གཟིགས་གནང་མི་ལུ་བཀའ་དྲིན་ཆེ།

༉ ང་བཅས་ཀྱིས་ ཉིན་བསྟར་བཞིན་དུ་

ཡོངས་འབྲེལ་འཆར་སྒོ་འདི་ནང་

གནས་ཚུལ་ཚུ་ དུས་མཐུན་བཟོ་སྟེ་ གསལ་བཀོད་འབདཝ་ཨིན།

We update at the earliest possible for you!

རྫོང་ཁའི་གནས་ཚུལ་གཟིགས་ དུས་མཐུན་ཞུགས་ཚུགས།

འབྲུག་གློག་བརྙན་ཚོགས་པ་གིས་ རྒྱལ་ཡོངས་ཁྱིམ་བཟོ་གོང་འཕེལ་ལས་འཛིན་ལས་ རྒྱལ་ཁ་ཐོབ་ཡོདཔ།

༣༡/༡༠/༢༠༡༢   ༉ མུ་ཏིག་ཐང་འབྲིང་རིམ་སློབ་གྲྭ་གོང་མའི་ ཕུཊ་བཱོལ་རྩེད་ཐང་ནང་སྦེ་ ཀོལ་བཱར་འཛིན་སྐྱོང་གིས་ འགོ་འདྲེན་འཐབ་མི་ ལས་ཁུངས་ཁག་གི་ རྩེད་འགྲན་འཕྲོ་མཐུད་འབད་མིའི་ནང་ ཁ་ཙ་ འབྲུག་གློག་བརྙན་ཚོགས་པ་གིས་ གཱོལ་༦ བཙུགས་ཏེ་ རྒྱལ་ཡོངས་ཁྱིམ་བཟོ་གོང་འཕེལ་ལས་འཛིན་ལས་ རྒྱལ་ཁ་ཐོབ་ཅི།
རྒྱལ་ཡོངས་ཁྱིམ་བཟོ་(ཁེན་འཇར་ལྕང་ཁ)དང་ འབྲུག་གློག་བརྙན་ཚོགས་པའི་བར་ན་ རྩེད་འགྲན་འབད་བའི་བསྒང་།

སྤྱི་ཕན་རིག་སྤེལ་གྱི་ལས་འགུལ་དང་པ་ བརྒྱ་ཆ་༧༠ དེ་ཅིག་གྲུབ་ཡོདཔ།

༣༡/༡༠/༢༠༡༢   ༉ ལོ་ལྔའི་སྤྱི་ཕན་རིག་སྤེལ་ལས་འགུལ་དེ་ སྤྱི་ལོ་༢༠༡༠ ཟླ་༥ པའི་ནང་ལས་འགོ་བཙུགས་ཏེ་ ད་ཚུན་ལུ་ ལཱ་གི་གྲུབ་འབྲས་ བརྒྱ་ཆ་༧༠ དེ་ཅིག་ གྲུབ་ཡོད་པའི་ཁར་ ད་རུང་ ལས་འགུལ་གོ་རིམ་༢ པའི་དོན་ལུ་ དུས་ཅི་སྤྱི་ཟླ་༥ པའི་ནང་ རྒྱ་གར་གཞུང་ལུ་ གྲོས་འཆར་ཕུལ་ཡོདཔ་ཨིན་པས། 

དགེ་ལེགས་ཕུག་དེ་ ཞི་གཡོག་ལས་དགོངས་ཞུ་འབད་མི་ཚུ་གི་ སྡོད་གནས་ཅིག་ལུ་གྱུར་ཡོདཔ།

༣༡/༡༠/༢༠༡༢   ༉ དགེ་ལེགས་ཕུག་ཁྲོམ་གྱི་ས་ཁོངས་དེ་ དགོངས་ཞུས་འབད་མི་ ཞི་གཡོགཔ་ཚུ་གིས་ ལཱ་གཡོག་ནང་ལས་ དགོངས་ཞུས་འབད་བའི་ཤུལ་ལུ་ སྐྱིད་ཉམས་སྐྱོང་སའི་ ས་ཁོངས་ཅིག་ལུ་གྱུར་ཡོད་མི་དེ་ཡང་ ས་གནས་དེ་ ལོ་ན་རྒས་ཤོསམ་ཚུ་ལུ་ ཚ་དྲོད་དང་ལྡན་པའི་ཁར་ སྒོ་ཡངས་དྲག་སྦེ་ ཡོད་ནི་དེ་གིས་ཨིན་པས།
ཐར་པ་ལ།

དུས་ཡུན་སྐར་མ་༥༠ ནང་ ཤིང་༩༠,༠༠༠ ལྷགཔ་ཅིག་བཙུགས་ཡོདཔ།

༣༡/༡༠/༢༠༡༢   ལ་དྭགས་ཀྱིས་ འཛམ་གླིང་ནང་ དུས་སྟབས་ཅིག་ཁར་ ཤིང་གི་གྱངས་ཁ་མཐོ་ཤོས་ བཙུགས་ཡོད་པའི་ ཐོ་བཀོད་གསརཔ་འབད་ནུག།

༉ ད་རེས་ ལ་དྭགས་ཀྱི་ས་གནས་ ཧེ་མིསི་དགོན་པ་ལུ་ འཚོགས་པའི་བསྒང་ཡོད་མི་ དོན་རྒྱུད་དཔལ་ལྡན་འབྲུག་པའི་ཚོགས་ཆེན་ཐེངས་༤ པའི་ནང་ བཅའ་མར་གཏོགས་མི་བླ་སྤྲུལ་དང་ དགེ་སློང་ དེ་ལས་ ས་གནས་ཀྱི་མི་ཚུ་གིས་ མཉམ་རུབ་ཐོག་ལས་ སྤྱི་ཟླ ༡༠ པའི་ཚེས་༢༩ ལུ་ ཏུང་ཀེ་ལ་ཏོག་ཐང་ནང་ ལྕང་མ་ཤིང་༩༠,༠༠༠ ལྷགཔ་ཅིག་ བཙུགས་ཐོག་ལས་ འཛམ་གླིང་ནང་ དུས་ཡུན་ཐུང་ཀུ་ཅིག་ནང་ ཤིང་གི་གྱངས་ཁ་མཐོ་ཤོས་ འཛུགས་སྐྱོང་འབད་ཡོད་པའི་ ཐོ་བཀོད་གསརཔ་འབད་ཡི།
རྒྱལ་དབང་འབྲུག་པ་རིན་པོ་ཆེ་མཆོག་གིས་ ཤིང་བཙུགས་གནང་པའི་བསྒང་།
ལ་དྭགས་ཀྱི་ས་གནས་ ཏུང་ཀེ་ལ་ཏོག་ཐང་ནང་ མི་གྲངས་༣༠,༠༠༠ དེ་ཅིག་གིས་ ལྕང་མ་ཤིང་ཚུ་ བཙུགས་པའི་བསྒང་།

ཉམས་མྱོང་དང་ཤེས་མཐོང་ཅན་གྱི་ གསལ་བཤད་ལས་རིམ།

༣༡/༡༠/༢༠༡༢   ༉ ཀྲོང་གསར་སྟག་རྩེ་རིག་གཞུང་མཐོ་རིམ་སློབ་གྲྭ་གིས་ དུས་ཅི་ ཤེས་རིག་གི་ ལོ་བརྒྱ་འཁོར་བའི་དུས་སྟོན་དང་འབྲེལ་ འགོ་དང་པ་ ཉམས་མྱོང་དང་ཤེས་མཐོང་ཅན་གྱི་ གསལ་བཤད་ལས་རིམ་ཟེར་ ཆགས་རབས་དང་ ལམ་སྲོལ་གྱི་བརྗོད་དོན་ཐོག་ལུ་ ཉིན་གྲངས་༡ འབད་མི་ ལས་རིམ་ཅིག་ འགོ་འདྲེན་འཐབ་ཅི།
སྟག་རྩེ་རིག་གཞུང་མཐོ་རིམ་སློབ་གྲྭ་ནང་ ཉམས་མྱོང་དང་ཤེས་མཐོང་ཅན་གྱི་ གསལ་བཤད་ལས་རིམ་ འགོ་འདྲེན་འཐབ་པའི་བསྒང་།

ལྷན་རྒྱས་གཞུང་ཚོགས་ཀྱིས་ གནས་ཚུལ་གསར་སྟོན།

༣༠/༡༠/༢༠༡༢   ༉ ཁ་ཙ་ ཐིམ་ཕུ་ རེ་བེན་ཧ་འུསི་ནང་སྦེ་ ལྷན་རྒྱས་གཞུང་ཚོགས་ཀྱི་ ཞལ་འཛོམས་ཐེངས་༡༤༥ འཚོགས་པའི་སྐབས་ འཕྲལ་ཁམས་ཅིག་ཁར་ གོང་འཕེལ་སྲིད་བྱུས་ཀེ་རེ་ཌིཌ་(ཌི་པི་སི་-༢)དང་ མཐའ་ཟུར་གྲོང་གསེབ་གོང་འཕེལ་(ཨར་ཨར་སི་ཌི་)གི་དོན་ལུ་ འཛམ་གླིང་དངུལ་ཁང་གིས་ ཨའེ་ཌི་ཨེ་བསྐྱིན་འགྲུལ་ ཡུ་ཨེསི་ཌོ་ལར་ས་ཡ་༤༥ གནང་བ་གྲོལ་མི་དེ་ལུ་ ཆ་འཇོག་འབད་ཡོདཔ་ཨིན་པས།

དོན་བརྒྱུད་དཔལ་ལྡན་འབྲུག་པའི་ ཚོགས་ཆེན་ཐེངས་༤ པ་ འགོ་འབྱེད་འབད་ཡོདཔ།

༣༠/༡༠/༢༠༡༢   ༉ སྤྱི་ཟླ་༡༠ པའི་ཚེས་༢༨ ལུ་ རྒྱ་གར་གྱི་མངའ་སྡེ་ ལ་དྭགས་ལུ་ཡོད་པའི་ ཧེ་མེསི་དགོན་པ་ལུ་ རྒྱལ་དབང་འབྲུག་པ་དང་ ནང་སྲིད་བློན་པོ་ མི་འགྱུར་རྡོ་རྗེ་༢ ཀྱིས་ དོན་བརྒྱུད་དཔལ་ལྡན་འབྲུག་པའི་ ཚོགས་ཆེན་ཐེངས་༤ པ་ འགོ་འབྱེད་གནང་ཡི།
ཚོགས་ཆེན་འགོ་འབྱེད་སྐབས་ ནང་སྲིད་བློན་པོ་མི་འགྱུར་རྡོ་རྗེ་གིས་ གསུང་བཤད་གནང་པའི་བསྒང་།

ལས་མིའི་ཉེན་སྲུང་དང་ལྡནམ་སྦེ་མེད་མི་གིས་ བཟོ་སྐྲུན་ཇོ་བདག་ལུ་ ཉེས་བྱ་བཀལ་ཡོདཔ།

༣༠/༡༠/༢༠༡༢    ༉ ལཱ་འབད་སའི་ས་ཁོངས་ནང་ ལས་མི་༢ ལུ་ གནོད་སྐྱོན་བྱུང་བའི་ཤུལ་ལུ་ དབྱེ་ཞིབ་འབདཝ་ད་ འཕྲོད་བསྟེན་ཉེན་སྲུང་དམ་འཛིན་དང་འཁྲིལ་ མ་འབད་མི་དང་ བྱུང་རྐྱེན་དེའི་སྐོར་ལས་ བཟོ་སྐྲུན་ལས་སྡེ་ལུ་ སྙན་ཞུ་མ་འབད་བར་བཞག་མི་ལུ་བརྟེན་ སེམས་རྟོགས་ཁའི་ བཟོ་སྐྲུན་ཇོ་བདག་གཅིག་ལུ་ ཉེས་བྱ་དངུལ་ཀྲམ་ ༡༨,༠༠༠ བཀལ་ཡོདཔ་ཨིན་པས། 

ཀྲོང་གསར་ནུབ་སྟོད་གཡུས་ཚན་ནང་ རིང་ཚད་ཕིཊ་༧༠ འབད་མི་ ཟམ་བཟོ་སྐྲུན་འགོ་བཙུགས་ནི།

༣༠/༡༠/༢༠༡༢    ༉ ཀྲོང་གསར་ ནུབ་ཕྱོགས་སྟོད་གཡུས་ཚན་༦ གི་མི་སེར་ཚུ་ ཡུན་རིང་བསྒུགས་སྡོད་པའི་ཤུལ་ལུ་ མང་སྡེ་ཆུའི་ཡན་ལག་ ཀ་བ་ཆུའི་ཟམ་བཟོ་སྐྲུན་གྱི་ལཱ་དེ་ བདུན་ཕྲག་འདི་ནང་ལས་ འགོ་བཙུགས་ནིའི་རེ་བ་ཡོདཔ་ཨིན་པས།
གནས་སྐབས་ཀྱི་དོན་ལུ་རྐྱབ་མི་རྐང་ཟམ།

དཔེ་དེབ་བཀྲམ་སྤེལ་གྱི་རྩོད་གཞི་ ཕྱིར་འབུད་བཏང་ཡོདཔ།

༣༠/༡༠/༢༠༡༢   ༉ ངན་ལྷད་བཀག་སྡོམ་ལྷན་ཚོགས་ཀྱིས་ ཧེ་མའི་ ཆོས་ཚན་རྩ་གཞུང་དང་ ཁྱད་རིག་རྒྱབ་སྐྱོར་སྡེ་ཚན་གྱི་ འགོ་དཔོན་༣ ལུ་ ཡིག་ཆ་བརྫུས་བཟོ་དང་ གསུག་འབུལ་ དེ་ལས་ ཡིག་ཚང་བྱ་སྤྱོད་ངན་པ་འཐབ་པའི་ ཉེས་འཛུགས་ཐོག་ སྤ་རོ་རྫོང་ཁག་ཁྲིམས་འདུན་ལས་ མངོན་མཐོ་ཁྲིམས་ཀྱི་འདུན་སར་ མཐོ་གཏུགས་འབད་ཡོད་མི་དེ་ མངོན་མཐོ་ཁྲིམས་འདུན་གྱིས་ ཕྱིར་འབུད་བཏང་ཡོདཔ་ལས་ ཆེ་མཐོ་གྲངས་མང་ཁྲིམས་འདུན་གྱི་འཁྲུན་ཆོད་ལུ་ ཆ་གནས་འབད་དགོཔ་ཨིན་པས།

