འབྲུག་སྤྱིར་དབང་ཚོགས་པ་ལུ་ འདེམས་ངོ་༧ མ་ཚང་པར་ཡོདཔ།

༠༢/༠༥/༢༠༡༣  ༉ ཁ་ཙ་ འབྲུག་སྤྱིར་དབང་ཚོགས་པ་གིས་ ཧེ་མའི་འདེམས་ངོ་༣ གྱི་ཚབ་ལུ་ གསརཔ་བཙུགས་མི་རྩིས་ཏེ་ འདེམས་ངོ་༨ ངོ་སྤྲོད་འབད་ཡོད་མིའི་གྲས་ལས་༤ བདུན་ཕྲག་ཧེ་མའི་ནང་ འགོ་འདྲེན་འཐབ་མི་ རྒྱལ་ཡོངས་ཚོགས་སྡེའི་ བཙག་འཐུ་ནང་ བཅའ་མར་གཏོགས་ཏེ་ བཙག་འཐུ་མ་གྲུབ་མི་ཚུ་ཨིན་པས།
སྲིད་དོན་ཚོགས་པ་ཚུ་གིས་ བཙག་འཐུ་ལྷན་ཚོགས་ལུ་ དོ་འགྲན་ཁས་ལེན་ཡི་གུ་བཙུགས་ནི་གི་ ཚེས་གྲངས་མཇུག་དེ་ སྤྱི་ཟླ་༥ པའི་ཚེས་༥ ལུ་ཨིནམ་བཞིན་དུ་ དོ་འགྲན་ཁས་ལེན་ཡི་གུའི་ནང་ སྲིད་ཚོགས་ག་ར་གིས་ འདེམས་ཁོངས་༤༧ གྱི་ འདེམས་ངོ་ཚུ་ཚངམ་སྦེ་ བཙུགས་དགོཔ་ད་ འབྲུག་སྤྱིར་དབང་ཚོགས་པ་གིས་ ད་ཚུན་གྱི་བར་ན་ འདེམས་ངོ་༤༠ གཏན་འཁེལ་སོང་ཡོདཔ་ལས་ ད་རུང་ འདེམས་ངོ་༧ ངོ་སྤྲོད་འབད་དགོཔ་ཡོདཔ་ཨིན་པས།

དགེ་ལེགས་ཕུག་ལུ་ སྲིད་ཚོགས་ཀྱི་ཡིག་ཚང་ཚུ་གིས་ ལཱ་འབད་ནི་འགོ་བཙུགས་ཡོདཔ།

༠༢/༠༥/༢༠༡༣  ༉ འབྲུག་སྤྱིར་དབང་ཚོགས་པ་གིས་ སྤྱི་ཟླ་༤ པའི་ཚེས་༣༠ ལུ་ གསར་སྤང་རྫོང་ཁག་གི་ འགོ་འདྲེན་པའི་ཡིག་ཚང་དེ་ དགེ་ལེགས་ཕུག་ལུ་སྦེ་ སྒོ་འབྱེད་འབད་ཡི།
ཡིག་ཚང་དེ་ སྒོ་འབྱེད་འབད་ཚར་བའི་ཤུལ་ལུ་ ཁྲོམ་ཁ་ལས་ ཚོགས་པ་ལུ་ དང་འདོད་བསྐྱེད་མི་ དག་པ་ཅིག་ཐོན་ཡོད་རུང་ མི་ཕུད་རྡོག་གཅིག་ལས་བརྒལ་ མ་ཐོནམ་ཨིན་པས།

གནས་ཚུལ་བསྡུ་བཀོདཔ་ཚུ་གིས་ ཕྱོགས་ལྷུང་མེད་པར་ བརྡ་དོན་སྤེལ་དགོཔ།

༠༢/༠༥/ ༢༠༡༣  ༉ བརྡ་བརྒྱུད་ནང་ ལཱ་འབད་མི་ཚུ་ལུ་ བཙག་འཐུ་དང་འབྲེལ་བའི་ ཁྲིམས་ཡིག་དང་ ལམ་ལུགས་ཚུ་གི་ གོམས་འདྲིས་སློབ་སྦྱོང་བྱིན་མི་དེ་གིས་ རྒྱལ་ཡོངས་ཚོགས་འདུའི་ བཙག་འཐུ་སྐབས་ གནས་ཚུལ་ཚུ་ ཕྱོགས་ལྷུང་མེད་པར་ འདྲ་མཉམ་དང་ དྲང་བདེན་ཐོག་ལས་ ཁྱབ་སྤེལ་འབད་ཚུགས་པའི་ རེ་བ་ཡོདཔ་ཨིན་པས།

