 |
| རྩི་ནག་གཏང་ནི་རྐྱངམ་ཅིག་ ལུས་མི་ དགེ་ལེགས་ཕུག་ནང་འཁོད་གནམ་ཐང་། |
ཡེ་ཤེས་སྒྲོལ་མ།
༉ ཤུལ་མའི་ཟླཝ་ནང་ མཇུག་བསྡུ་ནི་ཨིན་མི་ དགེ་ལེགས་ཕུག་ནང་འཁོད་གནམ་ཐང་དེ་ སྤྱི་ཟླ་༥ པའི་ བདུན་ཕྲག་དང་པའི་ནང་ འགོ་འབྱེད་འབད་ཚུགས་པའི་ རེ་བ་ཡོད་ཟེར་ ཞི་བའི་མཁའ་འགྲུལ་ལས་ཁུངས་ཀྱི་ ཡོངས་ཁྱབ་མདོ་ཆེན་ ཕ་ལ་རྡོ་རྗེ་གིས་ སླབ་ཨིན་པས།
ཡོངས་ཁྱབ་མདོ་ཆེན་གྱིས་འབད་བ་ཅིན་ ནང་འཁོད་གནམ་ཐང་བཟོ་སྐྲུན་གྱི་ལཱ་ཚུ་ ད་ལྟོ་བཟུམ་ མགྱོགས་ཚད་དང་ལྡནམ་སྦེ་ འགྱོ་བ་ཅིན་ སྤྱི་ཟླ་༥ པའི་ བདུན་ཕྲག་དང་པའི་ནང་ འགོ་འབྱེད་འབད་ཚུགས་ནི་དང་ གནམ་གྲུ་འཕུར་འགྲུལ་ཡང་ དུས་མཉམ་ལུ་ འགོ་བཙུག་ནི་ཟེར་ཨིན་པས།
གནམ་ཐང་བཟོ་སྐྲུན་ལཱ་གི་ གྲུབ་འབྲས་དེ་ ལེགས་ཐོན་བྱུང་དོ་ཡོད་མི་དེ་ཡང་ གཙོ་བོ་ར་ གནམ་གཤིས་གནས་སྟངས་ ལེགས་ཤོམ་ཡོད་ནི་དེ་གིས་ཨིན་ཟེར་ ཕ་ལ་རྡོ་རྗེ་གིས་ བཤདཔ་ཨིན་པས།
དགེ་ལེགས་ཕུག་གནམ་ཐང་བཟོ་སྐྲུན་གྱི་ འཛིན་སྐྱོང་པ་ མགོནམ་རྡོ་རྗེ་གིས་ སླབ་མིའི་ནང་ ད་རེས་ནངས་པ་ རྒྱལ་ཁབ་ནང་ རུ་པིའི་དཀའ་ངལ་ལུ་བརྟེན་ ལས་འགུལ་ལུ་ ཐོ་སྦོམ་སྦེ་ར་ ཕོག་ཅི་ཟེར་ཨིན་པས།
ཁོ་གིས་འབད་བ་ཅིན་ དཀའ་ངལ་དེ་ལུ་བརྟེན་ རྒྱུག་ལམ་རིང་ཐུང་མི་ཊཪ་༡,༥༠༠ གི་དོན་ལུ་ རྩི་ནག་མེ་ཊིག་ཊཱོན་༡,༠༠༠ མཁོ་སྒྲུབ་འབད་དགོཔ་ཡོད་རུང་ དངུལ་ཁང་ནང་ལས་ ཌི་མཱན་ཌཱཕཊ་ཚུ་ ཐོབ་མ་ཚུགསཔ་ལས་ རྩི་ནག་གཏང་ནིའི་ལཱ་དེ་ ཐོག་ལུས་སོ་ཡི་ཟེར་ཨིན་པས།
ཨིན་རུང་ ལས་འགུལ་གྱིས་ ཁ་ཙ་ རྒྱ་གར་གྱི་ས་གནས་ གུ་ཧ་ཊི་ལས་ རྩི་ནག་མེ་ཊིག་ཊཱོན་༡༠༠ མཁོ་སྒྲུབ་འབད་ཡོདཔ་ལས་ དཀའ་ངལ་མི་འབྱུང་འོང་ཟེར་ སླབ་ཨིན་པའི་གནས་ཚུལ།
No comments:
Post a Comment