མི་མང་གི་བསམ་འཆར།

༧/༢/༢༠༡༣   ཕྱི་ཁའི་ན་གཞོན་ཚུ་གིས་ གསུང་སྐད་འགྲན་བསྡུར་ནང་ བཅའ་མར་གཏོགས་མི་དེ་ འོས་འབབ་འདུག་ག?

༉ འདས་པའི་ལོ་དག་པ་ཅིག་ལས་ཚུར་ རང་ལུགས་ཀྱི་ཞབས་ཁྲ་ གཞུང་སྒྲ་དང་ འབོད་སྒྲ་ རིག་གསར་ཚུ་ མི་ཉམས་གོང་འཕེལ་གཏང་ནིའི་དོན་ལུ་ དང་འདོད་ཅན་གྱི་ སྒེར་སྡེ་ཚུ་གིས་ ན་གཞོན་ཚུ་གི་དོན་ལུ་ གསུང་སྐད་འགྲན་བསྡུར་ལས་རིམ་ འགོ་འདྲེན་འཐབ་མི་དེ་ལུ་ འབྲུག་མི་དྲག་ཞན་ཆེ་ཆུང་མེདཔ་ ཆ་མཉམ་ར་ ངལ་རངས་བྱུངམ་མ་ཚད་ བཀའ་དྲིན་དགའ་ཚོར་སྦོམ་ཡོད་ཟེར་ཞུ་ནི།
འདས་པའི་ཚོར་སྣང་བྱུང་མི་དང་འཁྲིལཝ་ད་ དང་པ་ ཞབས་ཁྲའི་དྲང་དཔོན་ཚུ་ ཁོང་ར་འབད་རུང་ སྐད་ལེགས་ཤོམ་ཡོད་པའི་ཁར་ ཉམས་མྱོང་ཅན་གྱི་ མཁས་མཆོག་ཙང་ཙ་ཨིནམ་ལས་ ཞབས་ཁྲ་འཐེན་མི་ ན་གཞོན་ཚུ་ལུ་ ཞབས་ཁྲའི་གདངས་དང་ ཚིག་གི་སྐོར་ལས་ སྐྱོན་དང་ཡོན་ཏན་ཚུ་ དབྱེ་བ་དཔྱད་ཞིནམ་ལས་ ལམ་སྟོན་དང་ བཀོད་རྒྱ་ཚུ་ མ་བཏུབ་བཏུབ་སྦེ་ བྱིན་མི་ལུ་བརྟེན་ ན་གཞོན་ཚུ་ཡང་ ཞབས་ཁྲ་འཐེན་ནི་ལུ་ ལྕོགས་གྲུབ་ཅན་ཙང་ཙ་འོངམ་མས་ཟེར་ཞུ་ནི།
གཉིས་པ་ཟེརཝ་ད་ ང་བཅས་རའི་ སྒྲིག་ལམ་རྣམ་གཞག་གི་ ཁ་ཐུག་ལས་འབད་རུང་ ཐ་ན་ བྱོན་ཞུ་འབད་ཐངས་ལས་ འགོ་བཙུགས་ཏེ་ གོ་ལ་གྱོན་ཐངས་དང་ ཁ་སླབ་ཐངས་ཚུ་ ཧེ་མ་ག་ཅི་ཡང་ མ་ཤེས་ཏེ་འབད་རུང་ གསུང་སྐད་འགྲན་བསྡུར་གྱི་ ལས་རིམ་ལུ་བརྟེན་ ན་གཞོན་ཚུ་ བྱ་སྤྱོད་ཟབ་ཏོག་ཏོ་འགྱོ་སར་མཐོངམ་ལས་ ཕམ་ཚུ་ཡང་ ངལ་རངས་བསྐྱེད་ནི་དང་གཅིག་ཁར་ གཞན་གྱི་གདོང་ཁར་ དཔའ་ཉམས་བྱུང་སྟེ་ ཡོད་ཟེར་ཞུ་ནི།
དེ་འབདཝ་ལས་ གནམ་དགུན་གྱི་དུས་ཚོད་ལུ་ སློབ་གྲྭའི་ངལ་གསོ་སྐབས་ དང་འདོད་ཅན་གྱི་ སྒེར་སྡེ་ཚུ་གིས་ སློབ་ཕྲུག་ཨ་ལུ་ཚུ་དང་ ན་གཞོན་ཚུ་གི་དོན་ལུ་ གསུང་སྐད་འགྲན་བསྡུར་གྱི་ལས་རིམ་ འགོ་འདྲེན་འཐབ་གནང་མི་དེ་ ག་ཅི་དེས་ འོས་འབབ་ཆེ་བའི་ཁར་ རིག་རྩལ་ཡར་དྲག་གཏང་ནིའི་ ལྷན་ཐབས་ཅིག་ཨིནམ་ལས་ མ་འོངས་པ་ལུ་ཡང་ སྣང་མེད་སྐྱུར་ཏེ་ བཀོ་མ་བཞག་པར་ འཕྲོ་མཐུད་དེ་ར་ འགོ་འདྲེན་འཐབ་གནང་དགོཔ་འདུག་ཟེར་ཞུ་ནི།
