གཟིགས་གནང་མི་ལུ་བཀའ་དྲིན་ཆེ།

༉ ང་བཅས་ཀྱིས་ ཉིན་བསྟར་བཞིན་དུ་

ཡོངས་འབྲེལ་འཆར་སྒོ་འདི་ནང་

གནས་ཚུལ་ཚུ་ དུས་མཐུན་བཟོ་སྟེ་ གསལ་བཀོད་འབདཝ་ཨིན།

We update at the earliest possible for you!

རྫོང་ཁའི་གནས་ཚུལ་གཟིགས་ དུས་མཐུན་ཞུགས་ཚུགས།

རྩོམ་སྒྲིག་པའི་སྣང་འཆར།

༡༤/༠༧/༢༠༡༣། རྒྱལ་ཁ་ཐོབ་དང་བསྟུན་ འགན་ཁུར་སྦོམ་ཕོག་ཡོདཔ།
 

༉ ཁ་ཙ་ སྤྱི་ཚོགས་༢ པའི་ རྒྱལ་ཡོངས་ཚོགས་འདུའི་ སྤྱིར་བཏང་བཙག་འཐུ་ མཐར་འཁྱོལ་ཅན་སྦེ་ འགོ་འདྲེན་འཐབ་ཚུགས་མི་ལུ་བརྟེན་ ད་ཚུན་གྱི་རིང་ བཙག་འཐུ་དང་འབྲེལ་བའི་ སྲིད་དོན་ཚོགས་པ་ཚུ་གི་ རྒྱལ་ཕམ་སྐོར་ལས་ དུས་རྒྱུན་དུ་ ཆ་རོགས་དང་ བཟའ་ཚང་ནང་འཁོད་ལུ་ རྒན་གཞོན་མེད་པར་ རྩོད་འགྲན་འབད་སྡོད་མི་ རྒྱལ་ཁབ་མཐའ་དབུས་མེད་པའི་མི་སེར་ཚུ་ ཉིནམ་ད་རིས་ལས་ ཚ་གྱང་ལང་མ་དགོ་པར་ སེམས་བག་ཕེབས་ཐོག་ལུ་ སྡོད་ཚུགས་ནི་མས།

ཚོགས་རྒྱན་ས་ཁོངས་ཚུ་ནང་ ཆུང་ཤོས་སྐྱེས་ལོ་༡༨ ཡན་ཆད་ལས་ རྒས་ཤོས་སྐྱེས་ལོ་༨༥ མན་ཆད་ཚུན་གྱིས་ རང་སོའི་ དབང་ཚད་ཐོག་ལུ་ཡོད་པའི་ ཚོགས་རྒྱན་ཕུད་རྡོག་གཅིགཔོ་དེ་ འཕྲོ་བརླག་མ་བཏང་པར་ ཚུལ་བཞིན་དུ་སྤྱོད་ནིའི་དོན་ལུ་ ཚོགས་རྒྱན་བཙུགས་པར་ འོང་ཐངས་ལུ་ལྟཝ་ད་ རྒྱལ་ཁབ་དང་ མི་སེར་ལུ་ཕན་པའི་ གཞུང་ལེགས་ཤོམ་ཅིག་ བཙག་འཐུ་འབད་ནི་གི་ ཚ་གྱང་ཡོད་པའི་རྟགས་མཚན་སྟོནམ་ཨིན་མས།


མ་གཞི་ སྤྱིར་བཏང་བཙག་འཐུ་ནང་ དོ་འགྲན་འབད་མི་ འབྲུག་ཕུན་སུམ་ཚོགས་པ་དང་ མི་སེར་དམངས་གཙོ་ཚོགས་པ་༢ ལས་ ག་གིས་ར་ གཞུང་སྐྱོང་ནིའི་གོ་སྐབས་ཐོབ་སྟེ་འབད་རུང་ ཁྱད་པར་མེད་ཟེར་ ཞུ་ནི་ཨིནམ་ད་ གཙོ་བོ་ར་ རྒྱབ་ཁབ་ཀྱི་ རང་བཙན་ཞི་བདེ་དང་ མི་སེར་གྱི་མཐའ་དོན་འགྲུབ་ནི་ལུ་ མཐུན་མོང་མ་ཡིན་པའི་ ཐབས་རིག་གཏོན་ནི་དང་ སེམས་ཤུགས་བསྐྱེད་དགོཔ་དེ་ ཨིན་ཟེར་མནོཝ་མས།


ཨིན་རུང་ འབྲུག་མི་ཚུ་གི་ སྤྱི་མཐུན་བསོད་ནམས་དང་ དཀོན་མཆོག་གི་ ཐུགས་རྗེ་བྱིན་རླབས་ལུ་བརྟེན་ ཁ་ཙ་ དྲོ་པ་ལས་ཕྱི་རུ་ཚུན་ འགོ་འདྲེན་འཐབ་མི་ སྤྱིར་བཏང་བཙག་འཐུ་ནང་ མི་སེར་དམངས་གཙོ་ཚོགས་པ་གིས་ འདེམས་ཁོངས་བསྡོམས་༤༧ ཡོད་མིའི་ནང་ལས་ འདེམས་ཁོངས་༣༢ ནང་ ཚོགས་རྒྱན་མངམ་ཐོབ་སྟེ་ གཞུང་སྐྱོང་ནིའི་ གོ་སྐབས་ཐོབ་མི་དེ་ལུ་ འབྲུག་མི་ཡོངས་ཀྱི་མགྲིན་ཚབ་ལུ་ ལེགས་སོ་སྦོམ་ཡོད་ཟེར་ཞུ་ནི།


