གཟིགས་གནང་མི་ལུ་བཀའ་དྲིན་ཆེ།

༉ ང་བཅས་ཀྱིས་ ཉིན་བསྟར་བཞིན་དུ་

ཡོངས་འབྲེལ་འཆར་སྒོ་འདི་ནང་

གནས་ཚུལ་ཚུ་ དུས་མཐུན་བཟོ་སྟེ་ གསལ་བཀོད་འབདཝ་ཨིན།

We update at the earliest possible for you!

རྫོང་ཁའི་གནས་ཚུལ་གཟིགས་ དུས་མཐུན་ཞུགས་ཚུགས།

གཟིགས་སྐོར་སྐབས་ འཁོར་ལམ་དང་ གློག་མེ་དགོ་པའི་ ཞུ་བ་ཕུལ་ཡོདཔ།

ཟླ་༤ པའི་ཚེས་༣༠

བློན་ཆེན་འཇིགས་མེད་འོད་ཟེར་འཕྲིན་ལས་མཆོག་གིས་ ཧཱ་གསང་སྦིས་ཁ་དྲུང་ཁག་ གསེར་སྦྱིས་ཐང་གཡུས་ཚན་གྱི་ མི་སེར་ཚུ་ལུ་ ལྟོ་ཁ་གནང་པའི་བསྒང་།
༉ བློན་ཆེན་འཇིགས་མེད་འོད་ཟེར་འཕྲིན་ལས་མཆོག་གིས་ སྤྱི་ཟླ་༤ པའི་ཚེས་༢༣ ལས་འགོ་བཙུགས་ཏེ་ ཧཱ་རྫོང་ཁག་གི་ རྒེད་འོག་གཉིས་དང་ བསམ་རྩེ་རྫོང་ཁག་གི་ རྒེད་འོག་གཉིས་ནང་ གཟིགས་སྐོར་གནང་སྟེ་ ཁ་ཙ་ བསམ་རྩེ་ལུ་ ཕེབས་གནང་ཡི།

བྱང་སྟོར་ཤོར་མི་ སློབ་ཕྲུག་བུཚ་ ད་རིས་ སྤ་རོ་ལུ་ལྷོད་ནི།

ཟླ་༤ པའི་ཚེས་༣༠

ཁ་ཙ་ ནིའུ་ལྡི་ལི་ལུ་ལྷོད་མི་ བཀྲིས་ཕུན་ཚོགས།
༉ ན་ཧིང་ སྤྱི་ཟླ་༩ པའི་ནང་ ཁོ་རའི་གཡུས་ གཞལམ་སྒང་ དབང་འདུས་སྒང་པཱམ་ལས་ བྱང་སྟོར་ཤོར་མི་ སྐྱེས་ལོ་༡༥ ལང་མི་ བཀྲིས་ཕུན་ཚོགས་དེ་ ད་རིས་ སྤ་རོ་གནམ་ཐང་ནང་ ལྷོད་ནི་ཨིན་པས།
བུཚ་དེ་གི་དོན་ལུ་ གནམ་གྲུའི་ཤོག་འཛིན་དང་ སྡོད་ས་ དེ་ལས་ བཞེས་སྒོའི་ ཟད་འགྲོ་ཚུ་ ལྡི་ལི་ལུ་ འབྲུག་གི་གཞུང་ཚབ་ལས་ཁང་གིས་ བཏང་ཡོདཔ་ད་ གཞུང་ཚབ་ལས་ཁང་གིས་ ཕྱི་འབྲེལ་ལྷན་ཁག་གི འགོ་དཔོན་ཚུ་ལུ་ བུཚ་དེ་ གཞལམ་སྒང་ཚུན་ བསྐྱལ་བྱིན་དགོཔ་སྦེ་ སླབ་ཡོདཔ་ཨིན་པས།


ཉེན་བཅོལ་ལས་འཛིན་གྱི་ ལྟ་བཀོདཔ་ལུ་ བཙོན་ཁྲིམས་ལོ་༥ བཀལ་ཡོདཔ།

ཟླ་༤ པའི་ཚེས་༣༠

༉ ཐིམ་ཕུ་རྫོང་ཁག་ཁྲིམས་འདུན་གྱིས་ འབྲུག་རྒྱལ་གཞུག་ཉེན་བཅོལ་ལས་འཛིན་གྱི་ མ་དངུལ་སྒེར་སྤྱོད་འབད་མི་ ལས་འཛིན་གྱི་ སྤྱིར་བཏང་ཉེན་བཅོལ་ལས་ཁུངས་ཀྱི་ ལྟ་བཀོདཔ་དེ་ལུ་ བཙོན་ཁྲིམས་ལོ་ངོ་༥ བཀལ་ནུག།

ཉེས་འཛུགས་འབད་ནིའི་དོན་ལུ་ མི་སེར་ཚུ་ལས་ མཉམ་འབྲེལ་མེདཔ།

ཟླ་༤ པའི་ཚེས་༣༠

༉ བུམ་ཐང་ཨུ་ར་རྒེད་འོག་ ཤིང་གཉེར་གཡུས་ཚན་ནང་ མི་ངན་ཚུ་གིས་ ས་འཇལ་འཕྲུལ་ཆས་ཅིག་གུ་ ཨ་བ་གཏོར་བཞག་མི་ལུ་ རྫོང་ཁག་བདག་སྐྱོང་གི་ བཀོད་བྱ་དང་འཁྲིལ་ཏེ་ རྒེད་འོག་བདག་སྐྱོང་གིས་ ཞིབ་དཔྱད་འབད་ཡོདཔ་ཨིན་རུང་ ས་གནས་ཀྱི་ མི་སེར་ཚུ་གིས་ མཉམ་འབྲེལ་འབད་མ་བཏུབ་མི་ལུ་བརྟེན་ དོགས་པ་ཅན་ལུ་ དྲི་ཞིབ་འབད་མ་ཚུགས་པར་ ལུས་ཡོདཔ་ཨིན་པས།

མེ་རག་དང་ སག་སྟེང་ལུ་ཡང་ རུ་པིའི་བྱེམ་ཕོག་དོ་ཡོདཔ།

ཟླ་༤ པའི་ཚེས་༣༠

འབྱོགཔ་གི་མི་སྡེའི་ནང་ རྒྱ་གར་གྱི་རུ་པི་ ཧེ་མ་བཟུམ་སྦེ་ མི་ཐོབ་པས་ཟེར་ཨིན་བས།

ཧེ་མ་བཟུམ་སྦེ་ རུ་པི་འབག་ནི་མེད་མི་ མེ་རག་གི་འབྱོགཔ་ཚུ།
༉ བཀྲིས་སྒང་རྫོང་ཁག་གི་ བྱང་ཕྱོགས་ཁ་ཐུག་ལུ་ཡོད་མི་ མེ་རག་དང་ སག་སྟེང་གི་ མི་སེར་ཚུ་ འཚོ་བ་སྒོ་ནོར་ལུ་ བརྟེན་སྡོད་མི་ཨིནམ་ལས་ ཁོང་གི་ སྒོ་ནོར་གྱི་ ཐོན་སྐྱེད་ཚུ་ མང་ཤོས་ར་ རྒྱ་གར་གྱི་མངའ་སྡེ་ ཨ་རུ་ན་ཅཱལ་པར་དེཤ་གི་ས་གནས་ ཏ་ཝང་ལུ་ བཙོང་ཐོག་ལས་ དངུལ་རྐྱང་རུ་པིའི་ འབབ་ཁུངས་བཟོ་དོ་ཡོདཔ་ལས་ ད་ཚུན་གྱི་བར་ན་ འབྱོགཔ་ཚུ་ལུ་ རྒྱ་གར་གྱི་ཏི་རུ་ རུ་པིའི་དཀའ་ངལ་མ་བྱུངམ་ཨིན་པས།

མར་དང་དར་ཚིལ་ཚུ་བཙོང་སྟེ་ འོང་འབབ་ལེགས་ཤོམ་བཟོ་ཚུགས་དོ་ཡོདཔ།


ཟླ་༤་པའི་ཚེས་༣༠

 ཚོགས་པ་གིས་ བཙོང་ཁང་སྒོ་ཕྱེ་མི་ལུ་བརྟེན་ གཡུས་སྒོ་ཚུ་ནང་ སྒོ་ནོར་གསོ་སྐྱོང་འབད་མི་ཚུ་ལུ་ ཕན་ཁྱད་བྱུང་དོ་ཡོདཔ་ཨིན་པས།

སྔ་ཚང་སྒོ་ནོར་ཕུན་སུམ་སྤྱི་མཐུན་ཚོགས་པ་གིས་བཙོང་མི་ དར་ཚིལ་གསརཔ་ཚུ།
༉ སྐྱེས་ལོ་༢༣ ལང་མི་ བློ་བཟང་སྒྲོལ་མ་དེ་ སློབ་རིམ་༥ ལས་བརྒལ་ དཔེ་ཆ་མ་ལྷབ་རུང་ ད་རེས་ནངས་པ་ མོ་རའི་ མི་ཚེ་འཚོ་སྐྱོང་འཐབ་ནི་ལུ་ དཀའ་ངལ་ག་ནི་ཡང་མེད་པར་ སྡོད་ཚུགས་མི་ལུ་བརྟེན་ ངལ་རངས་བྱུང་སྟེ་ ཡོདཔ་ཨིན་པས།

རྫོང་ཁག་ལྟེ་བའི་ས་ཁོངས་ནང་ འགྲུལ་འཕྲིན་མོ་བཱ་ཡེལ་གྱི་ ཞབས་ཏོག་ལེགས་ཤོམ་མེདཔ།

ཟླ་༤ པའི་ཚེས་༣༠

༉ ལྷུན་རྩེ་རྫོང་ཁག་ལྟེ་བའི་ ས་གནས་དག་པ་ཅིག་ནང་ འགྲུལ་འཕྲིན་མོ་བཱ་ཡེལ་གྱི་ ཞབས་ཏོག་ལེགས་ཤོམ་མེདཔ་ལས་ ཞབས་ཏོག་སྤྱོད་མི་ཚུ་ དབུགས་འགམ་དོ་ཡོདཔ་ཨིན་པས།

སྒེར་སྡེའི་འགྲུལ་སྐྱེལ་བཱསི་ ཐེབས་བཙུགས་མི་ལུ་ ངོས་ལེན་ལེགས་ཤོམ་ཡོདཔ།

ཁྲོམ་སྡེའི་འགྲུལ་སྐྱེལ་བཱསི་ཚུ་ནང་ འགྲུལ་པ་ཚུ་མ་ཤོང་རུང་ གླ་འཁོར་ཚུ་སྟོངམ་སྦེ་ར་ ལུས་པའི་མཐོང་སྣང།
ཟླ་༤ པའི་ཚེས་༣༠

༉ འཕྲལ་ཁམས་ཅིག་ཁར་ ཐིམ་ཕུ་ཁྲོམ་སྡེའི་ནང་ འབྲུག་འགྲེམ་གྱི་ འགྲུལ་སྐྱེལ་བཱསི་ཚུ་དང་གཅིག་ཁར་ མོ་བཏབ་ཀྱི་དོན་ལུ་ བརྡ་དོན་དང་ བརྒྱུད་འབྲེལ་ལྷན་ཁག་གིས་ སྒེར་སྡེའི་ འགྲུལ་སྐྱེལ་བཱསི་༡༠ ཐེབས་བཙུགས་མི་གིས་ སྤྱིར་བཏང་མི་མང་ལུ་ ཞབས་ཏོག་ལེགས་ཤོམ་ཐོབ་ཡོད་རུང་ གླ་འཁོར་བཏང་སྟེ་ མི་ཚེ་འཚོ་སྐྱོང་འཐབ་མི་ཚུ་ལུ་ དཀའ་ངལ་གྱི་ གཞི་གནས་ཅིག་ལུ་ འགྱུར་དོ་ཡོདཔ་ཨིན་པས། 

ཨར་རྐུན་གཅིག་ཤུལ་གཉིས་ཤུལ་འབད་མི་ ༣ འཛིན་བཟུང་།

ཟླ་༤ པའི་ཚེས་༣༠

ཁྲིམས་སྲུང་འགག་པ་གིས་ ཨར་རྐུན་གྱི་ ཅ་ཆས་ཉོ་མི་༨ འཛིན་བཟུང་འབད་ནུག།

ཁྲིམས་སྲུང་འགག་པ་གིས་ འཕྱོག་བཟུང་འབད་མི་ ཨར་རྐུན་གྱི་ཅ་ཆས་ དངུལ་ལོར་དང་ གཟི་ བྱུ་རུ་ བ་སོའི་ཕོརཔ་ དེ་ལས་ མཆོད་ཆས་ཚུ།
༉ ཐིམ་ཕུའི་ཁྲིམས་སྲུང་འགག་པ་གིས་ འཕྲལ་ཁམས་ཅིག་ཁར་ ཁྱིམ་ནང་ཚུ་ལས་ ཨར་རྐུན་གཅིག་ཤུལ་གཉིས་ཤུལ་འབད་མིའི་ནང་ འབྲེལ་གནད་ཡོད་མི་ ཕོ་སྐྱེས་༣ འཛིན་བཟུང་འབད་ཡོདཔ་ཨིན་པས།