བཱསི་ཀེཊི་བཱོལ་རྩེད་འགྲན་གྱི་ མཐའ་བཅད་འོག་མ་ རེས་གཟའ་ཉི་མ་ལུ་རྩེ་ནི།

ན་གཞོན་ཚུ་གིས་ མཐའ་བཅད་འོག་མའི་དོན་ལུ་ དོ་འགྲན་འབད་བའི་བསྒང་།

༠༢/༠༥/༢༠༡༣ ༉ ཐིམ་ཕུ་ བཱསི་ཀེཊི་བཱོལ་རྩེད་འགྲན་གྱི་ ལིག་སྐོར་ཐེངས་ མཇུག་བསྡུ་ཡོདཔ་བཞིན་དུ་ མཐའ་བཅད་འགྲན་བསྡུར་འོག་མ་དེ་ སྤྱི་ཟླ་༥ པའི་ཚེས་༤ ལུ་ འགོ་འདྲེན་འཐབ་ནི་དང་ དེ་ཡང་ ཕོ་རྒྱསི་དང་ དཔའ་བཟངཔ་ དེ་ལས་ ཝི་ཟཱཌིསི་དང་ བྱ་ཁྱུང་སྡེ་ཚན་གྱི་བར་ན་ དོ་འགྲན་འབད་ནི་ཨིན་པས།

བློ་གསར་སློབ་ཁང་ཚུ་ནང་ དྲོད་ལྡན་གྱི་གདན་ཚུ་ འཐིང་ཡོདཔ།

སློབ་ཕྲུག་ཨ་ལུ་ཚུ་ དྲོད་ལྡན་གྱི་གདན་གུ་སྡོད་དེ་ དཔེ་ཆ་ལྷབ་པའི་བསྒང་།

༠༢/༠༥/༢༠༡༣ ༉ ད་རེས་ནངས་པ་ ཐིམ་ལུ་ ལྕང་ཟམ་ཏོག་ ཁྲིམས་སྲུང་འགག་པའི་ ཡིག་ཚང་ལྟེ་བའི་ ས་ཁོངས་ནང་ཡོད་པའི་ ཟིལ་གནོན་རྣམ་རྒྱལ་གླིང་ སློབ་གྲྭ་ཆུང་བའི་ནང་ འགྱོ་ལྟ་བ་ཅིན་ བློ་གསར་སློབ་ཁང་ཚུ་གི་ཕྱི་ཁར་ གྱང་རྩིག་གུ་ ཨང་ཡིག་བྲིས་བཞག་མི་དང་འཁྲིལ་ ཨ་ལུ་ཆུང་ཀུ་ཚུ་གི་ སྒྲིག་ལམ་ལྷམ་གནགཔོ་ཚུ་ གྱལ་སྒྲིག་ཐོག་ལས་ བཞག་ཡོདཔ་ མཐོངམ་ཨིན་པས།

དེང་སང་ལུགས་ཀྱི་རྩེད་ཐང་༢ པ་ བཟོ་སྐྲུན་འབད་དོ་ཡོདཔ།

༠༢/༠༥/༢༠༡༣   ༉ ཐིམ་ཕུ་ལྕང་ཇི་ཇི་ཕུཊ་བཱོལ་རྩེད་ཐང་དེ་ དེང་སང་ལུགས་ཀྱི་ གྱིབ་ཀྱི་རྩྭ་གདན་འཐིང་ནིའི་དོན་ལུ་ སྤྱི་ཟླ་༤ པའི་ནང་ བཟོ་སྐྲུན་གྱི་ལཱ་ འགོ་བཙུགས་ཡོདཔ་ལས་ ཐང་བཟོ་སྐྲུན་འབད་ཞིནམ་ལས་ ཕུཊ་བཱོལ་རྩེ་མི་ཚུ་གི་རེ་འདོད་ འགྲུབ་ཚུགས་ནི་ཨིན་པས།