ནགས་ཚལ་འགོ་དཔོན་ཅིག་ དམར་བསད་འབད་ཡོད་པའི་དོགས་པ།

ཚེ་འདས་ཀྱི་ཕུངམ་དེ་ རྒྱ་གར་ཧ་ཤི་མ་ར་ ཊོ་ཊ་པ་ར་གཡུས་ཚན་ཁ་ཐུག་ལུ་འགྱོ་སའི་ ཟུར་ལམ་ལས་ཐོབ་ནུག།
 ༩/༡༠/༡༢། ༉ སྤྱི་ཟླ་༡༠ པའི་ཚེས་༢༥ ལུ་ ཕུན་ཚོགས་གླིང་ལས་ བསམ་རྩེ་ལུ་ འགྱོ་བའི་ལམ་ཁར་ སྐྱེས་ལོ་༣༣ ལང་མི་ ནགས་ཚལ་འགོ་དཔོན་ཅིག་ དམར་བསད་འབད་མི་ལུ་ ད་ལྟོ་ ཞིབ་དཔྱད་འཕྲོ་མཐུད་དེ་ར་ རྐྱབ་པའི་བསྒང་ཡོདཔ་ཨིན་པས།

རྩོད་དོན་དེ་ རྒྱ་གར་ཇའི་སྒང་གི་ ཁྲིམས་སྲུང་འགག་སྡེའི་འོག་ལུ་ཚུད་མི་ ཧ་ཤི་མ་ར་ཁྲིམས་སྲུང་འགག་པའི་ ས་ཚིགས་འགེགས་སྲུང་ནང་ ཞིབ་དཔྱད་ཀྱི་དོན་ལུ་ ཐོ་བཀོད་འབད་དེ་ཡོདཔ་ཨིན་པས།

ཕོ་སྐྱེས་ཅིག་བསད་ཡོདཔ།

༩/༡༠/༡༢། ༉ ཁ་ཙ་དྲོ་པ་ ལུང་བསྟན་ཕུག་ལུ་སྡོད་མི་ སྐྱེས་ལོ་༣༨ དེ་ཅིག་ལང་མི་ ཕོ་སྐྱེས་ཅིག་ ཁོ་རའི་བུ་ སྐྱེས་ལོ་༡༥ ལང་མི་དེ་གིས་ ཀྲོབ་མདའ་པེསི་ཏཱོལ་རྐྱབ་སྟེ་ བསད་ཡོདཔ་ཨིན་པས།

བཙན་ཁྲིད་འབད་མི་ གླ་འཁོར་དེད་གཡོགཔ་ ད་ལྟོ་ཡང་ འཚོལ་མ་ཐོབ་པར་ཡོདཔ།

༩/༡༠/༡༢། ༉ སྤྱི་ཟླ་༡༠ པའི་ཚེས་༢༢ གི་ཕྱི་རུ་ གསར་སྤང་ལས་ དགེ་ལེགས་ཕུག་ལུ་འོང་པའི་ལམ་ཁར་ བཙན་ཁྲིད་འབད་མི་ གླ་འཁོར་དེད་གཡོགཔ་དེ་ འཚོལ་ནིའི་དོན་ལུ་ འབྲེལ་ཡོད་དབང་འཛིན་ཚུ་གིས་ ཨ་སམ་གྱི་ འགོ་འཛིན་ཚུ་ལས་ རྒྱབ་སྐྱོར་ལེན་ཐོག་ འཕྲོ་མཐུད་དེ་ར་ འཚོལ་ཞིབ་འབད་དོ་ཟེར་ བཤདཔ་ཨིན་རུང་ དེད་གཡོག་པའི་ ཨམ་སྲུ་གིས་འབད་བ་ཅིན་ འཚོལ་ཐབས་ཀྱི་དོན་ལུ་ མོ་ལུ་ ལམ་སྟོན་འབད་མི་ཅིན་འཐོན་རུང་ བཏུབ་ནི་མས་ཟེར་ སླབ་ཨིན་པས།

ཧེ་མེསི་ལྷ་ཁང་གི་ རྒྱབ་ཁུངས་མདོར་བསྡུས།

འབྲུག་པ་བཀའ་བརྒྱུད་པའི་ བླ་སྤྲུལ་ཚུ་ ཞལ་འཛོམས་གནང་པའི་བསྒང་།
 ༢༩/༡༠/༡༢། ༉ རྒྱ་གར་གྱི་མངའ་སྡེ་ ལ་དྭགས་ལུ་ ལྷ་ཁང་ལེ་ཤ་ཡོད་པའི་གྲས་ལས་ རྩ་ཆེ་ཤོས་དེ་ར་ ལ་དྭགས་གནམ་ཐང་ལས་ ཀི་ལོ་མི་ཊར་༤༥ དེ་ཅིག་གི་ས་ཁར་ གངས་རི་ཅིག་གི་རྩ་བར་ ཆགས་ཏེ་ཡོད་པའི་ ཧེ་མེསི་ལྷ་ཁང་དེ་ཨིན་པས།

ལྷ་ཁང་དེ་ནང་ འགྱོ་བའི་སྐབས་ལུ་ ལཱེ་གནམ་ཐང་ལས་ ལཱེ་དང་ མ་ན་ལིའི་ གཞུང་ལམ་བདའ་སྟེ་ ཀི་ལོ་མི་ཊར་༣༥ དེ་ཅིག་གི་ས་ཁར་ ས་གནས་ཀ་རུ་ཟེར་སར་ལྷོདཔ་ད་ ཨིན་ཌསི་གཙང་ཆུ་བརྒལ་ཏེ་ གཡས་ཕྱོགས་ལས་ ཁ་ཡར་བལྟ་སྟེ་ འགྲོ་འགྲུལ་འབད་དགོཔ་ཨིན་པས།

ཁྱིམ་གུང་༢༦༥ ལུ་ ཕན་ཐོགས་འབྱུང་ནི་ཨིན་མི་ སོ་ནམ་ཞིང་ལམ་ལུ་ཉོགས་བཤད།

མི་སེར་ཚུ་གིས་ ཉོགས་བཤད་བཀོད་མི་ བསམ་རྩེ་རྡོ་རོ་ཁའི་ སོ་ནམ་ཞིང་ལམ།
༩/༡༠/༡༢། ༉ བསམ་རྩེ་རྡོ་རོ་ཁའི་ མི་སེར་ཚུ་ རྫོང་ཁག་གཞན་དང་གཅིག་ཁར་ མཐུད་སྦྲེལ་འབད་ཚུགས་པའི་ སོ་ནམ་ཞིང་ལམ་བཏོན་ནི་དེ་གིས་ མི་སེར་ཚུ་ སེམས་དགའ་སྟེ་ཡོད་རུང་ ཁག་འབགཔ་ཚུ་གི་ ལཱ་འབད་ཐངས་ལུ་ལྟ་སྟེ་ བསམ་པ་མ་རྫོགས་པར་ཡོདཔ་ཨིན་པས།

སྤྱི་ཟླ་༡༠ པའི་ཚེས་༢༣ ལུ་ གཡུས་མི་ཚུ་གིས་ རྒཔོ་ལུ་ ཉོགས་བཤད་བཀོད་མིའི་ནང་ ཁག་འབགཔ་ཚུ་གིས་ ལམ་བདའ་སྟེ་ རྡོ་རུ་ལེགས་ཤོམ་སྦེ་ མ་བླུགས་ནི་དེ་གིས་ ཧོག་ཀ་ལེ་ཤ་ཡོདཔ་ད་ ད་ལྟོ་ ཞིང་ལམ་སེལ་ཏེ་ ཀི་ལོ་མི་ཊར་༧ དེ་ཅིག་ ལྷོད་ཡོདཔ་ཨིན་པས།

རྒྱལ་ཁབ་ནང་ ཆང་ལུ་བརྟེན་པའི་ བྱུང་རྐྱེན་གནས་སྟངས་ཀྱི་མངོན་གསལ།

 ཆང་འཐུང་སྟེ་ སྣུམ་འཁོར་བཏང་མི་གིས་ 
རྒྱུ་དངོས་མེདཔ་བཏང་ཡོད་པའི་སྙན་ཞུའི་ ཐོ་བཀོད་རེའུ་མིག། 
སྣུམ་འཁོར་བརྡ་སྟོན་སྡེ་ཚན་གྱི་ སྙན་ཞུ་༢༠༡༡ ཅན་མ་ལྟར།
༢༩/༡༠/༡༢། ༉ འབྲུག་ལུ་ ཆང་འཐུང་སྟེ་ སྣུམ་འཁོར་བཏང་མི་དེ་ ཉེན་འཚུབ་ཅན་གྱི་གནས་སྟངས་ཅིག་ལུ་གྱུར་བའི་མངོན་གསལ་བྱུང་མི་དེ་ཡང་ སྤྱི་ལོ་༢༠༠༥ དང་༢༠༡༠ གི་བར་ན་ ཆང་འཐུང་སྟེ་སྣུམ་འཁོར་བཏང་མི་གིས་ སྣུམ་འཁོར་༣༢༠ ཐུག་རྐྱེན་བྱུང་ས་ལས་ མི་གྲངས་༨༦ ལུ་ཤི་རྐྱེན་དང་ མི་གྲངས་༤༠༦ ལུ་ རྨ་སྐྱོན་བྱུང་ཡོདཔ་ཨིན་པས།

གོ་གནས་ཡར་སེང་དང་ མརཕབ་ཀྱི་ རྩེད་འགྲན་འགོ་བཙུགས་ཡོདཔ།

ནང་པའི་སྡེ་ཚན་དང་ འབྲུག་ཡུ་ནིའི་ཊེད་སྡེ་ཚན་༢ ཀྱི་བར་ན་ རྩེད་འགྲན་འབད་བའི་བསྒང་།
 ༢༩/༡༠/༡༢། ༉ འབྲུག་རྐང་རིལ་ཚོགས་སྡེ་གིས་ འགོ་འདྲེན་ཐོག་ལས་ ཕུཊ་བཱོལ་རྩེད་འགྲན་སྡེ་ཚན་༤ གི་བར་ན་ གནས་རིམ་ཡར་འཕར་གྱི་ རྩེད་འགྲན་འབད་ནི་ ཁ་ཙ་ ལས་ ལྕང་ཇི་ཇི་ཕུཊ་བཱོལ་རྩེད་ཐང་ནང་ རྩེད་འགྲན་འབད་ནི་འགོ་བཙུགས་ཡོདཔ་ཨིན།
དེ་ཡང་ འབྲུག་ཕུཊ་བཱོལ་ཚོགས་སྡེ་གིས་ ལོ་བསྟར་བཞིན་དུ་ ཕུཊ་བཱོལ་སྡེ་ཚན་ཚུ་གི་བར་ན་ འགྲན་བསྡུར་ཁག་མ་འདྲཝ་སྦེ་ འགོ་འདྲེན་འཐབ་ཡོད་མིའི་གྲལ་ལས་ ཕུཊ་བཱོལ་སྡེ་ཚན་ཀ་པའི་ནང་ སྡེ་ཚན་༦ གི་བར་ན་ འགྲན་བསྡུར་འབདཝ་ད་ སྡེ་ཚན་ལས་ མཇུག་གི་ ཨང་༥ པ་དང་༦ པ་ཐོན་མི་ སྡེ་ཚན་༢ དང་ སྡེ་ཚན་ཁ་པ་ལས་ རྩེད་འགྲན་དྲག་ཤོས་ཐོན་མི་སྡེ་ཚན་༢ བསྡོམས་ཀྱིས་ སྡེ་ཚན་༤ གི་བར་ན་ རྩེད་འགྲན་འབད་དོ་ཡོདཔ་ཨིན་པས།

རྒྱལ་ཡོངས་ཚོགས་སྡེའི་འཐུས་མི་ཚུ་ དགོངས་ཞུ་མ་འབད་བར་ ལོག་བཙག་འཐུ་ནང་ བཅའ་མར་གཏོགས་ནི་དེ་ འོས་འབབ་འདུག་ག?

༢༧/༡༠/༢༠༡༢   ༉ ད་རེས་གནས་སྐབས་ཅིག་ འབྲུག་གི་ རྒྱལ་ཡོངས་ཚོགས་སྡེ་དང་པའི་འཐུས་མི་ཚུ་ ལོག་ཚོགས་སྡེའི་ ས་གོ་དོན་ལུ་ བཙག་འཐུ་ནང་ ལོག་བཅའ་མར་གཏོགས་ཆོག་མི་ཆོག་གི་ཐད་ཁར་ བཀའ་རྒྱ་གཏན་འཁེལ་ཅིག་མེད་པའི་གནས་སྟངས་ནང་ ཚོགས་སྡེའི་བཙག་འཐུ་ནང་ བཅའ་མར་གཏོགས་ནི་ཨིན་མི་ འདེམས་ངོ་གསརཔ་ཚུ་གི་དོན་ལུ་ འཐུས་མི་རྙིངམ་ཚུ་མེད་པ་ཅིན་ སེམས་དགའ་ནི་ཨིན་པས།

སེམས་ཅན་ཚུ་ལུ་ གནོད་སྐྱོན་མེད་ཟེར་མི་དེ་ མི་བདེན་ནི་ཨིནམ།

༢༧/༡༠/༢༠༡༢   ༉ གློག་ཤུགས་མེ་ག་ཝཱཊ་༡,༢༠༠ འབད་མི་ སྤུ་ན་གཙང་ཆུ་གློག་མེ་ལས་འགུལ་དང་པ་དང་ མེ་ག་ཝཱཊ་༡,༠༢༠ འབད་མི་ ལས་འགུལ་༢ པ་གིས་ འཛམ་གླིང་ནང་ དཀོན་དྲགས་ཅན་གྱི་ ཆུ་བྱ་དཀརམོ་དང་ ཉ་རིགས་གཱོལ་ཌན་མ་ཤིར་ དེ་ལས་ བྱ་དགྭོ་ལུ་གནོད་སྐྱོན་མེད་ཟེར་ སླབ་ཨིན་པས།