དམར་བསད་ཀྱི་ དོགས་པ་ཡོད་མི་ ཕོ་སྐྱེས་ཅིག་འཛིན་བཟུང་།

ཟླ་༤ པའི་ཚེས་༣༠

༉ སྤྱི་ལོ་༢༠༡༠ ཟླ་༩ པའི་ཚེས་༦ ལུ་ ཐིམ་ཕུ་ལྕང་ཟམ་ཏོག་ ཀུ་ལ་གངས་རི་ཟ་ཁང་ནང་ སྐྱེས་ལོ་༢༥ ལང་མི་ ཕོ་སྐྱེས་ཅིག་ དམར་བསད་འབད་བའི་ དོགས་པ་ཡོད་མི་ ཕོ་སྐྱེས་ཅིག་ ཁྲིམས་སྲུང་འགག་པ་གིས་ སྤྱི་ཟླ་༤ པའི་ཚེས་༢༡ ལུ་ བསམ་རྩེ་ལས་ འཛིན་བཟུང་འབད་ཡོདཔ་ཨིན་པས།

བརྡུང་རྫོབ་ལུ་བརྟེན་ ཉམས་རྒུད་བྱུང་མི་ ཨམ་སྲུ་དེ་ བེང་ཀོག་ལུ་ར་ལུས་ཡོདཔ།

རྒྱལ་ཁབ་ནང་ ལོག་ལྷོད་མི་ སྐྱེས་ལོ་༢༧ ལང་མི་ ཨམ་སྲུ་ཅིག་གིས་ མོ་ལཱ་འབད་བར་བཏང་མི་ མཁན་པོ་དང་ རྩོད་གཞི་ཕྱེ་ནི།


ཟླ་༤ པའི་ཚེས་༢༨


༉ ཐའི་ལེནཌ་གི་རྒྱལ་ས་ བེང་ཀོག་ལུ་ ཏའི་ཝཱན་གྱི་ བཟའ་ཚང་ཅིག་གིས་ ཁོང་གི་ཁྱིམ་ནང་ གཡོག་ལཱ་འབད་མི་ འབྲུག་པའི་ཨམ་སྲུ་ཅིག་ལུ་ བརྡུང་རྫོབ་འབད་བའི་ རྩོད་དོན་སྐོར་ འབྲུག་གི་གཞུང་ཚབ་ལས་ཁང་གི་ འགོ་དཔོན་ཚུ་གིས་ བཟའ་ཚང་དང་གཅིག་ཁར་ བློ་སླབ་ཐོག་ལས་ བདེ་སྒྲིག་བཟོ་བའི་བསྒང་ཡོད་མི་དེ་ ཁ་ཙ་ མཇུག་བསྡུ་ཚུགས་པའི་ རེ་བ་བསྐྱེད་ཡོད་རུང་ མཇུག་བསྡུ་མ་ཚུགས་ཟེར་ ཉམས་རྒུདཔ་གིས་ བརྒྱུད་འཕྲིན་ཐོག་ལས་ ཀུན་གསལ་ལུ་ བཤདཔ་ཨིན་པས།

རྒྱལ་ས་ལུ་ རྩི་ས་ལངམ་སྦེ་ ཐོབ་མ་ཚུགས་པའི་ཚ་གྱང་།

ལྕང་ཟམ་ཏོག་ལུ་ རྩི་ས་ཉོ་མི་ཚུ་གིས་ སྤུངས་འཛོམས་ཐོག་ལས་ ག་ཐོབ་རྐྱབ་པའི་བསྒང་།


ཟླ་༤ པའི་ཚེས་༢༨


༉ ཁ་ཙ་དྲོ་པ་ ཐིམ་ཕུ་ལྕང་ཟམ་ཏོག་ལུ་ སྒང་ཁཔ་རྩི་ས་བཀྲམ་སྤེལ་ཁང་ནང་ རྩི་ས་ཉོ་མི་ཚུ་གིས་ ག་ཐོབ་རྐྱབ་ཡོདཔ་མ་ཚད་ རྩི་ས་ལངམ་སྦེ་ ཐོབ་མ་ཚུགས་མི་ལུ་བརྟེན་ ཁོང་རའི་བར་ན་ ཁ་འཐབ་ཚིག་འཐབ་འབད་བའི་ མཐོང་གསལ་བྱུང་ཡི།

སྣུམ་འཁོར་གྱི་རྐྱེན་ངན་ནང་ སློབ་གྲྭའི་སློབ་དཔོན་༢ ལུ་ཤི་རྐྱེན།

ཟླ་༤ པའི་ཚེས་༢༨

༉ སྤྱི་ཟླ་༤ པའི་ཚེས་༢༦ གི་ནུབ་མོ་ བསམ་རྩེ་རྡོ་རོ་ཁའི་ ཞིང་ལམ་བདའ་སྟེ་ འགྲུལ་སྐྱོད་འབད་མི་ སྣུམ་འཁོར་ཊུག་སཱན་ཅིག་ ལམ་འོག་ལས་མར་ མི་ཊར་༢༠༠ དེ་ཅིག་ རྦོབ་རིལ་སོ་མི་ནང་ སློབ་གྲྭའི་སློབ་དཔོན་ ཕོ་སྐྱེས་༢ ལུ་ ཤི་རྐྱེན་དང་ སློབ་དཔོན་གཞན་༣ ལུ་ རྨ་སྐྱོན་བྱུང་ཡོདཔ་ཨིན་པས།

གནས་ཚུལ་མདོར་བསྡུས།

དབྱངས་ཅན་ཕུག་ འབྲིང་རིམ་སློབ་གྲྭ་གོང་མའི་ སློབ་ཕྲུག་སྡེ་ཚན་དང་ དཔལ་འཁྱིལ་ འབྲིང་རིམ་སློབ་གྲྭ་གོང་མའི་སློབ་ཕྲུག་ སྡེ་ཚན་གྱི་བར་ན་ བཱསི་ཀེཊ་བཱོལ་ མཐའ་བཅད་འགྲན་བསྡུར་འོག་མ་ རྩེད་འགྲན་འབདཝ་ད་ དཔལ་འཁྱིལ་སྡེ་ཚན་གྱིས་ རྒྱལ་ཁ་ཐོབ་སྟེ་ མཐའ་བཅད་འགྲན་བསྡུར་ནང་ ལྷོདཡོད་པའི་གནས་ཚུལ།

ཕ་གླིང་ཁྲོམ་ཁར་ སྒྲིང་ཁྱིམ་བཟོ་སྐྲུན་གྱི་ལཱ་ འགོ་བཙུགས་ཡོདཔ།

སྒྲིང་ཁྱིམ་གྱི་ བཀོད་རིས་བཟོ་ནི་རྐྱངམ་གཅིག་གི་དོན་ལུ་ར་ དངུལ་ཀྲམ་༡༦༠,༠༠༠ ལྷགཔ་ཅིག་ ཟད་འགྲོ་བཏང་དགོཔ་ཐོན་ཡི་ཟེར་ཨིན་པས།

ཕ་གླིང་ལུ་ ཚོང་པ་༢ ཀྱིས་ བཟོ་སྐྲུན་གྱི་ལཱ་ འགོ་བཙུགས་པའི་བསྒང་།
༉ ལྷུན་རྩེ་ ཕ་གླིང་ཁྲོམ་ཁར་ ད་ལྟོ་ཚུན་ ཡུན་འགྱངས་སྦེ་ལུས་མི་ ཁྲོམ་གསར་པའི་ བཟོ་སྐྲུན་གྱི་ལཱ་ཚུ་ འཕྲལ་ཁམས་ཅིག་ལས་ འགོ་བཙུགས་ཡོདཔ་ཨིན་པས།
ཁྲོམ་གསར་པའི་ནང་ ཁྲོམ་ས་ཐོབ་མི་ ཚོང་པ་བསྡོམས་༢༨ ཡོད་ས་ལས་ ད་ལྟོ་ ཚོང་པ་༧ གྱིས་ ཁྱིམ་རྐྱབ་ཆོག་པའི་ གནང་བ་ཐོབ་ཡོདཔ་ལས་ ཟླཝ་འདི་ནང་ ཚོང་པ་༢ ཀྱིས་ བཟོ་སྐྲུན་གྱི་ལཱ་ཚུ་ འགོ་བཙུགས་ཡོདཔ་ཨིན་པས།


མི་སེར་སོ་ནམ་པ་ཚུ་ ན་ཧིང་གི་ཀེ་བ་ར་ བཙོང་མ་ཚུགས་པར་ཡོདཔ།

ན་ཧིང་གི་ལོ་ནང་ ཀེ་བའི་ཐོན་ཤུགས་ལེགས་ཤོམ་ཡོད་རུང་ ཚོང་འབྲེལ་ལེགས་ཤོམ་མེད་མི་ལུ་བརྟེན་ ཀེ་བ་ཚུ་ ནོར་གྱི་ཆག་སྦེ་ བྱིན་དགོཔ་ཐོན་པའི་ཁར་ ལ་ལུ་ཅིག་ རུལ་ཉམས་ཐལ་ཡོདཔ་ཨིན་པས།



ཟླ་༤ པའི་ཚེས་༢༨


བཙོང་མ་ཚུགས་པར་ལུས་མི་ ཤིང་གཉེར་གྱི་ སོ་ནམ་པ་ཅིག་གི་ཀེ་བ་ཚུ།
༉ རྒྱལ་ཁབ་ནང་ ཀེ་བ་འཛུགས་སྐྱོང་གི་ ལཱ་འབད་མི་ཚུ་གིས་ ཧ་ལམ་ ཀེ་བ་བཙུགས་ཚར་དོ་ཡོདཔ་ཨིན་རུང་ བུམ་ཐང་ཨུ་ར་རྒེད་འོག་ ཤིང་གཉེར་གཡུས་ཚན་བཟུམ་ཅིག་ནང་འབད་བ་ཅིན་ ན་ཧིང་ ཐོན་སྐྱེད་འབད་མི་ ཀེ་བའི་ཚུ་ཡང་ བཙོང་མ་ཚུགས་པར་ ལུས་ཡོདཔ་ཨིན་པས།

རྒྱ་འབྲུག་གི་ མཁའ་འགྲུལ་ཞབས་ཏོག་ཆིངས་ཡིག་ དུས་མཐུན་བཟོ་ཡོདཔ།

ཟླ་༤ པའི་ཚེས་༢༨

༉ ཁ་ཙ་ རྒྱ་འབྲུག་གི་ མཁའ་འགྲུལ་ཞབས་ཏོག་ཆིངས་ཡིག་ཚུ་ བརྡ་དོན་དང་ བརྒྱུད་འབྲེལ་ལྷན་ཁག་དང་ རྒྱ་གར་གྱི་མཉམ་ལས་ཚོགས་སྡེ་གཉིས་ཀྱི་བར་ན་ དུས་མཐུན་བཟོ་ཡོདཔ་ཨིན་མས།

སྤྱི་ལོ་༡༩༡༤ ལས་འགོ་བཙུགས་མི་ དེང་སང་ཤེས་རིག་ནང་ལེགས་བསྒྱུར།

སྤྱི་ཟླ་༥ པའི་ཚེས་༢ ལས་འགོ་བཙུགས་ ལོ་ངོ་༡ གི་རིང་ ཤེས་རིག་བརྒྱ་འཁོར་བརྩི་སྲུང་འབད་ནི་ཨིན་པས།

ཟླ་༤ པའི་ཚེས་༢༨


སྤྱི་ལོ་༡༩༣༠ སོ་གྲངས་ལུ་ ཧཱ་གི་སློབ་ཕྲུག་ཚུ་གིས་ བང་རྒྱུག་ནང་ བཅའ་མར་གཏོགས་པའི་བསྒང་།
༉ འབྲུག་རྒྱལ་ཁབ་ནང་ སྤྱི་ལོ་༡༩༡༤ ཚུན་ཚོད་ དགེ་འདུན་སློབ་གྲྭ་ཚུ་ནང་ ནང་པའི་ཤེས་ཡོན་ལྷབ་ནི་ཡོདཔ་མ་གཏོགས་ དེང་སང་གི་ ཤེས་ཡོན་ལམ་ལུགས་མེད་པའི་ཁར་ དབུ་ཁྲིདཔ་ཚུ་གིས་གཙོས་པའི་ ཕྱི་སྐད་ཨིང་ལིཤ་མཁྱེན་མི་ཡང་ རེ་གཉིས་ལས་བརྒལ་མེདཔ་ཨིན་པས།

ཁག་འབགཔ་ཅིག་ལུ་ གྱི་རྐྱབ་ཏེ་རྨ་སྐྱོན།

ཟླ་༤ པའི་ཚེས་༢༨ 

༉ སྤྱི་ཟླ་༤ པའི་ཚེས་༢༦ གི་ཉིན་མར་ ཕུན་ཚོགས་གླིང་ལས་ ཀི་ལོ་མི་ཊར་༡༨ ཀྱི་ས་གནས་ དཔག་བསམ་ཁ་ བོ་ཝོ་ནི་ཇོ་ར་ཟེར་སར་ ཕྱི་མི་༣ གྱིས་ སྐྱེས་ལོ་༤༤ ལང་མི་ ཁག་འབག་ཅིག་ལུ་ གྱི་ཅུང་ཁུ་ཀུ་རི་གིས་ བླུགས་བྱིན་ཡོདཔ་ལས་ མགུ་ཏོ་ཁར་ རྨ་སྐྱོན་བཏོན་ཡོདཔ་ཨིན་པས།