ལྕང་ཇི་ཇི་རྩེད་ཐང་ནང་ གྱིབ་ཀྱི་རྩྭ་གདན་
འཐིང་ནིའི་དོན་ལུ་ ལཱ་ཚུ་འབད་བའི་བསྒང་།

དེ་ཡང་ བཟོ་སྐྲུན་གྱི་ལཱ་འབད་བའི་སྐབས་ གནམ་གཤིས་གནས་སྟངས་ལེགས་ཤོམ་སྦེ་ཡོད་པ་ཅིན་ སྤྱི་ཟླ་༨ པའི་ནང་ མཇུག་བསྡུ་ཚུགས་ནི་ཨིནམ་ལས་ ད་རེས་ནངས་པ་ ལྕང་གླིང་མི་ཐང་ནང་ ཕུཊ་བཱོལ་རྩེ་ནིའི་དོན་ལུ་ ཟླཝ་ལས་བཅད་དེ་ སྔོན་མངགས་འབད་སྡོད་མི་ཚུ་གི་ དཀའ་ངལ་བསལ་ཚུགས་ནི་ཨིན་པས།

སྲིད་ཚོགས་ཀྱི་ བསྐུལ་བསྒྲགས་ཚུ་ ནོར་རྫིཔ་མངམ་སྡོད་སར་ འགོ་འདྲེན་འཐབ་དགོཔ།

༡/༥/༢༠༡༣   ༉ སྤྱི་ཚོགས་༢ པའི་ རྒྱལ་ཡོངས་ཚོགས་འདུའི་ འགོ་ཐོག་བཙག་འཐུའི་དོན་ལུ་ སྲིད་དོན་ཚོགས་པ་ཚུ་གིས་ མི་མང་གི་ བསྐུལ་བསྒྲགས་ལས་རིམ་ འགོ་བཙུགས་ནི་ལུ་ ཉིན་གྲངས་༡༠ མ་གཏོགས་མེདཔ་བཞིན་དུ་ བཀྲིས་སྒང་རྫོང་ཁག་ མེ་རག་དང་ སག་སྟེང་རྒེད་འོག་༢ ཀྱི་ གཡག་རྫིཔ་ཚུ་གིས་ བསྐུལ་བསྒྲགས་ཚུ་ གནམ་དགུན་གྱི་ གཡག་གི་བྱང་སའི་ ས་གོ་ཚུ་ནང་ འགོ་འདྲེན་འཐབ་དགོཔ་འདུག་ཟེར་ བསམ་འཆར་བཀོདཔ་ཨིན་པས།

འཚོ་བ་ལ་ནོར་ལུ་བརྟེན་སྡོད་མི་ མེ་རག་གི་མི་སེར།

རྒྱ་འབྲུག་༢ ཀྱི་མཐུན་ལམ་ལུ་ ཉམས་སྐྱོན་མེད་པའི་དོགས་སེལ།

༡/༥/༢༠༡༣   ༉ བློན་ཆེན་བགྲེསཔ་ འཇིགས་མེད་འོད་ཟེར་འཕྲིན་ལས་མཆོག་གིས་ ཁོ་རའི་གནས་ཡུན་སྐབས་ རྒྱ་འབྲུག་༢ ཀྱི་བར་ནའི་ མཐུན་ལམ་ལུ་ དུམ་གྲ་ཅིག་ གནོད་པ་བྱུང་ཡོདཔ་སྦེ་ རྒྱལ་ཁབ་༢ ཆ་རའི་ བརྡ་བརྒྱུད་ཚུ་གིས་ བྲིས་ཡོདཔ་ཨིན་རུང་ དེ་ལུ་ རྒྱབ་རྟེན་ག་ཅི་ཡང་མེད་ཟེར་ འདས་པའི་རེས་གཟའ་ཟླ་བ་ལུ་ འགོ་འདྲེན་འཐབ་མི་ འབྲུག་ཕུན་སུམ་ཚོགས་པའི་ ཡོངས་ཁྱབ་ཞལ་འཛོམས་ནང་ གསུངས་ཡོདཔ་ཨིན་པས།