སོ་ནམ་ཞིང་ལམ་གྱིས་ མི་སེར་ཚུ་ལུ་ ཕན་ཐོགས་སྦོམ་འབྱུང་ཚུགས་ནི།

༢༧/༡༠/༢༠༡༢   ༉ ལྷུན་རྩེ་རྫོང་ཁག་ རྒྱ་རས་རྒེད་འོག་ ངང་ངེ་གཡུས་ཚན་ལས་ སྐྱེས་༥༥ ལང་མི་ ཕུན་ཚོགས་རྡོ་རྗེ་གིས་ ད་ལས་ཕར་ ཁོ་ར་ཧ་ལམ་ ལོ་ན་རྒས་དོ་ཡོདཔ་ལས་ ཚྭ་ཚོ་ཏོ་དང་ བཟའ་འཐུང་གི་རིགས་ཚུ་ ཉོ་བར་འགྱོ་ནི་ལུ་ ལཱ་ཁག་བཏང་དོ་ཡོད་མི་དེ་ཡང་ ད་ལྟོ་ཚུན་ ཁོ་རའི་གཡུས་ཁ་ལུ་ འཁོར་ལམ་གྱི་ཞབས་ཏོག་མེདཔ་ལས་ རྐང་སྟོང་སྦེ་ དུས་ཡུན་ཞག་དང་ ཆུ་ཚོད་ལས་བཅད་དེ་ སྒོར་གཱན་དང་ ཨའུ་ཚོ་གཞུང་ལམ་ཁར་ འགྱོ་དགོཔ་ལས་ སྟབས་མ་བདེཝ་སྦོམ་ཡོདཔ་ཨིན་པས།
འགོ་འབྱེད་འབད་མི་ རྒྱ་རས་ཀྱི་ སོ་ནམ་ཞིང་ལམ།

ད་རིས་ལས་ དོན་བརྒྱུད་དཔལ་ལྡན་འབྲུག་པའི་ ལོ་འཁོར་ཚོགས་ཆེན་ འགོ་བཙུགས་ནི།

༢༧/༡༠/༢༠༡༢   ༉ ལོ་བསྟར་ དོན་བརྒྱུད་དཔལ་ལྡན་འབྲུག་པའི་ ལོ་འཁོར་ཚོགས་ཆེན་ཐེངས་༤ པ་དེ་ དུས་ཅི་ རྒྱ་གར་གྱི་མངའ་སྡེ་ ལ་དྭགས་ལུ་ཡོད་པའི་ ཧེ་མེསི་དགོན་པ་ལུ་སྦེ་ ད་རིས་ལས་ འཚོགས་ནི་ཨིནམ་ལས་ རྒྱལ་ཁབ་ཁག་ལས་ བཅའ་མར་གཏོགས་མི་ཚུ་ ལྷོད་ཡོདཔ་ཨིན་པས།
ལ་དྭགས་ཀྱི་ ཧེ་མེསི་དགོན་པ།
ཤིང་ལྕངམ་༡༠༠,༠༠༠ འཛུགས་སྐྱོང་འབད་ནི་ཨིན་མི་ ཏུང་ཀ་ལ་ཏོག་ཐང་།

ལས་བྱེདཔ་༢༢ ཀྱིས་ རྒྱལ་ཡོངས་གནས་ཚད་ཐེངས་༢ པའི་ ལེགས་ཐོན་ལག་ཁྱེར་ཐོབ་ཡོདཔ།

༢༧/༡༠/༢༠༡༢   ༉ ཁ་ཙ་ འབྲུག་གློག་མེ་ལས་འཛིན་གྱི་ གློག་མེ་ཚད་སྤེལ་དང་ རྒྱུད་ཐག་བཀྲམ་སྤེལ་གྱི་ ལཱ་འགན་འབག་མིའི་ནང་ མཐར་འཁྱོལ་བྱུང་མི་ མི་གྲངས་༢༢ ལུ་ རྒྱལ་ཡོངས་ལེགས་ཐོན་གནས་ཚད་ཐེངས་༢ པའི་ ངོས་འཛིན་ལག་ཁྱེར་ཚུ་ ལས་གཡོག་ལྷན་ཁག་གིས་ གནང་ཡི།
ལས་གཡོག་བློན་པོ་ རྡོ་རྗེ་དབང་འདུས་ཀྱིས་ ལཱ་འགན་མཐར་འཁྱོལ་བྱུང་མི་ཚུ་ལུ་ གསུངས་བཤད་གནང་པའི་བསྒང་།

སྦས་གནས་ཁྱད་པར་ཅན་ལུ་ སྦྱིན་བདག་མེད་པའི་དཀའ་ངལ།

༢༧/༡༠/༢༠༡༢   ༉ རྒྱལ་ཁབ་ནང་ གུ་རུ་རིན་པོ་ཆེའི་གནས་ མང་རབས་ཅིག་ཡོད་མིའི་གྲས་ལས་ དབང་འདུས་ཕོ་བྲང་ ཀ་བཞི་རྒེད་འོག་ལུ་ཡོད་པའི་ སྦས་གླང་བྲག་གི་གནས་དེ་ ཁྱད་པར་ཅན་ཅིག་ཨིན་རུང་ དེ་ནང་བཞུགས་མི་མཚམས་པ་ཚུ་ལུ་ གཞུང་དང་སྒེར་གྱི་ཁ་ཐུག་ལས་ གྲོགས་རམ་འབད་མི་སྒྲིང་སྒྲིང་མེད་མི་ལུ་བརྟེན་ ཡར་ངོ་ མར་ངོའི་ཚེས་བཅུའི་སྐབས་ ཁོང་ར་མཚམས་པ་ཚུ་གིས་སྦྱིན་བདག་འབད་ཐོག་ལས་ ཚོགས་འཁོར་སྐོར་དོ་ཡོདཔ་ཨིན་པས།
ཁྱད་འཕགས་ཅན་གྱི་ སྦས་གླང་བྲག་གི་གནས།

དགེ་འདུ་ལུ་ ལས་བྱེདཔ་ཅིག་ལུ་ ཤི་རྐྱེན་བྱུང་མིའི་ རྒྱུ་རྐྱེན་ཧ་མ་གོ་བར་ཡོདཔ།

༢༧/༡༠/༢༠༡༢   ༉ ཁ་ཙ་ཉིན་མར་ སྐྱེས་ལོ་༢༧ ལང་མི་ ཕོ་སྐྱེས་ཅིག་ དགེ་འདུ་སྨན་ཁང་ནང་ འབག་བསྐྱལཝ་ད་ ཤི་ཚར་ཡོདཔ་ཨིན་རུང་ རོ་བརྟག་འབད་མི་ ཌོག་ཊར་དེ་ གཞན་ཁར་སོང་ཡོདཔ་ལས་ རྒྱུ་རྐྱེན་ག་ཅི་ལུ་བརྟེན་ ཤི་ཡོདཔ་ཨིན་ན་ གསོ་བའི་ལས་བྱེདཔ་ཚུ་གིས་ གཏད་འཁེལ་སྦེ་ སླབ་མ་ཚུགསཔ་ཨིན་པས།

གློག་མེའི་ཟངས་ཐག་ཨར་རྐུན་འབད་མི་ ཕོ་སྐྱེས་ཅིག་ དོ་དམ་འོག་ལུ་བཙུགས་ཡོདཔ།

༢༧/༡༠/༢༠༡༢   ༉ ཀྲོང་གསར་ཁྲིམས་སྲུང་འགག་པ་གིས་ སྤྱི་ཟླ་༡༠ པའི་ཚེས་༡༧ ལུ་ ཕོ་སྐྱེས་ཅིག་གིས་ མང་སྡེ་ཆུ་གློག་མེ་ལས་འགུལ་གྱི་ ཆུ་བྱག་རྐྱབ་སའི་ ས་ཁོངས་ནང་ ཆུ་དུང་རྐྱབ་པའི་སྐབས་ ལག་ལེན་འཐབ་མི་ འཕྲུལ་ཆས་ཅིག་གི་ ཟངས་ཐག་བཏོན་མི་ལུ་བརྟེན་ ཁྲིམས་སྲུང་འགག་པའི་ དོ་དམ་འོག་ལུ་ བཙུགས་ཡོདཔ་ཨིན་པས།

དགེ་ལེགས་ཕུག་ ནང་འཁོད་གནམ་ཐང་གསརཔ་ འགོ་འབྱེད་འབད་ཡོདཔ།

༢༦/༡༠/༢༠༡༢   ༉ ད་ལྟོ་ཚུན་ཚོད་ དུས་ཡུན་རིངམོ་སྦེ་བསྒུགས་སྡོད་མི་ དགེ་ལེགས་ཕུག་ ནང་འཁོད་གནམ་ཐང་དེ་ ཁ་ཙ་ བློན་ཆེན་འཇིགས་མེད་འོད་ཟེར་འཕྲིན་ལས་མཆོག་གིས་ འགོ་འབྱེད་མཛད་གནང་ཡི།
སྤ་རོ་རྒྱལ་སྤྱི་གནམ་ཐང་ལས་ དགེ་ལེགས་ཕུག་ ནང་འཁོད་གནམ་ཐང་ཚུན་ འཕུར་འགྲུལ་འབདཝ་ད་ དུས་ཡུན་སྐར་མ་༢༥ འགོར་དོ་ཡོདཔ་ཨིན་པས།

ཁ་ཙ་ བློན་ཆེན་འཇིགས་མེད་འོད་ཟེར་འཕྲིན་ལས་མཆོག་ དགེ་ལེགས་ཕུག་ ནང་འཁོད་གནམ་ཐང་གསརཔ་ འགོ་འབྱེད་མཛད་ནིའི་དོན་ལུ་ གནམ་ཐང་ནང་ཕེབས་ད་ ལྟདམོ་ལྟ་བར་
འཛོམས་མི་ ས་གནས་ཀྱི་མི་སེར་ བརྒྱ་ཕྲག་ལས་བཅད་མི་ཚུ་ལུ་ ཕྱག་སེང་སྟེ་ དགའ་འཛུམ་ཐོག་ལས་ གཟིགས་གནང་པའི་བསྒང་།
ཁ་ཙ་ སྤ་རོ་ལས་ འགོ་འབྱེད་དོན་ལུ་ འཕུར་འགྲུལ་འབད་མི་ འབྲུག་གི་གནམ་གྲུ་ དགེ་ལེགས་ཕུག་ ནང་འཁོད་གནམ་ཐང་གསརཔ་ནང་ ཆགས་རན་པའི་བསྒང་།

གླིང་བཞི་རྫོང་གི་ ཉམས་གསོའི་ལཱ་ཚུ་ འཆར་གཞི་༡༠ པའི་དོན་ལུ་ ཕྱིས་ཡོདཔ།

༢༦/༡༠/༢༠༡༢   ༉ དུས་ཅི་ སྤྱི་ཟླ་༩ པའི་ནང་ ཐོག་ཚད་༣ འབད་མི་ གླིང་བཞི་གཡུལ་རྒྱལ་རྫོང་ ཐོག་ཚད་༢ ལུ་ མར་ཕབ་རྐྱབ་མི་དེ་ཡང་ མ་འོངས་པ་ལུ་ ས་ཡོམ་ས་སོགས་པའི་ རང་བཞིན་གྱི་རྐྱེན་ངན་ཚུ་ལས་ སྔོན་འགོག་འབད་ནིའི་དོན་ལུ་ཨིན་པས།

རྒྱ་གར་ལུ་ བི་རི་ཊེན་གྱི་གཞུང་ཚབ་ འབྲུག་རྒྱལ་ཁབ་ནང་ལྷོད་ཡོདཔ།

༢༦/༡༠/༢༠༡༢   ༉ ཁ་ཙ་ཉིན་མ་ རྒྱལ་ཡོངས་ཚོགས་ཁང་ནང་སྦེ་ རྒྱ་གར་ལུ་ བི་རི་ཊེན་གྱི་གཞུང་ཚབ་ སཱར་ ཇེམསི་ ཌེ་བིཌ་ བི་ཝཱན་གྱིས་ བསྟན་རྒྱས་བློན་པོ་ མཁའ་འགྲོ་དབང་ཕྱུག་མཆོག་དང་ མཇལ་ཕྲད་གནང་ཡོདཔ་ཨིན་པས།
གཞུང་ཚབ་ སཱར་ ཇེམསི་ ཌེ་བིཌ་ བི་ཝཱན་དང་ བསྟན་རྒྱས་བློན་པོ་ མཁའ་འགྲོ་དབང་ཕྱུག་མཆོག་ གསུང་གྲོས་གནང་གནང་པའི་བསྒང་།

སའི་ཇོ་བདག་ལ་ལུ་གཅིག་ལུ་ ཁྱིམ་རྐྱབ་ཆོག་པའི་གནང་བ་སྤྲོད་ཡོདཔ།

༢༦/༡༠/༢༠༡༢   ༉ བཀྲ་ཤིས་གཡང་རྩེ་ ཁྲོམ་རྒྱ་བསྐྱེད་ཀྱི་དོན་ལུ་ སའི་ཇོ་བདག་ཚུ་གིས་ ལོ་ངོ་༢ དེ་ཅིག་བསྒུགས་སྡོད་པའི་ཤུལ་ལུ་ ད་རེས་འབདཝ་ད་ ཁྲོམ་རྒྱ་བསྐྱེད་ས་ཁོངས་ནང་ ཁྱིམ་རྐྱབ་ནིའི་གནང་བ་བྱིན་ཡོདཔ་ཨིན་པས།

རེ་ས་གཡུས་ཚན་ནང་ ཚོང་ཁང་ཕུད་རྡོག་གཅིག་ལས་བརྒལ་མེདཔ།

༢༦/༡༠/༢༠༡༢   རེ་ས་ཚོང་ཁང་གིས་ ཉིནམ་རེ་ལུ་ འོང་འབབ་དངུལ་ཀྲམ་༥༠༠ ལས་༡,༠༠༠ གྱི་བར་ན་ བཟོ་ཚུགས་དོ་ཡོདཔ་ཨིན་པས།

