གཟིགས་གནང་མི་ལུ་བཀའ་དྲིན་ཆེ།

༉ ང་བཅས་ཀྱིས་ ཉིན་བསྟར་བཞིན་དུ་

ཡོངས་འབྲེལ་འཆར་སྒོ་འདི་ནང་

གནས་ཚུལ་ཚུ་ དུས་མཐུན་བཟོ་སྟེ་ གསལ་བཀོད་འབདཝ་ཨིན།

We update at the earliest possible for you!

རྫོང་ཁའི་གནས་ཚུལ་གཟིགས་ དུས་མཐུན་ཞུགས་ཚུགས།

འབྲུག་གིས་ འཛམ་གླིང་ཕྱོགས་རིས་མེད་པའི་ཚོགས་སྡེའི་ ཞལ་འཛོམས་ནང་གྲལ་གཏོགས།

༣༡/༨/༢༠༡༢   ༉ བློན་ཆེན་འཇིགས་མེད་འོད་ཟེར་འཕྲིན་ལས་མཆོག་གིས་ འཛམ་གླིང་ཕྱོགས་རིས་མེད་པའི་ཚོགས་སྡེའི་ ཞལ་འཛོམས་ཐེངས་༡༦ པའི་ནང་ བཅའ་མར་གཏོགས་ནིའི་དོན་ལུ་ ཁ་ཉིནམ་ ཨི་རཱན་གྱི་རྒྱལ་ས་ ཏཱེ་རཱན་ལུ་ ལྷོདཔ་ཅིག་ར་ ཨི་རཱན་གྱི་སྲིད་འཛིན་ མཱ་མཱུཌ་ ཨཱ་མ་དི་ནི་ཇེཌ་དང་གཅིག་ཁར་ མཇལ་ཕྲད་གནང་ཡོདཔ་ཨིན་པས།
བློན་ཆེན་འཇིགས་མེད་འོད་ཟེར་འཕྲིན་ལས་མཆོག་དང་ ཨི་རཱན་གྱི་སྲིད་འཛིན་ མཱ་མཱུཌ་ ཨཱ་མ་དི་ནི་ཇེཌ་གིས་ མཇལ་ཕྲད་གསུང་གྲོས་གནང་པའི་བསྒང་།

སྲོས་རྒེད་འོག་གི་ ཕྱགས་སྙིགས་ཚུ་ ཐིམ་ཕུ་ལུ་བཙོང་ཡོདཔ།

༣༡/༨/༢༠༡༢   ༉ སྲོས་དང་ ནཱ་རོ་ གླིང་བཞི་ལ་སོགས་པའི་ ས་ཁ་མཐོ་སའི་ ས་གནས་ཚུ་ནང་ དབྱར་རྩྭ་དགུན་འབུབ་ བསྡུ་བསྒྱོམ་འབད་མི་དང་ ལྟ་བཤལ་དང་ ལ་བཤལ་ནང་ འགྱོ་མི་ཚུ་གིས་ ཕྱགས་སྙིགས་ཚུ་ ག་ལྷོད་བཀོག་བཞག་སྟེ་ ཁམས་ལོག་སི་སི་བཟོ་བའི་ ཉོགས་བཤད་ཚུ་ བཀོད་ཡོདཔ་ཨིན་རུང་ ད་ལས་ཕར་ ས་གནས་ཚུ་ ཧིང་སངས་ས་སྦེ་ བཞག་ཚུགས་པའི་ གོ་སྐབས་ཡོདཔ་ཨིན་པས།
སྲོས་རྒེད་འོག་ནང་ ཕྱགས་སྙིགས་ཚུ་ བསྡུ་བསྒྱོམ་འབད་བའི་བསྒང་།

དབྱར་རྩྭ་དགུན་འབུབ་ཚུ་ གཞན་གྱི་ས་ཁོངས་ནང་ལས་ བསྡུ་བསྒྱོམ་འབད་བའི་ཚ་གྱང་།

༣༡/༨/༢༠༡༢   ༉ ཁ་ཙ་ དབང་འདུས་ཕོ་བྲང་རྫོང་ཁག་ཚོགས་འདུ་ཐེངས་༤ པ་འཚོགས་པའི་སྐབས་ གནད་དོན་གཙོ་བོ་ཅིག་ དབྱར་རྩྭ་དགུན་འབུབ་བསྡུ་བསྒྱོམ་འབད་མི་ཚུ་གིས་ རང་སོའི་རྫོང་ཁག་དང་ རྒེད་འོག་གི་ བཅད་མཚམས་ནང་མིན་པའི་ ས་ཁོངས་གཞན་ཚུ་ནང་ཡང་ ཧམ་འཛུལ་འབད་བའི་སྐོར་ གྲོས་བསྡུར་བྱུང་ཡི།

སང་ཕོད་ལས་ སྐྱེངས་མཁར་རྒེད་འོག་ནང་ གློག་མེའི་ཞབས་ཏོག་ལྷོད་ནི།

༣༡/༨/༢༠༡༢   ༉ སྐྱེས་ལོ་༡༣ ལང་མི་རྡོ་རྗེ་(མིང་ངོ་མ་མེན་)དེ་ ཡུ་ལྡི་རི་མི་སྡེ་སློབ་གྲྭའི་ སློབ་ཕྲུག་ཅིག་ཨིནམ་ད་ ཁོ་ར་ དཔེ་ཆ་ལྷབ་མ་ཚུགས་པའི་ཁར་ འཕྲལ་འཕྲལ་སྦེ་ར་ སློབ་དཔོན་གྱིས་ ཁོ་ལུ་ ཚོགས་བརྡ་བཏང་པའི་སྐབས་ ཁོ་རའི་ཁྱིམ་ནང་ གློག་མེ་ལྷོད་པ་ཅིན་ དཔེ་ཆ་ལེགས་ཤོམ་སྦེ་ ལྟ་ཚུགས་ནི་ཨིན་པའི་ མནོ་བསམ་བཏང་དོ་ཡོདཔ་ཨིན་པས།
སྐྱེངས་མཁར་རྒེད་འོག་ནང་ལྷོད་མི་ གློག་མེ་བཀྲམ་སྤེལ་གྱི་ གློག་ཐག་དང་ ཀཝ་ཚུ།

གནས་ཚུལ་མདོར་བསྡུས།

༣༡/༨/༢༠༡༢

བུམ་ཐང་ ལྕམ་མཁར་ཁྲོམ་གྱི་ འཁོར་ལམ་ཚུ་བདའ་སྟེ་ ནོར་ཚུ་ བདག་མེད་སྦེ་ བཏང་བཞག་པའི་མཐོང་སྣང་།

ཟངས་མདོག་དཔལ་རི་ལྷ་ཁང་གི་ བདག་དབང་ག་ལུ་ཡོདཔ་ཨིན་ན?

༣༡/༨/༢༠༡༢    ༉ བསམ་གྲུབ་ལྗོངས་མཁར་གྱི་ རྫོང་ཁག་སྨན་ཁང་ཁ་ཐུག་ལུ་ཡོད་མི་  ཟངས་མདོག་དཔལ་རི་ལྷ་ཁང་དེ་ ཉམས་སྐྱོན་ཤོར་ཡོད་རུང་ ཁྲོམ་སྡེ་དང་ སྒེར་མི་ཅིག་གི་བར་ན་ ས་ཆའི་བདག་དབང་སྐོར་ ཉོགས་འཛིན་ཐོན་མི་ལུ་བརྟེན་ རྒྱུན་སྐྱོང་འཐབ་མ་ཚུགས་པར་ ལུས་ཏེ་ཡོདཔ་ཨིན་པས།
རྩོད་རྙོགས་ཅན་ལུ་གྱུར་མི་ བསམ་གྲུབ་ལྗོངས་མཁར་ པདྨ་དགའ་སྐྱིད་གླིང་ཟངས་མདོག་དཔལ་རི་ལྷ་ཁང་།

རྫོང་ཁའི་གསར་ཤོག་གི་ སྤུས་ཚད་ཚུ་ སྐྱོ་དྲགས་སྦེ་ར་ གནས་ཡོདཔ།

༣༡/༨/༢༠༡༢   ༉ རྒྱལ་ཡོངས་སྐད་ཡིག་རྫོང་ཁ་ གོང་འཕེལ་གཏང་ནིའི་དོན་ལུ་ རྫོང་ཁའི་གསར་ཤོག་ཚུ་ཡང་ གནས་ཚད་ཅན་སྦེ་ བཏོན་དགོཔ་མ་ཚད་ ཨིང་ལིཤ་གསར་ཤོག་ཚུ་དང་ འདྲ་མཉམ་སྦེ་ རྫོང་ཁའི་གསར་ཤོག་ཚུ་ཡང་ བཏོན་དགོཔ་སྦེ་ བཟོ་ཡོདཔ་ཨིན་རུང་ ད་རེས་ནངས་པ་ རྫོང་ཁའི་གསར་ཤོག་ཚུ་ སྤུས་ཚད་ཅན་སྦེ་ བཏོན་མ་ཚུགས་པའི་ དཀའ་ངལ་བྱུང་དོ་ཡོད་པའི་ མཐོང་གསལ་བྱུངམ་ཨིན་པས།

གནས་ཚུལ་མདོར་བསྡུས།

༣༠/༨/༢༠༡༢

ཁ་ཙ་ མི་དབང་མངའ་བདག་རིན་པོ་ཆེ་མཆོག་གིས་ འབྲུག་ལུ་ ལེགས་སྨོན་གཟིགས་སྐོར་ལུ་བྱོན་མི་ རྒྱ་གར་གྱི་དམག་སྤྱི་ གུང་བློན་བིཀ་རཱམ་སིང་དང་ མཇལ་ཕྲད་མཛད་གནང་ཡོདཔ་ད་ གུང་བློན་བིཀ་རཱམ་སིང་གིས་ དུས་ཅི་ སྤྱི་ཟླ་༥ པའི་ཚེས་༣༡ ལུ་ རྒྱ་གར་གྱི་དམག་སྡེའི་ དམག་སྤྱི་༢༥ པ་སྦེ་ གོ་གནས་བཞེས་ཡོད་པའི་གནས་ཚུལ།