རྩི་སའི་དོས་ཚུ་ ཕུན་ཚོགས་གླིང་དོས་ཁང་ནང་ ལྷོད་ནི་མེད་པའི་ཁ་ཉེས།

ཟླ་༤ པའི་ཚེས་༢༧

ཚོང་འབྲེལ་ངོ་ཚབ་ལ་ལུ་ཅིག་གིས་ ཁ་ཉེས་བཀལ་བའི་ཤུལ་ལས་ 
རྩི་ས་དང་སྦྲགས་ ཏཱུར་ས་གཙང་ཆུའི་ སྦོ་ལོགས་ཁར་བཞག་མི་ སྣུམ་འཁོར་ཊཱག་ཚུ།
༉ ད་རེས་ནངས་པ་ བཟོ་སྐྲུན་གྱི་ ལས་མི་ཚུ་ལུ་ ཧེ་མ་བཟུམ་སྦེ་ རྒྱ་གར་གྱི་ཏི་རུ་ རུ་པིའི་ནང་ གླ་ཆ་སྤྲོད་མ་ཚུགས་པའི་ དཀའ་ངལ་བྱུང་ཡོད་མི་གིས་མ་དོ་བར་ ཕུན་ཚོགས་གླིང་ལུ་ཡོད་མི་ དཔལ་ལྡན་རྩི་ས་དབང་འཛིན་གྱི་ རྩི་སའི་དོས་ཁང་ནང་ལས་ རྩི་ས་ལངམ་སྦེ་ ཐོབ་མ་ཚུགས་ནི་དེ་གིས་ བཟོ་སྐྲུན་གྱི་ ལཱ་ཚུ་ལུ་ ཐོ་ཕོགཔ་མས་ཟེར་ ཉོགས་བཤད་བཀོད་དོ་ཡོདཔ་ཨིན་པས།

པདྨ་དགའ་ཚལ་སྨན་ཁང་ནང་ སྨན་ལངམ་སྦེ་ཡོད་པའི་ རྒྱུ་རྐྱེན་ག་ཅི་ཨིན་ན?

པདྨ་དགའ་ཚལ་སྨན་ཁང་གི་ སྨན་མཛོད་ཁང་།
ཟླ་༤ པའི་ཚེས་༢༧

༉ མོང་སྒར་ལུང་ཕྱོགས་གཙོ་བསྟེན་སྨན་ཁང་བརྩིས་ཏེ་ རྒྱལ་ཁབ་ཀྱི་ རྫོང་ཁག་སྨན་ཁང་ཚུ་ནང་ སྨད་རིགས་ལངམ་མེད་པའི་ དཀའ་ངལ་སྦོམ་བྱུང་སྟེ་ཡོད་རུང་ པདྨ་དགའ་ཚལ་རྫོང་ཁག་སྨན་ཁང་ནང་ སྨན་ཆ་མཉམ་ཡོདཔ་ཨིན་པས།

གནས་ཚུལ་མདོར་བསྡུས།

རྒྱ་གར་གྱི་ཏི་རུ་ རུ་པི་མ་ལང་པའི་དཀའ་ངལ་ལུ་བརྟེན་ ད་རེས་ནངས་པ་ ཐིམ་ཕུ་ མུ་ཏིག་ཐང་ལུ་ མེ་རླུང་གེསི་རྒྱ་ཛི་གི་ བཀྲམ་སྤེལ་ལུ་ཡང་ ཐོ་ཕོག་དོ་ཡོདཔ་ལས་ རྒྱ་ཛི་སོར་མི་ཚུ་ ཡུན་རིངམོ་འབད་ར་ གྱལ་རིམ་ནང་ བསྒུག་སྡོད་དགོཔ་ཨིན་པའི་ གནས་ཚུལ་མདོར་བསྡུས།

རྫོང་ཉམས་གསོའི་ལཱ་ བརྒྱ་ཆ་༣༠ དེ་ཅིག་ མཇུག་བསྡུ་ཡོདཔ།



ཟླ་༤ པའི་ཚེས་༢༧


ཉམས་གསོ་ཞུ་བའི་བསྒང་ཡོད་མི་ དབང་འདུས་ཕོ་བྲང་རྫོང་།
༉ དབང་འདུས་ཟམ་ལས་ རྩི་རང་ཁ་ཐུག་འགྱོཝ་ད་ སྤུ་ན་གཙང་ཆུའི་ གཡོན་ཁ་ཐུག་ དབང་འདུས་རྫོང་ལུ་ལྟཝ་ད་ སྒོ་སྒྲིག་ཚུ་ ཆ་མཉམ་ར་ གསརཔ་བཙུགས་ཡོདཔ་སྦེ་ མཐོང་གསལ་བྱུང་མི་དེ་ཡང་ ད་རེས་ནངས་པ་ རྫོང་ཉམས་གསོའི་ལཱ་ཚུ་ འབད་བའི་བསྒང་ཡོད་མི་ལུ་བརྟེན་ཏེ་ཨིན་པས།

རྐྱེན་ངན་འཛིན་སྐྱོང་གི་ སྦྱོང་བརྡར་མཇུག་བསྡུ་ཡོདཔ།

ཟླ་༤ པའི་ཚེས་༢༧

མོང་སྒར་ལུ་ རྐྱེན་ངན་འཛིན་སྐྱོང་གི་ སྦྱོང་བརྡར་འབད་བའི་བསྒང་།
༉ རང་བཞིན་གྱི་ རྐྱེན་ངན་ཚུ་བྱུང་བའི་སྐབས་ གདོང་ལེན་འབད་ནིའི་དོན་ལུ་ བསླབ་བཀོད་དང་ འཛིན་སྐྱོང་ལྕོགས་གྲུབ་ཡར་དྲག་ གཏང་ཐབས་ལུ་དམིགས་ཏེ་ མོང་སྒར་ལུ་སྦེ་ ཉིན་གྲངས་༣ གྱི་རིང་ སྦྱོང་བརྡར་ལས་རིམ་ཅིག་ འགོ་འདྲེན་འཐབ་མི་དེ་ ཁ་ཙ་ མཇུག་བསྡུ་ཡི།

དངུལ་ཀྲམ་༡༥༠,༠༠༠ དེ་ཅིག་གི་ སྟོང་ལོར་རྫུས་མ་ འབག་འོང་ཡོད་པའི་ རྫུན་ཁ་བཟེད་ཡོདཔ།

ད་རུང་ སྟོང་ལོར་རྫུས་མ་༦༡,༠༠༠ མ་ཐོབ་པར་ཡོདཔ་ཨིན་པས།

ཁྲིམས་སྲུང་འགག་པ་གིས་ འཕྱོག་བཟུང་འབད་མི་ སྟོང་ལོར་རྫུས་མ་ཚུ།
༉ ཧེ་མའི་ཟླཝ་ནང་ དངུལ་ལོར་རྫུས་མ་འབག་འོང་སྟེ་ བགོ་བཀྲམ་འབད་མི་ལུ་བརྟེན་ རྩི་རང་གི་ ཁྲིམས་སྲུང་འགག་པ་གིས་ འཛིན་བཟུང་འབད་མི་ དར་དཀར་ནང་ལས་ སྐྱེས་ལོ་༢༢ ལང་མི་ ཕོ་སྐྱེས་དེ་གིས་ དངུལ་ཀྲམ་༡༥༠,༠༠༠ དེ་ཅིག་གི་ སྟོང་ལོར་རྫུས་མ་འབག་འོང་ཡོདཔ་སྦེ་ རྫོང་ཁག་ཁྲིམས་ཀྱི་འདུན་སར་ ཁ་བཟེད་ཡོདཔ་ཨིན་པས།

སྐལ་བགོ་ལུ་ འོས་འབབ་མེད་པའི་འཁྲུན་ཆོད།

ཟླ་༤ པའི་ཚེས་༢༧

༉ མཐོ་གཏུགས་པ་ཅིག་གིས་ ཁོ་རའི་ ཕ་ཁྱིམ་ནང་ལས་ ཐོན་སོང་སྟེ་ ལོ་ངོ་༣༧ ལངམ་ད་ ཕམ་གྱི་རྒྱུ་ཆས་དང་ ས་ཆ་ཚུ་ སྐལ་བགོ་དགོ་པའི་སྐོར་ལས་ ཐོབ་བརྗོད་བཀོད་མི་དེ་ལུ་ ཁྲིམས་ཀྱིས་ ངོས་ལེན་འབད་རུང་བའི་ སྒྲུབ་བྱེད་ཡང་དག་ཅིག་ མེད་པ་ལུ་བརྟེན་ གྲངས་མང་ཁྲིམས་འདུན་གྱིས་ ཐོག་མའི་ཁྲིམས་འདུན་གྱི་ འཁྲུན་ཆོད་གུ་ བསྒྱུར་བཅོས་མེད་པར་ རང་འཇགས་བཞག་ནུག།

ཇའི་སྒང་གི་ཚོང་ཁང་ཚུ་ནང་ རུ་པི་རྐྱངམ་གཅིག་ ངོས་ལེན་འབད་ནི་ཟེར་བའི་བརྡ་བྱང་།

ཟླ་༤ པའི་ཚེས་༢༧

༉ ད་ལས་ཕར་ ཕུན་ཚོགས་གླིང་གི་ ས་མཚམས་ཁྲོམ་སྡེ་ ཇའི་སྒང་ལུ་ ཉོ་ཚོང་རྐྱབ་པར་འགྱོཝ་ད་ རྒྱ་གར་གྱི་ཏི་རི་ རུ་པི་མེད་པ་ཅིན་ ཅ་ཆས་ག་ནི་ཡང་ ཐོབ་མི་ཚུགས་ནི་་ཨིན་པས།

ཁྲོམ་སྡེ་ཚུ་ རྡོ་ཁབ་ལེན་བཟུམ་ཅིག་ཨིན་རུང་ རེ་འདོད་གྲུབ་མ་ཚུགས་པའི་ ས་ཁོངས་ཅིག་ཨིནམ།

ཟླ་༤ པའི་ཚེས་༢༧

༉ ཁ་ཙ་ ཐིམ་ཕུ་ལྕང་ཇི་ཇི་ ཨ་ལུའི་འཁྲབ་སྟེགས་ས་ཁོངས་ནང་སྦེ་ འཛམ་གླིང་ཨ་ལུའི་གནས་སྟངས་སྙན་ཞུ་ གསར་བཏོན་འབད་བའི་སྐབས་ ས་གནས་ནང་སྡོད་མི་བརྒྱ་ལས་བཅད་མི་ཚུ་གིས་ འབྲེལ་གཏོགས་འབད་ཡི།
མི་དབང་རྒྱལ་ཡུམ་ ཨ་ཞེ་ཚེ་རིང་དཔལམོ་དབང་ཕྱུག་མཆོག་དང་ 
ཡུ་ནི་སེཕ་གི་སྐུ་ཚབ་ ཌོག་ཊར་གེབ་ཀེ་ ཧིངསི་གིས་ 
འཛམ་གླིང་ཨ་ལུའི་གནས་སྟངས་སྙན་ཞུ་ གསར་བཏོན་འབད་བའི་བསྒང་།

དངུལ་རྩིས་ལྷན་ཁག་སྡེ་ཚན་གྱིས་ མཐའ་བཅད་འགྲན་བསྡུར་ནང་ལྷོད་ཡོདཔ།

ཟླ་༤ པའི་ཚེས་༢༧

༉ དངུལ་རྩིས་ལྷན་ཁག་དང་ འབྲུག་གློག་མེ་ལས་འཛིན་ སྡེ་ཚན་༢ ཀྱི་བར་ན་ འགོ་འདྲེན་འཐབ་མི་ མཐའ་བཅད་འགྲན་བསྡུར་འོག་མ་དེ་ ཉིན་དང་པའི་ནང་ རྒྱལ་ཕམ་ཕྱེ་མ་ཚུགས་པར་ ཁ་ཙ་འཕྲོ་མཐུད་རྩེད་འགྲན་འབད་ཡི།

མུམ་བཱ་ཡེ་ལུ་ལྷོད་མི་ སློབ་ཕྲུག་བུཚ་དེ་ ནངས་པར་གཏང་ནི།

ཟླ་༤ པའི་ཚེས་༢༦

མུམ་བཱ་ཡེ་ ཁྲིམས་སྲུང་འགག་པའི་ འགོ་དཔོན་༢ བཀྲིས་ཕུན་ཚོགས་བསྐྱལ་བར་ ནིའུ་ལྡི་ལི་ཚུན་འོང་ནི།


༉ གཞལམ་སྒང་སློབ་གྲྭ་ལས་ བྱང་སྟོར་ཤོར་བའི་ཤུལ་ལུ་ རྒྱ་གར་གྱི་ དངུལ་འབྲེལ་ལྟེ་བའི་ཁྲོམ་ཚོགས་ མུམ་བཱ་ཡེ་ལུ་ ལྷོད་ཡོད་མི་ བུཚ་བཀྲིས་ཕུན་ཚོགས་དེ་ ཁོ་རའི་ཁྱིམ་ནང་ ནམ་ལོག་ལྷོད་འོང་ག་ཟེར་ ཉིན་ནུབ་མེད་པར་ མནོ་བསམ་བཏང་སྟེ་ར་ སྡོད་དོ་ཡོདཔ་ཨིན་པས།