༉ སྐྱེས་ལོ་༤༢ ལང་མི་ རིག་འཛིན་གྱིས་ ཁོ་རའི་མི་ཚེ་ནང་ བཟའ་ཚང་འཚོ་སྐྱོང་ ལེགས་ཤོམ་སྦེ་ འཐོབ་ཚུགས་པ་གིས་མ་ཚད་ ཁོ་རའི་ཨ་ལུ་༣ སྒེར་གྱི་སློབ་གྲྭ་ནང་བཙུགས་ནི་ལུ་ ད་ལྟོ་ཚུན་ ཟད་འགྲོའི་དཀའ་ངལ་སྦོམ་ཅིག་ མ་བྱུང་མི་དེ་ཡང་ རེ་ས་གཡུས་ཚན་ནང་ ཁོ་གིས་ལོ་༣ དེ་ཅིག་གི་ཧེ་མ་ལས་ ཚོང་ཁང་ཆུང་ཀུ་ཅིག་ བཙུགས་ཚུགས་མི་ལུ་བརྟེན་ཏེ་ཨིན་པས།
ཉེ་བར་མཁོ་བའི་ བཟའ་ཆས་ཚུ་ བཙོང་མི་རེ་ས་ཚོང་ཁང་།

ཨེ་ཤི་ཡན་གློག་བརྙན་དུས་སྟོན་ ད་རིས་མཇུག་བསྡུ་ནི།

༢༦/༡༠/༢༠༡༢   ༉ ཨམ་སྲུའི་ལྕོགས་གྲུབ་ཡར་བསྐྱེད་གཏང་ནིའི་ བརྗོད་དོན་ཐོག་ལུ་ ལྷོ་ཨེ་ཤི་ཡན་གློག་བརྙན་དུས་སྟོན་དེ་ རྒྱ་གར་གཱོ་ཝ་ལུ་སྦེ་ ཁ་ཙ་ སྤྱི་ཟླ་༡༠ པའི་ཚེས་༢༥ ལུ་ འགོ་བཙུགས་ནུག།

བཀང་ལུང་ལུ་ ལོ་བསྟར་ཕུར་པའི་སྒྲུབ་ཆེན་ གནང་པའི་བསྒང་ཡོདཔ།

༢༦/༡༠/༢༠༡༢   ༉ བཀྲིས་སྒང་ བཀང་ལུང་ཟངས་མདོག་དཔལ་རི་བཤད་གྲྭ་ནང་ རང་ཟླ་༩ པའི་ཚེས་༨ ལས་ འགོ་བཙུགས་ཏེ་ ལོ་བསྟར་ཕུར་པའི་སྒྲུབ་ཆེན་གནང་ནི་ འགོ་བཙུགས་ཡོདཔ་ཨིན་པས།
པད་ཚལ་གླིང་སྤྲུལ་སྐུ་ པདྨ་ཀུན་བཟང་བསྟན་འཛིན་རྒྱ་མཚོ་གིས་ དབུ་བཞུགས་ཐོག་ལས་ ཕུར་པའི་སྒྲུབ་ཆེན་གནང་པའི་བསྒང་།

སོ་ནམ་ལཱ་གི་ དྲག་ཤོས་ཐོན་མི་སློབ་གྲྭ་ཚུ་ལུ་ ངོས་ལེན་ལེགས་ཤོམ་བྱུང་དོ་ཡོདཔ།

༢༦/༡༠ཨ༢༠༡༢   ༉ དུས་ཅི་ རྒྱལ་ཁབ་ཀྱི་ སློབ་གྲྭ་༢༠ འི་ནང་གི་ སློབ་ཕྲུག་ཚུ་གིས་ སོ་ནམ་གྱི་ལཱ་འབད་ནི་དང་ སློབ་སྦྱོང་ རིག་རྩལ་ ཉམས་མྱོང་ཚུ་ཐོབ་ཡོདཔ་བཞིན་དུ་ སློབ་གྲྭ་ཁག་གིས་ འབྲེལ་གཏོགས་འབད་མི་ལས་ དྲག་ཤོས་དེ་ རྟེན་འབྲུ་འབྲིང་རིམ་སློབ་གྲྭ་གོང་མ་གིས་ ཐོན་ཡོདཔ་ཨིན་པས།

གནས་ཚུལ་མདོར་བསྡུས།

༢༥/༡༠/༢༠༡༢
༉ ཁ་ཙ་ རྒྱལ་འཛིན་རང་བཞིན་སྲུང་སྐྱོབ་ཚོགས་སྡེ་གཞི་བཙུགས་འབད་དེ་ མི་ལོ་༢༥ འཁོར་བའི་ དུས་སྟོན་བརྩི་སྲུང་དང་འབྲེལ་ ཚོགས་སྡེའི་སྐྱབས་འཛིན་ མི་དབང་རྒྱལ་བཙུན་ རྗེ་བཙུན་པདྨ་དབང་ཕྱུག་མཆོག་གིས་ ཡིག་ཚང་གསརཔ་གི་ སྒྲིང་ཁྱིམ་དང་ འཇིགས་མེད་གེ་སར་མཐའ་འཁོར་གནས་སྟངས་ཐོན་སྐྱེད་ལྟེ་བ་ སྒོ་འབྱེད་གནང་ཡོདཔ་ད་ དེ་བསྒང་ ལྷན་རྒྱས་གཞུང་ཚོགས་ཀྱི་ བློན་པོ་དང་ ཕྱི་འབྲེལ་དོན་གཅོདཔ་སྐུ་ཚབ་ གཞུང་གི་ཆེ་མཐོའི་འགོ་དཔོན་ཚུ་དང་ གཞུང་མིན་ལས་ཚོགས་ཚུ་གི་ འཐུས་མི་ཚུ་གིས་ བཅའ་མར་གཏོགས་ཡོདཔ་ཨིན་པས།
རྒྱལ་འཛིན་རང་བཞིན་སྲུང་སྐྱོབ་ཚོགས་སྡེ་དེ་ སྤྱི་ལོ་༡༩༨༧ ལུ་ གཞུང་མིན་ལས་ཚོགས་སྦེ་ གཞི་བཙུགས་འབད་ཞིནམ་ལས་ཚུར་ འབྲུག་ལུ་ མཐའ་འཁོར་གནས་སྟངས་ཉམས་སྲུང་གི་དོན་ལུ་ གཙོ་བོར་བཏོན་ཏེ་ ལཱ་འབད་ཡོདཔ་ད་ སྤྱི་ལོ་༡༩༩༩ ལུ་ མི་དབང་མངའ་བདག་རིན་པོ་ཆེ་མཆོག་ བརྒྱུད་འཛིན་རྒྱལ་སྲས་སྦེ་བཞུགསཔ་ད་ ཚོགས་སྡེའི་སྐྱབས་འཛིན་གྱི་ ཕྱག་འགན་བཞེས་གནང་ཡོད་པའི་གནས་ཚུལ།

དགེ་ལེགས་ཕུག་ལུ་ རྫས་བམ་གས་པའི་ཤུལ་ལུ་ སྲུང་སྐྱོབ་སྒྲིང་སྒྲིང་བཙུགས་ཡོདཔ།

༢༥/༡༠/༢༠༡༢   ༉ སྤྱི་ཟླ་༡༠ པའི་ཚེས་༢༣ གྱི་ནུབ་ཕྱེད་ཆུ་ཚོད་༡༢ ལུ་ དགེ་ལེགས་ཕུག་ནང་འཁོད་གནམ་ཐང་གི་ སྦོ་ལོགས་ཁར་ གས་རྫས་ཅིག་ གས་པའི་ཤུལ་ལུ་ དགེ་ལེགས་ཕུག་ལུ་ སྲུང་སྐྱོབ་སྒྲིང་སྒྲིང་བཙུགས་ཡོདཔ་ཨིན་པས།

མི་ས་ཡ་ལས་བཅད་དེ་ ཤི་རྐྱེན་འབྱུང་ཉེན།

༢༥/༡༠/༢༠༡༢   ༉ འགྲོ་བ་མི་དང་འབྲེལ་བའི་ དཀའ་ངལ་གྱི་གནས་སྟངས་ཚུ་ནང་ དོན་སྨིན་ཅན་གྱི་ གྲོགས་རམ་འབད་མི་ཚོགས་པ་ཅིག་ཨིན་མི་ རྒྱལ་སྤྱིའི་གཞུང་མིན་ལས་ཚོགས་ ཌཱ་རཱ་གིས་ འཕྲལ་ཁམས་གསལ་སྟོན་འབད་མི་ སྙན་ཞུ་ཅིག་དང་འཁྲིལཝ་ད་ བཙོག་རླུང་ཡར་སེང་ལུ་བརྟེན་ ཚ་དྲོད་ཡར་སེང་འགྱོ་དོ་ཡོད་མི་དེ་གིས་ གོང་འཕེལ་འགྱོ་བའི་བསྒང་ཡོད་མི་ རྒྱལ་ཁབ་ཚུ་ལུ་ རྒྱ་ཆེ་དྲགས་སྦེ་ར་ གནོད་ཉེན་བྱུང་ནིའི་ འོས་འབབ་འདུག་ཟེར་ཨིན་པས།

བྱང་སྟོར་ཤོར་མི་ གླ་འཁོར་དེད་གཡོགཔ་གི་སྐོར་ལས་ ལོ་རྒྱུས་མེདཔ།

༢༥/༡༠/༢༠༡༢   ས་མཚམས་ཕྱི་ཁའི་ མི་ཚུ་གིས་ བཙན་ཁྲིད་འབད་བའི་ དོགས་སྣང་ཡོདཔ་ཨིན་པས།
༉ སྤྱི་ཟླ་༡༠ པའི་ཚེས་༢༢ ཀྱི་ ཕྱི་རུ་ཁམས་ཅིག་ཁར་ དགེ་ལེགས་ཕུག་དང་ གསར་སྤང་གི་ གཞུང་ལམ་བར་ན་ འགྲོ་འགྲུལ་འབདཝ་ད་ གར་སོང་མེད་པར་ བྱང་སྟོར་ཤོར་མི་ སྐྱེས་ལོ་༣༧ ལང་མི་ གླ་འཁོར་དེད་གཡོགཔ་དེ་ ཁ་ཙ་ཕྱི་རུ་ཚུན་ཚོད་ འཚོལ་ཐོབ་པའི་ ལོ་རྒྱུས་མེདཔ་ཨིན་པས།

ཧིན་དུའི་མི་སྡེ་གིས་ ད་ཤྭ་ཡན་དུས་སྟོན་བརྩི་སྲུང་།

༢༥/༡༠/༢༠༡༢    ༉ ཐིམ་ཕུ་ལུ་ དུར་ག་མན་ཌིར་ཟེར་མི་ ཧིན་དུའི་ལྷ་ཁང་ནང་ པཎ་ཌི་ཏ་པུཤ་པ་ལཱལ་ ནི་རོ་ལ་གིས་ འགོ་ཁྲིད་ཐོག་ ཧིན་དུའི་ཆོསཔ་༧ འབད་མི་ སྡེ་ཚན་ཅིག་གིས་ སྤྱི་ཟླ་༡༠ པའི་ཚེས་༡༦ ལས་འགོ་བཙུགས་ཏེ་ ཉིན་གྲངས་༩ གི་རིང་ དུར་གཱ་པུ་ཇ་ཟེར་ ལྷ་མོ་དུར་ག་འམ་ ལྷ་མོ་རྫོང་གཉན་མའི་ བསྙེན་སྒྲུབ་གནང་མི་དེ་ སྤྱི་ཟླ་༡༠ པའི་ཚེས་༢༣ ལུ་ གྲོལ་བའི་ཤུལ་ལུ་ ཁ་ཙ་ ཧིན་དུའི་མི་སྡེ་གིས་ ཊི་ཀ་སྦྱར་ནི་གི་ རྟེན་འབྲེལ་བརྩི་སྲུང་འབད་ཡི།
རྩི་རང་ལུ་ དུར་གཱ་པུ་ཇ་འམ་ ལྷ་མོ་རྫོང་གཉན་མའི་ བསྙེན་སྒྲུབ་ཉིན་གྲངས་༣ གྱི་རིང་གནང་པའི་ཤུལ་ལས་ ཁ་ཙ་ རྫོང་བདག་ངག་དབང་དཔལམོ་གིས་ པཎ་ཌི་ཏ་ལུ་ ཊི་ཀ་སྦྱར་བའི་བསྒང་།
ཐིམ་ཕུ་ལུ་ པཎ་ཌི་ཏ་གིས་ བཟའ་ཚང་ཅིག་ལུ་ ཞོ་དང་ཆུམ་སླ་བསྲེས་ཏེ་བཟོ་མི་ ཊི་ཀ་སྦྱར་བའི་བསྒང་།

ལཱ་གཡོག་ལུ་ བརྩི་མཐོང་བསྐྱེད་དགོ་པའི་ དངོས་མཐོང་འགྲེམ་སྟོན།

༢༥/༡༠/༢༠༡༢   མི་སྡེ་དང་འབྲེལ་བའི་དཀའ་ངལ་ཚུ་ བསལ་དགོ་པ་ཅིན་ དངོས་མཐོང་འགྲེམ་སྟོན་ཐོག་ལས་ གོ་བ་བརྡ་སྤྲོད་འབད་དགོཔ་ ཁག་ཆེ་ཟེར་ཨིན་པས།

༉ སྤྱི་ཟླ་༡༠ པའི་ཚེས་༢༣ ལུ་ ཐིམ་ཕུའི་ན་གཞོན་༨༠ དེ་ཅིག་གིས་ ཁས་བླངས་ཐོག་ལས་ ཚོས་གཞི་ལྕང་ཁ་འབད་མི་ ཞྭམོ་དང་ དོརམ་ ཁེན་འཇར་ དེ་ལས་ ཆུ་ལྷམ་ཚུ་ བཙུགས་ཐོག་ལས་ ཐིམ་ཕུ་ཁྲོམ་གྱི་ ཆུ་གཡུར་ཚུ་ནང་ ཕྱགས་སྙིགས་དང་ རག་རོག་ ག་ལྷོད་བཀོག་བཞག་མི་ཚུ་ བསྡུ་བསྒྱོམ་འབད་ཡོདཔ་ད་ དེ་ཡང་ ལཱ་གཡོག་ལུ་ བརྩི་མཐོང་བསྐྱེད་དགོ་པའི་ དངོས་མཐོང་འགྲེམ་སྟོན་འབདཝ་ཨིན་པས།
ན་གཞོན་༨༠ དེ་ཅིག་གིས་ ཐིམ་ཕུ་ཁྲོམ་གྱི་ ཆུ་གཡུར་ཚུ་ནང་ ག་ལྷོད་བཀོག་མི་ ཕྱགས་སྙིགས་རག་རོ་ཚུ་ བསྡུ་བསྒྱོམ་འབད་བའི་བསྒང་།