རྡོ་གཞོང་དགོན་པའི་ དུར་ཁྲོད་ལུ་ མཐུན་རྐྱེན་ཚུ་ བཟོ་སྐྲུན་འབད་ནི།

༣༠/༨/༢༠༡༢   ༉ ཀྲོང་གསར་ནུབ་སྦིས་རྒེད་འོག་ རྡོ་གཞོང་དགོན་པའི་དུར་ཁྲོད་དེ་ ཉེ་འདབས་ཀྱི་ རྒེད་འོག་ཚུ་གིས་ ལག་ལེན་འཐབ་དོ་ཡོདཔ་ཨིན་རུང་ ལག་ལེན་འཐབ་ཚར་བའི་ཤུལ་ལས་ ཕྱགས་སྙིགས་ཚུ་ ག་ལྷོད་བཀོག་བཞག་མི་དེ་གིས་ གཞུང་ལམ་བདའ་སྟེ་ འགྲུལ་སྐྱོད་འབད་མི་ཚུ་ འདྲོག་འཇིགས་འཐབ་བཅུག་དོ་ཡོདཔ་ཨིན་པས།
རྡོ་གཞོང་དགོན་པ་ལུ་ རོ་མེ་བཏང་མི་ཚུ་གིས་ ཤིང་གི་འཚིགས་རོ་དང་ གཤིན་པོའི་གོ་ལ་ཚུ་ གཞུང་ལམ་གྱི་འོག་ལས་མར་ ག་ལྷོད་བཀོག་བཞག་པའི་མཐོང་སྣང་།

ནང་འཁོད་ཚོད་བསྲེའི་ཐོན་སྐྱེད་རང་ལྡང་བཟོ་ནིའི་ཐབས་བྱུས།

༣༠/༨/༢༠༡༢   ༉ སྤྱི་ལོ་༢༠༡༤ ལས་ རྒྱལ་ཁབ་ནང་འཁོད་ལས་ཐོན་མི་ ཚོད་བསྲེ་ཚུ་གིས་ རང་འཚོ་རང་ལྡང་སྦེ་ གནས་ཚུགས་ནིའི་དོན་ལུ་ ཐབས་བྱུས་ལག་ལེན་ འཐབ་བཞིན་དུ་ཡོད་མིའི་གྲས་ལས་ གཅིག་ ཁ་ཙ་ དབང་འདུས་ཕོ་བྲང་ བ་ཇོ་ཐང་ལུ་ སོ་ནམ་ལྷན་ཁག་གིས་ འགྲེམ་སྟོན་འབད་མི་ སྔོ་ཚལ་འཛུགས་སྐྱོང་ཤེལ་ཁྱིམ་ནང་ ཚོད་བསྲེ་འཛུགས་སྐྱོང་ འབད་མི་དེ་ཨིན་པས།
སོ་ནམ་མཁས་མཆོག་གིས་ སྔོ་ཚལ་འཛུགས་སྐྱོང་གི་ཁྱིམ་ནང་ ཚོད་བསྲེའི་སོན་བཏབ་ཐངས་ཀྱི་ འགྲེམ་སྟོན་འབད་བའི་བསྒང་།

འཕྲོ་མཐུད་ཤེས་ཡོན་ལས་རིམ་ལུ་བརྟེན་པའི་ གྲུབ་འབྲས་གསལ་སྟོན།

༣༠/༨/༢༠༡༢   ༉ འཛམ་གླིང་ནང་ ཤེས་ཡོན་དེ་ མི་སྡེའི་ནང་ ག་ཅི་ལས་ཡང་ རིན་ཐང་ཅན་ཅིག་ཨིན་པའི་ངོས་འཛིན་ཐོག་ འབྲུག་ལུ་ཡང་ ཤེས་རིག་གི་སྲིད་བྱུས་ཚུ་ འགོ་བཙུགས་ཏེ་ ད་ཚུན་ ཤེས་རིག་གོང་འཕེལ་གྱི་གནས་སྟངས་ གོང་འཕེལ་འགྱོ་བཞིན་དུ་ཡོད་པའི་ནང་ལས་ ཧེ་མ་ ཤེས་རིག་གི་གོ་སྐབས་ མ་ཐོབ་མི་ཚུ་གི་དོན་ལུ་ གཞི་རྟེན་ཤེས་ཡོན་དང་ འཕྲོ་མཐུད་ཤེས་ཡོན་ལས་རིམ་ འགོ་བཙུགས་མི་དེ་གིས་ ཕན་ཐོགས་སྦོམ་བྱུང་ཡོད་པའི་ གསལ་སྟོན་འབདཝ་ཨིན་པས།
ཐིམ་ཕུ་ སྐལ་སྐྱིད་འབྲིང་རིམ་སློབ་གྲྭ་གོང་མའི་ནང་ འཕྲོ་མཐུན་ཤེས་ཡོན་སྦྱང་མི་ཚུ།

གཡང་འཕེལ་གྱི་ མདའ་རྩེདཔ་དྲག་ཤོས་ བཙག་འཐུའི་ལམ་ལུགས་ བསྒྱུར་བཅོས་འབད་ཡོདཔ།

༣༠/༨/༢༠༡༢    ༉ དུས་ཅི་ལས་འགོ་བཙུགས་ཏེ་ གཡང་འཕེལ་གྱི་ མདའ་རྩེད་འགྲན་བསྡུར་ནང་ལས་ མདའ་རྩེདཔ་དྲག་ཤོས་ བཙག་འཐུ་འབད་ནིའི་ ལམ་ལུགས་དེ་ བསྒྱུར་བཅོས་འབད་ཡོད་མི་དེ་ཡང་ ལམ་ལུགས་དེ་ནང་ དཀའ་ངལ་ཡོད་མི་ཚུ་ བསལ་ཐབས་ལུ་དམིགས་ཏེ་ཨིན་པས།
ཐིམ་ཕུ་ལྕང་གླིང་གི་ མདའ་རྩེད་ཐང་ནང་ སྤྲོ་སྣང་ཅན་གྱི་ཐོག་ལས་ ལྟདམོ་ལྟ་བའི་བསྒང་།

ཚོང་བསྒྲགས་ཚུ་ སྔར་ག་ཨིནམ་སྦེ་ར་ བགོ་བཀྲམ་ཐོག་བྱིན་ནི།

༣༠/༨/༢༠༡༢    ༉ འབྲུག་གི་བཙག་འཐུ་ལྷན་ཚོགས་ཀྱིས་ བདུན་ཕྲག་༢ དེ་ཅིག་གི་ཧེ་མར་ མི་མང་ལུ་ བརྡ་སྤྲོད་འབད་ནིའི་དོན་ལུ་ ཚོང་བསྒྲགས་དང་ ཁྱབ་བསྒྲགས་ བཙག་འཐུ་དང་འབྲེལ་བའི་ བརྡ་དོན་ཚུ་ གདམ་ཁ་ཅན་གྱི་ བརྡ་བརྒྱུད་གསུམ་བརྒྱུད་དེ་ གསལ་བསྒྲགས་འབད་ནི་གི་ གྲོས་ཐག་བཅད་མི་དེ་ ཆ་མེད་བཏང་ནུག།

ཁྲོམ་སྡེའི་འཐུས་མི་ཚུ་ལུ་ ཚོགས་ཡོན་འདྲ་མཉམ་མེདཔ།

༣༠/༨/༢༠༡༢     བསམ་གྲུབ་ལྗོངས་མཁར་ཁྲོམ་སྡེ་ཚོགས་འདུའི་ནང་ གནད་དོན་གཙོ་བོ་ར་ ཚོགས་ཡོན་འདྲ་མཉམ་མེད་པའི་སྐོར་ གྲོས་བསྡུར་འབད་ཡོདཔ།

༉ ཁ་ཙ་ མཇུག་བསྡུ་མི་ བསམ་གྲུབ་ལྗོངས་མཁར་གྱི་ ཁྲོམ་སྡེ་ཚོགས་འདུའི་ གྲོས་འཛོམས་ཐེངས་གསུམ་པའི་ནང་ བདེ་བ་ཐང་ཀེབ་སིའི་འཐུས་མི་ བཀྲིས་སྟོབས་རྒྱས་དེ་ ཁྲོམ་སྡེ་ཚོགས་འདུའི་ ཁྲི་འཛིན་འོག་མ་སྦེ་ བཙག་འཐུ་གྲུབ་ནུག།
སྤྱི་ཟླ་༨ པའི་ཚེས་༢༨ ལུ་ བསམ་གྲུབ་ལྗོངས་མཁར་ཁྲོམ་སྡེ་ཚོགས་འདུའི་ ཁྲི་འཛིན་འོག་མ་སྦེ་ བཙག་འཐུ་གྲུབ་མི་ བཀྲིས་སྟོབས་རྒྱས་ལུ་ འཐུས་མི་གཞན་ཚུ་གིས་ ལེགས་གསོ་འབད་བའི་བསྒང་།

བང་ལ་དེཤ་ལུ་ ཨེ་པཱལ་ཕྱིར་ཚོང་འཐབ་ནི་མཚམས་འཇོག།

༣༠/༨/༢༠༡༢   ༉ དུས་ཅི་ དངུལ་ཐོག་ཨེ་པཱལ་ཕྱིར་ཚོང་འཐབ་ཐོག་ལས་ ཕྱི་དངུལ་ཡུ་ཨེསི་ཌོ་ལར་ནང་ འོང་འབབ་བཟོ་ཚུགས་ནི་བཟུམ་ཅིག་མེདཔ་ཨིན་པས།

