གནས་ཚུལ་མདོར་བསྡུས།

༢༡/༧/༢༠༡༢  

ཁ་ཙ་ ཐིམ་ཕུ་རྡོ་གདན་ནང་ལུ་ དབྱར་རྩྭ་དགུན་འབུབ་ཀྱི་ རིན་བསྡུར་ཚོང་སྒྱུར་འཐབ་སར་ ཚོང་སྣ་ཚུ་ བཙུགས་ཡོདཔ་མ་ཚད་ ཏི་རུ་བཙུགས་ཐོག་ལས་ ཤོ་གི་རྩེདམོ་ཚུ་ཡང་ འགོ་འདྲེན་འཐབ་ཡོད་པའི་མཐོང་སྣང་།

འདས་པའི་བཙག་འཐུའི་དྲན་གསལ་དང་ ཤུལ་མའི་བཙག་འཐུ་ནང་ གྲུབ་འབྲས་ལེགས་འཐོན་གྱི་རེ་འདོད།

སྤྱི་ལོ་༢༠༠༨ ལུ་ འོས་འབབ་ཅན་གྱི་འབྲུག་མི་ཚུ་ ཚོགས་རྒྱན་བཙུགས་པའི་བསྒང་།

༢༡/༧/༢༠༡༢   ༉ སྤྱི་ཚོགས་༢ པའི་ བཙག་འཐུ་རན་དོ་ཡོདཔ་བཞིན་དུ་ བཙག་འཐུ་དེ་ནང་ མི་མང་གིས་ དམངས་གཙོའི་རིང་ལུགས་དེ་ ཧེ་མ་དང་ཕྱདཔ་ད་ བཙག་འཐུ་དང་ དམངས་གཙོའི་རིང་ལུགས་ཀྱི་སྐོར་ལས་ གོ་བརྡ་ལེགས་ཤོམ་ཐོབ་ཡོདཔ་ལས་ སང་ཕོད་ཀྱི་ བཙག་འཐུ་དེ་ ཚོགས་པ་དང་ འདེམས་ངོ་ཚུ་ག་ར་ལུ་ དོ་འགྲན་ཅན་ཅིག་ འོང་ནི་ཨིན་པས།

ལྷ་ཁང་བསྐྱར་བཞེངས་དོན་ལུ་ མ་དངུལ་མེད་པའི་དཀའ་ངལ།

༢༡/༧/༢༠༡༢   ༉ ཆུ་ཁ་རྫོང་ཁག་ སྤ་སྒར་དགོན་པའི་ལྷ་ཁང་ མེ་མཆོད་བཞེས་ཏེ་ ཟླཝ་༦ དེ་ཅིག་ ལང་ཡོདཔ་ཨིན་རུང་ མ་དངུལ་མེད་པའི་ དཀའ་ངལ་ལུ་བརྟེན་ ལོག་བསྐྱར་བཞེངས་འབད་ནི་གི་ འཆར་གཞི་མེདཔ་ཨིན་པས།

མེ་མཆོད་མ་བཞེས་པའི་སྐབས་ཀྱི་ སྤ་སྒར་ལྷ་ཁང་།

འཆར་གཞི་༡༠ པའི་ནང་ ཁང་ཚན་༨༠༠ བཟོ་སྐྲུན་འབད་ཚར་དགོཔ།

༢༡/༧/༢༠༡༢   ༉ འབྲུག་རྒྱལ་ཁབ་ནང་ གཞུང་གཡོག་པའི་གྱངས་ཁ་ ལོ་གཅིག་བ་ལོ་གཅིག་ ཡར་སེང་འགྱོ་མི་དང་བསྟུན་ རྫོང་ཁག་ཚུ་ནང་ སྡོད་ཁྱིམ་མ་ལང་པའི་ དཀའ་ངལ་སྦོམ་སྦེ་ར་ བྱུང་དོ་ཡོདཔ་ད་ ལོ་༥ འི་ འཆར་གཞི་༡༠ པའི་ནང་ རྒྱལ་ཡོངས་ཁྱིམ་བཟོ་གོང་འཕེལ་ལས་འཛིན་གྱིས་ ཁང་ཚན་༨༠༠ དེ་ཅིག་ བཟོ་སྐྲུན་འབད་ཚར་དགོཔ་ཨིན་རུང་ ད་ལྟོ་ ཁང་ཚན་༤༨ དེ་ཅིག་ལས་ བཟོ་སྐྲུན་འབད་མ་ཚརཝ་ཨིན་པས།

