རྩང་མོ།

༈ མཐོ་བའི་རི་མགུ་སྡོདཔ་ད། །རོང་ཆུ་ཧོ་མ་མ་སློང་། །
ནམ་ཅིག་ཁ་སྐོམ་འཚིགསཔ་ད། །ཧུབ་གང་བཞེས་དགོཔ་འཐོན་འོང་། །

གཞུ་མོ་ཚུར་ཡང་མ་བཀུག །མདའ་མོ་ཕར་ཡང་མ་བཏང་། །
མ་བསམ་འབའ་གུ་ཕོག་མི། །ཚེ་སྔོན་ལས་ཀྱིས་བསྐོས་དོ། །

སྒ་དང་སྲབ་ཐག་མེད་པའི། །རྟ་གུ་བཞོན་དགོ་མ་བདེ། །
ཁྲེལ་དང་དམ་ཚིག་མེད་པའི། །བུམོ་དེ་བལྟ་དགོ་མ་བདེ། །

དཀར་པོ་སེམས་ཀྱི་བརྩེ་གདུང་། །ཕྱི་ཁར་སྟོན་ས་མིན་འདུག །
དམ་ཚིག་དར་གྱི་མདུད་པ། །ལྷོད་ཡང་མེདཔ་སྦེ་བཞག་གནང་། །

སྒོ་ལུ་ཀྲོག་ཀྲོག་མ་འབད། །རོ་ཁྱི་ཧབ་སྟེ་འཐོན་འོང་། །
ཡབ་ཡུམ་གཉིས་ཀྱི་གདོང་ཁར། །བཟང་ལམ་ལམ་སྦེ་ཐོན་དེས། །

རྐམ་ཆོས་སྒྲོན།
ཐིམ་ཕུ་ལྕང་ཟམ་ཏོག།

 

 

རྩང་མོ།

༈ མཐོ་བའི་ཉིམ་ཅིག་ཨིན་ཟེར། །ཚ་དྲག་དེ་ར་མ་འབད། །
རྒྱབ་ལས་སྒྲ་གཅན་འོངམ་ད། །བཀག་མི་ག་ཡང་མི་འོང་། །

སྔོ་ལྗང་ལྗོན་ཤིང་རྡོག་མ། །མིག་ཁར་མཛེས་ར་མཛེས་པས། །
འཚོཔ་ད་ས་ཁར་འབུད་འོང་། །ཐུགས་བསམ་སྔོན་ལས་བཞེས་དགོ །

མཁས་པའི་ལྗོན་ཤིང་རྩ་བར། །ཡོན་ཏན་འབྲས་བུ་འཐོབ་འོང་། །
སྐམ་པའི་དར་ཤིང་རྩ་བར། །གྱིབ་བསིལ་ཅིག་ཡང་མ་བཏུབ། །

ཆུ་མོ་རྦ་རླབས་མང་མི། །ཉ་མོའི་སེམས་ཁར་མིན་འདུག །
ཁྱོད་ལུ་སྙིང་གྲོགས་མང་མི། །ངེ་སེམས་དཀྲུགས་པའི་གཞི་མས། །

སྤང་གི་ཤ་བ་ཨིན་ཟེར། །སྤྲོ་ཉམས་ཚད་མེད་མ་སྟོན། །
ནམ་ཅིག་ཤ་ཁྱི་འོངམ་ད། །གཡིབ་ས་འཚོལ་དགོཔ་འཐོན་འོང་། །

བཀྲིས་ལ། བསམ་རྩེ།

 

 

རང་སེམས་བདག་མེད་ཤོར་བའི་བསྐུལ་རྩོམ།

 

༈ ཧ་ལས་སི་སི་འཇའ་རིསམོ་ཡོད་མི་ལུ། །ལྟ་སྟེ་ལོ་རྒྱུས་ལེ་ཤ་
དྲིས་ལྟ་རུང་། །ལོ་རྒྱུས་ཚིག་ཙམ་ཅིག་ཡང་སླབ་མ་བཏུབ། །
ཁྱོད་ལུ་ལྟ་སྟེ་སེམས་ཡང་ཕམ་སི་སི། །