སཱག་ལུང་ཕྱོགས་རྒྱལ་ཁབ་གཞན་ཚུ་དང་ གློག་མེ་ཚོང་འབྲེལ་འཐབ་ནི།

༣༠/༨/༢༠༡༢   ༉ འབྲུག་གིས་ སྤྱི་ལོ་༡༩༨༦ ལས་འགོ་བཙུགས་  གློག་ཤུགས་ཐེབས་ཚུ་ རྒྱ་གར་རྒྱལ་ཁབ་ནང་ ཕྱིར་བཙོང་འབད་དོ་ཡོདཔ་ད་ ད་ལས་ཕར་འབད་རུང་ གློག་ཤུགས་ཚུ་ ཡར་སེང་ཐོག་ ཕྱིར་བཙོང་འབད་ནི་ཨིན་ཟེར་ གློག་མེ་དང་ གློག་མེ་ལམ་ལུགས་ལས་ཁུངས་ཀྱི་ ཡོངས་ཁྱབ་མདོ་ཆེན་ ཡེ་ཤེས་དབང་འདུས་ཀྱིས་ ཁ་ཙ་ ཐིམ་ཕུ་ལུ་འཚོགས་མི་ རྒྱལ་སྤྱིའི་ས་མཚམས་བརྒྱུད་དེ་ རྒྱུན་ཐག་ཐོག་ ནུས་ཤུགས་ཚོང་འབྲེལ་ཞལ་འཛོམས་ཀྱི་སྐབས་ལུ་ སླབ་ཡོདཔ་ཨིན།
ནུས་ཤུགས་ཚོང་འབྲེལ་ཞལ་འཛོམས་འཚོགས་པའི་བསྒང་།

རྙིང་ཤོས་ཅིག་ཨིན་མི་ གློག་མེ་འཕྲུལ་ཁང་ ཉམས་བཅོས་འབད་དོ་ཡོདཔ།

༢༩/༨/༢༠༡༢    ༉ བཀྲིས་སྒང་ཆེ་ན་རི་ལུ་ཡོད་པའི་ གློག་མེ་འཕྲུལ་ཁང་ཆུང་བ་དེ་ལུ་ ཆུ་རུད་ཀྱིས་ གནོད་སྐྱོན་རྐྱབ་སྟེ་ ལོ་༨ ལང་བའི་རྒྱབ་ལས་ ད་རེས་ ཉམས་བཅོས་ཀྱི་ལཱ་ཚུ་ འབད་བའི་བསྒང་ཡོདཔ་ད་ གློག་མེ་འཕྲུལ་ཁང་དེ་གིས་ གློག་ཤུགས་ཀི་ལོ་ཝཱཊ་༧༠༠ ཐོན་སྐྱེད་འབད་དོ་ཡོདཔ་ཨིན་པས།
ཆུ་རུད་ཀྱིས་མེདཔ་བཏང་མི་ ཆེ་ན་རི་ གློག་མེ་འཕྲུལ་ཁང་ཆུང་བའི་ ཆུ་ལམ་རྩིག་བྱང་ཚུ་ ཉམས་བཅོས་འབད་བའི་བསྒང་།

ཨེ་མི་རི་ཀ་དང་ཕྱདཔ་ད་ ཇ་པཱན་གྱི་ ལྟ་བཤལ་མང་སུ་འོང་དོ་ཡོདཔ།

༢༩/༨/༢༠༡༢     ༉ ན་ཧིང་ཚུན་ འབྲུག་ལུ་འོང་མི་ ལྟ་བཤལ་པའི་གྱངས་ཁ་ མཐོ་ཤོས་དེ་ ཨེ་མི་རི་ཀ་ལས་ཨིན་རུང་ དུས་ཅི་འབདཝ་ད་ སྤྱི་ཟླ་༧ པ་ཚུན་གྱི་ ནང་འཁོད་ལུ་ར་ ཇ་པཱན་གྱི་ ལྟ་བཤལ་པའི་གྱངས་ཁ་དེ་ མཐོ་ཡོདཔ་ཨིན་པས།

ད་རིས་ མཐའ་བཅད་འོག་མའི་ རྩེད་འགྲན་འབད་ནི།

༢༩/༨/༢༠༡༢   ༉ ཁ་ཙ་ ལས་ཁུངས་ཁག་གི་བར་ན་ ཕུཌ་བཱོལ་རྩེད་འགྲན་འབད་བའི་སྐབས་ འབྲུག་རྒྱལ་ཡོངས་དངུལ་ཁང་དང་ བློན་ཆེན་ཡིག་ཚང་གིས་ ད་རིས་ རྩེད་འགྲན་འབད་ནི་ཨིན་མི་ མཐའ་བཅད་འགྲན་བསྡུར་ འོག་མའི་ནང་ ལྷོད་ནུག།
འབྲུག་རྒྱལ་ཡོངས་དངུལ་ཁང་(ཁེན་འཇར་དམརཔོ་)དང་ འབྲུག་གློག་མེ་ལས་འཛིན་གྱི་བར་ན་ རྩེད་འགྲན་འབད་བའི་བསྒང་།

གུང་པ་༣༠ ལུ་ ཕན་ཐོགས་འབྱུང་ནི་ཨིན་མི་ སྣུམ་འཁོར་ལམ།

༢༩/༨/༢༠༡༢    ༉ ཆུ་རྫོང་ཁག་ ཕུན་ཚོགས་གླིང་ཁྲོམ་སྡེ་ གུ་རུང་གྲང་ར་རྒེད་འོག་ མ་ལ་བ་ཤི་གཡུས་ཚན་གྱི་ མི་སེར་སོ་ནམ་ཚུ་གི་དོན་ལུ་ སྣུམ་འཁོར་ལམ་བསལ་ནི་ འགོ་བཙུགས་ཡོད་མི་ལུ་བརྟེན་ མི་སེར་ཚུ་གི་ རེ་འདོད་གྲུབ་ཚུགས་ཡོདཔ་ཨིན་པས།
མ་ལ་བ་ཤི་གཡུས་ཚན་གྱི་དོན་ལུ་ ཀི་ལོ་མི་ཊར་༢ དེ་ཅིག་འབད་མི་ འཁོར་ལམ་བསལ་ནི་ འགོ་བཙུགས་པའི་བསྒང་།

གཡུས་མི་ཚུ་གིས་ ཨོམ་བཀྲམ་སྤེལ་འབད་མ་བཏུབ་པའི་དཀའ་ངལ།

༢༩/༨/༢༠༡༢   ༉ ཀྲོང་གསར་རྫོང་ཁག་ བྲག་སྟེང་རྒེད་འོག་གི་ བྲག་སྟེང་ཨོམ་སྤྱི་མཐུན་ཚོགས་པའི་ ཨོམ་བཀྲམ་སྤེལ་འབད་མི་ གཡུས་ཁའི་འཐུས་མི་ཚོགས་པ་ཚུ་གིས་ ཨོམ་བཀྲམ་སྤེལ་འབད་མ་བཏུབ་པའི་ དཀའ་ངལ་བྱུང་ཡོདཔ་ཨིན་པས།
གཡུས་མི་ཚུ་གིས་ ཨོམ་དཀྲོགས་ཏེ་ དར་ཚིལ་སྒོང་བའི་བསྒང་།

ཉ་རྡོ་བསྲེགསམ་གིས་ འོང་འབབ་ལེགས་ཤོམ་བཟོ་ཚུགས་པའི་རེ་བ།

༢༩/༨/༢༠༡༢   ༉ དབང་འདུས་རྫོང་ཁག་ ཨ་ཐང་རྒེད་འོག་ རུ་ཁ་དང་ ལ་ཝ་ལམ་སྒང་ དེ་ལས་ བསམ་ཐང་སྤྱི་འོག་༣ ནང་ སྐད་གྲགས་ཅན་ཅིག་ཨིན་མི་ ཉ་རྡོ་བསྲེགསམ་དེ་ སྤྱི་འོག་གི་མི་སེར་ཚུ་གི་དོན་ལུ་ འོང་འབབ་ཀྱི་འབྱུང་ཁུངས་གཙོ་བོ་ཅིག་ཨིན་རུང་ ད་ཚུན་ལུ་ འོང་འབབ་འབོར་ཆེ་ཏོག་ཏོ་ཅིག་ བཟོ་མ་ཚུགས་པར་ཡོདཔ་ཨིན་པས།
ཉ་གསོ་སྐྱོང་འཐབ་སའི་ ཆུ་རྫིང་།

སྒོ་ནོར་ཚུ་ལུ་ གནོདཔ་བཀལ་མི་ གཅན་གཟན་ ངོས་འཛིན་འབད་ནི།

༢༩/༨/༢༠༡༢   ༉ མོང་སྒར་རྫོང་ཁག་ ས་གླིང་རྒེད་འོག་ ཀ་ལ་སྤང་གཡུས་ཚན་ནང་ ད་རེས་ནངས་པ་ གཟིག་ཚུ་གིས་ སྒོར་ནོར་སེམས་ཅན་ཚུ་ལུ་ གནོདཔ་སྦོམ་སྦེ་ར་ བཀལ་དོ་ཡོད་པའི་སྐོར་ལས་ ས་གནས་ཀྱི་ གླིང་འཛིན་པ་ལུ་ སྙན་ཞུ་ལྷོད་མི་ལུ་བརྟེན་ ནགས་ཚལ་ལས་བྱེདཔ་ཚུ་གིས་ གནོདཔ་བཀལ་མི་ སེམས་ཅན་དེ་ གཟིག་ཨིན་ན་མེན་ན་ བལྟ་ནིའི་དོན་ལུ་ ཀ་ལ་སྤང་གཡུས་ཚན་ནང་ སོང་ཡོདཔ་ཨིན་པས།
གཟིག་ཚུ་གིས་ ནདཔ་བཏོན་བཞག་མི་ ཕགཔ་ཅིག།

