 |
| འཛམ་གླིང་བརྡ་བརྒྱུདཔ་ཚུ་གིས་ ར་ཤི་ཡའི་རྒྱལ་ས་མོསི་ཀོ་ལུ་ སྤྱི་ལོ་༢༠༡༢ ཀྱི་ འཛམ་གླིང་བརྡ་བརྒྱུད་ཞལ་འཛོམས་འཚོག་པའི་བསྒང། |
ཁ་ཙ་ འཛམ་གླིང་སོར་བསྒྱུར་འགྱོ་བའི་གནས་སྟངས་ནང་ བརྡ་བརྒྱུདཔ་ཚུ་གི་ ཀུན་སྤྱོད་རྣམ་གཞག་དང་ འགན་དབང་སྐོར་ལས་ གྲོས་བསྡུར་འབདཝ་ད་ བརྡ་བརྒྱུད་ཀྱི་ མཁས་མཆོག་ཚུ་གིས་ གསར་འགོད་པ་དང་ གཞུང་གཉིས་ཆ་ར་ལུ་ འགན་ཁུར་འདྲ་མཉམ་ཡོད་པའི་ གྲོས་འཆམ་བྱུང་ཡོདཔ་ད་ འཛམ་གླིང་བརྡ་བརྒྱུད་ཀྱི་ ཞལ་འཛོམས་ཐེངས་༢ པའི་ནང་ བཅའ་མར་གཏོགས་མི་ཚུ་གིས་འབད་བ་ཅིན་ བརྡ་བརྒྱུད་ཀྱི་ དལ་དབང་དང་ བསམ་བཤད་ཀྱི་ ཐོབ་དབང་ཚུ་ བྱིན་ནི་གི་ འགན་དབང་དེ་ གཞུང་ལུ ཕོགཔ་བཞིན་དུ་ བརྡ་བརྒྱུད་ཀྱི་ འགན་ཁུར་དེ་ གནས་ཚུལ་ཚུ་ འཇིགས་སྣང་དང་ ཕྱོགས་ལྷུང་མེད་པར་ བརྡ་དོན་སྤེལ་དགོཔ་དེ་ ཁག་ཆེ་ཟེར་ཨིན་པས།
སྤྱི་ཟླ་༧ པའི་ཚེས་༥ ལུ་ འཛམ་གླིང་བརྡ་བརྒྱུད་ཀྱི་ ཞལ་འཛོམས་འགོ་འབྱེད་ནང་གནང་མི་ ལེགས་སྨོན་གསུང་འཕྲིན་ནང་ ར་ཤི་ཡའི་སྲིད་འཛིན་ བེ་ལེ་ཌི་མར་ པུ་ཊིན་གྱིས་ ད་རེས་ནངས་པ་ འཛམ་གླིང་ལུ་བྱུང་མི་ དོ་འགྲན་ཚུ་ བརྡ་བརྒྱུད་ཀྱིས་ བསལ་ནི་གི་ འོས་འབབ་ཡོད་ཟེར་ གསལ་སྟོན་གནང་པའི་ཁར་ བརྡ་བརྒྱུད་ཀྱིས་ འཛམ་གླིང་གི་སྲིད་དོན་དང་ དཔལ་འབྱོར་ དེ་ལས་ འགྲོ་བ་མིའི་མི་ཚེའི་གནས་སྟངས་ལེགས་བསྒྱུར་ནང་ ཕན་ཁྱད་བཟོ་ཚུགསཔ་ཨིན་རུང་ དེ་བཟུམ་མའི་ འགན་ཁུར་འབག་ཚུགས་མི་དེ་ ཁྱད་རིག་ཅན་དང་ ཀུན་སྤྱོད་རྣམ་གཞག་ཚུ་ལུ་ གཙོ་རིམ་བཟུང་མི་དགོ་ཟེར་ བཀོད་གནང་ནུག།