ཕུན་ཚོགས་གླིང་ཁྲོམ་སྡེའི་འོག་ལུ་ ཚུད་ཡོད་རུང་ ལེགས་བསྒྱུར་མེདཔ།

༢༡/༧/༢༠༡༢   སྤོས་དཀར་ཤིང་གི་ མི་སེར་ཚུ་གིས་འབད་བ་ཅིན་ ཁང་ཁྲལ་དང་ ས་ཁྲལ་ཚུ་ ཁྲོམ་གཞན་བཟུམ་སྦེ་ར་ བཏབ་དགོཔ་ཨིན་རུང་ གོང་འཕེལ་ལས་སྣ་ཚུ་ འགོ་བཙུག་ནི་མིན་འདུག་ཟེར་ ཉོགས་བཤད་བཀོདཔ་ཨིན་པས།

༉ ལོ་ངོ་༡ དེ་ཅིག་གི་ཧེ་མར་ ཕུན་ཚོགས་གླིང་རྒེད་འོག་གི་འོག་ལུ་ཨིན་མི་ སྤོས་དཀར་ཤིང་གི་ མི་སེར་ཚུ་ལུ་ ཁོང་ཆ་ཁྱབ་ ཕུན་ཚོགས་གླིང་ཁྲོམ་སྡེའི་འོག་ལུ་ ཚུད་ནི་ཨིནམ་ལས་ ཁོང་གི་གཡུས་ཚན་ནང་ གོང་འཕེལ་གྱི་ ལས་སྣ་གསརཔ་དང་ མཐུན་རྐྱེན་ཚུ་ ཐོབ་སྤྱོད་འབད་ཚུགས་པའི་ གོ་སྐབས་ཡོད་ཟེར་ སླབ་མི་ལུ་བརྟེན་ མི་སེར་ཚུ་ སེམས་དགའ་ཡོདཔ་ཨིན་པས།

ད་ལྟོ་ ཁྲོམ་སྡེའི་མཐུན་རྐྱེན་དང་ གོང་འཕེལ་ལས་སྣ་ག་ཅི་ཡང་ འགོ་མ་བཙུགས་པར་ མཐའ་ཟུར་རྒེད་འོག་གཞན་ཚུ་དང་ དབྱེ་བ་མེདཔ་སྦེ་ ལུས་ཡོད་མི་ སྤོས་དཀར་ཤིང་གཡུས་ཚན།

དབང་འདུས་རྫོང་གི་ ནང་རྟེན་ཚུ་ འཚོལ་བཞིན་དུ་ཡོདཔ།

ནང་རྟེན་འཚོལ་མི་ སྡེ་ཚན་གྱིས་ སྤྱི་ཟླ་༧ པའི་ཚེས་༤ ལས་ ཁ་ཙ་ཚུན་ཚོད་ སྐུ་རྟེན་བྱིན་ཅན་༥༠ དེ་ཅིག་ འཚོལ་ཐོབ་ནུག།

རིང་ཚད་ཨིན་ཅི་༥ དེ་ཅིག་འབད་མི་ ནོརབུ་བསི་ལིའི་རྭཝ་གུ་ རྐོ་ཡོད་མི་ ཚེ་རིང་མཆེད་ལྔའི་སྐུ་འདྲ་དང་ རིང་ཚད་ཕིཊ་༡ འབད་མི་ ནང་གཟུངས་བསི་ལི་རྭཝ་གིས་བཞེངས་མི་ ཛམ་བྷ་ལའི་སྐུ།