ཚོང་ཆས་ཚུ་ རྒྱ་གར་ལུ་ འབག་འགྱོ་མི་ཡར་འཕར།

༢༩/༨/༢༠༡༢     དེ་ཡང་ རྒྱ་གར་གྱི་ ཚོང་པ་ཚུ་གི་ ལག་པར་ཡོད་མི་ འབྲུག་གི་དངུལ་ཀྲམ་ལག་ལེན་འཐབ་ཐབས་ལུ་ཨིནམ་འོང་ནི་མས་ཟེར་ སླབ་ཨིན་མས།


༉ སྤྱི་ཟླ་༨ པའི་ཚེས་༢༧ ལུ་ ཕུན་ཚོགས་གླིང་ལུ་ འབྲུག་མི་མིན་པའི་ བཀྲམ་སྤེལ་བ་ཅིག་གིས་ དངུལ་ཀྲམ་ས་ཡ་༠.༢༦༧ ལྷགཔ་ཅིག་གི་ བཟའ་ཆས་ཅ་ཆས་ཚུ་ ཁ་བསྒྱུར་ཏེ་ ས་མཚམས་ཁྲོམ་སྡེ་ ཇའི་སྒང་ལུ་ འབག་ནི་གི་ དཔའ་བཅམ་མི་དེ་ མཐར་འཁྱོལ་བྱུང་མ་ཚུགས་པས།

ནོར་ཚུ་ལུ་ གནོདཔ་བཀལ་མི་ གཅན་གཟན་སྟག་ཚུ་ བཟུང་ནིའི་ཐབས་ཤེས་བཏོན་དོ་ཡོདཔ།

སྟག་བཟུང་ནིའི་དོན་ལུ་ ནོར་ཁྱིམ་གྱི་སྒོ་ཁར་ ཐགཔ་བཏགས་ཏེ་བཞག་མི་ ར་པོད་ཅིག།
 ༢༨/༠༨/༢༠༡༢། ༉ བདུན་ཕྲག་༢ དེ་ཅིག་གི་རིང་ ཀྲོང་གསར་ལུ་ རི་དྭགས་སེམས་ཅན་སྲུང་སྐྱོབ་སྡེ་ཚན་གྱིས་ རྡོ་གཞོང་དགོན་པ་ལུ་ སྒོ་ནོར་སེམས་ཅན་ཚུ་ལུ་ གནོདཔ་བཀལ་མི་ གཅན་གཟན་སྟག་ཚུ་ བཟུང་ནིའི་ཐབས་ཤེས་ཚུ་ ག་དེམ་ཅིག་བཏོན་རུང་ མཐར་འཁྱོལ་བྱུང་མ་ཚུགས་ནི་དེ་གིས་ ཁ་ཙ་ལས་ ར་པོད་ཅིག་ ནོར་ཁྱིམ་གྱི་སྒོ་ཁར་ ཐགཔ་བཏགས་ཏེ་ བཞག་ཡོདཔ་ཨིན་པས།

དཔལ་ལི་ལ་ལུ་ ཐོགས་ལུས་མི་སྣུམ་འཁོར་ཚུ་ ཁ་ཙ་ཕྱི་རུ་ལས་བཏང་ཡོདཔ།

ས་རུད་ཆད་སར་ ཐོགས་ལུས་མི་སྣུམ་འཁོར་ཚུ།
 ༢༨/༠༨/༢༠༡༢། ༉ སྤྱི་ཟླ་༨ པའི་ཚེས་༢༦ གི་ ཕྱི་རུའི་ཆུ་ཚོད་༤ དེ་ཅིག་ལས་ དབང་འདུས་ཕོ་བྲང་ དཔལ་ལི་ལའི་རྒྱབ་ལུ་ ས་རུད་ཆད་དེ་ གཞུང་ལམ་བསུབས་མིའི་ གཡས་དང་གཡོན་ལུ་ སྣུམ་འཁོར་༡༠༠ ལྷགཔ་ཅིག་ དུས་ཡུན་ཆུ་ཚོད་༢༢ དེ་ཅིག་གི་རིང་ ཐོགས་ལུས་མི་དེ་ ཁ་ཙ་ཕྱི་རུའི་ཆུ་ཚོད་༣ དེ་ཅིག་ལས་ བཏང་ཡོདཔ་ཨིན་པས།

གདུང་བསམ་རྩི་ས་ལས་འགུལ་ ད་རུང་ ཕྱིར་འགྱངས་འབད་ཡོདཔ།

 ༢༨/༠༨/༢༠༡༢། ༉ འབྲུག་རྒྱལ་ཁབ་ནང་ རྩི་སའི་ལས་འགུལ་སྦོམ་ཤོས་ཅིག་ཨིན་མི་ གདུང་བསམ་རྩི་ས་ལས་འགུལ་དེ་ ད་རུང་ དུས་ཅི་ ལས་འགུལ་མཇུག་བསྡུའི་ ཚེས་གྲངས་ཁར་ མཇུག་བསྡུ་མ་ཚུགསཔ་ལས་ ཐེངས་༣ པ་ ཕྱིར་འགྱངས་འབད་དགོཔ་ ཐོན་ཡོདཔ་ཨིན་པས།
མ་གཞི་ ལས་འགུལ་དེ་ དུས་ཅི་ སྤྱི་ཟླ་༧ པའི་ནང་ རྩི་ས་བཟོ་ནི་གི་ རྡོ་ཕྱེ་བཟོ་སྐྲུན་འགོ་བཙུགས་ཏེ་ སྤྱི་ཟླ་༡༠ པའི་ནང་ལས་ རྩི་ས་བཟོ་སྐྲུན་ འགོ་བཙུགས་ནི་གི་ དམིགས་ཡུལ་ཨིན་པས།

བཀང་ལུང་བཤད་གྲྭ་ནང་ དབྱར་གནས་འཚོགས་དོ་ཡོདཔ།

བཀང་ལུང་བཤད་གྲྭའི་དགེ་སློང་ཚུ་ དབྱར་གནས་འཚོགས་པའི་བསྒང་།
 ༢༨/༠༨/༢༠༡༢། ༉ རང་ཟླ་༦ པའི་ཚེས་༡༥ ལས་ འགོ་བཙུགས་ཏེ་ ཉིན་གྲངས་༤༥ འི་རིང་ བཀང་ལུང་ཟངས་མདོག་དཔལ་རི་ ཐུབ་བསྟན་ཆོས་འཁོར་གླིང་བཤད་གྲྭའི་ནང་ ལོ་བསྟར་གྱི་ དབྱར་གནས་ཐེངས་༢ པ་དང་ མ་ནི་དུང་སྒྲུབ་འཚོགས་གནང་པའི་བསྒང་ ཡོདཔ་ཨིན་པས།
དབྱར་གནས་དེ་ཡང་ བཤད་གྲྭའི་དབུ་འཛིན་ ཀརྨ་རང་གྲོལ་གྱིས་ དབུ་བཞུགས་ཐོག་ལས་ དགེ་སློང་དང་ དགེ་ཚུལ་ཞལ་གྲངས་༢༠༠ དེ་ཅིག་གིས་ བཅའ་མར་གཏོགས་དོ་ཡོདཔ་ཨིན་པས།

ཟམ་འཕྱགས་བདའ་མི་གིས་ སློབ་ཕྲུག་ཚུ་ ལྟོ་ཐོབ་ཀྱི་ཐབས་ལམ།

སེངྒེ་རྣམ་རྒྱལ་མི་སྡེ་སློབ་གྲྭའི་མཐོང་སྣང་།
 ༢༨/༠༨/༢༠༡༢། ༉ སྐྱེས་ལོ་༨ ལང་མི་ ཨ་ཐང་རྒེད་འོག་ སེངྒེ་རྣམ་རྒྱལ་མི་སྡེ་སློབ་གྲྭ་ཆུང་བའི་ སློབ་ཕྲུག་སྤེན་པ་དེ་ ཨ་རྟག་ར་ དྲོ་པའི་ཆུ་ཚོད་༥ དེ་ཅིག་ཁར་ ལོང་སྟེ་ གདོང་ཆུ་འཁྱུ་ཞིནམ་ལས་ སློབ་གྲྭ་ནང་འགྱོ་ནི་ འགོ་བཙུགསཔ་ཨིན་པས།ཁོ་གིས་ ཁོ་རའི་གཡུས་ ལ་ཝ་ཟེར་ས་ལས་ དུས་ཡུན་ཆུ་ཚོད་ཕྱེད་དང་༣ དེ་ཅིག་གི་རིང་ འགྲོ་འགྲུལ་འབད་བའི་ཤུལ་ལས་ དྲོ་པའི་དྲོ་མཛར་གྱི་དོན་ལུ་ སྒུག་སྡོད་མི་ ཁོ་རའི་ཆ་རོགས་ཚུ་དང་ ཕྱད་དོ་ཡོདཔ་ཨིན་པས།

གཞི་རྟེན་ཤེས་ཡོན་དང་ འཕྲོ་མཐུད་ཤེས་ཡོན་ལས་རིམ་གྱིས་ རྒྱལ་སྤྱིའི་གཟེངས་བསྟོད་རྟགས་མ་འཐོབ་ནི།