གནས་ཚུལ་མདོར་བསྡུས།

༡/༥/༢༠༡༣  ཁ་ཙ་ མི་དབང་མངའ་བདག་རིན་པོ་ཆེ་མཆོག་གིས་ བཀྲིས་ཆོས་རྫོང་ནང་སྦེ་ ཧཱ་རྫོང་ཁག་གི་ རྫོང་བདག་གསརཔ་ བསོད་ནམས་དབང་འདུས་ལུ་ ལེགས་དར་གནང་ཡོདཔ་ད་ བསོད་ནམས་དབང་འདུས་དེ་ རྫོང་བདག་སྦེ་ བསྐོ་བཞག་མ་གནང་པའི་ཧེ་མར་ དངུལ་རྩིས་ལྷན་ཁག་ནང་ བདག་སྐྱོང་གཙོ་འཛིན་སྦེ་ ཕྱག་ཞུ་ཡོད་པའི་གནས་ཚུལ།

ཤར་ཕྱོགས་ཀྱི་དཔེ་དེབ་འགྲེམས་སྟོན་ནང་ བཅའ་མར་གཏོགས་མི་ཚུ་ལུ་སེམས་ཕམ།

༡/༥/༢༠༡༣   ༉ དུས་ཅི་ རྒྱལ་ཡོངས་དཔེ་དེབ་འགྲེམས་སྟོན་ཐེངས་༦ པ་དེ་ ཤར་ཕྱོགས་རྫོང་ཁག་ཚུ་གི་དོན་ལུ་ མོང་སྒར་ འབྲིང་རིམ་སློབ་གྲྭ་འོག་མའི་རྩེད་ཐང་ནང་སྦེ་ སྤྱི་ཟླ་༤ པའི་ཚེས་༢༦ ལས་ འགོ་བཙུགས་ཡོད་རུང་ དཔེ་དེབ་ཉོ་མི་ ཉུང་སུ་ཅིག་ལས་བརྒལ་ མེད་མི་ལུ་བརྟེན་ འགྲེམས་སྟོན་ནང་བཅའ་མར་གཏོགས་མི་ཚུ་ སེམས་ཕམ་སྦོམ་བྱུང་ཡོདཔ་ཨིན་པས།

དགེ་སློང་ཚུ་གིས་ དཔེ་ཆ་ཉོ་འབག་པའི་བསྒང་།

ཤ་མུ་བཟའ་མི་ལུ་བརྟེན་ སྐྱེས་ལོ་༡༠ ལང་མི་ བུམོ་ཅིག་ཤི་རྐྱེན།

༡/༥/༢༠༡༣   ༉ པདྨ་ཐང་འབྲིང་རིམ་སློབ་གྲྭ་འོག་མའི་ སློབ་རིམ་༢ པའི་སློབ་ཕྲུག་ སྐྱེས་ལོ་༡༠ ལང་མི་ བུམོ་ཅིག་ སྤྱི་ཟླ་༤ ཚེས་༢༧ རེས་གཟའ་ཉི་མ་ལུ་ སྨན་ཁང་ནང་ བསྐྱལ་བའི་ཤུལ་ལས་ ཤི་ཡོདཔ་ཨིན་པས།
དེ་ཡང་ བསམ་གྲུབ་ལྗོངས་མཁར་ བསམ་གྲུབ་ཆོས་གླིང་དྲུང་ཁག་ གཡུས་གསར་ན་གཡུས་ཚན་གྱི་ སོ་ནམ་པ་བཟའ་ཚང་ཅིག་གིས་ སྤྱི་ཟླ་༤ པའི་ཚེས་༢༣ ལུ་ སྐྱེས་ལོ་༣༥ འབད་མི་ ཕོ་སྐྱེས་དང་ གནས་ཚང་༢ ཤིང་འཐུ་བར་འགྱོཝ་ད་ ཚལ་མ་ནང་ལས་སྤོག་འབག་མི་ ཤ་མུ་དེ་ ཁོང་བཟའ་ཚང་ཆ་ཁྱབ་ ཕྱི་རུ་ ཚོདམ་བསྐོལ་བཟའ་མི་ལུ་བརྟེན་ཨིན་པས།