ཆུ་སྨད་ལུ་ བཟོ་རིག་གི་ ལག་རྩལ་འགྲན་བསྡུར།

ཟླ་༤ པའི་ཚེས་༢༦

བུམ་ཐང་ཆུ་སྨད་ལུ་ བཟོ་རིག་གི་ ལག་རྩལ་འགྲན་བསྡུར་འབད་མི་ སྦྱོང་བརྡར་བ་ཚུ།
༉ ཉིན་གྲངས་༣ གྱི་རིང་ འགོ་འདྲེན་འཐབ་ནི་ཨིན་མི་ རྒྱལ་ཁབ་ནང་འཁོད་ཀྱི་ ལག་ཤེས་སྤེལ་ཁང་༥ ལས་ སྦྱོང་བརྡར་བ་༤༠ གིས་ བུམ་ཐང་ཆུ་སྨད་ལུ་ ཞི་བའི་བཟོ་རིག་སྤེལ་ཁང་ནང་སྦེ་ བཟོ་རིག་གི་ ལག་རྩལ་འགྲན་བསྡུར་ནང་ བཅའ་མར་གཏོགས་དོ་ཡོདཔ་ཨིན་པས།

རྫོང་ཁག་༡༨ ནང་ སྤྱང་ཁྱི་༣༤,༩༢༥ ཤ་བཅད་ཡོདཔ།

ཟླ་༤ པའི་ཚེས་༢༦

ཤ་བཅད་མི་ སྡེ་ཚན་གྱིས་ སྤྱང་ཁྱི་༡ གཤག་བཅོས་མ་འབད་བའི་ཧེ་མར་ 
དྲན་མེད་བརྒྱལ་ནིའི་ ཁབ་བཙུགས་པའི་བསྒང་།
༉ ཁྲོམ་སྡེ་ནང་ རྒྱུན་འགྲུལ་མང་དྲགས་པའི་ཁར་ མི་མང་ལས་ སེམས་ཅན་ལུ་ བྱམས་སྙིང་བསྐྱེད་མི་ལུ་བརྟེན་ སྤྱང་ཁྱི་ཚུ་བཟུང་སྟེ་ ཤ་བཅད་ནི་ལུ་ བར་ཆད་རྐྱབ་དོ་ཡོདཔ་ལས་ ཁོང་གི་ དམིགས་གཏད་དང་འཁྲིལ་ འགྱོ་མི་བཏུབ་པས་ཟེར་ འཛམ་གླིང་ཡོངས་ལུ་ཁྱབ་སྟེ་ཡོད་མི་ སེམས་ཅན་ཉེན་སྐྱོབ་ལས་སྡེ་ཅིག་ཨིན་མི་ རྒྱལ་སྤྱི་འགྲོ་བ་མིའི་ལས་ཚོགས་ཀྱི་ སྡེ་ཚན་གྱིས་ བཤདཔ་ཨིན་པས།

གོང་ཚད་ཡར་སེང་སོང་རུང་ རིན་བསྡུར་ཆིངས་ཡིག་ལུ་ ཐབས་མེད་གནས་དགོཔ་བྱུང་ཡོདཔ།

ཟླ་༤ པའི་ཚེས་༢༦

རོང་ཐུང་འབྲིང་རིམ་སློབ་གྲྭ་གོང་མའི་ སློབ་ཕྲུག་བུམོ་ཚུ་ ཕྱི་རུའི་ ལྟོ་ཟ་བའི་བསྒང་།
༉ ཤར་ཕྱོགས་ཁ་ཐུག་ལུ་ ནང་སྡོད་ཀྱི་མཐུན་རྐྱེན་ཚུ་ཡོད་མི་ སློབ་གྲྭའི་དབང་འཛིན་པ་ཚུ་དང་ ཁག་འབག་ཐོག་ལས་ བཟའ་ཆས་བཀྲམ་སྤེལ་འབད་མི་ཚུ་གི་བར་ན་ གོང་ཚད་ཀྱི་སྐོར་ལས་ སྟབས་མ་བདེཝ་ཐོན་དོ་ཡོདཔ་ད་ དེ་ཡང་ བཀྲམ་སྤེལ་བ་ཚུ་ལུ་ གོང་ཚད་ཡར་སེང་འབད་མ་བཅུག་ནི་དེ་གིས་ཨིན་པས།

མོང་སྒར་ལུ་ འཇིག་རྟེན་དབང་ཕྱུག་འབུམ་ བསག་དོ་ཡོདཔ།

ཟླ་༤ པའི་ཚེས་༢༦

མི་ཚུ་གིས་ མདོས་ནང་བཀོག་མི་ གོ་ལ་ཚུ་ ག་ཐོབ་རྐྱབ་སྟེ་ འཐུ་འབག་འགྱོ་བའི་བསྒང་།
 དགེ་སློང་ཚུ་གིས་ མདོས་འཕང་པའི་བསྒང་།
༉ མོང་སྒར་ལུ་ བཛྲ་གུ་རུ་དུང་སྒྲུབ་ མཇུག་བསྡུ་ཞིནམ་ལས་ རྒྱལ་བློན་འབངས་གསུམ་གྱི་ སྐུ་རིམ་ལུ་དམིགས་ཏེ་ ཉིན་གྲངས་༣ གྱི་རིང་ རྒྱ་ནག་སྤྱི་མདོས་ཀྱི་སྐུ་རིམ་ གནང་མི་དེ་ སྤྱི་ཟླ་༤ པའི་ཚེས་༢༤ ལུ་ གྲོལ་གནང་ཡི།

ནགས་ཚལ་ཁྱབ་ཚད་ ཡར་སེང་སོང་རུང་ ཁྱེགས་རིའི་ཁྱབ་ཚད་མར་བབས།

ཟླ་༤ པའི་༢༦

༉ འབྲུག་ལུ་ ཇིའོ་ ཨིས་པེ་ཤཱལ་ རང་བཞིན་ཐོན་སྐྱེད་གནས་སྡུད་དང་འཁྲིལཝ་ད་ སྤྱི་ལོ་༡༩༩༠ ལས་༢༠༡༠ ཚུན་ རྒྱལ་ཁབ་ཀྱི་ ནགས་ཚལ་གྱི་ ཁྱབ་ཚད་དེ་ ཀི་ལོ་མི་ཊར་གྲུ་བཞི་༢༥,༥༥༨ ལས་༢༦,༧༣༢ ལུ་ ཡར་སེང་སོང་ཡོདཔ་སྦེ་ བཀོད་ནུག།

འབྲུག་གློག་མེ་དང་ དངུལ་རྩིས་ལྷན་ཁག་གིས་ ད་རིས་ འཕྲོ་མཐུད་ རྩེད་འགྲན་འབད་ནི།

ཟླ་༤ པའི་ཚེས་༢༦

ཆ་རོགས་ཚུ་ལུ་ འབའ་གཏད་པའི་སྐབས་ མིག་ཏོ་ལེགས་ཤོམ་སྦེ་ མ་ལྟ་བ་ཅིན་ 
རང་ལུ་ བཀག་རེག་རྐྱབ་ནི་གི་ ཉེན་ཁ་ཡོདཔ་ལས་ 
འབའ་གཏད་མི་ཅིག་ ས་གོ་ནང་ལས་ བྲོས་ཟུར་འབད་བའི་བསྒང་།
༉ ཁ་ཙ་ འབྲུག་གློག་མེ་ལས་འཛིན་དང་ དངུལ་རྩིས་ལྷན་ཁག་སྡེ་ཚན་༢ ཀྱི་བར་ན་ རང་ལུགས་སྤག་ཤིང་གི་ མདའ་གཞུའི་ཐོག་ལུ་ མཐའ་བཅད་འགྲན་བསྡུར་འོག་མ་རྩེད་འགྲན་འབདཝ་ད་ སྐུགས་དང་པམ་དེ་ དངུལ་རྩིས་ལྷན་ཁག་གིས་ཆོད་རུང་ སྐུགས་གཉིས་པ་དེ་ ཆོད་མ་ཚུགསཔ་ལས་ ད་རིས་ འཕྲོ་མཐུད་རྩེད་འགྲན་འབད་ནི་ཨིན་པས།

ཚོང་ཆས་ཐོ་ཡིག་ཚུ་ནང་ གནས་གོང་ཡར་སེང་བཟོ་དོ་ཡོདཔ།

ཟླ་༤ པའི་ཚེས་༢༦

༉ རུ་པི་གི་དཀའ་ངལ་དེ་ མར་ཕབ་འགྱོ་ནིའི་བརྡ་མཚོན་མེད་མི་ལུ་བརྟེན་ ནང་འདྲེན་དང་ ཕྱིར་ཚོང་འཐབ་མི་ཚུ་གིས་ ཕུན་ཚོགས་གླིང་ སྒོ་ར་སྒོའི་ས་གོ་ནང་ལས་ དོས་ཆས་ཀྱི་ ཚོང་བཟོ་ཐོ་ཡིག་ཚུ་ ཡར་སེང་དང་ གནས་གོང་ཡར་སེང་ཐོག་ལུ་ ཐབས་བྱུས་བཏོན་མི་དེ་ ཐབས་ལམ་གསརཔ་ཅིག་ཨིན་མས་ཟེར་ ཅ་དམ་འགོ་དཔོན་གྱིས་ བཤདཔ་ཨིན་པས།

བློ་གསལ་གླིང་སྡེ་ཚན་གྱིས་ ཨང་དང་པའི་གསོལ་རས་ དངུལ་ཀྲམ་ ༢༠,༠༠༠ ཐོབ་ཡོདཔ།

ཟླ་༤ པའི་ཚེས་༢༦

བློ་གསལ་གླིང་སྡེ་ཚན་གྱིས་ ཨང་དང་པའི་གསོལ་རས་ ལེན་པའི་བསྒང་།
༉ ལྕང་ཇི་ཇི་ ཕུཊ་བཱོལ་རྩེད་ཐང་ནང་སྦེ་ སྐྱེས་ལོ་༡༦ མན་ཆད་འབད་མིའི་ ཕུཊ་བཱོལ་རྩེད་འགྲན་ཐེངས་༡༠ པའི་ མཐའ་བཅད་འགྲན་བསྡུར་ནང་  བློ་གསལ་གླིང་དང་ འབྲུག་ཨིསི་ཊར་སྡེ་ཚན་༢ ཀྱི་བར་ན་ ཁ་ཙ་ མཐའ་བཅད་འགྲན་བསྡུར་གྱི་རྩེད་འགྲན་འབདཝ་ད་ བློ་གསལ་གླིང་སྡེ་ཚན་གྱིས་ རྒྱལ་ཁ་ཐོབ་ཡོདཔ་ཨིན་པས།

གཞལམ་སྒང་ལས་ བྱང་སྟོར་ཤོར་མི་སློབ་ཕྲུག་ མུམ་བཱ་ཡེ་ལུ་ཡོདཔ།

ཟླ་༤ པའི་ཚེས་༢༥

 བུཚ་དེ་ འཕྲལ་མགྱོགས་ར་ རྒྱལ་ཁབ་ནང་ ལེན་ཚུགས་པའི་རེ་བ།

༉ ན་ཧིང་ སྤྱི་ཟླ་༩ པའི་ནང་ གཞལམ་སྒང་སློབ་གྲྭ་ནང་ལས་ སྐྱེས་ལོ་༡༦ ལང་མི་ བུཚ་༡ གར་སོང་མེད་པར་ བྱང་མི་དེ་ རྒྱ་གར་གྱི་ཁྲོམ་སྡེ་ མུམ་བཱ་ཡེ་ལུ་ཡོད་པའི་སྐོར་ལས་ ནིའུ་ལྡི་ལི་ལུ་ཡོད་མི་ འབྲུག་གི་གཞུང་ཚབ་ལས་ཁང་གི་ འགོ་དཔོན་ཚུ་གིས་ སྙན་ཞུ་ཐོབ་ཡོདཔ་ད་ བུཚ་དེ་ མི་ནག་ཚོང་འཐབ་མི་ཚུ་གིས་ བཙན་ཁྲིད་འབད་བའི་ དོགས་པ་ཡོདཔ་ཨིན་པས།

དགེ་ལེགས་ཕུག་ནང་འཁོད་གནམ་ཐང་ ད་རུང་ བདུན་ཕྲག་༢ ཡུན་འགྱངས་ལུས་ནི།

ཟླ་༤ པའི་ཚེས་༢༥

Add caption
༉ འཆར་གཞི་དང་འཁྲིལ་བ་ཅིན་ དགེ་ལེགས་ཕུག་ནང་འཁོད་གནམ་གྲུ་ཐང་གི་ བཟོ་སྐྲུན་ལཱ་དེ་ སྤྱི་ཟླ་༤ པའི་ཚེས་༣༠ ལུ་ མཇུག་བསྡུ་སྟེ་ སྤྱི་ཟླ་༥ པའི་བདུན་ཕྲག་དང་པའི་ནང་ སྒོ་འབྱེད་འབད་ནི་གི་ དམིགས་ཡུལ་ཨིན་རུང་ གནམ་གཤིས་གནས་སྟངས་དང་ རུ་པིའི་དཀའ་ངལ་ཚུ་ལུ་བརྟེན་ ད་རུང་ བདུན་ཕྲག་༢ དེ་ཅིག་ ཡུན་འགྱངས་ལུས་ནི་མས་ཟེར་ ཞི་བའི་མཁའ་འགྲུལ་འགོ་དཔོན་ཚུ་གིས་ བཤདཔ་ཨིན་པས།