 ༢༨/༠༨/༢༠༡༢། ༉ སྤྱི་ལོ་༡༩༩༢ ལུ་ འབྲུག་རྒྱལ་ཡོངས་ཨམ་སྲུ་ཚོགས་སྡེ་གིས་ འགོ་ཐོག་མི་སྡེ་དག་པ་ཅིག་ནང་ གཞི་རྟེན་ཤེས་ཡོན་ལྟེ་བ་༥ དེ་ཅིག་ནང་ གཞི་རྟེན་ཤེས་ཡོན་སློབ་སྦྱོང་འབད་མི་ གཡུས་མི་༣༠༠ དེ་ཅིག་ལུ་ གཞི་རྟེན་ཤེས་ཡོན་ འགོ་བཙུགས་ཡོད་མི་དེ་ སྤྱི་ལོ་༡༩༩༦ ལས་ ཤེས་རིག་ལྷན་ཁག་གིས་ འགོ་འདྲེན་ཐོག་ལས་སྦེ་ ད་རེས་འབདཝ་ད་ རྫོང་ཁག༢༠ འི་ གཡུས་མི་༡,༦༠༠༠ དེ་ཅིག་ལུ་ གཞི་རྟེན་ཤེས་ཡོན་ཚུ་ བྱིན་ཡོདཔ་ཨིན་པས།
ཁ་ཙ་ཕྱི་རུ་ ཐིམ་ཕུ་ལྕང་འབངས་འབྲུ་ཟམ་ལུ་ མ་ལྷོདཔ་ཅིག་ཁར་ སྣུམ་འཁོར་ཐུག་རྐྱེན་བྱུང་མི་ལུ་བརྟེན་
ཐིམ་ཕུ་ལས་འགྱོ་མི་ སྣུམ་འཁོར་བརྒྱ་ལས་བཅད་མི་ཚུ་ མགྱོགས་ལམ་བདའ་སྟེ་ ཐོགས་ལུས་པའི་མཐོང་སྣང་།

སྤྱན་རས་གཟིགས་ཀྱི་སྒྲུབ་ཆེན་དང་ མ་ཎི་དུང་སྒྲུབ་བསག་དོ་ཡོདཔ།

༢༨/༠༨/༢༠༡༢། ༉ སྤྱི་ཟླ་༧ པའི་ཚེས་༢༦ ལས་ ཐིམ་ཕུ་ བདེ་ཆེན་ཕོ་བྲང་དགེ་འདུན་སློབ་གྲྭ་ནང་སྦེ་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ དབུ་བཞུགས་ཐོག་ལས་ སློབ་གྲྭའི་དགེ་སློང་ཞལ་གྲངས་༣༠༠ ལྷགཔ་ཅིག་གིས་ སྤྱན་རས་གཟིགས་ཀྱི་སྒྲུབ་ཆེན་དང་ མ་ཎི་དུང་སྒྲུབ་བསག་ནི་ འགོ་བཙུགས་ཡོདཔ་བཞིན་དུ་ དད་ཅན་སྐྱ་སེར་ཕོ་མོ་༥༠༠ ལྷགཔ་ཅིག་གིས་ ལས་རིམ་ནང་ གྲལ་གཏོགས་འབད་དོ་ཡོདཔ་ཨིན་པས།

གནས་ཚུལ་མདོར་བསྡུས།

༢༨/༠༨/༢༠༡༢། ཁ་ཙ་ཕྱི་རུ་ ཐིམ་ཕུ་ལྕང་འབངས་འབྲུ་ཟམ་ལུ་ མ་ལྷོདཔ་ཅིག་ཁར་ སྣུམ་འཁོར་ཐུག་རྐྱེན་བྱུང་མི་ལུ་བརྟེན་ ཐིམ་ཕུ་ལས་འགྱོ་མི་ སྣུམ་འཁོར་བརྒྱ་ལས་བཅད་མི་ཚུ་ མགྱོགས་ལམ་བདའ་སྟེ་ ཐོགས་ལུས་པའི་མཐོང་སྣང་།

རྒྱལ་ཁབ་ཀྱི་ ངོ་རྟགས་དང་ ལམ་སྲོལ་བཟང་པོ་ཉམས་སྲུང་གི་ཐབས་ལམ།

༢༧/༨/༢༠༡༢   ༉ ཁ་ཙ་ སྐུ་མགྲོན་གཙོ་བོ་ མི་དབང་རྒྱལ་ཡུམ་ ཨ་ཞེ་ཚེ་རིང་པདྨོ་དབང་ཕྱུག་མཆོག་གིས་གཙོས་པའི་ རྒྱལ་པོའི་སྲས་སྲསམོ་ བློན་པོ་ལྷན་རྒྱས་ ཆེ་མཐོའི་འགོ་དཔོན་ དེ་ལས་ རྒྱལ་སྲས་སྤྲུལ་སྐུ་རིན་པོ་ཆེ་མཆོག་གིས་  སིམ་པི་ལི་བུ་ཊཱན་ཟེར་མི་ འགྲེམས་སྟོན་ཁང་ལུ་ རབ་གནས་མཛད་གནངམ་དང་འབྲེལ་ འགོ་འབྱེད་མཛད་གནང་ཡི།
རྒྱལ་སྲས་སྤྲུལ་སྐུ་མཆོག་གིས་ སིམ་པི་ལི་བུ་ཊཱན་ལུ་ རབ་གནས་གནང་པའི་བསྒང་།

དོགས་པ་ཅན་སློབ་དཔོན་དེ་ འཕྲལ་མགྱོགས་ར་ ཁྲིམས་འདུན་ལུ་གཏང་ནི།

༢༧/༨/༢༠༡༢   ༉ ད་རེས་ཁམས་ བསམ་རྩེའི་སློབ་གྲྭ་ཅིག་ནང་ རྒྱ་གར་གྱི་ སློབ་དཔོན་ཅིག་གིས་ ཁོ་རའི་ཁྱིམ་ནང་སྦེ་ སློབ་ཕྲུག་བུམོ་༢ ལོག་སྤྱོད་འབད་ནི་གི་ དཔའ་བཅམ་མི་ལུ་བརྟེན་ ད་རེས་ཀྱི་བདུན་ཕྲག་ནང་ར་ ཁྲིམས་སྲུང་འགག་པ་དང་ སིབ་སུ་དྲུང་ཁག་༢ མཉམ་འབྲེལ་ཐོག་ལས་ ཁྲིམས་འདུན་ལུ་ གཏང་ནི་ཨིན་པས།

གཡང་འཕེལ་མདའ་རྩེད་ མཐའ་བཅད་འོག་མ་ ཁ་ཙ་ མཇུག་བསྡུ་ཡོདཔ།

༢༧/༨/༢༠༡༢   ༉ ཁ་ཙ་ ལྕང་གླིང་མི་ཐང་གི་ མདའ་རྩེད་ཐང་ནང་སྦེ་ ཌའི་གཱོན་རུཌ་དང་ རྒྱལ་ཡོངས་དགའ་སྐྱིད་ དེ་ལས་ འབྲུག་ཡུལ་སྡེ་ཚན་༣ གྱི་བར་ན་ མཐའ་བཅད་འོག་མའི་རྩེད་འགྲན་མཇུག་འབད་བའི་སྐབས་ ཌའི་གཱོན་རུཌ་གིས་ རྒྱལ་ཁ་ཐོབ་སྟེ་ མཐའ་བཅད་ནང་ལྷོད་ཅི།
དོ་འགྲན་ཅན་གྱི་རྩེད་འགྲན་འབདཝ་ད་ ལྟདམོ་བལྟ་མི་ཚུ་ལུ་ སྤྲོ་བ་བྱུང་ཡོདཔ།

སྤ་རོ་རྫོང་ཁག་ སྨན་ཁང་གི་ནང་ རླངས་བདུགས་དང་ རླངས་ལུམས་ཀྱི་ ཞབས་ཏོག་འགོ་བཙུགས་ཡོདཔ།

༢༧/༨/༢༠༡༢   ༉ འདས་པའི་ རེས་གཟའ་ཉི་མ་ སྤྱི་ཟླ་༨ པའི་ཚེས་༢༥ ལས་འགོ་བཙུགས་ ནང་པའི་སྨན་བཅོས་ཞབས་ཏོག་ནང་ དང་འདོད་ཡོད་མི་ སྤ་རོ་གི་མི་སེར་ཚུ་གིས་ རླངས་བདུགས་དང་ རླངས་ལུམས་ཀྱི་ ཞབས་ཏོག་ཚུ་ཐོབ་ནི་ཨིན་པས། 
རྐང་མ་ ལྤགས་སྲིན་གྱི་ནད་གཞི་ཐོབ་མི་ ཨ་རྒས་ཅིག་གིས་ འགོ་དང་པ་ རླངས་བདུགས་འབད་བའི་བསྒང་།

མི་སེར་དམངས་གཙོ་ཚོགས་པ་གིས་ བུ་ལོན་ཚུ་བཏབ་ཚར་ཡོདཔ།

༢༧/༨/༢༠༡༢   ༉ ལོ་ངོ་༡ དེ་ཅིག་གི་རིང་ བུ་ལོན་གྱི་བྱ་སྟབས་མ་བདེ་བའི་གནས་སྟངས་ནང་ ལུས་པའི་ཤུལ་ལུ་ འབྲུག་གི་དམངས་གཙོའི་རིང་ལུགས་ནང་ སྲིད་ཚོགས་ཐོ་བཀོད་འབད་མི་ དང་པ་ཨིན་མི་ མི་སེར་དམངས་གཙོ་ཚོགས་པ་གིས་ བུ་ལོན་ཚུ་བཏབ་ཚར་ཡོདཔ་ཨིན་པས།

ཀ་ལ་སྤང་གཡུས་ཚན་ནང་ གཟིག་གིས་ སྒོ་ནོར་སེམས་ཅན་ལུ་གནོད་པ་བཀལ་དོ་ཡོདཔ།

༢༧/༨/༢༠༡༢     ༉ མོང་སྒར་རྫོང་ཁག་ ས་གླིང་རྒེད་འོག་ ཀ་ལ་སྤང་གཡུས་ཚན་ནང་ ན་ཧིང་ལས་འགོ་བཙུགས་ཏེ་ གཟིག་ཚུ་གིས་ སྒོ་ནོར་སེམས་ཅན་ཚུ་ལུ་ གནོད་པ་སྦོམ་བཀལ་དོ་ཡོདཔ་ལས་བརྟེན་ མི་སེར་སོ་ནམ་པ་ཚུ་ ཁྱིམ་དང་ ནོར་གྱི་བྱང་སའི་སྦོ་ལོགས་ཁར་ ཕྱི་རུ་ཨ་རྟག་ར་ མེ་འཕུ་བཞག་དགོཔ་ཐོན་དོ་ཡོདཔ་ཨིན་པས།
སོ་ནམ་པ་ཅིག་གིས་ མོ་གི་ར་ལུ་ གཟིག་གིས་རྨ་བཏོན་འབད་མི་ སྨན་བཅོས་འབད་བའི་བསྒང་།