ཨིན་རུང་ དུས་ཅི་ལས་ གསུང་སྐད་འགྲན་བསྡུར་གྱི་ལས་རིམ་ནང་ སྔར་མེད་པའི་ལམ་ལུགས་ཅིག་ འགོ་བཙུགས་མི་ལུ་བརྟེན་ མི་སྡེ་ཚུ་ནང་ སྤྱིར་བཏང་ལོ་རྒྱུས་སླབ་སར་གོཝ་ད་ དུམ་གྲ་ཅིག་ འོས་འབབ་མེད་པའི་ སྐྱོན་བརྗོད་འབདཝ་མས་ཟེར་ཞུ་ནི།
དེ་ཡང་ ག་འཆརཔ་ཟེར་བ་ཅིན་ མ་གཞི་ ཕྱི་ཁའི་ན་གཞོན་ཚུ་གིས་ གསུང་སྐད་འགྲན་བསྡུར་ནང་ བཅའ་མར་གཏོགས་མི་དེ་ལུ་ལྟཝ་ད་ རང་ལུགས་ཀྱི་ ལམ་སྲོལ་ལུ་ བརྩི་མཐོང་བསྐྱེད་པའི་ རྟགས་མཚན་བཟང་པོ་ཅིག་ཨིནམ་ལས་ བྱོན་ལེགས་ཡོད་ཟེར་ཞུ་ནི།
དེ་འབདཝ་ད་ ཞབས་ཁྲ་འཐེནམ་ད་ རང་ལུགས་ཀྱི་ཞབས་ཁྲ་ གཞུང་སྒྲ་དང་ འབོད་སྒྲ་ རིག་གསར་ཚུ་མེན་པར་ ཁོང་རའི་ ཏ་ཝང་གི་ ཞབས་ཁྲའི་ཚིག་དང་ གདངས་དབྱངས་ཚུ་གི་ཐོག་ལས་ འཐེན་པའི་ཁར་ གྱོན་ཆས་འབད་རུང་ དོརམ་དང་ཁེན་འཇར་གྱོན་ཏེ་ འབྲུག་གི་ རྒྱང་མཐོང་ཊི་བི་ནང་ཐོནམ་ད་ འདི་ རང་ལུགས་ཀྱི་ལམ་སྲོལ་ ཡར་དྲག་བཏངམ་ཨིན་ན?
རང་ལུགས་ཀྱི་ ལམ་སྲོལ་ལས་རིམ་ཨིན་པ་ཅིན་ ཉག་རྐྱང་སྦེ་ར་ འགོ་འདྲེན་འཐབ་ནི་དང་ གཞན་ལུགས་ཀྱི་ ལམ་སྲོལ་ལས་རིམ་ཨིན་པ་ཅིན་ གཞན་གྱི་བཟུམ་སྦེ་ འགོ་འདྲེན་འཐབ་པ་ཅིན་ མི་དྲག་ག?
དེ་མིན་པ་ཅིན་ ན་གཞོན་ཚུ་ རིག་པའི་སྒོ་རྒྱས་པའི་དུས་ཚོད་ལུ་ ལམ་སྲོལ་སླ་བསྲེས་པའི་ལས་རིམ་ཚུ་ འགོ་འདྲེན་འཐབ་པ་ཅིན་ རང་གི་ལམ་སྲོལ་བྱང་ནིའི་ཉེན་ཁ་དང་ གཞན་གྱི་ལམ་སྲོལ་མ་ཤེས་པར་ མགུ་འཐོམ་འབྱུང་པའི་ ཚ་གྱང་ཡོདཔ་ལས་ ག་ར་འབད་རུང་ ཐུགས་ཁར་ངེས་གནང་ཟེར་བའི་ བསམ་བཀོད་ཞུཝ་ཨིན།

ཀུན་དགའ་རྣམ་རྒྱལ། ཐིམ་ཕུ་ ལྕང་ཟམ་ཏོག།