གནས་ཚུལ་མདོར་བསྡུས།

༢༥/༡༠/༢༠༡༢
གཞལམ་སྒང་རྫོང་ཁག་གི་ ནགས་ཚལ་གླིང་འཛིན་པ་ བཀྲིས་དོན་གྲུབ་ཀྱིས་ ནང་སྐོར་རྒེད་འོག་ སྐྱིད་མཁར་གཡུས་ཚན་ནང་ ཨོ་རེན་ཊཱལ་བེ་ཟེར་མི་ བྱ་འུག་པ་ཅིག་ མཐོང་མི་དེ་ འབྲུག་ལུ་ འུག་པའི་རིགས་གསརཔ་ཅིག་ཨིན་པའི་གནས་ཚུལ།

གནས་ཚུལ་མདོར་བསྡུས།

༢༥/༡༠/༢༠༡༢
ཁ་ཙ་ བྱ་དཀར་ཚེས་བཅུ་ཉིནམ་༣ པའི་ནང་ ཚེས་བཅུ་མཇལ་མི་ཚུ་གིས་ གུ་རུ་མཚན་བརྒྱད་ལས་ ཕྱག་དབང་ཞུ་ཡོདཔ་བཞིན་དུ་ ད་རིས་དྲོ་པ་ གུ་རུའི་མཐོང་གྲོལ་དཔྱངས་ཐོག་ལས་ ཚེས་བཅུ་འགྲོལ་གནང་ནི་ཨིན་པའི་གནས་ཚུལ།
 

ཨར་རྐུན་འབད་མི་བཟའ་ཚང་༢ ཁྲིམས་སྲུང་འགག་པའི་ དོ་དམ་འོག་ལུ་ར་ཡོདཔ།

༢༥/༡༠/༢༠༡༢   ༉ སྤྱི་ཟླ་༡༠ པའི་ཚེས་༡༧ གྱི་ཕྱི་རུ་ ཐིམ་ཕུ་ཁྲོམ་གྱི་ འབྲུག་ཤོ་པིང་ཀམ་པེ་ལེགསི་སྒྲིང་ཁྱིམ་གྱི་ ཚོང་ཁང་ནང་ལས་ ཅ་ཆས་ཨརཝ་རྐུ་མི་བཟའ་ཚང་གཉིསཔ་དེ་ བདུན་ཕྲག་ལང་སོ་རུང་ ད་ལྟོ་ཡང་ ཞིབ་དཔྱད་འབད་བའི་བསྒང་ཡོདཔ་ཨིན་པས།

གནས་ཚུལ་མདོར་བསྡུས།

༢༤/༡༠/༢༠༡༢
ཁ་ཙ་ མི་དབང་མངའ་བདག་རིན་པོ་ཆེ་མཆོག་གིས་ རྒྱ་གར་ལུ་ ཨེ་མི་རི་ཀའི་གཞུང་ཚབ་ ཨམ་ནཱན་སི་ ཇེ་ པོ་ཝཱེལ་དང་ མཇལ་ཕྲད་གནང་པའི་བསྒང་།

དབང་འདུས་ཆོས་གླིང་ཕོ་བྲང་གི་ ཡིག་ཆ་བསྡུ་སྒྲིག་དོན་ལུ་ མ་དངུལ་གྲོགས་རམ།

༢༤/༡༠/༢༠༡༢   མ་དངུལ་གྲོགས་རམ་ ཡུ་ཨེསི་ཌོ་ལར་༩༧,༧༨༦ འབྲུག་གཞི་ཚོགས་བརྒྱུད་དེ་ བགོ་བཀྲམ་འབད་ནི།
༉ དུས་རབས་༡༩ པའི་ དབང་འདུས་ཆོས་གླིང་ཕོ་བྲང་གི་ ཡིག་ཆ་བསྡུ་སྒྲིག་འབད་ནི་དེ་ ཨེ་ཨེཕ་སི་པི་ཟེར་མི་ ཡུ་ཨེསི་གཞུང་ཚབ་ཀྱི་ ལམ་སྲོལ་ཉམས་སྲུང་མ་དངུལ་གྱི་ གྲོགས་རམ་ཐོག་ལས་ འཕྲལ་མགྱོགས་ར་ འགོ་བཙུགས་ཚུགས་པའི་ རེ་བ་ཡོདཔ་ད་ ཡིག་ཐོག་བཀོད་ནི་དེ་ ཕོ་བྲང་ཉམས་པ་སོར་ཆུད་ཐོག་ བདག་འཛིན་འཐབ་ནི་གི་ ཐབས་ལམ་དང་པ་ཨིན་པས།
བུམ་ཐང་ལུ་ཡོད་མི་ དབང་འདུས་ཆོས་གླིང་ཕོ་བྲང་།

ཕོ་སྐྱེས་ཅིག་ལུ་ བཙོན་ཁྲིམས་ལོ་༦ བཀལ་ཡོདཔ།

༢༤/༡༠/༢༠༡༢   ༉ འདས་པའི་བདུན་ཕྲག་ནང་ དབང་འདུས་རྫོང་ཁག་ཁྲིམས་འདུན་གྱིས་ སྐྱེས་ལོ་༡༨ ལང་མི་ ཕོ་སྐྱེས་ཅིག་ལུ་ བཙོན་ཁྲིམས་ལོ་༦ བཀལ་ཡོདཔ་ད་ དེ་ཡང་ ཁོ་གིས་ སྐྱེས་ལོ་༦ ལང་མི་ བུམོ་ཅུང་ཅིག་ལུ་ དབང་བཙོང་ལུས་འབྲེལ་འབད་ནིའི་ དཔའ་བཅམ་མི་ལུ་བརྟེན་ཏེ་ཨིན་པས།

གནས་ཚུལ་མདོར་བསྡུས།

༢༤/༡༠/༢༠༡༢
ཁ་ཙ་ མི་དབང་མངའ་བདག་རིན་པོ་ཆེ་མཆོག་གིས་ རྒྱ་གར་གཞུང་གི་ ཕྱི་འབྲེལ་ལྷན་ཁག་(བྱང་ཕྱོགས) གི་ མཉམ་འབྲེལ་དྲུང་ཆེན་ ཨ་ཁི་ལེཤ་ མིཤ་ར་དང་ མཇལ་ཕྲད་གནང་པའི་བསྒང་།
 

ཡུ་ཨེསི་གཞུང་ཚབ་ཀྱིས་ སློབ་གྲྭ་དང་ ཁྲིམས་དོན་གཙུག་སྡེ་ལུ་ དཔེ་དེབ་གྲོགས་རམ།

༢༤/༡༠/༢༠༡༢   ༉ འབྲུག་རྒྱལ་ཁབ་ནང་ གཞུང་དོན་ལྟ་སྐོར་ལུ་ ལྷོད་ཡོད་མི་ རྒྱ་གར་ལུ་ ཨེ་མི་རི་ཀའི་གཞུང་ཚབ་ ཨམ་ནཱན་སི་ ཇེ་ པོ་ཝེལ་གྱིས་ ཁ་ཙ་ ཐིམ་ཕུ་ལྕང་ཟམ་ཏོག་འབྲིང་རིམ་སློབ་གྲྭ་འོག་མ་ལུ་ ཨེ་མི་རི་ཀའི་ ཨ་ལུའི་དཔེ་དེབ་ཆ་ཚང་ཅིག་དང་ འབྲུག་རྒྱལ་ཡོངས་ཁྲིམས་དོན་གཙུག་སྡེ་ལུ་ ཁྲིམས་ཀྱི་དཔེ་དེབ་ཆ་ཚང་ཅིག་ ཞལ་འདེབས་སྦེ་བྱིན་ཡི།
ཨེ་མི་རི་ཀའི་གཞུང་ཚབ་ ཨམ་ནཱན་སི་ ཇེ་ པོ་ཝེལ་གྱིས་ ཐིམ་ཕུ་ལྕང་ཟམ་ཏོག་འབྲིང་རིམ་སློབ་གྲྭ་འོག་མའི་ སློབ་ཕྲུག་སྡེ་ཚན་ཅིག་ལུ་ ཨ་ལུའི་དཔེ་དེབ་ཅིག་ལྷག་སྟེ་ གསལ་བཤད་འབད་བའི་བསྒང་།

ད་རུང་ བཟོ་སྐྲུན་ས་ཁོངས་ཅིག་ནང་ ལས་མི་༡ ལུ་ རྐྱེན་ངན་བྱུང་ཡོདཔ།

༢༤/༡༠/༢༠༡༢   ༉ འཕྲལ་ཁམས་ཅིག་ཁར་ སྐྱེས་ལོ་༤༠ ལང་མི་ རྒྱ་གར་གྱི་ལས་མི་ཅིག་ ཐིམ་ཕུ་ལུང་བསྟན་ཕུག་གནམ་ཐང་གི་ལྟག་ལུ་ ད་ལྟོ་ བཟོ་སྐྲུན་འབད་བའི་བསྒང་ཡོད་མི་ སྒྲིང་ཁྱིམ་ཐོག་ཚད་༤ འབད་མི་ཅིག་གི་གུ་ལས་ འགྱེལ་ཏ་རྐྱབ་སྟེ་ རྦོབ་རིལ་མི་ལུ་བརྟེན་ གཟུགས་ཀྱི་ཡན་ལག་ ལེ་ཤ་ཅིག་ལུ་ གནོད་སྐྱོན་བྱུང་ཡོདཔ་ཨིན་པས།

སྣུམ་འཁོར་ལུ་བརྟེན་པའི་འོང་འབབ་ ཡར་སེང་སོང་ཡོདཔ།

༢༤/༡༠/༢༠༡༢    དེ་འབདཝ་ད་ སྣུམ་འཁོར་གྱི་གྱངས་ཁ་ ཡར་སེང་འགྱོཝ་དང་བསྟུན་ མཐའ་འཁོར་གནས་སྟངས་སྲུང་སྐྱོབ་ལུ་ དོ་འགྲན་བྱུང་བའི་ སྙན་ཞུ་ཁ་གསལ་ཅིག་ ད་ཚུན་མེདཔ་ཨིན་པས།

༉ འདས་པའི་འཆར་ལོ་ སྤྱི་ལོ་༢༠༡༡ ཟླ་༦ པ་ལས་ འགོ་བཙུགས་ དུས་ཅི་ སྤྱི་ཟླ་༦ པ་ཚུན་གྱི་རིང་ལུ་ ལམ་འགྲུལ་ཉེན་སྲུང་དང་སྐྱེལ་འདྲེན་དབང་འཛིན་གྱིས་ འོང་འབབ་དངུལ་ཀྲམ་ས་ཡ་༢༧༣.༣༩ ལྷགཔ་ཅིག་ བཟོ་ཡོད་མི་དེ་ འཆར་ལོ་༢༠༡༠ དང་༢༠༡༡ ལུ་ བཟོ་ཡོད་མི་འོང་འབབ་ལས་ བརྒྱ་ཆ་༡༥.༩༢ ཀྱིས་ ཡར་སེང་སོང་ཡོདཔ་སྦེ་ དབང་འཛིན་གྱི་ ལོ་བསྟར་སྙན་ཞུའི་ནང་བཀོད་ནུག།

གནས་ཚུལ་མདོར་བསྡུས།



༢༣/༡༠/༢༠༡༢ལུང་ནག་ནང་ལུ་ ཐོར་ཐོ་མི་གངས་མཚོའི་ ཆུའི་གནས་ཚད་མར་ཕབ་ལས་འགུལ་དེ་ མཇུག་བསྡུ་མི་དང་བསྟུན་ ཟླཝ་འདི་ནང་ མཚོ་དེ་གི་ ཆུའི་གནས་ཚད་མི་ཊར་༥ མར་ཕབ་འབད་ཡོདཔ་ད་ ཐོར་ཐོ་མི་མཚོ་དེ་ རྦད་འགྱོ་ནི་གི་ ཉེན་ཁ་སྦོམ་ཡོད་པའི་ ངོས་འཛིན་བྱུང་པའི་ཤུལ་ལུ་ ཁྱེགས་མཚོའི་གནོད་ཉེན་མར་ཕབ་ལས་འགུལ་དེ་ སྤྱི་ལོ་༢༠༠༨ ལུ་ འགོ་བཙུགས་ཡོད་རུང་ ས་དང་ཆུ་བཏོན་བཀོ་ནིའི་ལཱ་ཚུ་ སྤྱི་ལོ་༢༠༠༩ ལས་རྐྱངམ་གཅིག་ འགོ་བཙུགས་ཚུགས་ཡོདཔ་ཨིན་པས།
ཆུའི་གནས་ཚད་མར་ཕབ་ཀྱི་ ལཱ་འབད་མི་ ལས་མི་ལངམ་མེད་མི་ལུ་བརྟེན་ འབྲུག་གི་བསྟན་སྲུང་དམག་མི་༡༠༠ ལྷགཔ་ཅིག་གིས་ཆ་རོགས་འབད་ཡོདཔ་ད་ ལཱ་དེ་ཡང་ ས་གཏེར་ལས་ཁུངས་ཀྱིས་ འཛམ་གླིང་སྤྱི་ཚོགས་གོང་འཕེལ་ལས་རིམ་དང་ ཨཱསི་ཊི་ཡཱན་གོང་འཕེལ་ལས་འཛིན་ འཛམ་གླིང་རི་དྭགས་སྲུང་སྐྱོབ་མ་དངུལ་ འབྲུག་གཞུང་ཚུ་ལས་ མ་དངུལ་ས་ཡ་༡༣༠ གི་གྲོགས་རམ་ཐོག་ལས་ འགོ་འདྲེན་འཐབ་ཡོད་པའི་གནས་ཚུལ།