སྒྲོལ་མ་༢༡ གི་ མཐོང་གྲོལ་འགོ་འབྱེད་འབད་ཡོདཔ།

༢༧/༨/༢༠༡༢    ༉ མོང་སྒར་ འབྲས་སྤུངས་ལས་ ཐིམ་ཕུ་ལུ་ ལཱ་འབད་དེ་ཡོད་མི་ གཞུང་གཡོགཔ་དང་ གཡུས་མི་ཚུ་ མཉམ་འབྲེལ་ཐོག་ལས་ ཞི་བའི་སྒྲོལ་མ་༢༡ གི་ མཐོང་གྲོལ་ཅིག་ བཞེངས་ནི་ཨིན་མི་དེ་ ཁ་ཙ་ རྡོ་སྐྱོང་ལ་སྐྱིད་གནས་ལུ་སྦེ་ འགོ་འབྱེད་འབད་ཡོདཔ་ཨིན་པས།
མཐོང་གྲོལ་འགོ་འབྱེད་ཀྱི་ ཚབ་པར་རྐྱབ་པའི་བསྒང་།

ས་ཡོམ་གྱིས་གནོད་སྐྱོན་རྐྱབ་མི་ལྷ་ཁང་ གསར་བཞེངས།

༢༧/༨/༢༠༡༢    ༉ སྤྱི་ལོ་༢༠༠༩ གི་ཟླཝ་༩ པའི་ཚེས་༢༡ ལུ་ ས་ཡོམ་གྱིས་ གནོད་སྐྱོན་རྐྱབ་མི་དངོས་གྲུབ་ཆོས་གླིང་ལྷ་ཁང་དེ་ སྤྱི་ལོ་༢༠༡༡ ལས་ གསར་བཞེངས་ཀྱི་ ལཱ་འགོ་བཙུགས་ཏེ་ མ་དངུལ་ དངུལ་ཀྲམ་ས་ཡ་༣.༥ ཟད་འགྲོ་བཏང་ཐོག་ལས་ གསར་བསྒྲུབས་འབད་ཡོདཔ་ད་ ད་རུང་ མ་དངུལ་ དངུལ་ཀྲམ་ས་ཡ་༠.༥ དེ་ཅིག་གནས་པའི་ ལྷ་ཁང་གི་ ལྡེབས་རིས་ཚུ་ རྐྱབ་ནི་ཡོདཔ་ཨིན་པས།
གསར་བཞེངས་བསྒྲུབས་མི་ ཨོ་རྫོ་རོང་ རྒེད་འོག་ དགོན་ཁ་དངོས་གྲུབ་ཆོས་གླིང་སྒོམ་སྡེ།

གནས་ཚུལ་མདོར་བསྡུས།

༢༧/༨/༢༠༡༢

བཟོ་རིགས་བཅུ་གསུམ་ནང་ སློབ་སྦྱོང་འབད་མི་ མོང་སྒར་སྐྱེངས་མཁར་ལས་ པདྨ་ཚེ་རིང་དེ་ ཁོ་ར་གཟུགས་ཁར་ཐོ་ཕོག་མི་ལུ་བརྟེན་ ལགཔ་གི་ཡན་ལག་ལུ་ ལྕོགས་གྲུབ་མེད་དེ་འབད་རུང་ འབད་བརྩོན་ཐོག་ལས་ རྐངམ་གིས་ ལཱ་འབད་དེ་ མི་ཚེ་སྐྱོང་དོ་ཡོདཔ་ཨིན་པས།

སོ་ནམ་ཞིང་ལམ་ལུ་བརྟེན་ མི་སེར་ཚུ་གི་འཚོ་བའི་གནས་སྟངས་ ཡར་དྲག་གཏང་ཚུགས་པའི་རེ་བ།

༢༧/༨/༢༠༡༢    ༉ སྐྱེངས་མཁར་རྒེད་འོག་ ན་ཀོ་ལོག་གཡུས་ཚན་ལས་ སྐྱེས་ལོ་༤༦ ལང་མི་ རིན་ཆེན་རྡོ་རྗེ་གིས་ ཁོ་རའི་ཁྱིམ་གྱི་མཐའ་འཁོར་ལུ་དང་ ཤིང་འབྲས་ལྡུམ་ར་ནང་ ཚལ་ལུ་ཤིང་ བརྒྱ་ལྷགཔ་ཅིག་ ཡོད་མི་ཚུ་ལས་ ཚལ་ལུ་ཚུ་ ཚོང་འབྲེལ་འཐབ་རེན་ཡོདཔ་བཞིན་དུ་ ཧེ་མ་བཟུམ་སྦེ་ རྟ་གུ་བཀལ་ཏེ་ རྒྱལ་པོའི་གཞིང་དང་ པདྨ་དགའ་ཚལ་ལུ་ འགྱོ་མི་དགོ་ནི་ཨིནམ་ལས་ སེམས་དགའ་སྟེ་ ཡོདཔ་ཨིན་པས།
སོ་ནམ་ཚོང་འབྲེལ་ རྒྱ་བསྐྱེད་ལུ་ ལྷན་ཐབས་ཅན་གྱི་ཞིང་ལམ།

ཉིནམ་གསུམ་གྱི་རིང་ལུ་གནང་མི་ ཞི་བའི་སྦྱིན་སྲེག་ ཁ་ཙ་གྲོལ་ཡོདཔ།

༢༥/༨/༢༠༡༢   ༉ ཐིམ་ཕུ་ཁྲིམས་སྲུང་འགག་སྡེ་ལྟེ་བའི་ ཕུཊ་བཱོལ་རྩེད་ཐང་ནང་སྦེ་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ དབུ་བཞུགས་ཐོག་ལས་ ཉིན་གྲངས་༣ གྱི་རིང་ལུ་ ཞི་བའི་སྦྱིན་སྲེག་གནང་མི་དེ་ ཁ་ཙ་ མགོན་པོ་ཚེ་དཔག་མེད་ཀྱི་ཚོགས་འཁོར་དང་  གཡང་བསྐུར་གནང་ཐོག་ལས་ གྲོལ་གནང་ཡི།
སྐྱབས་རྗེ་མཆོག་གིས་ གཡང་བསྐུར་གནང་པའི་བསྒང་།
སྐྱབས་རྗེ་མཆོག་གིས་ ཆོས་བསྐུར་གཡང་བསྐུར་གནང་སར་ དད་ཅན་བརྒྱ་ཕྲག་ལས་བཅད་དེ་ འཛོམས་མི་ཚུ།

སློབ་ཕྲུག་བརྒྱ་ཆ་༤༤.༩ གིས་ སྔོན་འགྲོའི་ཆོས་རྒྱུགས་ནང་ལས་ མཐར་འཁྱོལ།

༢༥/༨/༢༠༡༢   ༉ སྤྱི་ཟླ་༨ པའི་ཚེས་༡༡ ལུ་ རྒྱལ་གཞུང་ཞི་གཡོག་ལྷན་ཚོགས་ཀྱིས་ མཐོ་རིམ་ཤེས་ཚད་མཐར་འཁྱོལ་མི་ཚུ་གི་ སྔོན་འགྲོའི་ཆོས་རྒྱུགས་ལེན་ཡོདཔ་བཞིན་དུ་ དེ་གི་གྲུབ་འབྲས་ཚུ་ ཁ་ཙ་ གསལ་སྟོན་འབད་ནུག།

འཛམ་གླིང་ནང་ དཀོན་དྲགས་ཅན་ཅིག་ཨིན་མི་ ཕྱེ་མ་ལེབ་ མ་ཡལ་བར་ཡོད་པའི་མངོན་གསལ།

༢༥/༨/༢༠༡༢   ༉ འབྲུག་གི་རྒྱལ་ཡོངས་ཕྱེ་མ་ལེབ་སྦེ་ ངོས་འཛིན་འབད་མི་ ལུཌ་ལོསི་ སྭ་ལོ་ཊེལ་ཟེར་མི་ དཀོན་དྲགས་ཅན་གྱི་ཕྱེ་མ་ལེབ་དེ་ ངོས་འཛིན་འབད་དེ་ ལོ་༣ དེ་ཅིག་སོང་བའི་ཤུལ་ལུ་ ད་རུང་ སྤྱི་ཟླ་༧ པའི་ཚེས་༢༦ ལུ་ བུམ་སྡེ་གླིང་ རྒྱལ་ཡོངས་གླིང་ཁའི་ནང་ལུ་ འཛམ་གླིང་ནང་དཀོན་དྲག་ཅིག་ཨིན་མི་ ཕྱེ་མ་ལེབ་ཀྱི་རིགས་གཞན་མི་ཅིག་ཡང་ ཡོད་པའི་ངོས་འཛིན་བྱུང་ནུག།
ཊིརི་བརའུན་ ཕྱི་མ་ལེབ།

བུམ་ཐང་ཨུ་ར་ལུ་ ཤ་མུ་གི་དུས་སྟོན་ འགོ་བཙུགས།

༢༥/༨/༢༠༡༢   ༉ བུམ་ཐང་ཨུ་ར་ལུ་ ལོ་བསྟར་འགོ་འདྲེན་འཐབ་སྲོལ་ཡོད་མི་ ཤ་མུ་གི་དུས་སྟོན་དེ་ ཁ་ཙ་ལས་ འགོ་བཙུགས་ཡོད་མིའི་ནང་ ཨུ་ར་རྒེད་འོག་གི་ མི་སེར་ཚུ་གིས་ རང་སོ་གཡུས་ཁའི་ བཞེས་སྒོའི་རིགས་དང་ གཞན་ཟ་འཐུང་གི་རིགས་ཚུ་ འགྲེམ་སྟོན་འབད་ཡོདཔ་ཨིན་པས།
གཡུས་མི་ཚུ་གིས་ ཤ་མུ་མེར་སྲེག་པའི་བསྒང་།
སྐུ་མགྲོན་ཚུ་ལུ་ ཤ་མུའི་ཁུ་བ་དྲང་པའི་བསྒང་།