དབུལ་ཕོངས་ཀྱི་དཀའ་ངལ་ སེལ་ཐབས་ལུ་ ཇར་སི་བ་གསོ་སྐྱོང་།

ཟླ་༤ པའི་ཚེས་༢༥

ཤིང་གཉེར་རྡོ་རྗེ་སྒྲ་སྡེའི་ རྩྭ་འབྲོག་ནང་ འཁྱམས་སྡོད་མི་ ཇར་སི་བ་ཚུ།
༉ བུམ་ཐང་ཨུ་ར་རྒེད་འོག་ ཤིང་གཉེར་གཡུས་ཚན་དེ་ རྫོང་ཁག་ནང་ དབུལ་ཕོངས་ཀྱི་དཀའ་ངལ་བྱུང་མི་ སྦོམ་ཤོས་ཅིག་ཨིནམ་ལས་ གཞུང་གིས་ དཀའ་ངལ་སེལ་ཐབས་ལུ་ གཡུས་ཚན་ནང་ སྒོ་ནོར་གསོ་སྐྱོང་ལས་འགུལ་ གཞི་བཙུགས་འབད་མི་དེ་གིས་ མི་སྡེ་ནང་ ཕན་ཐོགས་སྦོམ་བྱུང་དོ་ཡོདཔ་ཨིན་པས།

གནས་ཚུལ་མདོར་བསྡུས།

ཐིམ་ཕུ་དང་ བར་སྦིས་སའི་ མགྱོགས་ལམ་བར་ན་ ལྕགས་ཁྲམ་ལྷོང་བཞག་མིའི་གུ་ལས་ འཛེགས་འགྱོཝ་ད་ སྣུམ་འཁོར་ཚུ་དང་ ཐུག་རྐྱེན་འབྱུང་ནི་གི་ ཉེན་ཁ་མེདཔ་ཨིན་ན?

ཨར་རྐུན་འབད་མི་ མང་སུ་འཐོན་དོ་ཡོདཔ།

ཟླ་༤ པའི་ཚེས་༢༥

༉ ཕུན་ཚོགས་གླིང་ལུ་ ཉེས་ལས་ཨར་རྐུན་དང་ བརྡུང་རྫོབ་འབད་མིའི་གྱངས་ཁ་དེ་ ཨང་གཉིས་པ་སྦེ་ཡོད་ཟེར་ ཁྲིམས་སྲུང་འགག་པའི་གནས་ཐོའི་ནང་ལས་ གསལ་སྟོན་འབདཝ་ཨིན་མས།

ཁྱིམ་གསརཔ་ཅིག་ མེ་གིས་ ཐལ་བར་ བརླགས་བཏང་ཡོདཔ།

ཟླ་༤ པའི་ཚེས་༢༥

༉ སྤྱི་ཟླ་༤ པའི་ཚེས་༢༣ གྱི་ནུབ་མོའི་ཆུ་ཚོད་༩.༣༠ དེ་ཅིག་ཁར་ དགེ་ལེགས་ཕུག་དྲུང་ཁག་ འཛོམས་གླིང་ཐང་གི་ སྦོ་ལོགས་ཁར་ ཐོག་ཚད་༡ འབད་མི་ སྡོད་ཁྱིམ་ཅིག་ མེ་གིས་ ཐལ་བར་བརླགས་བཏང་ཡོདཔ་ཨིན་པས།

མི་སྡེའི་ཁེ་ཕན་དོན་ལུ་ དངུལ་ཀྲམ་ས་ཡ་༥༡༦ ཁས་ལེན་འབད་ཡོདཔ།

ཟླ་༤ པའི་ཚེས་༢༥

གྲོགས་རམ་མ་དངུལ་ཐོག་ལས་ ས་གནས་ནང་འཁོད་ཀྱི་ སློབ་གྲྭ་དང་ སྨན་ཁང་ སྨན་ཁང་འབྲིང་མ་ ཁྲིམས་སྲུང་འགག་སྡེ་ མགྱོན་ཁྱིམ་ སྣུམ་འཁོར་ལམ་ཚུ་ བཟོ་སྐྲུན་འབད་ནི་ཨིནམ་མ་ཚད་ འཐུང་ཆུ་བཀྲམ་སྤེལ་འབད་ནི་ཨིན་པས།


ས་ཁོངས་ནང་ ལོག་བཏང་མི་ ཆུ་བྱ་དཀརཔོ།
༉ སྤུ་ན་གཙང་ཆུ་ལས་འགུལ་༡ དང་༢ ཀྱི་ འགོ་དཔོན་ཚུ་གིས་ སླབ་མིའི་ནང་ ས་གནས་ཀྱི་ མི་སྡེ་ཚུ་གི་དོན་ལུ་ སློབ་གྲྭ་དང་ སྨན་ཁང་ སྨན་ཁང་འབྲིང་མ་ ཁྲིམས་སྲུང་འགག་སྡེ་ མགྱོན་ཁྱིམ་ སྣུམ་འཁོར་ལམ་ དེ་ལས་ འཐུང་ཆུ་བཀྲམ་སྤེལ་ཚུ་ བཟོ་སྐྲུན་འབད་ནིའི་དོན་ལུ་ དངུལ་ཀྲམ་ས་ཡ་༥༡༦ ལྷགཔ་ཅིག་ བྱིན་ནི་གི་ཁས་ལེན་འབད་ཡི་ཟེར་ཨིན་པས།

འགྲུལ་པ་ཅིག་ སྣུམ་འཁོར་གྱིས་ གླེབས་བཏང་ཡོདཔ།

ཟླ་༤ པའི་ཚེས་༢༥

༉ སྣུམ་འཁོར་ཊཱག་ལས་ འགྲུལ་སྐྱེལ་བཱསི་ལུ་ བསྒྱུར་བཅོས་འབད་མི་དེ་ སྤྱི་ཟླ་༤ པའི་ཚེས་༢༣ གྱི་ ཕྱི་རུ་ཁམས་ཅིག་ཁར་ དགེ་ལེགས་ཕུག་ལས་ ཨུམ་གླིང་རྒེད་འོག་ནང་ ལོག་འགྱོ་བའི་བར་ན་ ས་གནས་དྭངས་གླིང་གཡུས་ཚན་གྱི་ རི་མགོ་ལུ་ལྷོདཔ་ད་ བཀག་འཕྲུལ་ལཱ་འབད་མ་བཏུབ་པར་ གྱེན་གུ་ལས་ རྒྱབ་བཤུད་རྐྱབ་སྟེ་ འོང་པའི་སྐབས་ སྣུམ་འཁོར་དེ་ནང་ འཛུལ་འོང་མི་ ལམ་འགྲུལཔ་ཅིག་ གྱིབ་འཁོར་གྱིས་ བསྣད་མི་ལུ་བརྟེན་ ཤི་སོཔ་ཨིན་པས།

ཡངས་བ་རི་དང་ པ་ཏོང་གཡུས་ཚན་ནང་ བྱ་ནད་ཐོན་པའི་དོགས་སྣང།

ཟླ་༤ པའི་ཚེས་༢༥

བྱ་ནད་ཐོན་པའི་ དོགས་པ་ཡོད་མི་ ཡངས་བ་རི་གཡུས་ཚན།
༉ འདས་པའི་ཟླཝ་ནང་ མོང་སྒར་རྫོང་ཁག་ དགོངས་འདུ་རྒེད་འོག་གི་གཡུས་ཚན་ ཡངས་བ་རི་དང་ པ་ཏོང་༢ ནང་ ཉིནམ་༡ ལུ་ར་ བྱ་༨༧ ཤི་ཡོད་མི་དེ་ བྱ་ནད་ཐོན་པའི་ དོགས་པ་རྐྱངམ་གཅིག་མ་གཏོགས་ གཏན་འཁེལ་སྦེ་ ངོས་འཛིན་མ་བྱུང་ཟེར་ སྒོ་ནོར་འགོ་དཔོན་ཚུ་གིས་ བཤདཔ་ཨིན་པས།

མགུ་སྐོར་རྐྱབ་མི་ ཕོ་སྐྱེས་ཅིག་འཛིན་བཟུང་།

ཟླ་༤ པའི་ཚེས་༢༥

༉ སྐྱེས་ལོ་༣༢ ལང་མི་ ཕོ་སྐྱེས་ཅིག་གིས་ འབྲུག་གནམ་གྲུ་ལས་འཛིན་ནང་ ལཱ་འབདཝ་ཨིན་ཟེར་ ཤོབ་རྐྱབ་སྟེ་ སྒེར་གྱི་ཚོང་ལཱ་འབད་མི་ ཨམ་སྲུ་ཅིག་ལས་ དངུལ་ཀྲམ་༢༣༠,༠༠༠ ལེན་པའི་ཤུལ་ལུ་ ཡུདཔ་ཐེངས་ཅིག་ནང་ར་ གར་སོང་མེད་པར་ བྱོག་ཡར་སོཔ་ཨིན་རུང་ ཟླཝ་༡ གི་རྒྱབ་ལས་ ཁྲིམས་སྲུང་འགག་པ་གིས་ ཆུ་འཛོམས་ཀྱི་ ཞིབ་དཔྱད་སྒོ་ར་ལས་ འཛིན་བཟུང་འབད་ཚུགས་ཡོདཔ་ཨིན་པས།

ཌོག་ཊར་སྟོབས་རྒྱས་སློབ་གྲྭ་གིས་ བློ་གསལ་གླིང་སློབ་གྲྭ་ ཕམ་བཏང་ཡོདཔ།

ཟླ༤ པའི་ཚེས་༢༥

སྡེ་ཚན་གཉིས་ཀྱི་བར་ན་ རྩེད་འགྲན་འབད་བའི་བསྒང་།
༉ ཐིམ་ཕུ་ཁྲོམ་སྡེ་གིས་ ན་གཞོན་དཔལ་རི་རྩེད་ཁང་ནང་སྦེ་ ཁྲོམ་སྡེ་ནང་འཁོད་ཀྱི་ སློབ་གྲྭ་ཁག་གི་བར་ན་ བཱསི་ཀེཌ་བཱོལ་རྩེད་འགྲན་ འགོ་འདྲེན་འཐབ་མིའི་ནང་ ཁ་ཙ་ ཌོག་ཊར་སྟོབས་རྒྱས་འབྲིང་རིམ་སློབ་གྲྭ་བར་མ་དང་ བློ་གསལ་གླིང་འབྲིང་རིམ་སློབ་གྲྭ་བར་མའི་བར་ན་ རྩེད་འགྲན་འབདཝ་ད་ ཌོག་ཊར་སྟོབས་རྒྱལ་སྡེ་ཚན་གྱིས་ རྒྱལ་ཁ་ཐོབ་ཅི།

ངེས་བཟུང་མེད་པའི་ ངོ་རྒོལ་འགྲེམ་སྟོན་ལུ་བརྟེན་ འགྲུལ་བསྐྱོད་བཀག་དམ།


ཁ་ཙ་ལས་ ཕུན་ཚོགས་གླིང་གི་ སྒོ་རའི་ཕྱི་ནང་༢ ཆ་ར་ལས་ 
སྣུམ་འཁོར་འགྲུལ་སྐྱོད་བཀག་དམ་འབད་ཡོད་པའི་མཐོང་སྣང་།

ཟླ་༤ པའི་ཚེས་༢༤། ༉ གོར་ཁ་ ཇཱན་མུག་ཏི་ མོར་ཅ་གིས་ ན་གར་ཀ་ཊ་ལུ་ ཞལ་འཛོམས་ཅིག་ འཚོག་དགོ་པའི་ གྲོས་འཆར་བཀོད་མི་དེ་ ནུབ་བེང་གཱལ་ཇཱལ་པའི་གུ་རི་རྫོང་ཁག་བདག་སྐྱོང་གིས་ ངོས་ལེན་འབད་མ་བཏུབ་མི་ལུ་བརྟེན་ ཁ་ཙ་ལས་ འགོ་བཙུགས་ཏེ་ དུ་ཝརམི་དང་ ཊི་རའི་ཁྲོམ་སྡེ་ཆ་མཉམ་གྱི་ནང་ ངེས་བཟུང་མེད་པའི་ ངོ་རྒོལ་འགྲེམ་སྟོན་ཅིག་ འགོ་འདྲེན་འཐབ་ནི་གི་ གསལ་བསྒྲགས་འབད་ནུག།

གཙང་ཆུ་ནང་ཐིམ་སྟེ་ ཤི་ཡོད་པའི་ དོགས་པ་ལུ་བརྟེན་ ཆ་རོགས་ཅིག་འཛིན་བཟུང་།

ཟླ་༤ པའི་ཚེས་༢༤། ༉ སྤྱི་ཟླ་༤ པའི་ཚེས་༢༢ ཀྱི་དྲོ་པ་ ཆ་རོགས་༡ དང་གཅིག་ཁར་ ཉ་བཟུང་པར་སོང་མི་ བསམ་རྩེ་རྫོང་ཁག་གི་ འཆམ་དཔོན་དེ་ ཁ་ཙ་དྲོ་པ་ དམ་དུམ་གཙང་ཆུ་ནང་ཐིམ་སྟེ་ ཤི་ཡོདཔ་སྦེ་མཐོང་ནུག།