འགོ་འབྱེད་རྟེན་འབྲེལ་ནང་ བྱོན་གནང་མི་ ར་ཤི་ཡའི་སྲིད་བློན་ ཌི་མི་ཊའི་ མེ་བི་དེབ་ཀྱིས་ འཛམ་གླིང་གི་ བརྡ་བརྒྱུདཔ་ཚུ་ལུ་ གནས་ཚུལ་ཚུ་ ཆགས་སྡང་ཕྱོགས་རིས་མེད་པར་ དྲང་བདེན་དང་ རང་དབང་ཐོག་ལས་ བརྡ་སྤེལ་འབད་དགོ་ཟེར་གསུངས་ཡི།
འཛམ་གླིང་སྤྱི་ཚོགས་ཀྱི་ ཡོངས་ཁྱབ་དྲུང་ཆེན་ བཱན་ཀི་མཱུན་གྱིས་ རྒྱང་མཐོང་ཐོག་ལས་ འཛམ་གླིང་བརྡ་བརྒྱུད་ཀྱི་ ཞལ་འཛོམས་ནང་ བཅའ་མར་གཏོགས་མི་ཚུ་ལུ་ བཤད་མིའི་ནང་ གཞུང་ཆ་མཉམ་གྱིས་ གནས་ཚུལ་མཁན་དང་ བརྡ་བརྒྱུདཔ་ཚུ་ལུ་ ཉེན་སྲུང་དང་ བརྡ་བརྒྱུད་ཀྱི་ དལ་དབང་ཚུ་ བྱིན་དགོ་ཟེར་ཨིནམ་ད་ ཁོ་གིས་འབད་བ་ཅིན་ དམངས་གཙོའི་རིང་ལུགས་སྤེལ་ནི་དང་ ཡུན་བརྟན་གོང་འཕེལ་གཏང་དགོ་པ་ཅིན་ བརྡ་བརྒྱུད་དེ་ གལ་གནད་ཅན་ཅིག་ཨིན་ཟེར་ཨིན་པས།
འཛམ་གླིང་སྤྱི་ཚོགས་ཀྱི་ ཡོངས་ཁྱབ་དྲུང་ཆེན་གྱིས་འབད་བ་ཅིན་ འདས་པའི་ལོ་ངོ་བཅུ་ཕྲག་༡ གི་རིང་ལུ་ སྒྲིག་གཡོག་ནང་ བརྡ་བརྒྱུདཔ་༥༠༠ ལྷགཔ་ཅིག་ བསད་ཡོདཔ་མ་ཚད་ འཛིན་བཟུང་དང་ ཚེ་སྲོག་ལུ་ གནོད་ཉེན་ཐོག་ལས་སྡོད་མི་ ལེ་ཤ་ཡོད་ཟེར་ཨིནམ་ད་ དུས་ཅིའི་ལོ་ནང་ར་ བརྡ་བརྒྱུདཔ་༦༥ ལྷགཔ་ཅིག་བསད་ཡོདཔ་ལས་ གཞུང་ཚུ་གིས་ ཉེན་སྲུང་གི་ ཐབས་ལམ་ངེས་པར་དུ་ བཏོན་དགོཔ་འདུག་ཟེར་ཨིན་པས།
འཛམ་གླིང་བརྡ་བརྒྱུད་ཞལ་འཛོམས་ཐེངས་དང་པ་དེ་ སྤྱི་ལོ་༢༠༠༩ ལུ་ རྒྱ་ནག་གི་རྒྱལ་ས་ བེ་ཇིང་ལུ་་འགོ་འདྲེན་འཐབ་ཡོདཔ་ད་ ཞལ་འཛོམས་ཀྱི་ དམིགས་ཡུལ་གཙོ་བོ་ར་ འཛམ་གླིང་གི་བརྡ་བརྒྱུད་ལས་སྡེ་གོང་འཕེལ་དང་ བརྡ་བརྒྱུད་དང་འབྲེལ་བའི་ མི་སྡེའི་འགན་ཁུར་ཁྱད་རིག་ཅན་བཟོ་ནི་གི་ ལྷན་ཐབས་ལུ་ཨིན་པའི་གནས་ཚུལ།
མོསི་ཀོ་ལས་ རིག་འཛིན་དབང་ཕྱུག།
No comments:
Post a Comment