གཤིན་རྗེའི་རྣམ་སྤྲུལ་ མ་ཧེ་རྭཝ་གི་རྒྱབ་ཁུངས།

༡/༥/༢༠༡༣   ༉ ད་རེས་ནངས་པ་ དར་དཀར་བཀྲིས་གཡང་རྩེའི་རྫོང་ནང་ ནང་རྟེན་གཙོ་ཅན་ཅིག་སྦེ་ བཞུགས་སུ་གསོལ་མི་ མ་ཧེ་རྭཝ་དེ་ གཤིན་རྗེའི་རྣམ་སྤྲུལ་ཨིནམ་སྦེ་ གསོལ་བ་བཏབ་དོ་ཡོདཔ་ཨིན་པས།
རྫོང་གི་མགོན་ཁང་ནང་ དར་གྱིས་སྤུར་ཏེ་ ཤེལ་སྒྲོམ་ཅིག་ནང་བཞུགས་མི་ ཡ་མཚན་ཆེ་ཏོག་ཏོ་སྦེ་ མཇལ་ནི་ཡོད་མི་ རིང་ཚད་ཕིཊ་ཕྱེད་དང་༥ འབད་མི་ མ་ཧེ་རྭཝ་དེ་ མཇལཝ་ཙམ་ཅིག་གིས་ ངན་སོང་གི་སྡུག་བསྔལ་ལས་ འགྲོལ་ཚུགས་པའི་ནུས་པ་ཡོད་ཟེར་ཨིན་པས།

དར་དཀར་བཀྲིས་གཡང་རྩེའི་རྫོང་གི་ ནང་རྟེན་གཙོ་ཅན་ མ་ཧེ་རྭཝ།

རྒྱལ་ཁབ་ནང་ ཟད་འགྲོ་མཐོ་ཤོས་གནས་པའི་ འཐུང་ཆུའི་ཞབས་ཏོག།

༡/༥/༢༠༡༣   ༉ མཐའ་ཟུར་གྱི་གཡུས་ཚན་ ལུང་ནག་ནང་ལུ་ འཐུང་ཆུ་བཀྲམ་སྤེལ་གྱི་ཞབས་ཏོག་བྱིན་མི་དེ་ རྒྱལ་ཁབ་ནང་ ད་ཚུན་ལུ་ ཟད་འགྲོ་མཐོ་ཤོས་གནས་པའི་ ལཱ་ཅིག་ཨིནམ་བཞིན་དུ་ གཡུས་ཚན་ནང་ ཅ་ཆས་སྐྱེལ་འདྲེན་གྱི་འཐུས་རྐྱངམ་གཅིག་གིས་ར་ དངུལ་ཀྲམ་ས་ཡ་༢.༩ དེ་རེ་ གནས་ཡོདཔ་ད་ ཅ་ཆས་ཚུ་ གནམ་གྲུ་ ཧེ་ལི་ཀོབ་ཊར་གྱི་ཐོག་ལས་ སྐྱེལ་འདྲེན་འབད་ཡོདཔ་ཨིན་པས།

རྩི་སའི་ཚབ་ལུ་ ཤིང་གིས་བཟོ་མི་ཆུའི་ཀ་ལི།

གཡུས་ཚན་ནང་ གཞི་རྟེན་མཐུན་རྐྱེན་མེད་པར་ ཁྲོམ་ཁར་གནས་སྤོ་འགྱོ་དགོཔ་ཐོན་ཡོདཔ།

༡/༥/༢༠༡༣   ༉ དབང་འདུས་ཕོ་བྲང་ དྭངས་ཆུ་རྒེད་འོག་ རྟ་ས་གཡུས་ཚན་ནང་ ཁྱིམ་གུང་༡༧ ཡོད་ས་ལས་༡༡ གིས་ ཁྲོམ་ཁར་གནས་སྤོ་འགྱོ་མི་ལུ་བརྟེན་ ད་རེས་ གཡུས་ཚན་ནང་ ཁྱིམ་༨ སྟོངམ་སྦེ་ལུས་ཡོདཔ་ད་ ཁྱིམ་༣ རྩ་བ་ལས་བཤུབ་བཏང་ནི་དེ་གིས་ གྱང་འཁོགས་སྦེ་ ལུས་ཡོདཔ་ཨིན་པས།