འདྲོག་སི་སི་སྦེ་བཟོ་སྟེ་འགྱོ་ལྟ་རུང་། །ཁྱོད་ཀྱིས་མིག་ཟུར་
ཙམ་ཡང་ལྟ་བ་བཏུབ། ། ག་ཅི་གུ་ཅི་འབད་ན་མ་ཤེས་པར། །
ངེ་གི་བྱ་བ་སྤྱོད་ལམ་རྔམ་སི་སི། །

དགོད་བྲ་སི་སི་ལོ་རྒྱུས་སླབ་ལྟ་རུང་། །ཁྱོད་ཀྱིས་དགའ་འཛུམ་ཙམ་ཡང་
སྟོན་མ་བཏུབ། ། དོན་མེད་ལོ་རྒྱུས་ལེ་ཤ་སླབ་མི་ང་། །
རོགས་ཀྱི་གདོང་ཁར་ངོ་ཡང་ཚ་སི་སི། །

ཡིད་ཆེ་སི་སི་ཧིང་གཏམ་སླབ་ལྟ་རུང་། །ཁྱོད་ཀྱིས་ཉན་དོ་བཟུམ་ཡང་
འབད་མ་བཏུབ། ། དོན་མེད་ཧིང་གཏམ་ག་ལྷོད་སླབ་མི་ང་། །
བུ་ཆུང་ང་ར་བློ་ཡང་ཕམ་སི་སི། །

འདྲོག་སི་སི་སྦེ་འཇིགས་སྐྲག་སྟོན་ལྟ་རུང་། །ཁྱོད་ཀྱིས་འདྲོག་དོ་བཟུམ་ཡང་འབད་མ་བཏུབ། །

འདྲོག་མི་མེད་པར་འཇིགས་སྐྲག་སྟོན་མི་ང་། །གཞན་གྱི་གདོང་ཁར་གཡང་ཡང་ཟ་སི་སི། །

དབུགས་འགམ་སི་སི་ལོ་རྒྱུས་མ་སླབ་པར། །དགའ་བའི་ལོ་རྒྱུས་
ཚིག་ཅིག་སླབ་ཟེར་རུང་། །གཏམ་ལན་མེད་པར་ཆ་རོགས་གཞན་དང་མཉམ། །
གར་སོང་མི་ཤེས་མགུ་ཡང་འཐོམ་སི་སི། །

ཧིང་ཚ་སི་སི་སྡུག་བསྔལ་ཕོག་མི་ང་། །ལྟ་སྟེ་སེམས་གསོ་འབད་ནི་
ཕར་ར་བཞག །ཤ་དང་སེན་མོ་བྱལ་བའི་སྡུག་བསྔལ་གྱིས། །
རང་སེམས་མ་དགའ་ཙིགཔ་ཡང་ཟ་སི་སི། །

སྐྱོ་སི་སི་སྦེ་ག་ཏེ་འཚོལ་ལྟ་རུང་། །འཇའ་རིསམོ་ཁྱོད་བཟུམ་རྩ་ལས་
འཚོལ་མ་ཐོབ། །ཁྱོད་གདོང་བལྟ་ནི་མ་ཐོབ་སྡུག་བསྔལ་གྱིས། །
ངེ་གི་སེམས་ཡང་གདིང་ལས་འཁྲུལ་སི་སི། །

བྱོ་རོ་སི་སི་ལཱ་ར་འབད་དེ་གིས། །ངེ་གི་མི་ཚེ་སྟོང་ལོག་འགྱོ་དོ་ས། །

དོན་མེད་ལཱ་འདི་སྤང་ར་མ་ཚུགས་པར། །མི་ཚེ་སྟོང་ལོག་འགྱོཝ་ད་ཕམ་སི་སི། །

བཀྲིས་སྟོབས་རྒྱས།
ཐིམ་ཁྲོམ།