༉ སྤྱི་ཟླ་༦ པའི་ཚེས་༢༤ ལུ་ རྒྱལ་རབས་ཅན་གྱི་ དབང་འདུས་ཕོ་བྲང་རྫོང་ མེ་མཆོད་བཞེས་པའི་ཤུལ་ལས་ བསྟན་སྲུང་དམག་མི་༥༠ འབད་མི་ སྡེ་ཚན་ཅིག་གིས་ སྤྱི་ཟླ་༧ པའི་ཚེས་༤ ལས་ མེ་གིས་འཚིགས་པའི་ཤུལ་ཚུ་ནང་ ནང་རྟེན་འཚོལ་ནི་ འགོ་བཙུགས་ཞིནམ་ལས་ཚུར་ ཁ་ཙ་ཚུན་ཚོད་ སྐུ་རྟེན་བྱིན་ཅན་༥༠ དེ་ཅིག་ ཐོབ་ཡོདཔ་ཨིན་པས།

རི་དྭགས་སེམས་ཅན་ཚུ་གི་ ཞིབ་འཚོལ་དོན་ལུ་ མ་དངུལ་གྱི་རྒྱབ་སྐྱོར་ ཡར་སེང་འབད་དགོཔ།

༢༠/༧/༢༠༡༢   ༉ འཕྲལ་ཁམས་ཅིག་ལས་ རི་དྭགས་སྲུང་སྐྱོབ་ཀྱི་དོན་ལུ་ ནགས་ཚལ་དང་གླིང་ཁའི་ འགོ་དཔོན་ཚུ་གིས་ རི་དྭགས་སེམས་ཅན་ཚུ་དང་འབྲེལ་བའི་ ཤེས་ཡོན་གྱི་དོན་ལུ་ པར་ཆས་ཀྱི་ ཧིང་བཀལ་ཐོག་ལས་ རི་དྭགས་སེམས་ཅན་དང་ གཅན་གཟན་མང་རབས་ཅིག་གི་ པར་ཚུ་ ཐོབ་ཚུགས་ཡོདཔ་བཞིན་དུ་ དེ་དང་འབྲེལ་བའི་ཞིབ་འཚོལ་འབད་ནི་དེ་ དགོས་མཁོ་སྦོམ་ཡོད་རུང་ མ་དངུལ་གྱི་ རྒྱབ་སྐྱོར་ཆུང་བའི་ དཀའ་ངལ་ཡོདཔ་ཨིན་པས།

ཚོགས་འདུའི་གནས་ཡུན་ སང་ཕོད་སྤྱི་ཟླ་༤ པའི་ནང་ མཇུག་བསྡུ་ནི།

༢༠/༧/༢༠༡༢   སྤྱི་ཚོགས་༢ པའི་ རྒྱལ་ཡོངས་ཚོགས་འདུའི་ བཙག་འཐུ་གི་ ཚེས་གྲངས་གསལ་བསྒྲགས་དེ་ སང་ཕོད་སྤྱི་ཟླ་༢ པ་དེ་ཅིག་ཁར་ གསལ་བསྒྲགས་འབད་ནི་གི་ འོས་འབབ་ཡོདཔ་ཨིན་པས།

༉ སྤྱི་ཚོགས་༢ པའི་བཙག་འཐུ་རན་དོ་ཡོད་པའི་ཁར་ འབྲུག་གི་སྤྱི་ཚོགས་དང་པའི་ ཚོགས་ཁང་གོང་འོག་༢ ཀྱི་ གནས་ཡུན་ཡང་ ཚང་རནམ་ཨིན་རུང་ ད་ལྟོ་ ཤུལ་མའི་སྤྱི་ཚོགས་༢ པའི་བཙག་འཐུའི་ཚེས་གྲངས་དེ་ གཏན་འཁེལ་མ་ཤེསཔ་མ་ཚད་ སྤྱི་ཚོགས་ཀྱི་ གནས་ཡུན་ནམ་ལས་ཚངམ་ཨིན་ན་ གཏན་འཁེལ་སྦེ་ གསལ་བཀོད་མ་འབདཝ་ཨིན་པས།

