མེ་བསད་པར་འགྱོ་མི་༢ ལུ་ ཤི་རྐྱེན་དང་༡༧ ལུ་རྨ་སྐྱོན།

 ཁ་ཙ་ ནགས་མེ་བསད་མ་ཚུགསཔ་ལས་ ད་རིས་ དྲོ་པའི་ཆུ་ཚོད་༥ ལས་ མེ་བསད་མི་ཚུ་ མེ་བསད་པར་ ལོག་འགྱོ་ནི་ཨིན་པས།

ཁ་ཙ་ནུབ་མོར་ དབྱངས་ཅན་ཕུག་སློབ་གྲྭའི་ལྟག་ལས་ 
མེ་འབར་བའི་བསྒང་གི་མཐོང་སྣང་།

བཀྲིས་ཕུན་ཚོགས།
མིག་དམར་ སྤྱི་ཟླ་༤ ཚེས་༩། ༉ ཁ་ཙ་ཉིན་མར་ ཐིམ་ཕུ་དབྱངས་ཅན་ཕུག་འབྲིང་རིམ་སློབ་གྲྭ་གོང་མའི་ལྟག་ལུ་ ནགས་ཚལ་ལུ་ མེ་རྐྱེན་ཤོར་མི་དེ་ གསད་ནིའི་དོན་ལུ་ ཁྲིམས་སྲུང་འགག་པ་༢༣ འབག་འགྱོ་མི་ འགག་སྡེའི་སྣུམ་འཁོར་ཊཱག་ཅིག་ ལམ་འོག་ལས་མར་ རྦོབ་རིལ་ཡར་སོཔ་ལས་ སྤེལ་རྒྱབ་༢ ཁ་འཐུམ་མར་ བསད་ཡོདཔ་མ་ཚད་ ཁྲིམས་སྲུང་འགག་པ་གཞན་༡༧ ལུ་ རྨ་སྐྱོན་བྱུང་ནུག།

རྐྱེན་ངན་བྱུངམ་ད་ མཐོང་མི་ཚུ་གིས་ སླབ་མིའི་ནང་ ཁྲིམས་སྲུང་འགག་སྡེའི་ སྣུམ་འཁོར་ཊཱག་དེ་ རི་གུ་ལས་མར་ མགུ་མཇུག་སློགས་ཏེ་ རྦོབ་རིལ་འགྱོཝ་ད་ སྣུམ་འཁོར་ནང་ཡོད་མི་ཚུ་ ཕར་ཚུར་བཏོན་བཀོག་སར་ མཐོང་ཡོདཔ་ད་ རྨ་སྐྱོན་བྱུང་མི་ཚུ་ དེ་འཕྲོ་ལས་ ཐིམ་ཕུ་སྨན་ཁང་ནང་ བསྐྱལ་ཡོདཔ་ལས་ ད་ལྟོ་ ནདཔ་༢ གློ་བུར་ཚམས་ཆེན་ལྟ་རྟོག་ཁང་ནང་ བཞག་ཡོདཔ་མ་ཚད་ ནདཔ་གཞན་ཚུ་ སྤྱིར་བཏང་ནད་ཁང་ནང་ ལྟ་རྟོག་ཐོག་ལུ་ བཞག་ཡོདཔ་ཨིན་པས།
སྣུམ་འཁོར་དེ་ རྦོབ་རིལ་བའི་སྐབས་ རྒྱབ་ཁར་སྡོད་མི་ ཁྲིམས་སྲུང་དམག་མི་༢ དང་ གདོང་ཁར་སྡོད་མི་ དེད་གཡོགཔ་བརྩིས་ཏེ་ མི་༣ འབདཝ་ད་ མི་གྲངས་༥ གིས་ ས་ཁར་མཆོངས་ཐོག་ལས་ ཉེན་སྐྱོབ་འབད་ཚུགས་ནུག།
ནགས་ཚལ་གཙོ་འཛིན་འགོ་དཔོན་ ཕན་ཏོ་ཚེ་རིང་གིས་ སླབ་མིའི་ནང་ ཉིན་མའི་ཆུ་ཚོད་༡.༣༠ དེ་ཅིག་ཁར་ ནགས་མེ་ཤོར་མི་དེ་ གསད་ནིའི་དོན་ལུ་ ཁྲིམས་སྲུང་འགག་པ་༥༠ ལྷགཔ་ཅིག་དང་ བསྟན་སྲུང་དམག་མི་༧༠ ལྷགཔ་ཅིག་ ས་ཁོངས་ནང་ ལྷོད་པའི་ཤུལ་ལས་ ད་རུང་ བདེ་སྲུང་དང་ ཁས་བླངས་པ་༡༨༠ ལྷགཔ་ཅིག་དང་ མེ་བསད་སྣུམ་འཁོར་༤ ལྷོད་ཡོདཔ་ཨིན་རུང་ ལམ་ལེགས་ཤོམ་མེད་པའི་གུ་ ནགས་མེ་འབར་སར་ བདའ་མ་ཟུནམ་ལས་ མེ་བསད་སྣུམ་འཁོར་ཚུ་ ལག་ལེན་འཐབ་མ་ཚུགས་ཟེར་ཨིན་པས།
དེ་མ་ཚད་ དེ་བསྒང་ རླུང་མ་ཤུགས་སྦེ་ འཕུ་ནི་དེ་གིས་ མེ་བསད་མ་ཚུགས་པའི་ཁར་ གནམ་སྲོ་མི་ལུ་མརྟེན་ མེ་བསད་མི་ཚུ་ ཁྱིམ་ནང་བཏང་དགོཔ་ བྱུང་ཡི་ཟེར་ ནགས་ཚལ་འགོ་དཔོན་གྱིས་ བཤད་པའི་ཁར་ ད་རིས་དྲོ་པ་ཆུ་ཚོད་༥ ལུ་ མེ་བསད་མི་ཚུ་ ལོག་འཛོམས་ཐོག་ལས་ མེ་གསད་ནི་འགོ་བཙུག་འོང་ཟེར་ སླབ་ཨིན་པས།

