མོང་སྒར་རྒྱལ་པོའི་ཞིང་གི་ ནགས་ཚལ་གླིང་འཛིན་འགོ་དཔོན་ ཡེ་ཤེས་ལྷུན་གྲུབ་ཀྱིས་ སླབ་མིའི་ནང་ འཁོར་ལམ་གྱི་ ཉེ་འདབས་ལུ་ ནགས་མེ་ཤོར་མི་དེ་ཡང་ ས་གནས་དེ་ཁར་ སྦ་སྒོར་༡ ནང་སྡོད་མི་ ཨང་རྒས་ཅིག་གིས་ ཉིན་མའི་བཞེས་སྒོ་འབད་བའི་སྐབས་ལུ་ ཧང་སྟོང་མར་ མེ་ཤོར་སོ་ནི་དེ་གིས་ དོན་ཆེད་སྦེ་ར་ མེ་བཏང་བཏངམ་ མེན་པས་ཟེར་ཨིན་པས།
ཁོ་གིས་ སླབ་མིའི་ནང་ ད་རེས་ ནགས་མེ་ཤོར་སའི་ས་ཁོངས་ནང་ མེ་རྐྱེན་མ་ཤོར་བར་ ལོ་༣ དེ་ཅིག་ལང་ཡི་ཟེར་ཨིནམ་ད་ ས་ཁོངས་ནང་ སྟོང་ཕུ་ཤིང་དང་ ཚལ་མ་རག་རོག་ཚུ་གི་ འཚིགས་ཤུལ་ལེ་ཤ་ཡོདཔ་མ་ཚད་ མེ་བསད་ནི་ལུ་ གདོང་ལེན་སྦོམ་བྱུང་མི་དེ་ཡང་ བྱག་གཟར་དྲགས་ཡོད་ནི་དེ་གིས་ཨིན་པས།
མོང་སྒར་རྫོང་ཁག་ནང་ ཁ་ཙ་ཤོར་མི་ ནགས་ཚལ་མེ་རྐྱེན་དེ་ དུས་ཅི་ གནམ་དགུན་གྱི་དུས་ཚོད་ལུ་ འགོ་དང་པ་ཨིནམ་ད་ རྒྱལ་པོའི་ཞིང་ལུ་ སྡོད་མི་ཚུ་གིས་ སླབ་མིའི་ནང་ མི་ཚུ་གིས་ ནགས་ཚལ་དེ་ དགོས་མཁོ་ཆེ་ཧིང་ཤེས་ཏེ་འབད་རུང་ མེ་བདག་འཛིན་འཐབ་ནི་ལུ་ རྒྱབ་སྐྱོར་མིན་འདུག་ཟེར་ཨིན་པས།
ནགས་མེ་དེ་ཡང་ རྒྱལ་པོའི་ཞིང་ལུ་ཡོད་པའི་ ཁྲིམས་སྲུང་འགག་པ་དང་ ནགས་ཚལ་ལས་བྱེད་པ་ དེ་ལས་ ས་གནས་ཀྱི་མི་ཚུ་འབདཝ་ད་ བསྡོམས་མི་གྲངས་༣༠ དེ་ཅིག་གིས་ བསད་ཡོད་རུང་ བྱ་གཟར་དྲགས་ཡོད་མི་ལུ་བརྟེན་ ཁ་ཙ་ རྩ་བ་ལས་ བསད་མ་ཚུགས་ནི་དེ་གིས་ ད་རིས་ འཕྲོ་མཐུད་དེ་ བསད་ནི་ཨིན་པས།
ནགས་ཚལ་འགོ་དཔོན་ཚུ་གིས་ སླབ་མིའི་ནང་ ནགས་ཚལ་མེ་རྐྱེན་ལུ་བརྟེན་ སྟོང་ཕུ་ཤིང་ཨེ་ཀར་སྟོང་ཕྲག་ལས་བཅད་དེ་ འཚིགས་དོ་ཡོདཔ་ལས་ གཞུང་གིས་འབད་རུང་ མེ་རྐྱེན་གྱི་སྐོར་ལས་ གོ་བ་བརྡ་སྤྲོད་ཚུ་ མ་བཏུབ་བཏུབ་སྦེ་ སྤྲོད་ནི་ཡོད་རུང་ མི་སེར་ཚུ་གིས་ སྣང་དག་མ་བསྐྱེད་པའི་ཁར་ ཁྲིམས་ལུ་ཡང་ འཚེར་སྣང་མེདཔ་བཟུམ་སྦེ་ ཚོརཝ་མས་ཟེར་ཨིན་པས།
ནགས་ཚལ་མེ་བཏང་མི་ཚུ་ བདའ་ཟུན་པ་ཅིན་ ས་ཆ་ཧེཊ་ཊར་༡ ལུ་ ཉེས་ཆད་དངུལ་ཀྲམ་༣,༠༠༠ ལས་༡༠,༠༠༠ ཚུན་ ཡངས་ཆག་མེད་པར་ བཀལ་དོ་ཡོདཔ་ཨིན་པས།
འབྲུག་གི་ནགས་ཚལ་བཅའ་ཁྲིམས་ སྤྱི་ལོ་༡༩༦༩ ཅན་མའི་ནང་ དོན་ཆེད་སྦེ་ར་ ནགས་མེ་སྤར་མི་ཚུ་ བདའ་ཟུན་པ་ཅིན་ མི་ངོམ་དེ་ བཙོན་ནང་བཙུགས་དོ་ཡོདཔ་ཨིན་པས།
རང་བཞིན་གནས་སྟངས་བཅའ་ཁྲིམས་༡༩༩༥ དང་འཁྲིལཝ་ད་ ནགས་ཚལ་ལུ་ གནོད་སྐྱོན་འབྱུང་ཉེན་ཡོད་པའི་ས་ཁོངས་ནང་ མེ་འཕུ་མ་ཆོགཔ་སྦེ་ཡོདཔ་ད་ ཁྲིམས་དེ་ལས་འགལ་བ་ཅིན་ བཙོན་ཁྲིམས་ལོ་༥ ཡན་ཆད་ སྨིན་དགོཔ་སྦེ་ ཡོད་པའི་གནས་ཚུལ།
མོང་སྒར་ལས་ བདེ་ཆེན་ཚེ་རིང་།
No comments:
Post a Comment