གཅན་གཟན་སྟག་ཉམས་སྲུང་གི་ བློན་པོའི་ཞལ་འཛོམས་ཐེངས་༢ པ་ ད་རིས་མཇུག་བསྡུ་ནི།

༢༣/༡༠/༢༠༡༢    ༉ ཁ་ཙ་ ཐིམ་ཕུ་ལུ་ གཅན་གཟན་སྟག་ཉམས་སྲུང་གི་དོན་ལུ་ ཨེ་ཤི་ཡ་ལུང་ཕྱོགས་རྒྱལ་ཁབ་ཚུ་གི་ བློན་པོའི་ཞལ་འཛོམས་འཚོགས་མིའི་ནང་ གཅན་གཟན་སྟག་ཡོད་མི་ རྒྱལ་ཁབ་༡༣ དེ་ཅིག་གིས་ ནངས་པ་ལས་ བློན་པོ་དང་ ཆེ་མཐོའི་འགོ་དཔོན་ཚུ་གིས་ གྲལ་གཏོགས་ཐོག་ རྒྱལ་ཁབ་སོ་སོའི་ སྟག་ཉམས་སྲུང་གི་ ལས་རིམ་སྙན་ཞུ་ཚུ་ ཕུལ་ཐོག་ལས་ གྲོས་བསྡུར་འབད་ཡི།
ཨེ་ཤི་ཡ་ལུང་ཕྱོགས་རྒྱལ་ཁབ་ཚུ་གི་ བློན་པོ་ཚུ་ གྲོས་འཛོམས་འཚོགས་པའི་བསྒང་།

འབྲུག་དང་ སིང་ག་པོར་གྱི་བར་ན་ བརྡ་དོན་འཕྲུལ་རིག་གི་ ཆིངས་ཡིག་བཀོད་ཡོདཔ།

༢༣/༡༠/༢༠༡༢   ༉ ཁ་ཙ་ ཐིམ་ཕུ་ན་གཞོན་དཔལ་རི་གི་ ཞལ་འཛོམས་ཁང་ནང་སྦེ་ འབྲུག་དང་ སིང་ག་པོར་རྒྱལ་ཁབ་༢ ཀྱི་བར་ན་ བརྡ་དོན་འཕྲུལ་རིག་གི་ ཆིངས་ཡིག་ཅིག་བཟོ་མིའི་གུ་ སིང་ག་པོར་བརྡ་དོན་གོང་འཕེལ་ལས་ཁུངས་ཀྱི་ བཀོད་ཁྱབ་འགོ་དཔོན་གཙོ་འཛིན་ རོ་ནི་ཏེ་དང་ འབྲུག་གི་ བརྡ་དོན་དང་བརྒྱུད་འབྲེལ་ལྷན་ཁག་གི་དྲུང་ཆེན་ དྲགོས་ཀུན་ལེགས་རྡོ་རྗེ་༢ ཀྱིས་ མཚན་རྟགས་བཀོད་གནང་ཡི།
སིང་ག་པོར་བརྡ་དོན་གོང་འཕེལ་ལས་ཁུངས་ཀྱི་ བཀོད་ཁྱབ་འགོ་དཔོན་གཙོ་འཛིན་ རོ་ནི་ཏེ་དང་ བརྡ་དོན་དང་བརྒྱུད་འབྲེལ་ལྷན་ཁག་གི་དྲུང་ཆེན་ དྲགོས་ཀུན་ལེགས་རྡོ་རྗེ་༢ ཀྱིས་ མཚན་རྟགས་བཀོད་པའི་བསྒང་།

ད་རུང་ ཞལ་འདེབས་ཁ་སྐོང་ ཡུ་ཨེསི་ཌོ་ལར་༡༠,༠༠༠ ཕུལ་ཡོདཔ།

༢༣/༡༠/༢༠༡༢    ༉ ཁ་ཙ་ རྒྱལ་ཡོངས་ཚོགས་ཁང་ནང་སྦེ་ ཇ་པཱན་ལུ་ ཡོ་ཀོ་ཧ་མ་དང་ འབྲུག་མཐུན་འབྲེལ་ཚོགས་པའི་ ཁྲི་འཛིན་འོག་མ་ ཨམ་ཡུ་ཀོ་ཀི་ མི་ཡ་ཛ་ཝ་གིས་ བློན་ཆེན་གྱི་འགན་འཛིན་པ་ ཞབས་ཏོག་བློན་པོ་ ཡེ་ཤེས་སྦྱིན་པ་ལུ་ དབང་འདུས་ཕོ་བྲང་རྫོང་ བསྐྱར་བཞེངས་ཀྱི་དོན་ལུ་ ཞལ་འདེབས་ཁ་སྐོང་ ཡུ་ཨེསི་ཌོ་ལར་༡༠,༠༠༠ ཕུལ་ཡོདཔ་ཨིན་པས།
ཨམ་ཡུ་ཀོ་ཀི་ མི་ཡ་ཛ་ཝ་གིས་ བློན་ཆེན་གྱི་འགན་འཛིན་པ་ ཞབས་ཏོག་བློན་པོ་ ཡེ་ཤེས་སྦྱིན་པ་ལུ་ དབང་རྫོང་བསྐྱར་བཞེངས་ཀྱི་ ཞལ་འདེབས་ཁ་སྐོང་ ཕུལ་བའི་བསྒང་།

སྣུམ་འཁོར་རྦོལ་རིལ་བའི་རྐྱེན་ངན་ནང་ འགྲུལ་པ་༢ ཆ་ར་ལུ་ཤི་རྐྱེན།

༢༣/༡༠/༢༠༡༢     སྣུམ་འཁོར་ཤུགས་ཚད་ལས་བརྒལ་བཏང་པའི་ དོགས་པ་ཡོདཔ།

༉ རེས་གཟའ་ཟླ་བའི་ཕྱི་རུ་ རྩི་རང་དང་ དབང་འདུས་ཕོ་བྲང་གི་ གཞུང་ལམ་ཁར་ སྣུམ་འཁོར་ཨཱལ་ཊོ་ཀཱར་ཅིག་ ལམ་འོག་ལས་མར་ མི་ཊར་༡༠༠ དེ་ཅིག་གི་ས་ཁར་ རྦོབ་རིལ་ཡར་སོཔ་ལས་ སྐྱེས་ལོ་༢༣ དང་༢༦ ལང་མི་ ཕོ་སྐྱེས་༢ ཁ་འཐུམ་མར་ བསད་ཡོདཔ་ཨིན་པས།

སློབ་ཕྲུག་ཅིག་ བྱང་སྟོར་ཤོར་ཡོདཔ།

༢༣/༡༠/༢༠༡༢    ༉ ཁ་ཙ་ དྲོ་པ་ལས་ སྐྱེས་ལོ་༢༡ ལང་མི་ སློབ་རིམ་༡༢ པའི་སློབ་ཕྲུག་ཅིག་ འཇིགས་མེད་ཆོས་གླིང་རྒེད་འོག་ལུ་ ཁོ་རའི་ ཁྱིམ་ནང་ལས་ གར་སོང་མེད་པར་ བྱང་དཔ་ཨིན་པས།

ནུབ་སྦིས་རྒེད་འོག་ལུ་ སྟག་གིས་ ནོར་བསད་པའི་འུར་བྱེལ་མེདཔ།

༢༣/༡༠/༢༠༡༢    ༉ ཀྲོང་གསར་རྫོང་ཁག་ ནུབ་སྦིས་རྒེད་འོག་གི་ གཡུས་ཚན་ཚུ་ནང་ སྒོ་ནོར་སེམས་ཅན་མང་རབས་ཅིག་ལུ་ གནོད་སྐྱོན་དང་ བསད་མི་ གཅན་གཟན་སྟག་གི་སྐོར་ལས་ ཉོགས་བཤད་བཀོད་མི་ མ་ཐོན་པར་ བདུན་ཕྲག་གསུམ་དེ་ཅིག་ ཡར་སོ་རུང་ མི་སེར་ཚུ་ སེམས་སྡུག་ཐོག་ལུ་ སྡོད་དོ་ཡོདཔ་ཨིན་པས།
གཅན་གཟན་སྟག་ལས་སྲུང་ནིའི་དོན་ལུ་ གཞུང་ལམ་བདའ་སྟེ་ནོར་འཚོ་སྡོད་མི།

རེ་ས་ལྷ་ཁང་གསར་བསྒྲུབས་ཀྱིས་ གཡུས་མི་ཚུ་ལུ་ ཕན་ཁྱད་སྦོམ་བྱུང་ཡོདཔ།

༢༣/༡༠/༢༠༡༢    སྤྱི་ལོ་༢༠༠༨ ལུ་ ལྷ་ཁང་གསར་བཞེངས་ཀྱི་ ལཱ་འགོ་བཙུགས་མི་ ཐོག་ཚད་༡ འབད་མི་ རེ་ས་ལྷ་ཁང་དེ་ལུ་ ཟད་འགྲོ་དངུལ་ཀྲམ་འབུམ་༢༠ ལྷགཔ་ཅིག་ གནས་ཡོདཔ་ཨིན་པས།

༉ མོང་སྒར་རྫོང་ཁག་ ས་གླིང་རྒེད་འོག་ རེ་ས་གཡུས་ཚན་གྱི་ མི་སེར་ཚུ་གིས་ ད་ལས་ཕར་ ཧེ་མ་བཟུམ་སྦེ་ ཆོས་ཕྱོགས་ཀྱི་ལས་རིམ་ ག་ཅི་བཟུམ་ཅིག་ འགོ་འདྲེན་འཐབ་དགོ་རུང་ ཐང་ནང་ལུ་ གུར་སྤུབས་ཏེ་ འབད་དགོཔ་མི་ཐོན་ནི་ཨིན་མི་དེ་ཡང་ དུས་ཅི་ལས་ གཡུས་ཚན་དེ་ནང་ ལྷ་ཁང་གསརཔ་ཅིག་ ཕྱི་ནང་མེད་པར་ བསྒྲུབས་ཚུགས་མི་ལུ་བརྟེན་ཏེ་ཨིན་པས།
རྟེན་དང་བརྟེན་པ་བཅས་ གསར་བསྒྲུབས་འབད་མི་ རེ་ས་ལྷ་ཁང་།

འབྲུག་ཕུན་སུམ་ཚོགས་པའི་ ཁས་བླངས་འགྲུབ་ཚུགསཔ་འབད་ནི།

༢༣/༡/༢༠༡༢    ༉ གསོ་བའི་འགོ་དཔོན་ཚུ་གིས་ རྫོང་ཁག་སྨན་ཁང་རེའི་ནང་ ཌོག་ཊར་༣ དེ་རེ་ དགོཔ་མེད་པའི་ཁར་ དམིགས་ཡུལ་འགྲུབ་ཚུགས་པར་ ལཱ་ཁག་འོང་ཟེར་ སླབ་ཨིན་རུང་ གསོ་བའི་བློན་པོ་ བཟང་ལེགས་འབྲུག་པ་གིས་འབད་བ་ཅིན་ སང་ཕོད་ འབྲུག་ཕུན་སུམ་ཚོགས་པའི་ གནས་ཡུན་ཚངམ་ད་ ཧེ་མར་ བསྐུལ་བསྒྲགས་སྐབས་ ཁས་བླངས་འབད་མི་དེ་ འགྲུབ་ཚུགས་འོང་ཟེར་ཨིན་པས།

གནས་ཚུལ་མདོར་བསྡུས།

༢༢/༡༠/༢༠༡༢། ཁ་ཙ་ ཐིམ་ཕུ་ དབྱངས་ཅན་ཕུ་འབྲིང་རིམ་སློབ་གྲྭ་གོང་མའི་ རྩེད་ཐང་ནང་སྦེ་ སྔ་འགྱུར་བསྟན་པའི་ཤིང་རྟ་ཆེན་པོ་ གྲུབ་དབང་ནམ་མཁའི་སྙིང་པོ་རིན་པོ་ཆེ་མཆོག་གིས་ དད་ཅན་སྐྱ་སེར་ ཁྲི་ཕྲག་ལས་བཅད་དེ་ སྤུངས་འཛོམས་འབད་མི་ཚུ་ལུ་ ཚེ་སྒྲུབ་ལྕགས་ཀྱི་སྡོང་པོའི་ ཚེ་དབང་གནངམ་དང་འབྲེལ་ སྐྱབས་འགྲོ་ལས་འགོ་བཟུང་སྟེ་ འཇམ་དཔལ་དབྱངས་དང་ ཕྱག་ན་རྡོ་རྗེ་ སྤྱན་རས་གཟིགས་ མགོན་པོ་ཚེ་དཔག་མེད་ སྟོན་པ་ཤཱཀྱ་ཐུབ་པ་ སངས་རྒྱས་སྨན་ལྷ་ ཨྱོན་གུ་རུ་ སྒྲོལ་མ་ལ་སོགས་པའི་ གཟུངས་སྔགས་ཀྱི་ལུང་ཚུ་ ཡོངས་རྫོགས་གནང་ཡོད་པའི་གནས་ཚུལ།

མི་སེར་དམངས་གཙོ་ཚོགས་པའི་ལཱ་ཚུ་ ལེགས་ཤོམ་འགྱོ་དོ་ཡོདཔ།

༢༢/༡༠/༢༠༡༢   ༉ འབྲུག་གི་བཙག་འཐུ་ལྷན་ཚོགས་ཀྱིས་ ཐོ་བཀོད་ཅན་གྱི་ སྲིད་དོན་ཚོགས་པ་ཅིག་ཨིནམ་སྦེ་ ཁྲིམས་མཐུན་ངོས་ལེན་གྲུབ་སྟེ་ ཟླཝ་༢ དེ་ཅིག་ མ་ལངམ་ལས་ར་ མི་སེར་དམངས་གཙོ་ཚོགས་པ་གིས་ སང་ཕོད་ཀྱི་ བཙག་འཐུའི་ནང་ དོ་འགྲན་འབད་ནིའི་དོན་ལུ་ ཧ་ལམ་ གྲ་སྒྲིག་འགྱོ་དོ་ཡོདཔ་ཨིན་པས།
ལྡོག་ཕྱོགས་འགོ་ཁྲིདཔ་ཚེ་རིང་སྟོབས་རྒྱས།

སྲིད་ཚོགས་ནང་ དང་འདོད་ཡོད་རུང་ འགན་འཁྲི་ཕོག་མི་ལུ་བརྟེན་ བྱ་སྟབས་མ་བདེཝ།

༢༢/༡༠/༢༠༡༢   ༉ འབྲུག་གི་སྲིད་ཚོགས་ཚུ་གི་དོན་ལུ་ འོས་འབབ་ཅན་གྱི་འདེམས་ངོ་ཚུ་ འཐོབ་ཚུགས་པ་ཅིན་ ཞི་གཡོག་ནང་ལས་མ་གཏོགས་ མེདཔ་ཨིན་རུང་ ཞི་གཡོག་ནང་ལས་ རང་གིས་དགའ་མི་དེ་ ཐད་ཀར་དུ་ གདམ་འཐུ་འབད་ཆོག་པའི་ ངེས་བརྟན་མེདཔ་ཨིན་པས།