པདྨ་དགའ་ཚལ་ རྫོ་སྦལ་གཡུས་ཚན་ནང་ མི་དང་རི་དྭགས་སེས་ཅན་བར་ན་བྲིལ་ཟིང་གི་དཀའ་ངལ།

༢༥/༨/༢༠༡༢   ༉ སྤྱི་ལོ་༢༠༠༧ ལུ་ པདྨ་དགའ་ཚལ་ རྫོ་སྦལ་གཡུས་ཚན་གྱི་ སོ་ནམ་ཞིང་པ་ཀུན་བཟང་གིས་ ས་ཆ་ཨེ་ཀར་༤ འི་ནང་ གེ་ཟ་བསྡུ་གསོག་ འབད་རན་ཁར་ལྷོདཔ་ད་ རི་དྭགས་སེམས་ཅན་གྱིས་ ག་ར་བཟའ་ཡོད་པའི་ཁར་ སྤྱི་ལོ་༢༠༠༨ ལུ་ཡང་ ཕྱེད་ཀ་ཅིག་ རི་དྭགས་སེམས་ཅན་ལུ་ ཤོར་སོཔ་ཨིན་པས།
རྫོ་སྦལ་གཡུས་ཚན་གྱི་མཐོང་སྣང་།

གཅན་གཟན་སྟག་འཛིན་བཟུང་ལུ་ མཐར་འཁྱོལ་བྱུང་མ་ཚུགསཔ།

༢༥/༨/༢༠༡༢   ༉ ཀྲོང་གསར་རྫོང་ཁག་འོག་གི་ ནུབ་སྦིས་རྒེད་འོག་ རྡོ་གཞོང་དགོན་པའི་གཡུས་ཚན་ནང་ འཕྲལ་ཁམས་ཅིག་ལས་ སེམས་ཅན་གཅན་གཟན་སྟག་གིས་ སྒོ་ནོར་སེམས་ཅན་ཚུ་ལུ་ གནོདཔ་བཀལ་མི་དེ་ ངོས་འཛིན་འབད་ཐབས་ལུ་ ཐིམ་ཕུ་ལས་རི་དྭགས་སེམས་ཅན་སྲུང་སྐྱོབ་ལས་ཁུངས་ཀྱི་ འགོ་དཔོན་སྡེ་ཚན་ཅིག་ འོང་ཡོད་རུང་ ད་ལྟོ་ཡང་ གྲུབ་འབྲས་མཐར་འཁྱོལ་བྱུང་མ་ཚུགས་པར་ཡོདཔ་ཨིན་པས།

ཨའི་ཚེ་ལས་འདས་པའི་ཤུལ་ལུ་ བུམོ་༣ མགུ་འཐོམ་ཡོདཔ།

༢༥/༨/༢༠༡༢    ༉ སྤྱི་ཟླ་༨ པའི་ཚེས་༡༧ ལུ་ དབང་འདུས་ཕོ་བྲང་ སྲས་ཕུག་རྒེད་འོག་ལས་ སྐྱེས་ལོ་༤༠ ལང་མི་ ཨམ་སྲུ་ཅིག་བརྡུང་རྫོབ་འབད་བའི་རྐྱེན་ལུ་བརྟེན་ ཤི་རྐྱེན་བྱུང་བའི་ཤུལ་ལུ་ མོ་གི་ཨ་ལུ་༣ ག་གིས་ གསོ་ནི་ཨིན་ན་མ་ཤེས་པ་ མགུ་འཐོམ་སྟེ་ལུས་ཡོདཔ་ཨིན་པས།
ཚེ་འདས་ཉམས་རྒུདཔ་དེ་ དོགས་ཅན་གྱིས་ འདྲུད་བདའ་བའི་སྐབས་ བཤུབས་ལུས་མི་གོ་ལ་ཚུ།

གནས་ཚུལ་མདོར་བསྡུས།

༢༤/༨/༢༠༡༢

སྤྱི་ལོ་༢༠༡༡ ལུ་ ཇ་པཱན་རྒྱལ་ཁབ་ནང་ རྐྱེན་ངན་སྣ་ཚོགས་བྱུང་བའི་སྐབས་ལུ་ འབྲུག་གིས་ ཇ་པཱན་གྱི་ མི་སེར་ཚུ་ལུ་ ལེགས་སྨོན་དང་ བྱམས་བརྩེ་བསྐྱེད་མི་དེ་ལུ་ ཇ་པཱན་གྱི་ མི་སེར་ཚུ་གི་ཁ་ཐུག་ལས་ འབྲུག་གི་མི་སེར་ཚུ་ལུ་ ངལ་རངས་དང་ ཡིད་ཆེས་ཡོད་ལུགས་ཀྱི་ གསལ་ཞུ་འབད་བར་འོང་མི་ ཇ་པཱན་གྱི་ ནང་པའི་དགེ་སློང་ཚུ་གིས་ ཁ་ཙ་ ཐིམ་ཕུ་བཀྲིས་ཆོས་རྫོང་ནང་ མི་དབང་མངའ་བདག་རིན་པོ་ཆེ་མཆོག་གི་ སྐུ་མདུན་ལུ་ བཅར་ཡོད་པའི་གནས་ཚུལ།

ས་གནས་གཞུང་གི་ཚོགས་པ་ དགོངས་ཞུ་འབད་མ་ཆོག་པའི་བཀའ་རྒྱ་དེ་ ཁྲིམས་མཐུན་མེདཔ།

༢༤/༨/༢༠༡༢   ༉ འདས་པའི་བདུན་ཕྲག་ནང་ བཙག་འཐུ་ལྷན་ཚོགས་ཀྱིས་ ས་གནས་གཞུང་གི་ བཙག་འཐུ་གྲུབ་མིའི་འཐུས་མི་ཚུ་ གཟུགས་ཁམས་འཕྲོད་བསྟེན་དང་འབྲེལ་བའི་ དཀའ་ངལ་ཚབས་ཆེན་འཐོན་པ་ཅིན་མ་གཏོགས་ བཙག་འཐུའི་དོན་ལུ་ གཞུང་གིས་ ཟད་འགྲོ་མང་རབས་ཅིག་བཏང་ཡོདཔ་ལས་ དགོངས་ཞུ་འབད་མི་ཆོག་ཟེར་བའི་ བཀའ་རྒྱ་ཅིག་ བརྡ་བརྒྱུད་ཚུ་ནང་ ཁྱབ་སྤེལ་འབད་མི་ལུ་ ལ་ལུ་ཅིག་གིས་ རྒྱབ་སྐྱོར་འབད་དགོཔ་བཟུམ་ཅིག་མཐོངམ་ཨིན་རུང་ མང་ཆེ་ཤོས་ཅིག་གིས་ འོས་འབབ་དང་མ་ལྡནམ་སྦེ་ སླབ་ཨིན་པས།

མཐོ་རིམ་ཤེས་ཚད་མཐར་འཁྱོལ་མི་༢ རེའི་དོན་ལུ་ ས་སྟོང་རེ་ཡོདཔ།

༢༤/༨/༢༠༡༢   ༉ ལས་གཡོག་ལྷན་ཁག་གི་ ལཱ་གཡོག་བརྡ་དོན་ལམ་སྟོན་དཔེ་དེབ་དང་འཁྲིལཝ་ད་ ད་རེས་ རྒྱལ་ཁབ་ནང་ ལཱ་གཡོག་དང་ སྦྱོང་བརྡར་གྱི་གོ་སྐབས་༢,༢༢༣ ཡོད་མི་དེ་ རྒྱལ་གཞུང་ཞི་གཡོག་ལྷན་ཚོགས་ཀྱི་ སྔོན་འགྲོའི་ཆོས་རྒྱུགས་རྐྱབ་མི་ མཐོ་རིམ་ཤེས་ཚད་མཐར་འཁྱོལ་མིའི་ གྱངས་ཁ་དང་ཕྱདཔ་ད་༤༠༠ གིས་ ཉུངམ་ཨིན་པས།

ལས་ཁུངས་ཁག་གི་ ཕུཌ་བཱོལ་རྩེད་འགྲན་འབད་བའི་བསྒང་ཡོདཔ།

༢༤/༨/༢༠༡༢   ༉ ཁ་ཙ་ མུ་ཏིག་ཐང་སློབ་གྲྭ་ཆེ་བའི་ ཕུཌ་བཱོལ་རྩེད་ཐང་ནང་སྦེ་ ལས་ཁུངས་ཁག་གི་ ཕུཊ་བཱོལ་རྩེད་འགྲན་ནང་ བརྡ་དོན་དང་བརྒྱུད་འབྲེལ་ལྷན་ཁག་དང་ རྒྱལ་ཡོངས་ས་ཆ་ལྷན་ཚོགས་སྡེ་ཚན་༢ ཀྱི་བར་ན་ རྩེད་འགྲན་འབདཝ་ད་ གཱོལ་༢ རེ་བཙུགས་ཏེ་ རྒྱལ་ཕམ་ཕྱེ་མ་ཚུགས་པར་ སྐུགས་རེ་རེ་འདྲན་འདྲ་ཐོབ་ཡོདཔ་ཨིན་པས།
བརྡ་དོན་དང་བརྒྱུད་འབྲེལ་ལྷན་ཁག་དང་ རྒྱལ་ཡོངས་ས་ཆ་ལྷན་ཚོགས་ཀྱི་བར་ན་ རྩེད་འགྲན་འབད་བའི་བསྒང་།