ཨུ་ལ་གཡུས་ཚན་གྱི་ ཞིང་ལམ་བསལ་ནི་ མཚམས་འཇོག་འབད་ཡོདཔ།

ཞིང་ལམ་འཕྲོ་མཐུད་བསལ་ནི་ལུ་ མ་དངུལ་ལངམ་སྦེ་ མེད་པའི་ཁར་ མི་སེར་ཚུ་ ཞིང་ཆུ་བཏོན་ནི་གི་ ལཱ་འབད་དགོ་ནི་དེ་གིས་ཨིན་ཟེར་ རྒཔོ་གིས་ སླབ་ཨིན་པས།


མཚམས་འཇོག་འབད་མི་ ཨུ་ལ་གཡུས་ཚན་གི་ཞིང་ལམ།
ཟླ་༤ པའི་ཚེས་༢༤། ༉ ན་ཧིང་ དབང་འདུས་ཕོ་བྲང་ རུ་སྦིས་ས་རྒེད་འོག་ནང་ སོ་ནམ་ཞིང་ལམ་ ཀི་ལོ་མི་ཊར་༨ དེ་ཅིག་ བསལ་ནི་ཨིན་ཟེར་སླབ་སྟེ་ ལཱ་འགོ་བཙུགས་པའི་སྐབས་ མི་སེར་ཚུ་ སེམས་དགའ་དྲགས་ཏེ་ སྤྲོ་སྟོན་ལས་རིམ་ཚུ་ གོ་འདྲེན་འཐབ་པའི་ཁར་ མཛར་ཅུམ་ཡང་བཟའ་སྟེ་ རྟེན་འབྲེལ་བརྩི་ཡི་ཟེར་ གཡུས་མི་ཅིག་གིས་ སླབ་ཨིན་པས།

འབྲུག་གཅེས་གཅེས་གསུང་སྐད་འགྲན་བསྡུར་ མཇུག་བསྡུ་ཡོདཔ།

ཨང་དང་པ་ཐོན་མི་ ཚེ་རིང་འོད་ཟེར་(གཡས་ཁ་ཐུག་)
དང་ ཨང་༢ པ་ཐོན་མི་ སྐལ་ལྡན་ཆོས་གྲགས།
ཟླ་༤ པའི་ཚེས་༢༤། ༉ འཇིགས་བྲལ་སྤྲོ་འཕེལ་ཁང་གི་ཇོ་བདག་ དངོས་གྲུབ་རྡོ་རྗེ་གིས་ འགོ་འདྲེན་འཐབ་མི་ འབྲུག་གཅེས་གཅེས་གསུང་སྐད་འགྲན་བསྡུར་དེ་ རེས་གཟའ་ཟླ་བ་ལུ་ ཐིམ་ཕུ་ཆུ་ཚོད་འཁོར་ལོའི་ ཀ་ཆེན་གྱི་ས་ཁོངས་ནང་སྦེ་ ཕྱི་རུའི་ཆུ་ཚོད་༦ ལས་༩ ཚུན་ དྲག་ཤོས་ཐོན་མི་༣ གྱི་བར་ན་ མཐའ་བཅད་འགྲན་བསྡུར་འབདཝ་ད་ སྐྱེས་ལོ་༨ ལང་མི་ ཚེ་རིང་འོད་ཟེར་གྱིས་ ཨང་དང་པ་ཐོན་ཏེ་ དངུལ་རྐྱང་གི་གསོལ་རས་ དངུལ་ཀྲམ་༢༣༠,༠༠༠ ཐོབ་ཅི།

བཞེས་སྒོའི་གོང་ཚད་ཚུ་ ཡང་སེང་རྐྱབ་ནི་ཨིན་ན་མེན་ནའི་ ཐག་བཅད་མ་ཚུགས་པར་ཡོདཔ།

བཀྲིས་སྒང་ལུ་ སུ་རེཤ་ཟ་ཁང་ནང་ གཡུས་མི་ཚུ་ ཉིན་མའི་བཞེས་སྒོ་ ཟ་བའི་བསྒང་།
ཟླ་༤ པའི་ཚེས་༢༤། ༉ བཀྲིས་སྒང་ལུ་ སྐྱ་ནམ་གྱི་གོང་ཚད་ཚུ་ ཡར་སེང་སོང་མི་ལུ་བརྟེན་ ཟ་ཁང་ལག་ལེན་འཐབ་མི་ཚུ་ བཟའ་འཐུང་གི་གོང་ཚད་ཚུ་ ཡར་སེང་རྐྱབ་ནི་ཨིན་ན་ ཡང་ཅིན་ ཁོང་རའི་ ཚོང་མགྲོན་པ་ཚུ་ དགའ་ཏོག་ཏོ་སྦེ་ར་ བཞག་ནི་ཨིན་ནའི་སྐོར་ལས་ ཐག་བཅད་མ་ཚུགས་པར་ མགུ་འཐོམ་དོ་ཡོདཔ་ཨིན་པས།

པདྨ་དགའ་ཚལ་སློབ་གྲྭ་༩ མར་ཕབ་རྐྱབ་ཡོདཔ།

སློབ་ཕྲུག་གི་གྱངས་ཁ་ ཉུང་སུ་ཅིག་ལས་མེད་མི་ལུ་བརྟེན་ མི་སྡེ་སློབ་གྲྭ་ལས་ རྒྱ་བསྐྱེད་སློབ་ཁང་ལུ་ མར་ཕབ་རྐྱབ་ཡོདཔ་ཨིན་པས།


ཟླ་༤ པའི་ཚེས་༢༤། ༉ པདྨ་དགའ་ཚལ་རྫོང་ཁག་གི་ སློབ་གྲྭ་ཆུང་བ་ཚུ་ནང་ ཨ་ལུ་འཛུལ་ཞུགས་འབད་མིའི་གྱངས་ཁ་ མར་བབས་སོང་མི་ལུ་བརྟེན་ མི་སྡེ་སློབ་གྲྭ་༣ རྒྱ་བསྐྱེད་སློབ་གྲྭ་ལུ་ (སློབ་རིམ་༣ པ་ཚུན་) མར་ཕབ་རྐྱབ་ཡོདཔ་ཨིན་པས།
ན་ཧིང་ ཤེས་རིག་ལྷན་ཁག་གིས་ སློབ་ཕྲུག་༡༠༠ ལས་ཉུངམ་སྦེ་ཡོད་མི་ཚུ་ མར་ཕབ་འབད་དགོཔ་སྦེ་ གྲོས་ཐག་བཅད་མི་དང་བསྟུན་ ཁེ་རོང་ནག་སི་ཁར་དང་ བྲག་སྒོར་མི་སྡེ་སློབ་གྲྭ་དེ་ སློབ་ཁང་རྒྱ་བསྐྱེད་འབད་མིའི་ནང་ མར་ཕབ་རྐྱབ་ཡོད་པའི་ཁར་ སློབ་གྲྭ་གསུམ་ནང་ སློབ་ཕྲུག་༤༠-༦༠ རེ་མ་གཏོགས་མེདཔ་ཨིན་པས།


སཱག་རྒྱལ་ཁབ་ཚུ་གི་ སྒེར་སྡེའི་བརྩོན་ཤུགས།

ཟླ་༤ པའི་ཚེས་༢༤། ༉ ལྷོ་ཨེ་ཤི་ཡའི་ རྒྱལ་ཁབ་ཚུ་གིས་ ནུས་ཤུགས་ཐོན་སྐྱེད་འབད་ཐོག་ བཀྲམ་སྤེལ་འབད་ནི་ལུ་ ལྕོགས་གྲུབ་ཡོད་དེ་འབད་རུང་ ལུང་ཕྱོགས་ནང་ ནུས་ཤུགས་མ་ལང་པའི་ དཀའ་ངལ་བྱུང་མི་དེ་ གལ་སྲིད་ སྲིད་ཚོགས་ཀྱི་ དབུ་ཁྲིད་ཚུ་གིས་ ཁོང་རའི་ མནོ་ལུགས་ཚུ་ བསྒྱུར་བཅོས་འབད་ཚུགས་པ་ཅིན་ གནས་སྟངས་བསྒྱུར་བཅོས་ཐོག་ དཀའ་ངལ་བསལ་ཚུགས་ནི་མས་ཟེར་ཨིན་པས།

རྒྱལ་ཕམ་ཕྱེ་མ་ཚུགས་མི་ མཐའ་བཅད་འགྲན་བསྡུར་འོག་མ་ ད་རིས་ འཕྲོ་མཐུད་རྩེད་ནི།

སྐྱབས་ཆའི་མདའ་རྩེདཔ་ཅིག་ ང་རྒྱལ་ཐོག་ལས་ མདའ་རྐྱབ་པའི་བསྒང་།
ཟླ་༤ པའི་ཚེས་༢༤། ༉ ཁ་ཙ་ འབྲུག་སྐྱབས་ཆ་བཟོ་སྐྲུན་དང་ ཁྱུང་སྡེ་ཚན་༢ ཀྱི་བར་ན་ མཐའ་བཅད་འགྲན་བསྡུར་འོག་མའི་རྩེད་འགྲན་འབདཝ་ད་ འབྲུག་སྐྱབས་ཆ་བཟོ་སྐྲུན་སྡེ་ཚན་གྱིས་ སྐུགས་༡ ཆོད་ཡོདཔ་ལས་ འཕྲོ་མཐུད་ ད་རིས་རྩེད་འགྲན་འབད་ནི་ཨིན་པས།

བཀྲིས་གཡང་རྩེ་ ཁམས་དྭངས་ཀྱི་ ཨེ་མ་གསརཔ་ཚུ་ མོང་སྒར་ཁྲོམ་ཁར་ལྷོད་ཡོདཔ།

བཀྲིས་གཡང་རྩེ་ ཁམས་དྭངས་ཀྱི་ ཨེ་མ་གསརཔ།
ཟླ་༤ པའི་ཚེས་༢༤།  ༉ དུས་ཚོད་འ་ནེམ་ཅིག་ཁར་ བཀྲིས་གཡང་རྩེ་རྫོང་ཁག་ནང་ ཨེ་མ་གསརཔ་ཐོན་དོ་ཡོདཔ་བཞིན་དུ་ ཁམས་དྭངས་རྒེད་འོག་གི་ ཨེ་མ་གསརཔ་ཚུ་ ཁ་ཉིནམ་ལས་ མོང་སྒར་ཁྲོམ་ཁར་ ལྷོད་ཅི།

སྐྱབས་རྗེ་མཆོག་ བདུན་ཕྲག་འདི་ནང་ ཆོས་དོན་གཟིགས་སྐོར་ལས་ ལོག་ཕེབས་གནང་ནི།



སྤྱི་ཟླ་༣ པའི་ནང་ སྐྱབས་རྗེ་རྗེ་མཁན་མཆོག་གིས་ 
དགེ་བསྙེན་གྱི་སྐུ་འདྲ་ལུ་ རབ་གནས་གནང་པའི་བསྒང་།
ཟླ་༤ པའི་ཚེས་༢༣། ༉ སྐྱབས་རྗེ་རྗེ་མཁན་རིན་པོ་ཆེ་ སྤྲུལ་སྐུ་འཇིགས་མེད་ཆོས་གྲགས་མཆོག་གིས་ རྒྱལ་ཁབ་ཀྱི་ ས་གནས་ཐདམ་ཐད་ཁ་ལས་ཕར་ ཟླ་ངོ་ཕྱེད་དང་༢ ལྷགཔ་ཅིག་གི་རིང་ ཆོས་དོན་གཟིགས་སྐོར་གནང་པའི་ཤུལ་ལུ་ བདུན་ཕྲག་འདི་ནང་ སྤུངས་ཐང་བདེ་བ་ཆེན་པོའི་ཕོ་བྲང་ནང་ ལོག་ཕེབས་གནང་ནི་ཨིན་པས།

སྤུ་ན་གཙང་ཆུ་༢ པ་ འཆར་གཞི་དང་འཁྲིལ་ ལེགས་ཤོམ་འགྱོ་དོ་ཡོདཔ།

ཟླ་༤ པའི་ཚེས་༢༣། ༉ སྤྱི་ལོ་༢༠༡༠ གྱི་ཟླཝ་༦ པའི་ནང་ འགོ་བཙུགས་མི་ སྤུ་ན་གཙང་ཆུ་ལས་འགུལ་༢ པ་དེ་ ད་རེས་ནངས་པ་ བཟོ་སྐྲུན་ལཱ་གི་ འཆར་གཞི་དང་འཁྲིལ་ ལེགས་ཤོམ་སྦེ་ར་ འགྱོ་དོ་ཡོདཔ་ཨིན་པས།

