ཉི་མ་དབང་འདུས།
༉ ཐིམ་ཕུ་ ལྕང་འབངས་འགྲོའི་ ས་ཁོངས་ནང་ ད་རེས་ ས་གནས་གོང་འཕེལ་འཆར་གཞི་ རྩམ་པའི་བསྒང་ཡོདཔ་བཞིན་དུ་ ད་རེས་ཁམས་ཅིག་ཁར་ ཐིམ་ཕུ་ཁྲོམ་སྡེ་ལས་འཛིན་གྱིས་ ས་གནས་ནང་འཁོད་ལུ་ སྣུམ་འཁོར་ལམ་བསལ་ནིའི་དཔག་ཚད་ བསྒྱུར་བཅོས་འབད་མི་ལུ་བརྟེན་ སྒྲིང་ཁྱིམ་གྱི་ཇོ་བདག་ཚུ་ སེམས་མ་དགའ་བར་ཡོདཔ་ཨིན་པས།
ཁོང་གིས་ སླབ་མིའི་ནང་ ད་ལྟོ་བསྒྲུབས་ཡོད་པའི་ སྒྲིང་ཁྱིམ་དང་ རྐྱབ་པའི་བསྒང་ཡོད་པའི་སྒྲིང་ཁྱིམ་ དེ་ལས་ བཟོ་སྐྲུན་གྱི་དོན་ལུ་ བཀོད་རིས་བཟོ་མི་ཚུ་ ཧེ་མའི་ ས་གནས་གོང་འཕེལ་འཆར་གཞི་ཨམ་ལུ་ གཞི་བཞག་སྟེ་ཨིནམ་ལས་ ད་རེས་ དེ་བཟུམ་མའི་ བསྒྱུར་བཅོས་འབད་མི་ལུ་བརྟེན་ བྱ་སྟབས་མ་བདེཝ་ སྦོམ་སྦེ་ར་ འཐོན་ནི་ཨིན་མས་ཟེར་ཨིན་པས།
སྣུམ་འཁོར་ལམ་དེ་ ཧེ་མའི་ འཆར་གཞི་ཨམ་དང་མ་འཁྲིལ་བར་ ད་རེས་ བསྒྱུར་བཅོས་འབད་ས་ལས་ བསལ་བ་ཅིན་ དེ་གིས་ བཟོ་སྐྲུན་འབད་ནིའི་དོན་ལུ་ བཀོད་རིས་དང་ ས་ཁོངས་ཀྱི་ས་ཁྲ་ཚུ་ གྲ་སྒྲིག་སོང་ཡོད་པའི་ ཁྱིམ་ས་ཅིག་གུ་ ཕོག་དོ་ཡོདཔ་མ་ཚད་ ཧེ་མ་ལས་ བཟོ་སྐྲུན་འབད་ཚར་མི་ སྒྲིང་ཁྱིམ་ཚུ་གི་ སྣུམ་འཁོར་བཞག་ས་དང་ བཙོག་ཆུའི་མཛོད་ཚུ་ལུ་ཡང་ གནོད་དོ་ཡོདཔ་སྦེ་ ས་གནས་ནང་སྡོད་མི་ཅིག་གིས་ སླབ་ཨིན་པས།
ཁོ་གིས་འབད་བ་ཅིན་ ལས་འཛིན་གྱིས་ བསྒྱུར་བཅོས་འབད་མི་ འཆར་གཞི་གསརཔ་དེ་དང་འཁྲིལ་བ་ཅིན་ ལམ་དེ་གིས་ སྒྲིང་ཁྱིམ་༡ ལུ་མ་གཏོགས་ གཞན་མི་༥ དེ་ཅིག་ལུ་ ཕན་མི་ཐོགས་ནི་མས་ཟེར་ སླབ་ཨིན་པས།
ད་རེས་ཀྱི་ བསྒྱུར་བཅོས་དེ་ལུ་ལྟ་སྟེ་ སེམས་མ་དགའ་བར་ཡོད་མི་ཚུ་གིས་ ཁྲོམ་སྡེ་ལས་འཛིན་ལུ་ ཉོགས་བཤད་ཡི་གུ་ཚུ་ བཙུགས་ཡོདཔ་ཨིན་པས།