གནས་ཚུལ་མདོར་བསྡུས།



༢༢/༡༠/༢༠༡༢ ཁ་ཙ་ ཇ་པཱན་ཨོའི་ཊ་ པི་རི་ཕེག་ཅར་ལུ་ ཀུ་སུ་ཕུཊ་བཱོལ་སྡེ་ཚན་དང་ སྐྱེས་ལོ་༡༤ མན་ཆད་འབད་མི་ འབྲུག་གི་ཕུཊ་བཱོལ་སྡེ་ཚན་གྱི་བར་ན་ མཐུན་འབྲེལ་རྩེད་འགྲན་ཅིག་ འགོ་འདྲེན་འཐབ་མི་དེ་ཡང་ ན་ཧིང་ ཇ་པཱན་ལུ་ ཆིབས་བསྐྱོད་གནང་མི་ མི་དབང་མངའ་བདག་རིན་པོ་ཆེ་མཆོག་དང་ རྒྱལ་བཙུན་རྣམ་གཉིས་ལུ་ གུས་བཏུད་ཞུ་ནིའི་དོན་ལུ་ཨིན་པས།
ཕུཊ་བཱོལ་གྱི་ མཐུན་འབྲེལ་རྩེད་འགྲན་དེ་ ཇ་པཱན་ཚོགས་ཁང་གི་ ཚོགས་དཔོན་འོག་མ་ སེའི་ཤི་རོ་ ཨི་ཏོ་དང་ ཁོ་གི་ཨམ་གྱིས་ འགོ་འདྲེན་འཐབ་ཡོདཔ་ད་ འབྲུག་གི་འཐུས་མི་སྡེ་ཚན་དེ་ ད་རིས་ ཇ་པཱན་ལས་ ལོག་འོང་དོ་ཡོད་པའི་གནས་ཚུལ། 

གཡུས་མི་ཚུ་གིས་ འགྲུལ་འཕྲིན་གྱི་མཐུན་རྐྱེན་ལུ་ དགའ་ཚོར་སྐྱེད་དོ་ཡོདཔ།

༢༢/༡༠/༢༠༡༢   ༉ ཀྲོང་གསར་བེམ་སྦྱིས་ལུ་ སོ་ནམ་ལཱ་འབད་མི་ རྡོ་རྗེ་དབང་འདུས་དེ་ ཁོ་རའི་ཞིང་ནང་ལཱ་འབད་སྡོད་པའི་བར་ན་ར་ ཁོ་གི་འགྲུལ་འཕྲིན་ནང་ལུ་ བརྒྱུད་འཕྲིན་ཅིག་ལྷོད་ཡོདཔ་ཨིན་པས།
འགྲུལ་འཕྲིན་བཏང་མི་དེ་ ཁོ་གི་ཁྱིམ་ཚང་གིས་ ཁོ་ལུ་ དྲོ་པའི་ཆུ་ཚོད་༨:༣༠ ལུ་ འཛོམས་འདུ་ནང་ཤོག་ཟེར་བའི་བརྡ་སླབ་མི་ཨིན་པས།


ཆུ་རག་གིས་འཐག་མི་ ཆུམ་བྲོཝ་དང་བཅུད་ཡོདཔ།

༢༢/༡༠/༢༠༡༢   ༉ རྩི་རང་རྫོང་ཁག་ སྤ་ཚར་གླིང་རྒེད་འོག་ སྤ་ཚར་གླིང་སྟོད་སྤྱི་འོག་གི་ མི་སེར་ཚུ་གིས་ ཁོང་རའི་གཡུས་ཁར་ ཐགམ་བརྡུང་ནི་གི་ འཕྲུལ་འཐག་ཡོད་རུང་ དང་ཕུ་བཟུམ་སྦེ་ ཆུ་རག་དེ་ར་ ལག་ལེན་འཐབ་དོ་ཡོད་པའི་ མངོན་གསལ་བྱུངམ་ཨིན་པས།
སྤ་ཚར་གླིང་ལུ་ ཆུ་ལུ་བརྟེན་པའི་ རང་ལུགས་ཀྱི་ ཐགམ་བརྡུང་ནིའི་ཆུ་རག་ ལག་ལེན་འཐབ་པའི་བསྒང་།


ཚེམ་སློབ་སྦྱོང་གིས་ འཚོ་སྐྱོང་ལུ་ ལྷན་ཐབས་འབད་ཚུགས་པའི་རེ་བ།

༢༢/༡༠/༢༠༡༢   བློན་ཆེན་གྱི་ འདེམས་ཁོངས་གོང་འཕེལ་མ་དངུལ་གྱི་ཐོག་ལས་ གཞི་བཙུགས་འབད་མི་ ལྟེ་བ་དེ་ ལག་ལེན་ཧྲིལ་བུ་མེད་པར་ལུས་ཡོདཔ།
 


༉ ན་ཧིང་ སྐྱེས་ལོ་༡༤ ལང་མི་ སངས་རྒྱས་བཟང་མོ་དེ་ སློབ་རིམ་༧ པ་ལས་ཐོན་ཏེ་ མོ་གི་ཁྱིམ་ནང་ ཨའི་ལུ་ ཆ་རོགས་འབད་མི་སྦེ་ སྡོད་ཡོདཔ་ཨིན་པས།
སངས་རྒྱས་བཟང་མོ་གིས་ སླབ་མིའི་ནང་ ཁྱིམ་ནང་ལཱ་འབད་མི་ ཨའི་མ་གཏོགས་ གཞན་ག་ཡང་མེདཔ་ལས་ མོ་ ཤེས་ཡོན་འཕྲོ་མཐུད་དེ་ ལྷབ་མ་ཚུགས་ཟེར་ཨིནམ་ད་ མོ་གི་ནུ་གཅུང་༢ དང་ ནུམོ་༡ ཡོད་མི་དེ་ཡང་ པདྨ་དགའ་ཚལ་ཤུ་མར་སློབ་གྲྭ་ཆུང་བའི་ནང་ དཔེ་ཆ་ལྷབ་དོ་ཡོདཔ་ཨིན་པས།


འབྲུག་གི་དོན་ལུ་ མིང་གཏམ་ཁྱབ་སྤེལ་གྱི་ གོ་སྐབས་བཟང་པོ་ཅིག་ཨིནམ།


འཛམ་གླིང་སྤྱི་ཚོགས་ཀྱི་ ཉེན་སྲུང་ལྷན་ཚོགས་ནང་ སྤྱི་ལོ་༢༠༡༣-༢༠༡༤ གི་དོན་ལུ་ གཏན་འཇགས་མིན་པའི་ འཐུས་མི་༥ བཙག་འཐུ་གྲུབ་ཡོདཔ།
༢༠/༡༠/༡༢། ༉ འབྲུག་འདི་ སྤྱི་ལོ་༢༠༡༣ དང་༢༠༡༤ གི་དོན་ལུ་ འཛམ་གླིང་སྤྱི་ཚོགས་ ཉེན་སྲུང་ལྷན་ཚོགས་ཀྱི་ གཏན་འཇགས་མིན་པའི་ འཐུས་མི་རྒྱལ་ཁབ་གྲངས་སུ་ བཙག་འཐུ་གྲུབ་མ་ཚུགས་རུང་ ཨེ་ཤི་ཡ་དང་ པེ་སི་ཕིག་སྡེ་ཚན་ལས་ འདོམས་ངོ་ཅིག་སྦེ་ བཅའ་མར་གཏོགས་ཚུགས་མི་དེ་ ཁ་རྗེ་ཅན་ཅིག་ཨིན་པས།

རི་དྭགས་སྲུང་སྐྱོབ་འབད་ནི་ལུ་ བརྩོན་ཤུགས།

༢༠/༡༠/༡༢། ༉ རི་དྭགས་སྲུང་སྐྱོབས་སྡེ་ཚན་གྱི་ ལོ་བསྟར་བཞིན་དུ་ཐོ་བཀོད་འབད་མི་ གནས་སྡུད་དང་འཁྲིལཝ་ད་ འབྲུག་གིས་ རི་དྭགས་ཉེན་སྲུང་གི་དོན་ལུ་ སོ་ནམ་ཞིང་པ་ཚུ་གི་ སྒོ་ནོར་སེམས་ཅན་ཚུ་ལུ་ གནོདཔ་བཀལ་མི་གིས་མ་ཚད་ དེ་དང་འབྲེལ་བའི་ རྒུད་འཐུས་མ་དངུལ་སྤྲོད་དགོ་པའི་ དོ་འགྲན་ཅན་གྱི་གནས་སྟངས་ཡང་ སྦོམ་སྦེ་ར་ བྱུང་དོ་ཡོད་པའི་ གསལ་སྟོན་འབདཝ་ཨིན་པས།
དེ་ཡང་ ག་ཅི་སྦེ་ཟེར་བ་ཅིན་ གྲོང་གསེབ་གཡུས་སྒོ་ཚུ་ནང་ གཅན་གཟན་སྟག་དང་ གངས་གཟིག་ དེ་ལས་ དོམ་དང་ གཟིག་ཚུ་གིས་ སྤྱི་ལོ་༢༠༠༢ ལས་ དུས་ཅི་ཚུན་ལུ་ སྒོ་ནོར་སེམས་ཅན་ཡོངས་བསྡོམས་༢༡༥༨ བསད་ཡོད་མི་ཚུ་ རི་དྭགས་སྲུང་སྐྱོབ་སྡེ་ཚན་གྱིས་ རྒུད་འཐུས་དངུལ་ཀྲམ་ས་ཡ་༨.༤ ལྷགཔ་ཅིག་ སྤྲོད་དགོ་པའི་ གནད་ཐོན་ཡོད་པའི་ གསལ་སྟོན་འབདཝ་ཨིན་པས།

ལས་མི་བྱོག་འགྱོ་མི་གིས་ ཁག་འབགཔ་ལུ་ དཀའ་ངལ་ཐོན་དོ་ཡོདཔ།

༢༠/༡༠/༡༢། ༉ སྤྱི་ཟླ་༡༠ པའི་ཚེས་༡༤ ལུ་ རྡོ་གདན་ནང་ ནང་པའི་མཐོ་རིམ་སློབ་གྲྭ་རྐྱབ་སའི་ ལས་མི་༥༤ དང་ དེ་གི་འགོ་འཛིན་འཐབ་མི་ཁག་འབགཔ་ཚུ་ བྱོག་སོང་ཡོད་མི་ལུ་བརྟེན་ ཐིམ་ཕུའི་ཁག་འབགཔ་གིས་ རྒྱ་གར་གཞུང་ཚབ་ཡིག་ཚང་ནང་ གནད་དོན་དང་འབྲེལ་བའི་ གྲོགས་རམ་འཚོལ་ཡོདཔ་ཨིན་པས།
ཁག་འབགཔ་གིས་སླབ་དོ་བཟུམ་འབད་བ་ཅིན་ གཟའ་ཟླ་ཨ་རྟག་ར་ ལས་མི་ཚུ་ ཁྲོམ་ཁར་ཉོ་ཚོང་རྐྱབ་པར་འགྱོ་དོ་ཡོདཔ་ལས་ དེ་ཚེ་ཡང་ གཟའ་ཟླཝ་འབད་ནི་དེ་གིས་ ཁྲོམ་ཁར་ འགྱོ་འགྱོཝ་འོང་ནི་མས་ཟེར་སྡོད་ཡོདཔ་ཨིན་རུང་ རྒྱ་གར་གྱི་ལས་མི་ཁག་འབགཔ་དེ་གིས་ ས་ཁོངས་ཡིག་ཚང་ནང་སོང་ཞིནམ་ལས་ ཆོག་ཐམ་ཚུ་ག་ར་འབག་སྟེ་ བྱོག་ཡར་སོ་ནུག་ཟེར་ཨིན་པས།

གནས་ཚད་དང་ལྡན་པའི་ འགྲུལ་སྐྱེལ་བཱསི་བཞག་སའི་ ས་ཁོངས་མེདཔ།

ཁྲོམ་གྱི་ས་ཁྲ་གསརཔ་དང་འཁྲིལཝ་ད་ སྐྱེལ་འདྲེན་བཱསི་བཞག་སའི་ས་ཁོངས་དེ་ ས་གནས་གཞན་ཅིག་ནང་ ངོས་འཛིན་འབད་དེ་ཡོདཔ་ཨིན་པས།
རྩི་རང་གི་ འགྲུལ་སྐྱེལ་བཱསི་བཞག་སའི་ས་ཁོངས།
༢༠/༡༠/༡༢། ༉ རྩི་རང་ལས་ འགོ་དང་པ་ རྒྱལ་ཁབ་ཀྱི་ས་གནས་ཁག་ཚུ་ནང་ འགྲོ་འགྲུལ་འབད་མི་ ལམ་འགྲུལཔ་ཅིག་ཨིན་པ་ཅིན་ འགྲམ་ཕུ་ཁྲོམ་ཁར་ འགྲུལ་སྐྱེལ་བཱསི་འཚོལ་འཐོབ་ནི་ལུ་ ལཱ་ཁག་རྐྱབ་ནི་ཨིན་མི་དེ་ཡང་ ཁྲོམ་ཁར་ བཱསི་བཞག་སའི་ས་ཁོངས་ ཏན་ཏན་ཅིག་ མེད་ནི་དེ་གིས་ཨིན་པས།
ཁྲོམ་གྱི་འཛུལ་སྒོ་ནང་ར་ སྒོར་ལམ་གྱི་འོག་ལུ་ འགྲུལ་སྐྱེལ་བཱསི་ཚུ་བཞག་སའི་ ཐང་ཅིག་མཐོང་མི་དེ་ བཟོ་སྐྲུན་གྱི་ས་ཁོངས་བཟུམ་སྦེ་ མཐོང་དོ་ཡོདཔ་ད་ དེ་ནང་ སྣུམ་འཁོར་ཊཱག་དང་ ཌི་སི་ཨེམ་ དེ་ལས་ སྒེར་གྱི་སྣུམ་འཁོར་ཆུང་བ་ཚུ་ བཞག་སར་མཐོངམ་ཨིན་པས།