རྟ་ས་གཡུས་ཚན་གྱི་ མི་ཚུ་གིས་ གཞིས་གསརཔ་ཆགས་མི་ ནོརབུ་སྡིངས་ཀྱི་ཁྱིམ་ཚུ།

རྩོམ་སྒྲིག་པའི་སྣང་འཆར།

༡/༥/༢༠༡༣   སྲིད་དོན་ཚོགས་པ་ཚུ་ལུ་ དུས་ཚོད་གངམ་མེདཔ།
༉ ད་རིས་ཀྱི་ དུས་ཚོད་འདི་ སྲིད་དོན་ཚོགས་པ་༥ གི་དོན་ལུ་ སེམས་འཚུབ་ཆེ་བའི་ གནས་སྟངས་ནང་ ལྷོད་ཡོད་མི་དེ་ཡང་ སྤྱི་ཟླ་༤ པའི་ཚེས་༢༩ ལུ་ འབྲུག་གི་བཙག་འཐུ་ལྷན་ཚོགས་ཀྱིས་ རྒྱལ་ཡོངས་ཚོགས་འདུའི་ འགོ་ཐོག་དང་ སྤྱིར་བཏང་བཙག་འཐུའི་ནང་ དོ་འགྲན་འབད་ནི་གི་ རེ་འདོད་ཡོད་མི་ ཐོ་བཀོད་གྲུབ་པའི་ སྲིད་ཚོགས་ཚུ་གིས་ ལྷན་ཚོགས་ལུ་ དོ་འགྲན་ཁས་ལེན་ཡི་གུ་བཙུགས་ནིའི་ མཐའ་མཇུག་ཚེས་གྲངས་དེ་ སྤྱི་ཟླ་༥ པའི་ཚེས་༥ ལུ་ཨིནམ་སྦེ་ གསལ་བསྒྲགས་འབད་ནི་དེ་གིས་ཨིན་མས།

གཡུས་སྟོངམ་ལུས་མི་ རྒེད་འོག་ནང་ འཁོར་ལམ་དང་ གློག་མེའི་མཐུན་རྐྱེན་ལྷོད་དོ་ཡོདཔ།

༡/༥/༢༠༡༣   དེ་གིས་ གནས་སྤོ་སོང་མི་ཚུ་ རང་གི་གཡུས་ཁར་ ལོག་འོང་ནི་ལུ་ སེམས་ཤུགས་བསྐྱེད་ཚུགས་ནི་ཨིན་ན?
༉ བསམ་གྲུབ་ལྗོངས་མཁར་རྫོང་ཁག་ བསམ་རང་རྒེད་འོག་ནང་ འཁོར་ལམ་དང་ གྲོང་གསེབ་གློག་མེ་བཀྲམ་སྤེལ་གྱི་ མཐུན་རྐྱེན་ཚུ་ ལྷོད་དོ་ཡོདཔ་ལས་ གཡུས་སྟོང་བཞག་སྟེ་ ས་གནས་གཞན་ཁ་ལས་ཕར་ གནས་སྤོ་སོང་མི་ གྲོང་གསེབ་མི་སེར་ལེ་ཤ་ཅིག་ ལོག་འོང་ནི་གི་ འོས་འབབ་ཡོདཔ་ཨིན་པས།

བསམ་རང་ལུ་ རི་དྭགས་གླངམོ་ཆེ་ཚུ་གིས་ གནོདཔ་བཀལ་ཉེན་ཡོད་མི་ལུ་བརྟེན་ མི་སེར་ཚུ་གིས་ ཁྱིམ་མང་ཤོས་ར་ བཟོ་བཀོད་འདི་བཟུམ་རྐྱབ་ཡོད་པའི་མཐོང་སྣང་།

སྲིད་ཚོགས་༥ གིས་ བཙག་འཐུ་ལྷན་ཚོགས་ལུ་ དོ་འགྲན་གྱི་ཁས་ལེན་ཡི་གུ་ འཕྲལ་མགྱོགས་བཙུགས་ནི།

༡/༥/༢༠༡༣   ༉ རྒྱལ་ཡོངས་ཚོགས་འདུའི་ འགོ་ཐོག་དང་ སྤྱིར་བཏང་བཙག་འཐུ་ནང་ དོ་འགྲན་འབད་ནི་གི་ རེ་འདོད་ཡོད་མི་ སྲིད་ཚོགས་༥ གིས་ འབྲུག་གི་ བཙག་འཐུ་ལྷན་ཚོགས་ལུ་ དོ་འགྲན་གྱི་ ཁས་ལེན་ཡི་གུ་ འཕྲལ་མགྱོགས་ར་ བཙུགས་དགོ་མི་ལུ་བརྟེན་ སྲིད་ཚོགས་ཚུ་ དལ་ཁོམ་མེད་པར་ སྡོད་དོ་ཡོདཔ་ཨིན་པས།