གནས་ཚུལ་མདོར་བསྡུས།

ད་རེས་ནངས་པ་ ཆརཔ་ཤུགས་སྦེ་ རྐྱབ་མི་ལུ་བརྟེན་ ཐིམ་ཕུ་དང་ ཕུན་ཚོགས་གླིང་གི་ གཞུང་ལམ་བར་ན་ ས་གནས་ཐདམ་ཐད་ཁ་ལས་ཕར་ ས་རུད་ཆད་དེ་ ལམ་བཀག་བསུུབ་འབད་དོ་ཡོདཔ་ཨིན་རུང་ ཌཱན་ཊག་ལས་མི་ཚུ་དང་ ས་རྐོ་འཕྲུལ་ཆས་ཚུ་གིས་ དེ་འཕྲོ་ལས་ ལམ་ཆད་མི་དང་ བསུབས་མི་ཚུ་ བསལ་དོ་ཡོདཔ་ད་ དེ་སྦེ་ བསལ་ཚུགས་མི་དེ་ཡང་ ཁྲིམས་སྲུང་འགག་པ་དང་ ལམ་འགྲུལ་ཉེན་སྲུང་འགོ་དཔོན་ཚུ་གིས་ མཉམ་འབྲེལ་ཕན་ནུས་ཅན་འབད་བ་ལུ་བརྟེན་ཨིན་ཟེར་ ཌཱན་ཊག་ལས་འགུལ་གྱི་ འགོ་དཔོན་ཚུ་གིས་ བཤདཔ་ཨིན་པའི་ གནས་ཚུལ་མདོར་བསྡུས།

མེམ་ དྭངས་གླིང་མཚོ་ སྐམ་དོ་ཡོདཔ།

༢༠/༧/༢༠༡༢    བཀྲིས་སྒང་ དྭངས་གླིང་མཚོ་དེ་ སྐམ་འགྱོ་དོ་ཡོདཔ་ལས་ ལོ་བསྟར་བཞིན་དུ་ མེམ་དྭངས་གླིང་ལུ་ གསོལ་ཁ་ཕུལ་བ་འགྱོ་མི་ མཁའ་གླིང་གི་མི་སེར་ཚུ་དང་ བཀྲིས་སྒང་གྲྭ་ཚང་གི་ དགེ་སློང་ཚུ་ལུ་ ཚ་གྱང་ལང་དོ་ཡོདཔ་ཨིན་པས།།

འདས་པའི་ཟླཝ་ནང་ དགེ་སློང་ཅིག་གིས་ དྭངས་གླིང་མཚོའི་ མེམ་དྭངས་གླིང་ལུ་ གསོལ་ཁ་ཕུལ་བའི་བསྒང་།

སྣུམ་འཁོར་རྦོབ་རིལ་རྐྱེན་ངན་ནང་ ཁག་འབགཔ་ཅིག་ལུ་ཤི་རྐྱེན།

༢༠/༧/༢༠༡༢   ༉ སྤྱི་ཟླ་༧ པའི་ཚེས་༡༧ གྱི་ཕྱི་རུ་ སྟག་ཏི་ཀོ་ཊི་དང་ མ་ཀའི་བ་རིའི་བར་ན་ སྣུམ་འཁོར་མུ་ཟོ་ཀཱར་ཅིག་ ལམ་འོག་ལས་མར་ ཕིཊ་༣༠ དེ་ཅིག་གི་ས་ཁར་ རྦོབ་རིལ་ཡར་སོཔ་ལས་ སྐྱེས་ལོ་༢༨ ལང་མི་ ཕོ་སྐྱེས་ཅིག་ལུ་ ཤི་རྐྱེན་བྱུང་ཡོདཔ་ཨིན་པས།