བཙག་འཐུ་ནང་ལས་ རྒྱལ་ཁ་ཐོབ་དང་བསྟུན་ ད་ལས་ཕར་ ལོ་༥ འི་རིང་ གཞུང་སྐྱོང་ནིའི་འགན་ཁུར་ཡང་ འགྱུར་བ་དང་བསྟུན་ ཨ་རྟག་དང་མ་འདྲཝ་སྦེ་ འབག་དགོ་པའི་ཚ་གྱང་ ལང་དགོཔ་འབྱུང་ནི་ཨིན་མས།


དེ་ཡང་ ག་འཆརཔ་ཟེར་བ་ཅིན་ འཕྲལ་ཁམས་ཅིག་ཁར་ སྲིད་འབྲེལ་གནད་དོན་ཚུ་ནང་ འབྲུག་དང་རྒྱ་གར་གྱི་ མཐུན་ལམ་སྐོར་ལས་ འོས་འབབ་མེད་པའི་ ལོ་རྒྱུས་ཚུ་ཐོན་པའི་ཤུལ་ལས་ རྒྱ་གར་གཞུང་གིས་ གློ་བུར་དུ་ རྣམ་རྟོག་ལང་སི་སི་སྦེ་ མེ་རླུང་གེསི་རྒྱ་རྫི་དང་ ས་མར་ཁུའི་ ཕབ་ཆ་གོང་ཚད་ བཤོལ་བཞག་ཐོག་ ལོག་ལྟབ་གསུམ་ལྟབ་སྦེ་ ཡར་སེང་རྐྱབ་མི་ལུ་བརྟེན་ འབྲུག་མི་ཚུ་གི་ འཚོ་བའི་གནས་སྟངས་ལུ་ ཐོ་སྦོམ་ཕོག་མི་དེ་ལུ་ གཞུང་སྐྱོང་ཚོགས་པ་གིས་ གཙོ་རིམ་དང་པ་བསྒྲིག་སྟེ་ སེལ་ཐབས་འབད་བ་ཅིན་ མི་སེར་ཚུ་གིས་ ཧིང་དྭངས་མའི་དཀྱིལ་ལས་ར་ བློ་གཏད་ཡིད་ཆེས་བསྐྱེད་མི་དེ་ཡང་ ཆུད་ཟོས་མི་འགྱོ་ནི་ཨིན་མས།


དེ་མ་ཚད་ ཚོགས་པ་གིས་ བསྐུལ་བསྒྲགས་འབད་བའི་སྐབས་ལུ་ མི་མང་གི་གདོང་ཁར་ ཁས་བླངས་གསལ་བསྒྲགས་འབད་མི་ཚུ་ཡང་ ཁྲོམ་སྡེ་དང་ གཡུས་སྒོ་ཚུ་ནང་གི་ འཕྲལ་གྱི་དགོས་མཁོ་དང་བསྟུན་ གཙོ་རིམ་བསྒྲིག་སྟེ་ རིམ་པ་བཞིན་དུ་སྦེ་ ཚུལ་བཞིན་བསྒྲུབ་ཚུགས་པ་ཅིན་ མི་སེར་ཚུ་ཡང་ དགའ་སྐྱིད་ཀྱི་དཔལ་ལུ་ལོངས་སྤྱོད་དེ་ སྡོད་ཚུགས་ནི་ཨིནམ་ལས་ འཛམ་གླིང་ནང་ འབྲུག་གི་དམངས་གཙོའི་རིང་ལུགས་དེ་ དཔེ་སྟོན་བཟུམ་ཅིག་ལུ་ འགྱུར་ཚུགས་ནི་གི་ འོས་འབབ་ཡོད་ཟེར་ ཞུ་ནི་ཨིན།

1 comment:

  1. སྤུ་་ན་ཁ་ཁུ་རུ་ཐང་གི་ མར་ཁུ་བླུགས་ས་འདི་ ཡོད་རུང་མེད་རུང་ ཁུངས་མིན་འདུག་ཟེར་ཞུ་ནི་ཨིན། དུས་ཚོད་མང་ཤོས་ཅིག་མར་ཁུ་མི་ཐོབ་པའི་ཁར་ མེ་རླུང་རྒྱ་ཛི་ཚུ་ཡང་་མི་གནགཔ་ཚུ་གིས་སོར་དགོ་པ་ཅིན་ ཟླཝ་བདུན་དང་བརྒྱད་སོང་རུང་སོར་མི་ཚུགས་པས། མར་ཁུ་བླུགས་སའི་ལས་བྱེདཔ་ཚུ་གིས་ མེ་རླུང་རྒྱ་ཛི་ཚུ་ ལྷོདཔ་ད་ ས་ཐག་རིང་ས་དང་ ཡང་ན་ ཧེ་མ་ལྷོད་མི་ཚུ་ལུ་བྱིན་ནི་མིན་པར་ ཁོང་རའི་ངོ་ཤེས་དྲེས་ཤེས་ རེ་དགོ་པའི་མི་ཚུ་ལུ་བྱིནམ་ཨིན་པས། འདི་བཟུམ་གྱི་ཚོང་འབྲེལ་ཞབས་ཏོག་ཚུ་ལུ་ གནས་ཚུལ་བསྡུ་ལེན་པ་ཚུ་གི་ཁ་ཐུག་ལས་རྒྱབ་སྐྱོར་གནང་ཚུགས་པ་ཅིན་ མི་དམང་ལུ་ཕན་ནི་མས་ཟེར་ཞུ་ནི་ཨིན།

    ReplyDelete