མགར་སའི་གཞུང་ལམ་བདའ་སྟེ་ སྣུམ་འཁོར་ རྒྱུན་འབྲེལ་འབད་ཚུགས་ཡོདཔ།

ལམ་གྱི་རྒྱ་ཚད་ཆུང་ནི་དེ་གིས་ དུས་སྟབས་ཅིག་ལུ་ སྣུམ་འཁོར་གཅིག་མ་གཏོགས་ མ་ཤོང་པའི་དཀའ་ངལ་ བྱུང་དོ་ཡོདཔ་ཨིན་པས།
ཡུན་རིངམོ་སྦེ་བསུབས་མི་ མགར་སའི་གཞུང་ལམ།
  ༢༠/༡༠/༡༢། ༉ དུས་ཅི་ སྤྱི་ཟླ་༦ པའི་ཚེས་༢༡ ལུ་ སྤུ་ན་ཁ་དང་ མགར་ས་རྫོང་ཁག་གི་ གཞུང་ལམ་དེ་ ས་གནས་ཁག་༡༧ དེ་ཅིག་ནང་ ས་རུད་ཆད་དེ་ ལམ་བསུབས་མི་ཚུ་ ད་རེས་ཀྱི་ ཟླཝ་འདི་ནང་ལས་ བསལ་ཚར་ནི་དེ་གིས་ སྣུམ་འཁོར་ཚུ་རྒྱུན་འབྲེལ་ འཐབ་ཚུགས་ཡོདཔ་ཨིན་པས།
ཨིན་རུང་ ལམ་གྱི་རྒྱ་ཚད་ཆུང་ཀུ་འབད་ནི་དེ་གིས་ དུས་སྟབས་ཅིག་ལུ་ སྣུམ་འཁོར་གཅིག་མ་གཏོགས་ མི་ཤོང་དོ་ཡོད་པའི་ཁར་ འཁོར་ལམ་དེ་ ད་ལྟོ་ རྒྱ་བསྐྱེད་འབད་བའི་བསྒང་ཨིནམ་ལས་ སྣུམ་འཁོར་ཚུ་ འགྲོས་ཀྱིས་སྦེ་ བཏང་འགྱོ་དགོ་དོ་ཡོདཔ་ཨིན་པས།

ད་རིས་ལས་ རྐ་མེད་ཆུ་དང་ ཕུན་ཚོགས་གླིང་གི་བར་ན་ འགྲུལ་སྐྱེལ་བཱསི་གི་ ཞབས་ཏོག་འགོ་བཙུགས་ནི།

རྐ་མེད་ཆུ་དང་ ཕུན་ཚོགས་གླིང་གི་བར་ན་ འགྲུལ་སྐྱེལ་བཱསི་བཙུགས་མི་དེ་ སྤུ་ན་གཙང་ཆུ་གློག་མེ་ལས་འགུལ་གྱིས་ ལམ་འགྲུལ་ཉེན་སྲུང་དང་སྐྱེལ་འདྲེན་དབང་འཛིན་ལུ་ གྲོས་གཞི་ཕུལ་མི་དང་འཁྲིལ་ཏེ་ཨིན་པས། 
ཁ་ཙ་ འགྲུལ་སྐྱེལ་བཱསི་གི་ ཇོ་བདག་ལུ་ རྩིས་སྤྲོད་འབད་མི་ རྐ་མེད་ཆུའི་ ཤོག་འཛིན་བཏོག་ཁང་།
༢༠/༡༠/༡༢། ༉ ད་རིས་ལས་ དབང་འདུས་ཕོ་བྲང་ རྐ་མེད་ཆུ་་དང་ ཕུན་ཚོགས་གླིང་གི་བར་ན་ འགྲུལ་སྐྱེལ་ཞབས་ཏོག་ འགོ་བཙུགས་ནི་ཨིནམ་ལས་ རྒེད་འོག་༤ གི་ མི་སེར་ཚུ་དང་ སྤུ་ན་གཙང་ཆུ་གློག་མེ་ལས་འགུལ་ནང་ ལཱ་འབད་མི་ཚུ་གིས་ ཞབས་ཏོག་ལག་ལེན་འཐབ་ཚུགས་ནི་ཨིན་པས།
ས་གནས་དེ་ཁ་ལས་ ཤོག་འཛིན་སྤྲོད་ནིའི་དོན་ལུ་ འབྲེལ་སྟེགས་ཁང་གསརཔ་ ཆུང་ཀུ་ཅིག་རྐྱབ་མི་དེ་ ཁ་ཙ་ སྤུ་ན་གཙང་ཆུ་གློག་མེ་ལས་འགུལ་དང་ ལམ་འགྲུལ་ཉེན་སྲུང་དང་སྐྱེལ་འདྲེན་དབང་འཛིན་གྱིས་ འགྲུལ་སྐྱེལ་བཱསི་གི་ ཇོ་བདག་ལུ་ རྩིས་སྤྲོད་འབད་ཡི།

གཤག་བཟོ་ལུ་བརྟེན་ འོང་འབབ་ལེགས་ཤོམ་ བཟོ་ཚུགས་དོ་ཡོདཔ།

 ལོ་བསྟར་བཞིན་དུ་ གཤག་བཟོ་ལུ་བརྟེན་ འོང་འབབ་དངུལ་ཀྲམ་༢༠༠,༠༠༠ དེ་ཅིག་ བཟོ་ཚུགས་དོ་ཡོདཔ་ཨིན་པས།
སྐྱེས་ལོ་༢༢ ལང་མི་ ཡོན་ཏན་རྒྱ་མཚོ་གིས་ གཤག་བཟོའི་ལཱ་འབད་བའི་བསྒང་།
 ༢༠/༡༠/༡༢། ༉ སྐྱེས་ལོ་༢༢ ལང་མི་ ཡོན་ཏན་རྒྱ་མཚོ་དེ་ ཁོ་རའི་མི་ཚེ་ནང་ ཆ་རོགས་གཞན་ཚུ་བཟུམ་སྦེ་ ཆུང་ཀུའི་བསྒང་ལས་ར་ ཡོན་ཏན་ལྷབ་ནིའི་ གོ་སྐབས་མ་ཐོབ་རུང་ ད་རེས་ནངས་པ་ ཁོ་རའི་མི་ཚེ་དེ་ རང་མགོ་རང་འདྲོངས་སྦེ་ སྡོད་ཚུགས་མི་དེ་ཡང་ གཙོ་བོ་ར་ ཁོ་རའི་ སྐྱེས་སྟོབས་ཀྱི་རིག་པ་ལུ་བརྟེན་ཨིན་པས།

རྒྱུན་འགྲུལ་བཀག་ཐོགས་ཀྱི་ དཀའ་ངལ་མར་ཕབ་འབད་ནི།

ཐིམ་ཕུ་སོ་ནམ་བརྒྱ་འཁོར་ཚོང་ཁྲོམ་གདོང་ཁའི་ གཞུང་ལམ་བསྒྱུར་བཅོས་ཀྱི་བཀོད་རིས།
 ༢༠/༡༠/༡༢། ༉ རྒྱུན་འགྲུལ་མངམ་འབད་སའི་ ལམ་སྒོ་དོག་དྲགས་ལས་  སྐེདཔ་བཏོག་འགྱོ་མི་ རྐང་འགྲུལ་པ་ཚུ་ སྣུམ་འཁོར་ཚུ་གིས་ འཐུ་བཀོག་ནི་དང་ བརྡུང་ནི་གི་ ཉེན་ཁ་ཡོད་མི་དེ་ མར་ཕབ་འབད་ནིའི་ ཐབས་ཤེས་ལུ་ སོ་ནམ་བརྒྱ་འཁོར་ཚོང་ཁྲོམ་གྱི་ འཛིན་སྐྱོང་ཚོགས་ཆུང་གིས་ ཚོང་ཁྲོམ་གདོང་ཁའི་ གཞུང་ལམ་དེ་ བསྒྱུར་བཅོས་ཐོག་ ཝང་ཆུའི་མཐའམ་བདའ་སྟེ་ བསལ་དགོ་པའི་ གྲོས་འཆར་བཀོདཔ་ཨིན་པས།

ཕུན་ཚོགས་གླིང་ལུ་ བྱ་ནད་ཨེཆ་ཕ་ཡེབ་ ཨེན་ཝཱན་ཐོན་ཡོདཔ་ལས་ བྱ་༢༨ བསད་ཡོདཔ།

༡༩/༡༠/༢༠༡༢   ༉ ཕུན་ཚོགས་གླིང་དྲུང་ཁག་ རིན་ཆེན་སྡིངས་ལུ་ གསོ་སྐྱོང་འབད་མི་ བྱམོ་༤ ཤི་རྐྱེན་བྱུང་མི་དེ་ བྱ་ནད་ཨེཆ་ཕ་ཡེབ་ཨེན་ཝཱན་ ཐོབ་ཡོད་པའི་ ངོས་འཛིན་བྱུང་པའི་ཤུལ་ལུ་ སྤྱི་ཟླ་༡༠ པའི་ཚེས་༡༧ གྱི་ཕྱི་རུ་ བྱ་༢༨ གདམ་ཁ་རྐྱབ་སྟེ་བསད་ནུག།
སྒོ་ནོར་འགོ་དཔོན་ཚུ་གིས་ བྱ་གདམ་ཁ་རྐྱབ་སྟེ་ མ་བསད་པའི་ཧེ་མར་ ནད་བརྟག་གི་དོན་ལུ་ དཔེ་ཚད་བསྡུ་ལེན་འབད་བའི་བསྒང་།

ཚོང་ཁང་ནང་ལས་ ཨར་རྐུན་འབད་མི་ བཟའ་ཚང་༢ འཛིན་བཟུང།

༡༩/༡༠/༢༠༡༢   ༉ སྤྱི་ཟླ་༡༠ པའི་ཚེས་༧ གྱི་ ཕྱི་རུའི་ཆུ་ཚོད་༧.༣༠ དེ་ཅིག་ཁར་ ཐིམ་ཕུ་ཁྲོམ་གྱི་ འབྲུག་ཤོ་པིང་ཀམ་པེ་ལེགསི་སྒྲིང་ཁྱིམ་གྱི་ འོག་ཐོག་ལས་ བཟའ་ཚང་༢ ཀྱིས་ ཚོང་ཆས་ཚུ་ ཨར་རྐུན་འབད་ཡོདཔ་ཨིན་པས།

མཐོ་རིམ་སློབ་ཕྲུག་༣ གྱིས་ གསེར་གྱི་རྟགས་མ་ཐོབ་ཡོདཔ།

༡༩/༡༠/༢༠༡༢   ༉ འབྲུག་གི་མཐོ་རིམ་སློབ་ཕྲུག་༣ ལུ་ རང་སོའི་གཙུག་ལག་སློབ་སྡེ་ཚུ་གིས་ གཟེངས་ཐོན་རྟགས་མ་ཚུ་ བྱིན་ཡོདཔ་བཞིན་དུ་ ཁ་ཙ་ ཤེས་རིག་ལྷན་ཁག་གིས་ ཁོང་གི་ ཤེས་ཡོན་གྲུབ་འབྲས་ལེགས་ཐོན་གྱི་ ངོས་ལེན་གནང་ཡི།

ཨེན་ཊི་ཊི་སྡེ་ཚན་ མཐའ་བཅད་འགྲན་བསྡུར་ནང་ལྷོད་ཡོདཔ།

༡༩/༡༠/༢༠༡༢   ༉ ད་རེས་ ཐིམ་ཕུ་ལྕང་གླིང་མི་ཐང་ནང་ལུ་ ཕྱི་རྒྱལ་མདའ་གཞུའི་ཐོག་ལུ་ ཁྲི་མངའ་གསོལ་ མདའ་རྩེད་འགྲན་བསྡུར་ འགོ་འདྲེན་འཐབ་པའི་བསྒང་ ཡོད་མིའི་ནང་ ཁ་ཙ་ མཐའ་བཅད་འགྲན་བསྡུར་འོག་མ་རྩེད་འགྲན་འབདཝ་ད་ འབའ་སྐྱོར་འོག་མའི་ནང་ ཨེན་ཊི་ཊི་སྡེ་ཚན་དང་ ཕུན་སུམ་སྡེ་ཚན་༢ ཀྱི་བར་ན་ རྩེད་འགྲན་འབདཝ་ད་ ཨེན་ཊི་ཊི་སྡེ་ཚན་གྱིས་ སྐུགས་༢ བྱེལཝ་བྱེལ་ས་ར་ཆོད་དེ་ མཐའ་བཅད་འགྲན་བསྡུར་ནང་ལྷོད་ཅི།
ཨེན་ཊི་ཊི་བཟོ་སྐྲུན་སྡེ་ཚན་གྱིས་ བཀག་རེག་ཕོག་མི་ལུ་ དགའ་ཚོར་སྐྱེད་པའི་བསྒང་།

ཉེན་ཅན་ས་ཁོངས་ཚུ་ནང་ སྔོན་བཤད་ལམ་ལུགས་ཚུ་ གཞི་བཙུགས་འབད་ནི།

༡༩ཨ༡༠/༢༠༡༢   ༉ ཁ་ཙ་ ཇ་པཱན་རྒྱལ་སྤྱི་མཉམ་འབྲེལ་ལས་སྡེ་ ཇའི་ཀ་གི་ ཞིབ་འཚོལ་སྡེ་ཚན་གྱི་མདོ་ཆེན་ ཤཱི་རོ་ ན་ཀ་སོ་ནི་དང་ ཆུ་བརྟག་ལས་ཁུངས་ཀྱི་མདོ་ཆེན་ ཀརྨ་ཚེ་རིང་གིས་ ཇའི་ཀ་དང་ ཆུ་བརྟག་ལས་ཁུངས་༢ ཀྱི་བར་ནའི་ ལས་འགུལ་གྱི་ ཆིངས་ཡིག་ཅིག་གུ་ མཚན་རྟགས་བཀོད་ཅི།
ཇའི་ཀ་གི་ ཞིབ་འཚོལ་མདོ་ཆེན་ ཤཱི་རོ་ ན་ཀ་སོ་ནི་དང་ ཆུ་བརྟག་ལས་ཁུངས་ཀྱི་མདོ་ཆེན་ ཀརྨ་ཚེ་རིང་གིས་ ཆིངས་ཡིག་བརྗེ་སོར་འབད་བའི་བསྒང་།