རྡོ་རྗེ་སློབ་དཔོན་གྱིས་ དགེ་སློང་༢༠༠ ལུ་ དགེ་ཚུལ་གྱི་ སྡོམ་པ་གནང་ཡོདཔ།

༢༠/༢༠༡༢   ༉ ཁ་ཙ་ ཐིམ་ཕུ་བདེ་ཆེན་ཕོ་བྲང་ལྷ་ཁང་ནང་སྦེ་ གཞུང་གྲྭ་ཚང་ཁག་གི་ རྡོ་རྗེ་སློབ་དཔོན་ཀུན་ལེགས་མཆོག་གིས་དགེ་སློང་ཞལ་གྲངས་༢༠༠ དེ་ཅིག་ལུ་ དགེ་ཚུལ་གྱི་སྡོམ་པ་གནང་ཡོདཔ་ཨིན་པས།
དེ་ཡང་ ཐིམ་ཕུ་ རྟ་མགོ་མཐོ་རིམ་བཤད་གྲྭ་དང་ མདོ་སྡེ་བྲག་བཤད་གྲྭ་ བདེ་ཆེན་ཕོ་བྲང་སློབ་གྲྭ་ སྤང་རི་ཟམ་པའི་བཤད་གྲྭ་ སེམས་རྟོགས་ཁ་གྲྭ་ཚང་དང་ སྤུ་ན་ཁ་ ན་ལནྜ་བཤད་གྲྭ་ དེ་ལས་ སྤ་རོ་གསང་ཆོས་འཁོར་བཤད་གྲྭའི་ དགེ་སློང་ཚུ་ཡོདཔ་ཨིན་པས།

རྡོ་རྗེ་སློབ་དཔོན་ཀུན་ལེགས་མཆོག་གིས་ སྡོམ་པ་གནང་པའི་བསྒང་།

ས་མཚམས་ལས་ཕར་ འགྲོ་འགྲུལ་འབད་ནི་དེ་ དཀའ་ངལ་ཅན་ཅིག་ཨིནམ།

༢༠/༧/༢༠༡༢   ༉ ཨ་སམ་གྱི་ གཞུང་ལམ་བདའ་སྟེ་ བསམ་གྲུབ་ལྗོངས་མཁར་དང་ ཕུན་ཚོགས་གླིང་ ངང་ལམ་ དེ་ལས་ དགེ་ལེགས་ཕུག་ལུ་འགྱོ་མི་ འབྲུག་པའི་སྒེར་འཁོར་བཏང་མི་ཚུ་གིས་ འཕྲལ་ཁམས་ཅིག་ལས་ ཁོང་རའི་ སྒེར་འཁོར་བཀོག་བཞག་སྟེ་ གླ་འཁོར་དང་ ཡང་ཅིན་ མི་མང་སྐྱེལ་འདྲེན་བཱསི་ཚུ་ནང་ འཛུལ་འགྱོ་དོ་ཡོདཔ་ཨིན་པས།
དེ་སྦེ་ འགྱོ་དགོ་མི་དེ་ཡང་ ས་མཚམས་ཀྱི་ ཁྲོམ་ཚོགས་ཚུ་ནང་ གཞུང་ལམ་ཚུ་ ཆུ་གིས་ མེདཔ་བཏང་མི་ལུ་བརྟེན་ཏེ་ཨིན་པས།

བསམ་གྲུབ་ལྗོངས་མཁར་ལུ་ ཚོད་བསྲེ་ཚུ་ ས་མཚམས་ཁྲོམ་སྡེ་ལས་ར་ ཉོ་དོ་ཡོདཔ།

བསམ་གྲུབ་ལྗོངས་མཁར་ཁྲོམ་ནང་ བཀྲམ་བཞག་མི་ ཚོད་བསྲེ་ཚུ།

༢༠/༧/༢༠༡༢   ༉ རྒྱལ་ཁབ་ནང་ རྒྱ་གར་གྱི་ཏི་རུ་ རུ་པིའི་དཀའ་ངལ་ལུ་བརྟེན་ ཚོད་བསྲེའི་གོང་ཚད་ཡར་སེང་སོང་ཡོདཔ་ཨིན་རུང་ བསམ་གྲུབ་ལྗོངས་མཁར་གྱི་ མི་སེར་ཚུ་ བདུན་ཕྲག་གི་ ཚོད་བསྲེ་ཚུ་ ས་མཚམས་ཀྱི་ཁྲོམ་སྡེ་ ཨ་སམ་ད་རང་ག་ལས་ར་ ཉོ་བར་འགྱོ་དོ་ཡོདཔ་ཨིན་པས།

