གློག་མེ་ལྷོད་མི་ལུ་བརྟེན་ སློབ་ཕྲུག་ཚུ་ལུ་ ཕན་ཁྱད་སྦོམ་འབྱུང་ནི་ཨིན་པས།
 |
| གློག་མེའི་འགོ་འབྱེད་འབདཝ་ད་ ཁྲུས་གསོལ་གནང་པའི་བསྒང་། |
༉ བཀྲིས་སྒང་རྫོང་ཁག་ སག་སྟེང་འབྲིང་རིམ་སློབ་གྲྭ་འོག་མའི་ སློབ་རིམ་༨ པའི་སློབ་ཕྲུག་ ལས་སྐྱིད་ཚེ་རིང་དེ་ ཤུལ་ལས་ མི་སྦོམ་ཅིག་ལུ་ འགྱུར་ནི་གི་ རེ་བ་ཡོད་མི་ལུ་བརྟེན་ ཕྱི་རུའི་ཆུ་ཚོད་༦ ཚུན་མིན་པར་ དེ་བ་མངམ་སྦེ་ ལྷབ་ཚུགས་པ་ཅིན་ཟེར་ ཨ་རྟག་ར་ མནོ་བསམ་བཏང་སྡོད་ཡོདཔ་ཨིན་པས།
དེ་ཡང་ བྱང་ཕྱོགས་ངྲུང་ཁག་དེ་ནང་ གློག་མེ་མེད་མི་ལུ་བརྟེན་ ཕྱི་རུའི་ཆུ་ཚོད་༦ ལས་ དཔེ་ཆ་ལྷབ་ནི་མེདཔ་ཨིན་པས།
ཨིན་རུང་ སྤྱི་ཟླ་༣ པའི་ཚེས་༢༨ ལས་ སག་སྟེང་ལུ་ གློག་མེ་བཀྲམ་སྤེལ་འབད་ཚར་མི་དང་བསྟུན་ ལས་སྐྱིད་ཚེ་རིང་གིས་གཙོས་པའི་ སག་སྟེང་གི་ མི་སེར་མང་རབས་ཅིག་གི་ མནོ་དོན་ཚུ་ འགྲུབ་ཚུགས་ནི་ཨིན་པས།
ད་རིས་འབདཝ་ད་ ང་བཅས་ཀྱི་ཁྱིམ་ནང་ གློག་མེ་ལྷོད་ཡོདཔ་ལས་ ང་གིས་ དཔེ་ཆ་ག་དེམ་ཅིག་ཚུན་ཚོད་ལྷབ་རུང་ ལྷབ་ཚུགས་ནི་ཨིནམ་ལས་ སེམས་དགའ་ཡི་ཟེར་ ལས་སྐྱིད་ཚེ་རིང་གིས་ བཤདཔ་ཨིན་པས།
ད་རུང་ སློབ་གྲྭ་དེ་གི་ སློབ་རིམ་༧ པའི་སློབ་ཕྲུག་ བཀྲིས་མཚོ་མོ་གིས་ སླབ་མིའི་ནང་ གློག་མེ་མེད་པའི་སྐབས་ སློབ་ཕྲུག་ཚུ་ ཁྱིམ་ནང་ལཱ་འབད་དགོཔ་ ལེ་ཤ་ཐོན་པའི་ཁར་ རེ་ཚེ་སྐབས་ ཐབ་ཤིང་འཐུ་བར་ འགྱོ་དགོཔ་ལས་ དཔེ་ཆ་ལྷབ་ནི་གི་ དུས་ཚོད་རན་པའི་བསྒང་ལས་ ནམ་སྲོ་ནི་ཡོད་ཟེར་ཨིན་པས།
དེ་མ་ཚད་ ཁྱིམ་ནང་བཞེས་སྒོ་འབད་ནིའི་དོན་ལུ་ ཐབ་ཤིང་ཚུ་ ལག་ལེན་འཐབ་མི་ལས་ དུ་པ་ཚུ་ཐོན་ཏེ་ མིག་ཏོག་ཚ་བའི་ཁར་ མེ་རབ་རིབ་ཅིག་ལས་ བཏེགས་ནི་མེད་མིའི་ནང་ དཔེ་ཆ་ལྷབ་ད་ དཀའ་ངལ་སྦོམ་འབྱུང་ནི་ཡོད་ཟེར་ མོ་གིས་ བཤདཔ་ཨིན་པས།
སློབ་གྲྭའི་སློབ་དཔོན་ སེངྒེ་དབང་ཕྱུག་གིས་འབད་བ་ཅིན་ ད་རེས་ གློག་མེ་ལྷོད་མི་ལུ་བརྟེན་ སློབ་ཕྲུག་ཚུ་ལུ་ ཕན་ཐོགས་སྦོམ་འབྱུང་ནི་དང་ ཤེས་ཡོན་གྱི་ གྲུབ་འབྲས་ཡང་ ཡར་དྲག་འགྱོ་འོང་ཟེར་ཨིནམ་ད་ ད་ཚུན་གྱི་བར་ན་ སློབ་ཕྲུག་ཚུ་གིས་ མེ་བཏེག་ནིའི་དོན་ལུ་ ས་མར་ཁུ་ལག་ལེན་འཐབ་དགོཔ་ལས་ ཕམ་ཚུ་ ས་མར་ཁུ་ཉོ་བར་ ལཱ་ཁག་སྦེ་ བཀྲིས་སྒང་ཚུན་ འགྱོ་མ་དགོ་པའི་ ཕན་ཐབས་ཡང་ཡོད་ཟེར་ཨིན་པས།
ཟད་འགྲོ་དངུལ་ཀྲམ་ས་ཡ་༣༥ གནས་མི་ གྲོང་གསེབ་གློག་མེ་ལས་འགུལ་དེ་གིས་ སག་སྟེང་གི་ ཁྱིམ་གུང་༣༤༢ དེ་ཅིག་ལུ་ ཕན་ཐོགས་འབྱུང་ནི་ཨིནམ་ད་ གློག་མེ་དེ་ རྒྱལ་ཡོངས་ཚོགས་འདུའི་ཚོགས་དཔོན་ འཇིགས་མེད་ཚུལ་ཁྲིམས་ཀྱིས་ འགོ་འབྱེད་གནང་ཡོད་པའི་གནས་ཚུལ།
No comments:
Post a Comment