མོང་སྒར་ལུ་ བཛྲ་གུ་རུ་དུང་སྒྲུབ་གྲོལ་ཡོདཔ།



མོང་སྒར་རྩེད་ཐང་ནང་ 
སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ 
དངོས་གྲུབ་བླངས་བ་དང་ ནང་རྟེན་ཚུ་གི་ དབང་གནང་པའི་བསྒང་།
ཟླ་༤ པའི་ཚེས་༢༣། ༉ མོང་སྒར་ལུ་ བཛྲ་གུ་རུ་དུང་སྒྲུབ་ཀྱི་ སྒྲུབ་ཆེན་གནང་མི་དེ་ ཁ་ཙ་དྲོ་པ་ སྐྱབས་རྗེ་རྗེ་མཁན་རིན་པོ་ཆེ་ སྤྲུལ་སྐུ་འཇིགས་མེད་ཆོས་གྲགས་མཆོག་གིས་ དད་ཅན་སྐྱ་སེར་ སྟོང་ཕྲག་ལས་བཅད་མི་ཚུ་ལུ་ དངོས་གྲུབ་བླངས་དབང་དང་ ནང་རྟེན་ཚུ་གི་དབང་ གནང་ཐོག་ལས་གྲོལ་གནང་ཡི།

བཀག་འཛིན་ཅན་གྱི་ ས་ཁོངས་ཚུ་ནང་ ཏམ་ཁུ་འཐུང་པ་ཅིན་ ཉེས་ཆད་བཀལ་ནི།

ཟླ་༤ པའི་ཚེས་༢༣། ༉ འབྲུག་གི་ཏམ་ཁུ་དམ་འཛིན་བཅའ་ཁྲིམས་༢༠༡༠ ཅན་མ་དེ་ སྤྱི་ཚོགས་ཀྱིས་ ལེགས་བཅོས་ཐོག་ལས་ ཆ་གནས་གྲུབ་པའི་ཤུལ་ལུ་ འབྲུག་སྨྱོ་རྫས་བཀག་འཛིན་ལས་སྡེ་གིས་ ཏམ་ཁུ་འཐུང་མི་ཚུ་གིས་ ངོས་འཛིན་ཅན་གྱི་ ས་གོ་ནང་མ་གཏོགས་ ས་ཁོངས་གཞན་ཚུ་ནང་ འཐུང་མ་ཆོག་པའི་སྐོར་ལས་ གསལ་བསྒྲགས་ཚར་༣ ལྷགཔ་ཅིག་འབད་ཡི་ཟེར་ཨིན་པས།

མཐའ་བཅད་འགྲན་བསྡུར་ནང་ བློ་གསལ་གླིང་དང་ འབྲུག་ཨིསི་ཊར་སྡེ་ཚན་༢ ལྷོད་ཡོདཔ།


འབྲུག་ཨིསི་ཊར་གྱི་ གཱོལ་ཀི་པར་གྱིས་ བཱོལ་བཟུང་བའི་བསྒང་།
ཟླ་༤ པའི་ཚེས་༢༣། ༉ ད་ལྟོ་འགོ་འདྲེན་འཐབ་བཞིན་དུ་ཡོད་པའི་ སྐྱེས་ལོ་༡༦ འོག་རྒྱུའི་ ཕུཊ་བཱོལ་རྩེད་འགྲན་དེ་ ནངས་པར་ བློ་གསལ་གླིང་སྡེ་ཚན་དང་ འབྲུག་ཨིསི་ཊར་སྡེ་ཚན་༢ ཀྱི་བར་ན་ ལྕང་ཇི་ཇི་ཕུཊ་བཱོལ་རྩེད་ཐང་ནང་སྦེ་ མཐའ་བཅད་འགྲན་བསྡུར་ རྩེད་འགྲན་འབད་ནི་ཨིན་པས། 
དེ་ཡང་ ཁ་ཙ་ བློ་གསལ་གླིང་དང་ བདེ་ཆེན་ཆོས་གླིང་སྡེ་ཚན་༢ ཀྱི་ བར་ན་ རྩེད་འགྲན་འབདཝ་ད་ བློ་གསལ་གླིང་སྡེ་ཚན་གྱིས་ གཱོལ་༣ བཙུགས་ཏེ་ རྒྱལ་ཁ་ཐོབ་ཡོདཔ་ཨིན་པས།

བུམ་ཐང་ལུ་ ཨིསི་ཀའུཊི་གི་ ལས་རིམ།

སློབ་ཕྲུག་ཨ་ལུ་ཚུ་ལུ་ མདུད་ཕོད་མ་འདྲཝ་བཏབ་ཐངས་ཀྱི་ སྦྱང་བ་བྱིན་པའི་བསྒང་།
ཟླ་༤ པའི་ཚེས་༢༣། ༉ ཤེས་རིག་ལྷན་ཁག་གིས་ དུས་ཅི་ ལོ་བརྒྱ་འཁོར་བའི་ ཤེས་རིག་དུས་སྟོན་ བརྩི་སྲུང་ཞུ་ནི་དང་འབྲེལ་ཏེ་ རྒྱལ་ཁབ་ནང་འཁོད་ཀྱི་ སློབ་གྲྭ་ཁག་ཚུ་ནང་ ཨིསི་ཀའུཊི་གི་ལས་རིམ་ཚུ་ འགོ་འདྲེན་འཐབ་དོ་ཡོད་མིའི་ནང་ སློབ་ཕྲུག་བརྒྱ་ལས་བཅད་མི་ཚུ་གིས་ བཅའ་མར་གཏོགས་དོ་ཡོདཔ་ཨིན་པས།

བུམ་ཐང་ལུ་ སྦྲང་རྩི་གི་མཁོ་འདོད་ སྒྲུབ་མི་ཚུགས་དོ་ཡོདཔ།

ཟླ་༤ པའི་ཚེས་༢༣། ༉ བུམ་ཐང་ལུ་ སེར་སྦྱངམ་གི་ སྦྲང་རྩི་ཚུ་ ཟླཝ་དག་པ་ཅིག་གི་ཧེ་མ་ལས་ རྫོགས་སོ་ནི་དེ་གིས་ མཁོ་འདོད་སྒྲུབ་མ་ཚུགས་པའི་ དཀའ་ངལ་བྱུང་དོ་ཡོདཔ་ཨིན་པས།

དར་དཀར་དཔལ་ལའི་ ཡན་ལག་ཁྲོམ་ རྒྱ་བསྐྱེད་ཀྱི་འཆར་གཞི།

ལོ་ངོ་༥༠ ལྷགཔ་ཅིག་གི་ཧེ་མར་ཆགས་མི་ དར་དཀར་དཔལ་ལའི་ ཡན་ལག་ཁྲོམ།
ཟླ་༤ པའི་ཚེས་༢༣། ༉ དར་དཔལ་ལའི་ ཡན་ལག་ཁྲོམ་དེ་ ལོ་ངོ་བཅུ་ཕྲག་༥ ལྷགཔ་ཅིག་གི་རིང་ ཚོང་ཁང་རོ་འཁོགས་ཚུ་དང་བཅསཔ་སྦེ་ གནས་པའི་ཤུལ་ལས་ རྒྱ་བསྐྱེད་འབད་ནི་གི་ རེ་བ་ཡོདཔ་ཨིན་པས།

ནངས་པ་ལས་ མདའ་རྩེད་འགྲན་བསྡུར་མཐའ་བཅད་འོག་མ་འགོ་བཙུག་ནི།

ཟླ་༤ པའི་ཚེས་༢༣། ༉ སྤྱི་ཟླ་༤ པའི་ཚེས་༧ ལས་ འགོ་བཙུགས་མི་ རང་ལུགས་སྤག་ཤིང་མདའ་གཞུའི་རྩེད་འགྲན་གྱི་ མཐའ་བཅད་འོག་མའི་ནང་ ནངས་པ་ ཁྱུང་སྡེ་ཚན་དང་ འབྲུག་སྐྱབས་ཆ་བཟོ་སྐྲུན་སྡེ་ཚན་༢ ཀྱི་ བར་ན་ རྩེད་འགྲན་འབད་ནི་ ཨིན་པས།

གནས་ཚུལ་མདོར་བསྡུས།

ཐིམ་ཕུ་ཁྲོམ་དཔོན་ ཀུན་ལེགས་རྡོ་རྗེ་དང་ འགོ་དཔོན་ཚུ་གིས་ ཁྲོམ་གྱི་ས་ཁོངས་ཚུ་ནང་ ཕྱགས་སྙིགས་རག་རོ་ཚུ་ ག་ལྷོད་བཀོག་མ་བཀོག་གི་ བརྟག་ཞིབ་འབད་བའི་བསྒང་།

ཡུ་ཨེསི་ཨེ་ལས་ འགྲེམ་ཐོག་ཚོགས་རྒྱན་བསྐྱལ་ནིའི་ཕན་ཁྱད།

༉ འབྲུག་གི་བཙག་འཐུ་ལྷན་ཚོགས་ཀྱིས་ བཙག་འཐུའི་བྱ་རིམ་ནང་ འཛམ་གླིང་ནང་འཁོད་ལུ་སྡོད་མི་ འབྲུག་མི་གང་མང་ལུ་ འབྲེལ་གཏོགས་འབད་བཅུག་ནི་གི་ ཐབས་ཤེས་བཏོན་པའི་བསྒང་ཡོད་མི་དེ་ ཟད་འགྲོ་ཚུ་ལུ་བརྟེན་ དོན་སྨིན་ཅན་ཅིག་ འབྱུང་མི་ཚུགས་ནི་བཟུམ་ཡོདཔ་ཨིན་པས།

སྲས་ཕུག་ དར་གླིང་གཡུས་ཚན་ནང་ མེ་རྐྱེན་བྱུང་མི་ཁྱིམ་ལུ་ གྲོགས་རམ་མ་ཐོབ་པར་ཡོདཔ།

 ཟླ་༤ པའི་ཚེས་༢༡

༉ སྤྱི་ཟླ་༤ པའི་ཚེས་༡༩ གི་ཉིན་མར་ ཆུ་ཚོད་ཕྱེད་དང་༤ དེ་ཅིག་ཁར་ དབང་འདུས་ཕོ་བྲང་ སྲས་ཕུག་རྒེད་འོག་ ད་གླིང་གཡུས་ཚན་ནང་ ཁྱིམ་ཅིག་ལུ་ མེ་རྐྱེན་ཤོར་ཡོདཔ་ཨིན་རུང་ ད་ལྟོ་ ཉམས་རྒུདཔ་བཟའ་ཚང་ཚུ་ལུ་ རྫོང་ཁག་དང་ རྒེད་འོག་གི་ ཁ་ཐུག་ལས་ རྒྱབ་སྐྱོར་ མ་ཐོབ་པར་ཡོདཔ་ཨིན་པས།

ཆང་གིས་ན་མི་ནདཔ་ཚུ་ སྨན་བཅོས་འབདཝ་ད་ ཟད་འགྲོ་སྦོམ་གནས་དོ་ཡོདཔ།

ཟླ་༤ པའི་ཚེས་༢༡

ཆང་རིགས་སྣ་ཚོགས་བཙོང་མི་ཆང་ཁང་།
༉ རྒྱལ་ཁབ་ནང་ ཆང་ལུ་བརྟེན་པའི་ནད་གཞི་ ཐོབ་མིའི་གྱངས་ཁ་དེ་ ལོ་བསྟར་བཞིན་དུ་ ཡར་སེང་འགྱོ་དོ་ཡོདཔ་བཞིན་དུ་ ལོ་རེ་ནང་ ཆང་དང་འབྲེལ་བའི་ནདཔ་ སྨན་བཅོས་འབད་མི་ཚུ་ལུ་ ཟད་འགྲོ་དངུལ་ཀྲམ་ས་ཡ་༡༣ དེ་ཅིག་བཏང་མི་དེ་ རྒྱལ་ཁབ་ཀྱི་ ཟད་འགྲོ་ཚུ་གི་གྲས་ལས་ མཐོ་ཤོས་ཅིག་ཨིན་པས། 

ཤར་ཕྱོགས་ལུ་ གཞུང་ལམ་བསུབས་ཡོདཔ།


ཟླ་༤ པའི་ཚེས་༢༡


༉ སྤྱི་ཟླ་༤ པའི་ཚེས་༡༩ འི་ནུབ་མོར་ བཀྲིས་སྒང་ལུ་ དུས་ཡུན་ཆུ་ཚོད་༣ དེ་ཅིག་གི་རིང་ ཆརཔ་ཤུགས་སྦེ་རྐྱབ་མི་ལུ་བརྟེན་ ས་རུད་ཆད་དེ་ དྲོ་པའི་ཆུ་ཚོད་༧ དེ་ཅིག་ལས་ འགྲུལ་འཁོར་ལམ་ བསུབས་ཡོདཔ་ཨིན་པས།
ས་རུད་དེ་ཡང་ བཀྲིས་གཡང་རྩེ་ལས་ མོང་སྒར་དང་ བཀྲིས་སྒང་འགྱོ་སའི་གཞུང་གྱི་ས་གནས་ ལྕགས་ཟམ་ལུ་ ཆད་ཡོདཔ་བཞིན་དུ་ ཁ་ཙ་ ལམ་དེ་བརྒྱུད་དེ་ འགྲོ་འགྲུལ་འབད་མི་ སྣུམ་འཁོར་༥༠ དེ་ཅིག་ཐོགས་ལུས་ཡོདཔ་ཨིན་པས།


དཔེ་དེབ་འགྲེམས་སྟོན་ནང་ལས་ ཉེ་བར་མཁོ་བའི་ དཔེ་དེབ་ཚུ་ཉོ་ཡི་ག?

