བཀྲིས་ཕུན་ཚོགས།
༉ ད་ལས་ཕར་ གཞུང་འབྲེལ་བཅའ་སྒྲིག་ལམ་སྟོན་དཔེ་དེབ་ལུ་བརྟེན་ ཆེ་མཐོའི་འགོ་དཔོན་ཚུ་ རྫོང་ཁག་༢༠ ནང་ གཞུང་དོན་གཟིགས་སྐོར་དང་ སྐུ་མགྲོན་སྦེ་བྱོན་པའི་སྐབས་ བཅའ་སྒྲིག་ཚུ་རྐྱབ་ནིའི་དོན་ལུ་ ཧེ་མ་བཟུམ་སྦེ་ དཀའ་ངལ་མ་བྱུང་པར་ བྱ་སྟབས་བདེ་ནི་ཨིན་པས།
ནང་སྲིད་དང་སྲོལ་འཛིན་ལྷན་ཁག་འོག་གི་ སྒྲིག་ལམ་སྡེ་ཚན་ལས་ ཚེ་རིང་དཔལ་འབྱོར་གྱིས་ སླབ་མི་དང་འཁྲིལཝ་ད་ ད་རེས་ནངས་པ་ དུས་ཀྱི་འགྱུར་བ་དང་བསྟུན་ཏེ་ ཧེ་མའི་ བཅའ་ཡིག་དང་སྒྲིག་གཞི་ཚུ་ ལེགས་བཅོས་འབད་ཡི་ཟེར་ཨིནམ་ད་ རྫོང་ཁག་༢༠ ནང་ བཅའ་སྒྲིག་རྐྱབ་ཐངས་ཚུ་ གཅིག་མཚུངས་བཟོ་ནིའི་དོན་ལུ་ མཁས་མཆོག་ཚུ་དང་ ཉམས་མྱོང་ཅན་ཚུ་གིས་ གྲོས་བསྟུན་ཐོག་ བསྒྱུར་བཅོས་འབད་མི་དེ་ ལྷན་རྒྱས་གཞུང་ཚོགས་ཀྱིས་ གྲོས་ཐག་བཅད་གནང་ཡི་ཟེར་ཨིན་པས།
གཞུང་འབྲེལ་བཅའ་སྒྲིག་གི་ དམིགས་ཡུལ་དེ་ཡང་ རྫོང་ཁག་སོ་སོའི་ གནས་སྟངས་དང་འཁྲིལ་ཏེ་ མཐུན་རྐྱེན་གཅིག་མཚུངས་མེད་པའི་ དཀའ་ངལ་བསལ་ནི་དང་ ཕྱི་ལས་བྱོན་མི་སྐུ་མགྲོན་དང་ རྫོང་ཁག་ནང་བཅའ་སྒྲིག་རྐྱབ་མི་༢ ཀྱི་བར་ན་ གོ་བ་བརྡ་ལོག་མ་འགྱོ་བར་ ཐུགས་མཐུན་ཁྲིམས་གཙང་ཐོག་ལུ་ གནས་ཚུགསཔ་བཟོ་ནི་ དེ་ལས་ རྫོང་ཁག་ནང་ ཐོབ་ཚད་ལས་ལྷག་པའི་ བཅའ་སྒྲིག་རྐྱབ་སྟེ་ མི་སྟོབས་དང་ མ་དངུལ་ཚུ་ འཕྲོ་བརླག་འགྱོ་བའི་དཀའ་ངལ་ཚུ་ བསལ་ཐབས་འབད་ནི་ཨིན་པས།
དེ་བཟུམ་སྦེ་ གཞུང་ལྷན་སྡེ་གསུམ་གྱི་ ཆེ་མཐོའི་འགོ་དཔོན་ཡོངས་ལུ་ ཆགས་སྡང་ཕྱོགས་རིས་མེད་པར་ གུས་ཞབས་དང་བརྩི་བཀུར་གཅིག་མཚུངས་ ཞུ་ཚུགས་ནི་དང་ སྐུ་མགྲོན་ཚུ་ལུ་ ཐོབ་ཚད་ལས་ལྷག་པའི་ བཅའ་སྒྲིག་དང་འབྲེལ་བའི་དཀའ་ངལ་ཚུ་ཡང་ བསལ་ཚུགས་ནི་ཨིན་པས།
ཕྱིའི་བཅའ་སྒྲིག་སྐབས་ རྫོང་ཁག་ཚུ་ནང་ རྒྱལ་ཡོངས་དུས་ཆེན་དང་ དགའ་སྟོན་རྟེན་འབྲེལ་གྱི་ མཛད་སྒོ་ཚུ་ནང་ མི་དབང་རྒྱལ་བཙུན་ རྒྱལ་ཡུམ་ བརྒྱུད་འཛིན་གྱི་རྒྱལ་སྲས་ དཔོན་སློབ་ སྐུ་འཁོར་ བློན་ཆེན་ཚུ་དང་ སློབ་དཔོན་ལྔ་པོའི་རིགས་ དེ་ལས་བློན་པོའི་གོ་གནས་ཅན་ཚུ་ གཞུང་ཞབས་ཀྱི་སྐུ་ཚབ་སྦེ་འབྱོནམ་ད་ བཅའ་སྒྲིག་རྐྱབ་དགོཔ་ཨིན་པས།