ལྟ་བཤལ་ལས་སྡེའི་གཞུང་ཁྲལ་ཡང་སེང་ལུ་ གྲོས་བཅུད་བྱུང་མ་ཚུགསཔ།

༢༠/༧/༢༠༡༢   ༉ འདས་པའི་བདུན་ཕྲག་ནང་ འབྲུག་ལྟ་བཤལ་ཚོགས་སྡེ་གིས་ ལྟ་བཤལ་པའི་དུས་ཚོད་སྐབས་ ཉིན་བསྟར་སྤྱོད་ཁྲལ་ ཡུ་ཨེས་ཌོ་ལར་༡༥ དང་ ལྟ་བཤལ་པའི་དུས་ཚོད་མེན་པའི་སྐབས་ སྤྱོད་ཁྲལ་ ཡུ་ཨེས་ཌོ་ལར་༡༠ རེ་ ཡར་སེང་འབད་དགོཔ་སྦེ་ཡོད་མི་ལུ་ ལྟ་བཤལ་པའི་ཚོང་ལཱ་འབད་མི་ཚུ་གིས་ ངོས་ལེན་འབད་མ་བཏུབ་ཨིན་པས།

ས་ཚབ་སྤྲོད་ནི་ཨིན་མི་ལུ་ མི་སེར་ལས་ཉོགས་བཤད།

༡༩/༧/༢༠༡༢   ༉ འཕྲལ་ཁམས་ཅིག་ཁར་ སྤ་རོ་ ན་རྒྱ་རྒེད་འོག་ བེ་ཏི་ཁ་གཡུས་ཚན་གྱི་ ཁྱིམ་གུང་༣ ལུ་ ཝ་ན་ཁ་གཡུས་ཚན་ནང་ལས་ ས་ཚབ་སྤྲོད་ནིའི་དཔའ་བཅམ་མི་ལུ་ ཁེ་རྒུད་མ་བཏུབ་པར་ ཝ་ན་ཁ་དང་ ཉེ་འདབས་ཀྱི་ གཡུས་ཚན་ཚུ་ལས་ མི་སེར་གྱི་འཐུས་མི་༡༥ འབད་མི་སྡེ་ཚན་ཅིག་ ཐིམ་ཕུ་ལུ་ མི་དབང་མངའ་ཞབས་མཆོག་གི་ཞབས་སར་ བཅར་བར་ འོང་ཡོདཔ་ཨིན་པས།

ན་གཞོན་ཚུ་གི་ བསམ་སྤྱོད་ལེགས་བཅོས།

༡༩/༧/༢༠༡༢   ༉ གཞུང་གྲྭ་ཚང་དང་ ཤེས་རིག་ལྷན་ཁག་༢ ཀྱིས་ མཉམ་འབྲེལ་ཐོག་ལས་ འགོ་འདྲེན་འཐབ་མི་ གཞུང་གྲྭ་ཚང་གི་ གཙུག་ལག་སློབ་དཔོན་ བསམ་གཏན་རྡོ་རྗེ་གིས་ དབུ་ཁྲིད་ཐོག་ལས་ ཉིན་གྲངས་༡༠ དེ་ཅིག་གི་རིང་ མཐོ་རིམ་སློབ་གྲྭའི་སློབ་ཕྲུག་ སྡེ་ཚན་ཅིག་ལུ་ གནས་སྐོར་དང་འབྲེལ་བའི་ ཆོས་བཤད་ལས་རིམ་ཅིག་ འགོ་འདྲེན་འཐབ་མི་དེ་ ཁ་ཙ་ མཇུག་བསྡུ་ཡི།

གཙུག་ལག་སློབ་དཔོན་ བསམ་གཏན་རྡོ་རྗེ་དང་ དགེ་འདུ་ཚོང་རིག་མཐོ་རིམ་སློབ་གྲྭའི་ སློབ་ཕྲུག་ཚུ་ བུམ་ཐང་སྟང་རི་མོ་ཅན་ལུ་ གནས་སྐོར་རྐྱབ་པའི་སྐབས།