མེ་བསད་མི་ཚུ་གིས་ སྣུམ་འཁོར་རྦོབ་རིལ་ས་ལུ་ སྲོག་སྐྱབས་འབད་བའི་བསྒང་།

ནགས་ཚལ་འགོ་དཔོན་ཚུ་གིས་ སླབ་དོ་བཟུམ་འབད་བ་ཅིན་ མེ་རྐྱེན་བྱུང་ས་ གཡུས་དང་ སོ་ནམ་ཞིང་པ་ དེ་ལས་ ཤིང་ཐོག་ལྡུམ་ར་ཚུ་ ག་ནི་ཡང་མེདཔ་ལས་ ཨ་ལུ་བཀྲ་མ་ཤིསཔ་ཚུ་ མེ་རྩེདམོ་རྩེཝ་ད་དང་ ཡང་ཅིན་ ཏམ་ཁུ་འཐུང་མི་ཚུ་གིས་ ཏམ་ཁུའི་འཚིགས་རོ་ཚུ་ བཀོག་བཞག་མི་ལུ་བརྟེན་ ནགས་མེ་ཤོར་ཡོདཔ་བཟུམ་ཅིག་འདུག་ཟེར་ཨིན་པས།
མེ་རྐྱེན་བྱུང་པའི་སྐབས་ ལ་ལུ་ཅིག་གིས་ ས་ཁོངས་དེ་ནང་ མི་༣ ཕར་ཚུར་རྒྱུག་འགྱོ་སར་ མཐོང་ཡོདཔ་བཞིན་དུ་ ཁྲིམས་སྲུང་འགག་པ་གིས་ ནགས་མེ་ཟུན་ས་ལས་ དོགས་པ་ཅན་༣ འཛིན་བཟུང་འབད་ཡོད་རུང་ ཁོང་གིས་ རྫུན་ཁ་བཟེད་མ་བཏུབ་ལས་ ཞིབ་དཔྱད་འཕྲོ་མཐུད་དེ་ར་ འབད་དོ་ཟེར་ སླབ་ཨིན་པས།
སྣུམ་འཁོར་གྱི་ རྐྱེན་ངན་བྱུང་པའི་ཤུལ་ལུ་ མི་དབང་མངའ་བདག་རིན་པོ་ཆེ་མཆོག་གིས་ ས་ཁོངས་དེ་ནང་ བྱོན་གནང་ཡོདཔ་མ་ཚད་ སྨན་ཁང་ནང་ཡང་ རྨ་སྐྱོན་བྱུང་མི་ཚུ་གཟིགས་པར་ བྱོན་གནང་ཡོད་པའི་གནས་ཚུལ།