དེ་ལུ་ ཐིམ་ཕུ་ཁྲོམ་དཔོན་ ཀུན་ལེགས་རྡོ་རྗེ་གིས་ སླབ་མིའི་ནང་ དེ་སྦེ་ བསྒྱུར་བཅོས་འབད་དགོ་མི་དེ་ཡང་ ཧེ་མའི་ འཆར་གཞི་ནང་ཚུད་མི་ སྣུམ་འཁོར་ལམ་གྱི་ས་ཁོངས་དེ་ གཟར་དྲགས་སྦེ་ཡོདཔ་མ་ཚད་ སྣུམ་འཁོར་ཚུ་ ས་ཁོངས་ནང་འཛུལ་ཞིནམ་ལས་ ད་རུང་ ལོག་འཐོན་པའི་སྐབས་ ལམ་དེ་ནང་ལས་ར་ འཐོན་འགྱོ་དགོ་ནི་ཨིནམ་ལས་ ལེགས་ཤོམ་ཅིག་སྦེ་ མ་མཐོང་ཟེར་ཨིན་པས།
དེ་འབད་ནི་འདི་གིས་ འཆར་གཞི་ནང་ བསྒྱུར་འབཅོས་འབད་ཡོདཔ་ཨིན་རུང་ དེ་གིས་ གནོད་སྐྱོན་བྱུང་མི་ཚུ་ ཁྱིམ་རྐྱབ་ནིའི་དོན་ལུ་ བཀོད་རིས་ཚུ་ གྲ་སྒྲིག་སོང་ཡོད་མི་ ཁྱིམ་ས་དེ་ཡང་ ཁྱིམ་ས་དེ་གི་འོག་ལུ་ཡོད་པའི་ ས་ཁོངས་ཅིག་ནང་ སྤོ་བཤུད་འབད་དགོཔ་སྦེ་ སླབ་སྟེ་ཡོད་ཟེར་ཨིན་པས།
ཁྱིམ་ས་དེ་གི་ ཇོ་བདག་གིས་ སླབ་མིའི་ནང་ ཁྱིམ་ས་དེ་ སྤོ་བཤུད་འབད་བའི་བསྒང་ལས་ བཀོད་རིས་ཡང་ སོར་དགོ་ནི་ཨིནམ་ལས་ བཀོད་རིས་གསརཔ་བཟོ་ནིའི་ ཟད་འགྲོ་ཚུ་ ལས་འཛིན་གྱིས་ གཏང་དགོ་པའི་ཡི་གུ་ཅིག་ བཙུགས་ཡོདཔ་ཨིན་རུང་ ཁྲོམ་དཔོན་གྱིས་འབད་བ་ཅིན་ ཇོ་བདག་དེ་གི་ཁྱིམ་ས་དེ་ ཧེ་མ་འབད་བ་ཅིན་ ཀོང་རྩེའི་བཟོ་དབྱིབས་སྦེ་ཡོད་ས་ལས་ གྲུ་༤ དཀྱུས་རིང་འབད་བའི་ ས་ཁོངས་ལེགས་ཤོམ་ནང་ སྤོ་བཤུད་འབད་ཡོདཔ་ལས་ བཀོད་རིས་སོར་ནིའི་ཟད་འགྲོ་ཚུ་ ལས་འཛིན་གྱིས་ གཏང་མི་ཚུགས་ཟེར་ཨིན་པས།
དེ་མ་ཚད་ ད་ལྟོ་ཡོད་པའི་ ཇོ་བདག་གི་བཀོད་རིས་དེ་ སྤོ་བཤུད་འབད་བའི་ས་ཁོངས་གསརཔ་ནང་ཡང་ ལག་ལེན་འཐབ་བཏུབ་ནི་ཨིནམ་ལས་ མ་སོར་རུང་བཏུབ་ནི་སྦེ་ སླབ་ཅི་ཟེར་ཨིནམ་ད་ དེ་སྦེ་ བསྒྱུར་བཅོས་འབད་དགོ་མི་དེ་ཡང་ གཙོ་བོ་ར་ མི་༡ དང་༢ ཀྱི་དོན་ལུ་མེན་པར་ མི་སྡེ་ལུ་ ཕན་ཐོགས་འབྱུང་ཐབས་ལུ་ དམིགས་ཏེ་ཨིན་ཟེར་ཨིན་པས།
ལྕང་འབངས་འགྲོ་གི་ ས་གནས་གོང་འཕེལ་འཆར་གཞིའི་དོན་ལུ་ ཟད་འགྲོ་ཚུ་ ཨེ་ཤི་ཡ་གོང་འཕེལ་དངུལ་ཁང་གིས་ གཏང་ནི་ཨིན་རུང་ ད་ལྟོ་ མ་དངུལ་མ་ཐོབ་པར་ཡོདཔ་ད་ སྤྱི་ལོ་༢༠༡༣ དང་༢༠༡༤ ལུ་ འཐོབ་ཚུགས་པའི་ རེ་བ་ཡོད་ཟེར་ སླབ་ཨིན་པའི་གནས་ཚུལ།
No comments:
Post a Comment