 |
| ནད་འབུབ་ཨེཆ་ཨའེ་བི་ཐོབ་མི་ དབང་དྲག་རདོ་རྗེ་གིས་ སློབ་ཕྲུག་ཚུ་ལུ་ གསལ་བཤད་འབད་བའི་བསྒང་། |
བཀྲ་ཤིས་བསྟན་འཛིན།
༉ ན་ཧིང་ སྤྱི་ཟླ་༡༢ པའི་ཚེས་༡ ལུ་ འཛམ་གླིང་ཨེཌསི་གི་ཉིནམ་ བརྩི་སྲུང་འབདཝ་དང་འབྲེལ་ གདུག་ཅན་གྱི་ ནད་གཞི་ཨེཌསི་གི་རྒྱུ་ ཨེཆ་ཨའེ་བི་ཐོབ་མི་༥ གིས་ རྒྱང་མཐོང་ནང་ འགོ་དང་པ་ ཐོན་ཐོག་ལས་ མི་མང་ལུ་ ནད་གཞི་དེ་གི་སྐོར་ལས་ གོ་བརྡ་སྤྲོད་པའི་ཤུལ་ལུ་ ད་རུང་ མི་མང་དང་ འབྲེལ་བ་འཐབ་ནི་ འགོ་བཙུགས་ཡོདཔ་ཨིན་པས།
དེ་ཡང་ ངོ་ཚ་ནི་དང་ གཡང་ཟ་བསྐྱེད་ནི་སྤངས་མི་ ཕོ་སྐྱེས་༢ དང་ ཨམ་སྲུ་༢ འབད་མི་ སྡེ་ཚན་ཅིག་གིས་ ཁ་ཙ་ བུམ་ཐང་དབང་འདུས་ཆོས་གླིང་འབྲིང་རིམ་སློབ་གྲྭ་བར་མའི་ནང་ སློབ་རིམ་༨ པ་དང་༧ པའི་ སློབ་ཕྲུག་ཚུ་དང་གཅིག་ཁར་ གྲོས་བསྡུར་འབད་དེ་ གདུག་ཅན་ནད་གཞིའི་སྐོར་ལས་ བསླབ་སྟོན་དང་ ནད་གཞི་གཞན་དང་ དབྱེ་བ་ག་ནི་ཡང་མེད་པའི་སྐོར་ གསལ་བཤད་འབད་ཡི།
ནད་འབུབ་ཨེཆ་ཨའེ་བི་ཐོབ་མི་ཚུ་གི་དོན་ལུ་ གཞི་བཙུགས་འབད་མི་ ལྷག་བསམ་ལས་ཚོགས་ཀྱི་མདོ་ཆེན་ དབང་དྲག་རྡོ་རྗེ་གིས་ བཤད་མིའི་ནང་ ཧེ་མར་ གསོ་བའི་ལྷན་ཁག་གིས་ མི་མང་ལུ་ གོ་བརྡ་སྤྲོད་པའི་སྐབས་ ནད་གཞི་དེ་ འདྲོག་སི་སི་ཅིག་ཨིནམ་ལས་ ཚར་ཅིག་ཐོབ་པའི་ཤུལ་ལས་ ལོ་༡༠ གྱི་ནང་འཁོད་ལུ་ མི་དེ་ཤི་ནི་ཨིན་ཟེར་ ཁྱབ་སྤེལ་འབད་ཡོད་མི་ལུ་བརྟེན་ མི་ཚུ་གིས་ ནད་གཞི་ཐོབ་མི་ཚུ་ལུ་ ཉེ་རིང་ཕྱེ་བའི་ཁར་ མི་སྡེའི་ནང་ལས་ ལོགས་སུ་སྦེ་ བཏོན་བཞག་པའི་ དཀའ་ངལ་ཚུ་ བྱུང་ནུག་ཟེར་ཨིན་པས།
ཁོ་གིས་འབད་བ་ཅིན་ ནད་གཞི་དེ་ ནད་གཞན་ཚུ་དང་ དབྱེ་བ་མེདཔ་ལས་ མི་ཚུ་གིས་ འདྲོག་ར་འདྲོག་དགོ་པ་ཅིན་ ནད་གཞི་ཀེན་སར་བཟུམ་ཚུ་ལུ་ འདྲོག་དགོ་ཟེར་ཨིནམ་ད་ ཁོ་གིས་ ནད་གཞི་དེ་ ག་དེ་སྦེ་ ཐོབ་ཨིན་ན་དང་ ཐོབ་པའི་ཤུལ་ལས་ ག་ཅི་ར་འབད་དགོཔ་ ཁག་ཆེཝ་ཨིན་ནའི་སྐོར་ལས་ གསལ་བཤད་འབད་བའི་ཁར་ ཁོ་རའི་ ཉམས་མྱོང་ལུ་བལྟ་སྟེ་ ཁོ་བཟུམ་སྦེ་ མི་སྡེའི་ནང་ ཉེ་རིང་མི་ཕྱེ་ནིའི་དོན་ལུ་ མི་ཚུ་གིས་ ཧ་གོ་དགོཔ་འདུག་ཟེར་ བཤད་ཅི།
ད་རུང་ དབང་དྲག་རྡོ་རྗེ་བཟུམ་སྦེ་ ནད་གཞི་ཐོབ་སྟེ་ གཡང་ཟ་བག་ཟོན་མེད་པར་ རྒྱང་མཐོང་ནང་ཐོན་མི་ པདྨ་གིས་ སླབ་དོ་བཟུམ་འབད་བ་ཅིན་ ཁོ་ལུ་ འགོ་དང་པ་ ནད་གཞི་དེ་ ཐོབ་ཡོད་པའི་ ངོས་འཛིན་བྱུངམ་ད་ སྤྱིར་བཏང་མི་ཚུ་གིས་ ཉེ་རིང་ཕྱེ་བ་གིས་མ་ཚད་ ཐ་ན་ ཌོག་ཊར་ཚུ་གིས་ཡང་ ལག་ཤུབས་དང་ ཁ་རས་སྤུར་ཐོག་ལས་ བརྟག་དཔྱད་འབད་ནི་དེ་གིས་ ནདཔ་གཞན་ཚུ་གིས་ ཁོ་ལུ་ ཨེཆ་ཨའེ་བི་ནད་འབུབ་ཐོབ་ཡོདཔ་ཤེས་ཏེ་ ཁོ་གི་ སྦོ་ལོགས་ཁར་ འོང་མ་བཏུབ་ཟེར་ཨིན་པས།
སྡེ་ཚན་དེ་གིས་ ནངས་པ་ བཀང་ལུང་ཤེས་རབ་རྩེ་མཐོ་རིམ་སློབ་གྲྭའི་ སློབ་ཕྲུག་ཚུ་དང་ འབྲེལ་བ་འཐབ་པའི་ཤུལ་ལུ་ ཤར་ཕྱོགས་རྫོང་ཁག་༦ གི་ སློབ་གྲྭ་ཁག་སོ་སོའི་ནང་ གོ་བརྡ་སྤེལ་བར་ འགྱོ་ནི་ཨིན་པས།
ལས་རིམ་དེ་ འཛམ་གླིང་སྤྱི་ཚོགས་གོང་འཕེལ་ལས་རིམ་ ཡུ་ཨེན་ཌི་པི་གིས་ མ་དངུལ་རྒྱབ་སྐྱོར་ཐོག་ལས་ འགོ་འདྲེན་འཐབ་ཡོད་པའི་གནས་ཚུལ།
No comments:
Post a Comment