ཟླ་༤ པའི་ཚེས་༢༡

སློབ་ཕྲུག་ཚུ་གིས་ དཔེ་དེབ་འགྲེམས་སྟོན་ནང་ ལྟ་བའི་བསྒང་།
༉ རྒྱལ་ཡོངས་དཔེ་དེབ་འགྲེམས་སྟོན་ ཐེངས་༥ པ་དེ་ ཁ་ཙ་ མཇུག་བསྡུ་ཡོདཔ་ད་ དེ་ནང་ ཤར་ཕྱོགས་རྫོང་ཁག་༦ དང་ བུམ་ཐང་རྫོང་ཁག་ནང་ལས་ སློབ་གྲྭ་ཁག་གི་ སློབ་དཔོན་ཚུ་དང་ དཔེ་གཉེར་པ་ཚུ་གིས་ རང་སོའི་ དཔེ་མཛོད་ཚུ་གི་དོན་ལུ་ དཔེ་དེབ་ཚུ་ཉོ་དོ་ཡོདཔ་ཨིན་པས།

མོང་སྒར་ལུ་ སྐྱ་ནམ་གོང་ཚད་ ཡར་སེང་སོང་ཡོདཔ།

ཟླ་༤ པའི་ཚེས་༢༡

༉ འདས་པའི་ཟླཝ་ལས་ཚུར་ རྒྱལ་ཁབ་ནང་ རྒྱ་གར་གྱི་རུ་པིའི་དཀའ་ངལ་ལུ་བརྟེན་ ཤར་ཕྱོགས་ མོང་སྒར་རྫོང་ཁག་ཁྲོམ་དང་ ཉེ་འདབས་ཀྱི་ ཚོང་ཁང་ཚུ་ནང་ སྐྱ་རྣམ་གྱི་གོང་ཚད་ ཡར་སེང་དུམ་གྲ་རེ་སོང་བའི་ཁར་ དགོས་མཁོ་ཅན་གྱི་ ཅ་ཆས་ལ་ལུ་ཅིག་ ཐོབ་མི་ཚུགསཔ་ཨིན་པས།

འགྲུལ་འཁོར་བཱསི་གི་ དོས་གླའི་ཚད་གཞི་ བཟོ་ཡོདཔ།

ཟླ་༤ པའི་ཚེས་༢༡

༉ འདས་པའི་བདུན་ཕྲག་ནས་ལས་ ལམ་འགྲུལ་ཉེན་སྲུང་དང་སྐྱེལ་འདྲེན་དབང་འཛིན་གྱིས་ མི་མང་འགྲུལ་འཁོར་བཱསི་ནང་ འགྲུལ་བསྐྱོད་འབད་མིའི་ ཁུར་ཆའི་རིགས་འབག་འགྱོཝ་ད་ དེ་གི་གླ་འཐུས་ཚུ་ ཚད་སྙོམས་ གཏན་འཁེལ་བཟོ་ཡོདཔ་ཨིན་པས།

རང་བཞིན་གནས་སྟངས་སྲུང་སྐྱོབ་འབད་མི་དེ་ རྒྱལ་སྤྱིའི་ གནས་ཚད་ནང་ ངོས་འཛིན་འབྱུང་ནི།

ཟླ་༤ པའི་ཚེས་༢༡

༉ དུས་ཅི་ སྤྱི་ཟླ་༦ པའི་ནང་ བཱ་ར་ཟིལ་ རྒྱལ་ཁབ་ཀྱི་ རྒྱལ་ས་ རཱི་བོ་ལུ་ རང་བཞིན་གནས་སྟངས་ཡུན་བརྟན་གྱི་ ཞལ་འཛོམས་འཚོགས་པའི་སྐབས་ འབྲུག་གིས་ སྐྱེ་ལྡན་རིགས་སྣ་ཉམས་སྲུང་འབད་མིའི་ ཁེ་ཕན་ཐོབ་བྱེད་བཀོད་ནི་ལུ་ ཤུགས་བཏོན་ནི་ཨིན་མི་ དེ་ཡང་ དུས་ཅིའི་ཞལ་འཛོམས་ཀྱི་ བརྗོད་དོན་དེ་ རང་བཞིན་ཐོན་སྐྱེད་ ཡུན་བརྟན་གནས་ཐབས་ཀྱི་བརྗོད་དོན་ཐོག་ གསུང་གྲོས་གནང་ནི་ཨིནམ་ལས་ ཞལ་འཛོམས་དེ་ རང་བཞིན་གནས་སྟངས་ལུ་གཙོ་བོར་ བཏོན་ནི་ཨིན་པས།

ལྕང་ཟམ་ཏོག་སྡེ་ཚན་གྱིས་ ཨི་སི་ཨར་སྡེ་ཚན་ལས་ རྒྱལ་ཁ་འཐོབ་ཡོདཔ།

ཟླ་༤ པའི་ཚེས་༢༡

ལྕང་ཟམ་ཏོག་སྡེ་ཚན་གྱིས་ ཨི་སི་ཨར་སྡེ་ཚན་གྱི་བར་ན་ རྩེད་འགྲན་འབད་བའི་བསྒང་།
༉ ལྕང་ཇི་ཇི་ ཕུཊ་བཱོལ་རྩེད་ཐང་ནང་སྦེ་ སྐྱེས་ལོ་༡༣ མན་ཆད་ཀྱི་ ཕུཊ་བཱོལ་རྩེད་འགྲན་ནང་ ཁ་ཙ་ དབྱེ་ཁ་ཀ་པའི་ནང་ ལྕང་ཟམ་ཏོག་སྡེ་ཚན་དང་ ཨི་སི་ཨར་སྡེ་ཚན་༢ ཀྱི་བར་ན་ རྩེད་འགྲན་འབདཝ་ད་ ལྕང་ཟམ་ཏོ་སྡེ་ཚན་གྱིས་ གཱོལ་༤ བཙུགས་ཏེ་ རྒྱལ་ཁ་ཐོབ་ཅི།

མཛེ་ནད་ཐོབ་མི་གསརཔ་ཅིག་ ངོས་འཛིན་འབད་ཡོདཔ།


ཟླ་༤་པའི་ཚེས་༢༡


༉ ཁ་ཙ་ པདྨ་དགའ་ཚལ་རྫོང་ཁག་ནང་ མཛེ་ནད་ཐོབ་མི་གསརཔ་ཅིག་ ངོས་འཛིན་འབད་ནུག།
དེ་ཡང་ མཁོ་ཐག་པ་སློབ་གྲྭ་ཆུང་བའི་ སློབ་རིམ་༢ པའི་སློབ་ཕྲུག་ སྐྱེས་ལོ་༨ ལང་མི་བུཚ་༡ ཅིག་ རི་སེར་པོ་སྨན་ཁང་ནང་ བརྟག་དཔྱད་འབདཝ་ད་ མཛེ་ནད་ཐོབ་ཡོད་པའི་ ངོས་འཛིན་འབད་ནི་དེ་གིས་ ད་ལྟོ་ པདྨ་དགའ་ཚལ་སྨན་ཁང་ནང་ བསྐྱལ་ཡོདཔ་ཨིན་པས།


སྤུ་ན་གཙང་ཆུ་ གློག་མེ་ལས་འགུལ་དང་པའི་ ས་འོག་ཆུ་ལམ་ ཁག་༢ མཐུད་སྦྲེལ་འབད་ཡོདཔ།

བསྟན་རྒྱས་བློན་པོ་ མཁའ་འགྲོ་དབང་ཕྱུག་གིས་ ས་འོག་ཆུ་ལམ་ ཁག་༢ མཐུད་སྦྲེལ་འབད་བའི་ རྟེན་འབྲེལ་བརྩི་སྲུང་གི་ གས་རྫས་བཀལ་ནིའི་དོན་ལུ་ ཨེབ་རྟ་ཨེབ་པའི་བསྒང་།
༉ ཁ་ཙ་ བསྟན་རྒྱས་བློན་པོ་ མཁའ་འགྲོ་དབང་ཕྱུག་གིས་ སྤུ་ན་གཙང་ཆུ་ གློག་མེ་ལས་འགུལ་དང་པའི་ ས་འོག་ཆུ་ལམ་ ཁག་༢ འབད་བསལ་མི་དེ་ གས་རྫས་བཀལ་ཐོག་ལས་ མཐུད་སྦྲེལ་འབད་བའི་་ རྟེན་འབྲེལ་ནང་ བཅའ་མར་གཏོགས་མི་ཚུ་གིས་ ཉེན་སྲུང་གི་ཞྭམོ་དང་ རྣམ་ཅོག་ཚུ་བསུབ་སྟེ་ ས་དོང་ནང་ འཛུལ་ཡོདཔ་ཨིན་རུང་ གས་རྫས་ཀྱི་སྐད་དང་ རླུང་ཤུགས་འཕུ་མི་ལུ་བརྟེན་ འཇིགས་སྣང་སྦོམ་སྦེ་ར་ལང་ཡི།

དར་དཀར་ཆུ་ གློག་མེ་ལས་འགུལ་ མཇུག་བསྡུའི་ དུས་ཚོད་ཕྱིར་འགྱངས།

ཕྱིར་འགྱངས་འབད་མི་ དར་དཀར་ཆུ་གློག་མེ་ལས་འགུལ།
༉ གློག་ཤུགས་མེ་ག་ཝཱཊ་༡༢༦ འབད་མི་ དར་དཀར་ཆུ་གློག་མེ་ལས་འགུལ་གྱི་ བཟོ་སྐྲུན་ལཱ་མཇུག་བསྡུའི་ དུས་ཚོད་དེ་ ཟླཝ་དག་པ་ཅིག་ ཕྱིར་འགྱངས་འབད་ཡོདཔ་ཨིན་པས།

གནས་ཚུལ་མདོར་བསྡུས།

ཁ་ཙ་ ཐིམ་ཕུ་ཨོ་ལ་ཁ་ལུ་ མགྱོགས་ལམ་ཁར་ སྣུམ་འཁོར་སཱན་ཏ་ཕི་ཅིག་ འཁོར་ལམ་གྱི་ཟུར་རྩིག་གུ་ཕོག་སྟེ་ གདོང་ཁའི་འཁོར་ལོ་གི་ འཕྲུལ་ཆས་ལུ་ གནོད་སྐྱོན་བྱུང་བའི་མཐོང་སྣང་།

འབྲུག་ཡུལ་གྱི་དྲག་ཤོས་ སྤྱི་ཟླ་༥ པ་ལས་ འགོ་བཙུག་ནི།

༉ འབྲུག་ཡུལ་གྱི་དྲག་ཤོས་ཟེར་མི་ གསུང་སྐད་འགྲན་བསྡུར་དེ་ སྤྱི་ཟླ་༥ པའི་ བདུན་ཕྲག་དང་པའི་ནང་ལས་ འགོ་བཙུག་ནི་ཨིན་པས།

ངོས་ལེན་གྱི་རྒྱབ་སྐྱོར་ལེགས་ཤོམ་ཨིན་པའི་ངོས་འཛིན།

༉ འབྲུག་རྒྱལ་ཁབ་ནང་ ཆང་ལག་ལེན་དང་འབྲེལ་བའི་ གནོད་ཉེན་མར་ཕབ་ཀྱི་ གྲོས་བསྡུར་ཞལ་འཛོམས་ནང་ བསྟན་སྲུང་དྲག་པོའི་ཕན་བདེ་ལས་འགུལ་གྱིས་ འབྲེལ་གཏོགས་འབད་མི་དེ་ དམིགས་ཡུལ་འགྲུབ་ནིའི་ནང་ ངོས་ལེན་རྒྱབ་སྐྱོར་ཡོད་པའི་ མངོན་གསལ་བྱུང་ཡོདཔ་ཨིན་པས།

གནས་ཚུལ་མདོར་བསྡུས།

སྤྱི་ཟླ་༤ པའི་ཚེས་༡༧ ལུ་ ཨ་མི་རི་ཀའི་ མ་འུནཊི་ ཧཱོལ་ཡོག་མཐོ་རིམ་སློབ་གྲྭ་གིས་ འབྲུག་ཨ་ནེམོ་གཞི་ཚོགས་ཀྱི་ བཀོད་ཁྱབ་མདོ་ཆེན་ ཌོག་ཊར་ བཀྲིས་བཟང་མོ་ལུ་ མེ་རི་ ལི་ཡཱོན་གཟེངས་ཐོན་རྟགས་མ་ བྱིན་ཡོདཔ་ད་ དེ་ཡང་ གཙོ་བོ་ར་ མོ་གིས་ འབྲུག་ཨ་ནེམོ་གཞི་ཚོགས་བརྒྱུད་དེ་ འབྲུག་ལུ་ ཨམ་སྲུ་དང་ བུམོ་ཚུ་གི་ མི་ཚེའི་གནས་སྟངས་ ལེགས་བཅོས་འབད་ནིའི་དོན་ལུ་ བརྩོན་ཤུགས་སྦོམ་བསྐྱེད་པའི་ ངོས་འཛིན་ལུ་ཨིན་པའི་གནས་ཚུལ།