དེ་ཡང་ རྫོང་ཁག་ཚུ་ནང་ རྟེན་འབྲེལ་གྱི་བཅའ་སྒྲིག་དང་ ཕེབས་བསུ་དང་ཞབས་སྐྱེལ་གྱི་རིམ་པ་ བསུ་བ་གསེར་སྦྲེང་དང་ ཆིབས་གྲལ་གྱི་རིམ་པ་ བཞུགས་གྲལ་ཕུན་སུམ་ཚོགས་པའི་རིམ་པ་ བླམ་གནས་བརྟན་དང་ རྫོང་བདག་ དྲང་དཔོན་ཚུ་ གསར་བསྐོས་དང་ གནས་སོར་སྐབས་ ཕེབས་བསུའི་རིམ་པ་ རྒཔོ་དང་ དམངས་མི་གསར་བསྐོས་ཀྱི་རིམ་པ་ ས་བསླང་རྟེན་འབྲེལ་ དེ་ལས་ འབུལ་བའི་རྣམ་གཞག་ཚུ་ ཚུལ་མཐུན་སྦེ་ བཟོ་ཡོདཔ་ཨིན་པས།
ཆིབས་གྲལ་རྒྱས་པའི་རིམ་པ་དེ་ གཞུང་འབྲེལ་བཅའ་སྒྲིག་དང་འཁྲིལཝ་ད་ རྒྱལ་ཡོངས་ཀྱི་ རྟེན་འབྲེལ་བརྩི་སྲུང་ཞུ་བའི་སྐབས་ ཆིབས་གྲལ་བསྒྲིག་ཐང་གི་ རིམ་པ་དེ་ཡང་ དང་པ་ར་ རྟ་དཀརཔོ་ བང་རྔ་རྡུང་མི་ ཀྲིང་ཀྲིང་རྡུང་མི་ བོད་ཀྱི་རྒྱ་གླིང་ ཕྱོགས་དར་ བཙན་དར་ རུ་དར་ ལྷ་དར་རེ་རེ་དང་ དར་ཤིང་སྣ་ལྔ་ སྐུ་སྲུང་དམག་དར་ བསྟན་སྲུང་འགག་པའི་དར་དང་ རྒྱལ་དར་རེ་རེ་ དགྲ་ཆས་༡༡ གཞས་༡༡ དཔའ་འཆམ་ ཕོ་གཞས་ མོ་གཞས་ ཆོས་གཞས་༩ རྒྱང་རྔ་རྡུང་མི་ མཆོད་པའི་རྒྱ་གླིང་ ཕྱེ་ཕུར་རྒྱལ་མཚན་ཆ་རེ་ དགོཔ་ཨིན་པས།
དེ་བཞིན་དུ་ ཏིང་ཤག་༣ འཕན་གཡུག་མི་༣ ཚོགས་དུང་ཆ་དང་ དཀར་དུང་ཆ་རེ་རེ་ གསེར་རྔ་ཆ་༣ སིལ་སྙན་ རོལ་མོ་སྤོ་སང་ གསེར་རྔ་ཆ་རེ་རེ་དང་ རིག་མ་བཅུ་དྲུག་གི་ འཆམ་རོལ་པ་༡ དང་ འཆམ་པ་ཚུ་ འགོ་དཔོན་དང་དཔོན་ཁག་གི་རིགས་ མཆོད་པའི་རྒྱ་གླིང་ བསང་ཕོར་ སྤོས་ཕོར་རེ་རེ་དང་ རྟེན་ཁེབས་འབག་མི་ མནྜལ་ སྐུ་གསུང་ཐུགས་རྟེན་ རྫོང་རྔ་ ཆབ་ཤུབས་ ཁྲི་ཁེབས་ ཕྱག་བསིལ་ཕང་ཁེབས་ ཇ་དོམ་ སྦ་ཁྲ་ པྱི་ཏ་ལ་ སྐུ་དྲུང་རྟགས་རྐྱབ་མི་ བྱིས་པའི་དཔའ་བོ་ཚུ་ དགོཔ་ཨིན་པས།
དེའི་རྟིང་ཤུལ་ གཟིམ་དཔོན་ སྐུ་མགྲོན་གཙོ་བོ་ ཕད་ཅུང་ ན་བཟའ་འབག་མི་༤ སྐུ་སྲུང་ སྲུང་འཁོརཔ་ དེ་ལས་ བླ་སློབ་ཚུ་དགོཔ་ཨིན་པས།
འབྲུག་རྒྱལ་ཡོངས་ཀྱི་ ལམ་སྲོལ་དེ་ རྒྱལ་ཁབ་ཀྱི་རྩ་བ་༣ ལུ་ ངོ་རྟགས་ཐུན་མོང་མ་ཡིན་པ་ཅིག་ཨིནམ་ལས་ གཞུང་ལྷན་སྡེ་༣ གྱིས་གཙོས་པའི་ འབྲུག་མི་ཡོངས་ཀྱིས་ གཅིག་མཐུན་ཐོག་ལས་ ལག་ལེན་འཐབ་དགོཔ་བཞིན་དུ་ ཕྱི་ལས་བྱོན་མི་སྐུ་མགྲོན་དང་ ནང་ན་བཞུགས་མི་རྫོང་ཁག་གི་ གནསཔོ་ཚུ་གི་བར་ན་ ཐ་དམ་ཚིག་ལུ་ བསྲེ་ལྷད་མ་ཞུགས་པར་ རྟགས་དང་རྟེན་འབྲེལ་ཕུན་སུམ་འཚོག་ནིའི་དོན་ལུ་ གཞུང་འབྲེལ་བཅའ་སྒྲིག་བཟོ་ཡོད་མི་དེ་ འཕྲལ་མགྱོགས་ར་ རྫོང་ཁག་༢༠ ནང་ བཀྲམ་སྤེལ་འབད་ནི་ ཨིན་པའི་གནས་ཚུལ།
No comments:
Post a Comment