 |
| ཐའི་ལེནཌི་གི་ རྒྱལ་སྤྱི་གོང་འཕེལ་མཉམ་འབྲེལ་ལས་སྡེའི་ ཡོངས་ཁྱབ་མདོ་ཆེན་ངོ་ཚབ་ སུ་ཅ་ད་ཐའི་ བཱུན་གྱིས་ ཤེས་རིག་དྲུང་ཆེན་ སངས་རྒྱས་བཟང་མོ་ལུ་ དངུལ་འཛིན་ཅེག་ རྩིས་སྤྲོད་འབད་བའི་བསྒང་། |
ཤེས་རབ་བསྟན་འཛིན།
༉ སྤྱི་ཟླ་༣ པའི་ཚེས་༢༨ ལུ་ ཐའི་ལེནཌི་རྒྱལ་པོའི་སྲསམོ་ མ་ཧཱ་ ཅག་རི་ ཤི་རིན་ཧཱོན་ལས་འགུལ་ཡིག་ཚང་གིས་ འབྲུག་གི་ སློབ་གྲྭའི་སོ་ནམ་ལས་འགུལ་གྱི་ གྲོགས་རམ་དོན་ལུ་ དངུལ་འཛིན་ཅེག་ ཡུ་ཨེས་ཌོ་ལར་༤༠,༥༤༩.༠༧ གྲོགས་རམ་གནང་མི་དེ་ ཐའི་ལེནཌི་གི་ རྒྱལ་སྤྱི་གོང་འཕེལ་མཉམ་འབྲེལ་ལས་སྡེའི་ ཡོངས་ཁྱབ་མདོ་ཆེན་ངོ་ཚབ་ སུ་ཅ་ད་ཐའི་ བཱུན་གྱིས་ ཤེས་རིག་དྲུང་ཆེན་ སངས་རྒྱས་བཟང་མོ་ལུ་ རྩིས་སྤྲོད་འབད་ཡི།
གྲོགས་རམ་གྱི་ དམིགས་གཏད་ངོ་མ་ར་ འབྲུག་པའི་ཨ་ལུའི་གནས་སྟངས་ ཡར་དྲག་གཏང་ནི་དང་ རྒྱལ་ཁབ་༢ ཀྱི་བར་ན་ སོ་ནམ་དང་འབྲེལ་བའི་ རིག་པ་བརྗེ་སོར་འབད་ནི་ སློབ་དཔོན་ཚུ་གིས་ སློབ་གྲྭ་ཁག་ལས་ཕར་ སོ་ནམ་རིག་པ་གཞི་བཙུགས་འབད་ནི་ དེ་ལས་ སློབ་གྲྭ་ནང་ དཔེ་ཆ་རྐྱངམ་གཅིག་མེན་པར་ གཞན་རིག་པ་མ་འདྲཝ་ཚུ་ ཡར་དྲག་གཏང་ནིའི་དོན་ལུ་ཨིན་པས།
གྲོགས་རམ་མ་དངུལ་དེ་ འགོ་ཐོག་ལུ་ སློབ་གྲྭ་༣ གདམ་འཐུ་འབད་མི་ཚུ་ལུ་ བགོ་བཤའ་རྐྱབ་ནི་ཨིནམ་ད་ དེ་ཡང་ ཐིམ་ཕུ་དགེ་བསྙེན་ཁ་འབྲིང་རིམ་སློབ་གྲྭ་འོག་མ་ལུ་ ཡུ་ཨེས་ཌོ་ལར་༡༤,༩༣༧.༥༦ དང་ སྤ་རོ་ཝ་ན་ཁ་འབྲིང་རིམ་སློབ་གྲྭ་འོག་མ་ལུ་ ཡུ་ཨེས་ཌོ་ལར་༩,༩༦༡.༡༠ དེ་ལས་ པདྨ་དགའ་ཚལ་ གཡུ་རུང་འབྲིང་རིམ་སློབ་གྲྭ་འོག་མ་ལུ་ ཡུ་ཨེས་ཌོ་ལར་༡༥,༦༥༠.༤༠ བྱིན་ནི་ཨིན་པས།
སློབ་གྲྭའི་ཤེས་རིག་ལས་ཁུངས་ཀྱི་ ལས་རིམ་འགོ་དཔོན་གོངམ་ བྲེ་སྲང་རྡོ་རྗེ་གིས་ སླབ་མིའི་ནང་ ད་ལྟོ་ མོ་བཏབ་བཟུམ་ཅིག་སྦེ་ སློབ་གྲྭ་༣ གདམ་འཐུ་འབད་མི་དང་འབྲེལ་ མ་དངུལ་ཡང་ ཁོང་གིས་ གྲོས་འཆར་བཀོད་མི་དང་འཁྲིལ་ཏེ་ བྱིན་ནི་ཨིནམ་ད་ དེ་ཡང་ ལྡུམ་རའི་ར་བ་རྐྱབ་ནི་དང་ ལྕངམ་འཛུགས་སྐྱོང་ཁང་རྐྱབ་ནི་ ཆུ་གཡུར་བཟོ་ནི་ ཕགཔ་གསོ་ཁང་ལ་སོགས་པའི་དོན་ལུ་ཨིན་ཟེར་ཨིན་པས།
ཁོ་གིས་ སླབ་མིའི་ནང་ སློབ་གྲྭ་༣ གདམ་འཐུ་རྐྱབ་དགོ་མི་དེ་ཡང་ ཕམ་ཉམ་ཆུང་གི་ཨ་ལུ་ ལེ་ཤ་ཡོད་ནི་དེ་གིས་ཨིནམ་ད་ གཡུ་རུང་བཟུམ་ཅིག་འབད་བ་ཅིན་ འདི་བཟུམ་མིའི་ སློབ་གྲྭའི་སོ་ནམ་ལས་རིམ་དེ་ ཧེ་མ་ལས་ སྦྱོང་བརྡར་འབད་དེ་ཡོད་ནི་དེ་གིས་ ཨིན་ཟེར་ཨིནམ་ད་ ཐིམ་ཕུ་རྫོང་ཁག་གི་ སློབ་གྲྭ་ནང་འབད་བ་ཅིན་ ཕམ་ཉམ་ཆུང་གྱི་ སློབ་ཕྲུག་ཡོད་པ་གིས་མ་ཚད་ གྲོགས་རམ་གནང་མི་ རྒྱལ་པོའི་སྲསམོ་ འབྲུག་ལུ་གཟིགས་སྐོར་ནང་བྱོན་ནིའི་ འཆར་གཞི་ཡོདཔ་ལས་ ཐིམ་ཕུ་དང་ སྤ་རོ་༢ པོ་དེ་ ས་གོ་སྟབས་བདེ་ནི་དེ་གིས་ ཨིན་ཟེར་ཨིན་པས།
ད་ལྟོ་ སློབ་གྲྭའི་སོ་ནམ་ལས་འགུལ་ནང་ སྦྱོང་བརྡར་འབད་མི་ སློབ་གྲྭ་༡༧༥ ཡོདཔ་ཨིན་པའི་གནས་ཚུལ།
No comments:
Post a Comment