ཨ་ཏ་བོ་ནིང་དང་ གཡུས་རྒྱལ་སྡེ་ཚན་གྱིས་ མཐའ་བཅད་འོག་མའི་ནང་ལྷོད་ཡོདཔ།

༢༤/༨/༢༠༡༢    ༉ ཁ་ཙ་ ལྕང་གླང་མི་ཐང་གི་ མདའ་རྩེད་ཐང་ནང་སྦེ་ ཨ་ཏ་བོ་ནིང་དང་ སྤྱི་མཐུན་བཟོ་སྐྲུན་ དེ་ལས་ པཱན་ནེཌ་སྡེ་ཚན་༣ གྱི་བར་ན་ རྩེད་འགྲན་འབདཝ་ད་ སྡེ་ཚན་༣ གྱིས་ སྐུགས་རེ་རེ་འདྲན་འདྲ་ཆོདཔ་ལས་ པའི་ནཱལ་ཊི་རྐྱབ་ད་ ཨ་ཏ་བོ་ནིང་སྡེ་ཚན་གྱིས་ རྒྱལ་ཁ་ཐོབ་ཅི།
སི་ཀིམ་གྱི་ མདའ་རྩེདཔ་ཚུ།

གནས་ཚུལ་མདོར་བསྡུས།

༢༤/༨/༢༠༡༢

འབྲུག་དང་ ས་ཝ་ཛི་ལེནཌི་ རྒྱལ་བརྒྱུད་རྒྱལ་ཁབ་ཀྱིས་ སྤྱི་ཟླ་༨ པའི་ཚེས་༢༡ ལུ་ ནིའུ་ཡོག་ལུ་ འབྲུག་གི་ གཏན་འཇགས་དོན་གཅོད་ལས་ཁང་ནང་སྦེ་ དོན་གཅོད་ཀྱི་མཐུན་ལམ་ གཞི་བཙུགས་འབད་ཡོདཔ་ཨིན་པས།དོན་གཅོད་ཀྱི་མཐུན་ལམ་གྱི་ ཆིངས་ཡིག་གུ་ འབྲུག་གི་ གཏན་འཇགས་སྐུ་ཚབ་ ལྷ་ཕྲུག་དབང་ཕྱུག་དང་ ས་ཝ་ཛི་ལེནཌི་གི་ གཏན་འཇགས་སྐུ་ཚབ་ཀྱིས་ མཚན་རྟགས་བཀོད་ཡོདཔ་ཨིན་པས།
འབྲུག་གིས་ འཛམ་གླིང་སྤྱི་ཚོགས་ཀྱི་ སྲུང་སྐྱོབ་ཚོགས་སྡེ་ནང་ འཛུལ་ཞུགས་འབད་ནིའི་དོན་ལུ་ ས་ཝ་ཛི་ལེནཌི་གི་སྐུ་ཚབ་ཀྱིས་ རྒྱབ་སྐྱོར་འབད་ནིའི་ ཁས་བླངས་འབད་ཡོདཔ་ཨིན་པས།འབྲུག་གིས་ ས་ཝ་ཛི་ལེནཌི་དང་གཅིག་ཁར་ དོན་གཅོད་ཀྱི་མཐུན་ལམ་ གཞི་བཙུགས་འབད་མི་དེ་ རྒྱལ་ཁབ་༤༠ པ་ ཨིན་པའི་གནས་ཚུལ།

བུམ་ཐང་དུར་མི་སྡེ་སློབ་གྲྭ་ནང་ སློབ་དཔོན་མ་ལང་པའི་དཀའ་ངལ།

༢༤/༨/༢༠༡༢     ༉ ཆོས་འཁོར་རྒེད་འོག་གི་ དུར་མི་སྡེ་སློབ་གྲྭ་ཆུང་བའི་ནང་ སློབ་དཔོན་མ་ལང་པའི་དཀའ་ངལ་ལུ་བརྟེན་ ད་ལྟོ་ཡོད་མི་ སློབ་དཔོན་བཞི་གིས་ ཨ་ལུ་ཚུ་ མཉམ་སྡེབ་ཐོག་ལུ་ སློབ་ཁང་ཅིག་ནང་བཞག་སྟེ་ སློབ་སྟོན་འབད་དོ་ཡོདཔ་ཨིན་པས།
དུར་མི་སྡེ་སློབ་གྲྭ་ཆུང་བ།

སྐྱེངས་མཁར་རྒེད་འོག་གི་ སོ་ནམ་ཞིང་ལམ་ བསལ་ཚར་ནི་གུ་ལྷོད་ཡོདཔ།

༢༤/༨/༢༠༡༢      ཞིང་ལམ་སེལཝ་ད་ གདོང་ལེན་ག་དེམ་ཅིག་བྱུང་རུང་ རྒེད་འོག་ལྟེ་བའི་ས་ཁོངས་ནང་ ལྷོད་ནིའི་དོན་ལུ་ ཀི་ལོ་མི་ཊར་༢ དེ་ཅིག་ལས་ བསལ་དགོཔ་མེད་ཟེར་ཨིན་པས།

 ༉ མོང་སྒར་རྫོང་ཁག་ སྐྱེངས་མཁར་རྒེད་འོག་གི་ ས་ཁོངས་མང་ཤོས་ཅིག་ནང་ ས་ཆ་ཚུ་ བྱེམ་དང་ ས་རུག་རྡོ་རུག་སྦེ་ ཡོད་མི་ཚུ་བརྒྱུད་དེ་ རྒེད་འོག་ནང་ སོ་ནམ་ཞིང་ལམ་ ཀི་ལོ་མི་ཊར་༢༨ སེལ་བའི་བསྒང་ཡོད་མི་དེ་ལུ་ གདོང་ལེན་ག་དེམ་ཅིག་བྱུང་རུང་ ད་རེས་ནངས་པ་ ཧ་ལམ་བསལ་ཚར་ནི གུ་ ལྷོད་ཡོདཔ་ཨིན་པས།
སྐེད་པ་རི་ལུ་ བྱེམ་ས་ཡོད་མི་ལུ་བརྟེན་ ཞིང་ལམ་སེལ་བའི་སྐབས་ ས་རུད་ཆད་དེ་ ལཱ་ལུ་བར་ཆད་རྐྱབ་དོ་ཡོདཔ་ཨིན་མས།
སྐྱེངས་མཁར་རྒེད་འོག་ལྟེ་བའི་མཐོང་སྣང་།

གནས་ཚུལ་མདོར་བསྡུས།

༢༤/༨/༢༠༡༢  
རྒྱ་གར་གྱི་ སྤྱི་ཚོགས་(ལོག་ས་བྷ་)འཐུས་མི་དང་ ཤྲི་སཱཊ་པཱལ་ མ་ཧ་རཱཇ་སྲུང་སྐྱོབ་ཀྱི་ ལས་བྱེད་ཚོགས་ཆུང་གི་ཁྲི་འཛིན་གྱིས་ དབང་འདུས་རྫོང་བསྐྱར་བཞེངས་ཀྱི་ ཞལ་འདེབས་དོན་ལུ་ སྤྱི་ཟླ་༨ པའི་ཚེས་༡༦ ལུ་ འབྲུག་གི་གཞུང་ཚབ་ལུ་ རུ་པི་༡༠༠,༠༠༡ གི་ དངུལ་འཛིན་ཅེག་ཅིག་ རྩིས་སྤྲོད་འབད་ཡོད་པའི་གནས་ཚུལ།

དབྱར་རྩྭ་དགུན་འབུབ་ རིན་བསྡུར་ཚོང་འབྲེལ་གྱི་ ཕན་གནོད་གནད་སྡུད་སྙན་ཞུ།

༢༤/༨/༢༠༡༢   ༉ སོ་ནམ་ཐོན་སྐྱེད་ཚོང་འབྲེལ་མཉམ་འབྲེལ་ཞབས་ཏོག་གིས་ ད་རེས་ཁམས་ དབྱར་རྩྭ་དགུན་འབུབ་ ཚོང་འབྲེལ་ལམ་ལུགས་ལུ་ མི་ཚུ་ལས་ བསམ་འཆར་ལེན་ནིའི་དོན་ལུ་ ཞིབ་འཚོལ་འབད་མིའི་ནང་ ཞིབ་འཚོལ་ལུ་ ངོས་ལེན་འབད་མི་ བརྒྱ་ཆ་༨༦ གིས་ དུས་ཅི་ འབྲུག་བཟའ་སྤྱོད་ལས་འཛིན་གྱིས་ འགོ་འདྲེན་འཐབ་མི་ རིན་བསྡུར་དེ་ འོས་ལྡན་མཐོང་ཡོདཔ་སྦེ་ དབྱར་རྩྭ་དགུན་འབུབ་ ཚོང་འབྲེལ་སྙན་ཞུའི་ནང་ བཀོད་ནུག།

སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ ཞི་བའི་སྦྱིན་སྲེག་གནང་ནི་ འགོ་བཙུགས་ཡོདཔ།

༢༣/༨/༢༠༡༢   ༉ ཐིམ་ཕུ་ཁྲིམས་སྲུང་འགག་པའི་ ཕུཊ་བཱོལ་རྩེད་ཐང་ནང་སྦེ་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ དབུ་བཞུགས་ཐོག་ལས་ ཉིན་གྲངས་༣ གྱི་རིང་ལུ་ ཞི་བའི་སྦྱིན་སྲེག་གནང་ནི་ཨིན་མི་དེ་ ཁ་ཙ་ སྤྱན་རས་གཟིགས་ཀྱི་ ཆོ་ག་གནང་ཐོག་ལས་ འགོ་བཙུགས་ཡོདཔ་ཨིན་པས།
སྐྱབས་རྗེ་མཆོག་གིས་ ཞི་བའི་སྦྱིན་སྲེག་ གནང་པའི་བསྒང་།
ཞི་བའི་སྦྱིན་སྲེག་ནང་ ལོ་དང་ མིང་ དེ་ལས་ སྙན་དར་ཕུལ་བར་འོང་མི་ དད་ཅན་ཚུ།