གཏེར་སྟོན་པདྨ་གླིང་པ་གིས་ བུམ་ཐང་གཏམ་ཞིང་ལུ་ གཏེར་སྦ་བཞག་མི་ གནས་རྡོ་༤ ཡོད་པའི་གྲས་ལས་༡། |
རྫོང་ཁག་སྲོལ་འཛིན་འགོ་དཔོན་ངོ་ཚབ་ ཀུན་བཟང་གིས་ བཤད་དོ་བཟུམ་འབད་བ་ཅིན་ སྲོལ་འཛིན་ལས་ཁུངས་ལས་ ཡི་གུ་ལྷོད་དེ་ གཏམ་ཞིང་དང་ དཀོན་མཆོག་གསུམ་ལྷ་ཁང་གི་བར་ན་ཡོད་པའི་ གནས་རྡོ་ཚུ་ ངོས་འཛིན་འབད་ནིའི་དོན་ལུ་ གྲྭ་ཚང་གི་ངོ་ཚབ་དང་ གཏམ་ཞིང་ལྷ་ཁང་གི་ ངོ་ཚབ་ཚུ་དང་གཅིག་ཁར་ བདེན་དཔྱད་འབད་བའི་སྐབས་ལུ་ གནས་རྡོ་ཚུ་ ངོས་འཛིན་འབད་ཚུགས་ཅི་ཟེར་ཨིན་པས།
གཏམ་ཞིང་ལྷ་ཁང་གི་ མཆོད་དཔོན་བགྲེསཔ་ ཀུན་དགའ་གིས་ སླབ་དོ་བཟུམ་འབད་བ་ཅིན་ གནས་རྡོ་༤ ཡོད་པའི་གྲས་ལས་ སྦོམ་ཤོས་དེ་ནང་ མ་མོ་ངག་གི་གསུང་འབུམ་ཚུ་ གཏེར་སྦེ་ སྦ་བཞག་ཡོད་པའི་སྐོར་ལས་ ལུང་བསྟན་ཀུན་གསལ་སྙིང་པོ་ ལེའུ་སུམ་ཅུ་པའི་ནང་ ཁ་གསལ་སྦེ་ འདུག་ཟེར་ཨིནམ་ད་ ཁ་རྒྱུན་ལས་ གཏེར་རྡོ་དེ་ནང་ གསེར་གྱི་དུང་ཚུ་ཡང་ཡོདཔ་སྦེ་ སླབ་སྲོལ་འདུག་ཟེར་ཨིན་པས།
གཏེར་རྡོ་སྦོམ་གྱི་འོག་ལུ་ ད་རུང་ གནས་རྡོ་ཡོད་མི་དེ་ནང་ གཏེར་སྟོན་པ་ཁོ་ར་དང་ ཆོས་སྲུང་དམ་ཅན་རྡོ་རྗེ་ལེགས་པའི་ ཞབས་རྗེས་༤ མཇལ་ནི་ཡོད་མི་དེ་ཡང་ པདྨ་གླིང་པ་ཁོ་ར་ ས་གནས་དེ་ནང་ལས་ གཏེར་བཞེས་ནི་གི་ ལུང་བསྟན་ཡོདཔ་བཞིན་དུ་ གཏེར་བཞེས་པར་བྱོན་ཏེ་ ས་ཁོངས་དེ་ནང་བཞུགསཔ་ད་ ཆོས་སྲུང་དེ་གིས་ གཏེར་དེ་ ད་ལྟོ་ཡོད་མི་ གནས་རྡོ་ཚུ་གི་ལྟག་ལུ་ བྱག་ཅིག་གུ་ཡོདཔ་སྦེ་ སྟོན་བྱིན་པའི་ཤུལ་ཨིན་ཟེར་ཨིན་པས།
གནས་རྡོ་ཚུ་ གཏམ་ཞིང་དང་ དཀོན་མཆོག་གསུམ་ལྷ་ཁང་༢ ཀྱི་བར་ན་ཡོད་མི་ ཆུ་འཁོར་མ་ཎི་གི་ ལྟག་ལུ་ཡོད་དེ་འབད་རུང་ གནས་ཚུ་གི་སྐོར་ལས་ ས་གནས་ནང་གི་ མི་ཚུ་གིས་མ་གཏོགས་ མི་མང་ཤོས་ཅིག་གིས་ མི་ཤེས་དོ་ཡོདཔ་ཨིན་པས།
རྫོང་ཁག་སྲོལ་འཛིན་འགོ་དཔོན་ངོ་ཚབ་ ཀུན་བཟང་གིས་ སླབ་དོ་བཟུམ་འབད་བ་ཅིན་ གནས་རྡོ་ཚུ་ ཡ་མཚན་ཆེ་བའི་ཁར་ ཇར་མ་ནི་གི་ མའི་ཀཱལ་ ཧའུ་སར་གྱིས་བཏང་མི་ ཡི་གུ་དང་ མཐུནམ་སྦེ་ཡོད་ནི་དེ་གིས་ རྫོང་ཁག་བདག་སྐྱོང་དང་འབྲེལ་བ་འཐབ་སྟེ་ ཉམས་སྲུང་འབད་ནི་ཨིན་ཟེར་ཨིན་པས།
མའི་ཀཱལ་ ཧའུ་སར་གྱིས་ དྲགོས་ཀརྨ་ཨུ་ར་ལུ་བསྐྱལ་མི་ ཡི་གུ་དང་འཁྲིལ་བ་ཅིན་ ས་གནས་དེ་ནང་ ཡ་མཚན་ཅན་གྱི་ གནས་རྡོ་ཚུ་ཡོད་དེ་འབད་རུང་ མི་མང་ཤོས་ཀྱིས་ དེ་གི་སྐོར་ལས་ ལེགས་ཤོམ་སྦེ་ ཤེས་མི་མེདཔ་ལས་ མ་འོངས་པའི་ནང་ མི་ཚུ་གིས་ ཁྱིམ་རྐྱབ་ནིའི་དོན་ལུ་ རྡོ་ཚུ་ལག་ལེན་འཐབ་ནི་གི་ ཉེན་ཁ་ཡོདཔ་ལས་ ད་ལྟོ་ལས་ར་ ཉམས་སྲུང་འབད་དགོཔ་འདུག་ཟེར་ཨིན་པས།
ཁོ་གིས་ གནས་རྡོ་སྦོམ་དེ་ཁར་ དང་ཕུ་འབད་བ་ཅིན་ ལོ་ཐོག་ཚུ་བཏབ་ད་ དུས་ཚོད་ཤེས་ནིའི་་དོན་ལུ་ ལག་ལེན་འཐབ་དོ་ཡོདཔ་འོང་ནི་མས་ཟེར་ཨིནམ་ད་ དེ་ཡང་ གནས་རྡོ་དེ་ཁར་ ཕྱོགས་༤ གི་དབྱེ་བ་ཚུ་ སྟོན་ནི་འདུག་ཟེར་ཨིན་པས།
སྲོལ་འཛིན་འགོ་དཔོན་ངོ་ཚབ་ཀྱིས་ གནས་རྡོ་ཚུ་ ཉམས་སྲུང་འབད་ཐབས་དང་ མི་མང་གིས་ ཤེས་རྟོགས་འབྱུང་ཐབས་ལུ་ འཕྲལ་མགྱོགས་ར་ རཝ་རྐྱབ་སྟེ་ བརྡ་བྱང་ཚུ་ཡང་ བཟོ་ནི་ཟེར་ ཨིན་པའི་གནས་ཚུལ།
བཀྲ་ཤིས་བསྟན་འཛིན།
No comments:
Post a Comment