 |
| མི་སེར་ཚུ་གིས་ ཉོགས་བཤད་བཀོད་མི་ བསམ་རྩེ་རྡོ་རོ་ཁའི་ སོ་ནམ་ཞིང་ལམ། |
སྤྱི་ཟླ་༡༠ པའི་ཚེས་༢༣ ལུ་ གཡུས་མི་ཚུ་གིས་ རྒཔོ་ལུ་ ཉོགས་བཤད་བཀོད་མིའི་ནང་ ཁག་འབགཔ་ཚུ་གིས་ ལམ་བདའ་སྟེ་ རྡོ་རུ་ལེགས་ཤོམ་སྦེ་ མ་བླུགས་ནི་དེ་གིས་ ཧོག་ཀ་ལེ་ཤ་ཡོདཔ་ད་ ད་ལྟོ་ ཞིང་ལམ་སེལ་ཏེ་ ཀི་ལོ་མི་ཊར་༧ དེ་ཅིག་ ལྷོད་ཡོདཔ་ཨིན་པས།
ཌོ་ཡའི་གཡུས་ཚན་ནང་ མི་སྡེ་༣ ཡོདཔ་ད་ དེ་ཡང་ ལོ་ཏོ་ཀུ་ཅུ་འཇིགས་མེད་དང་ ལོ་ཏོ་ཀུ་ཅུ་སེངྒེ་ དེ་ལས་ ལོ་ཏོ་ཀུ་ཅུ་དབང་ཕྱུག་ཨིནམ་ད་ མི་སྡེ་ཚུ་ བསམ་རྩེ་རྫོང་ཁག་ རྡོ་རོ་ཁ་དྲུང་ཁག་ རྡོ་ཕུ་ཅན་རྒེད་འོག་ནང་ཨིན་པས།
གོ་རིམ་དང་པའི་ སོ་ནམ་ཞིང་ལམ་བསལ་ནི་དེ་ ན་ཧིང་ སྤྱི་ཟླ་༡༠ པའི་ནང་ མཇུག་བསྡུ་ཡོདཔ་ད་ ཞིང་ལམ་དེ་ ཤུལ་མའི་ཟླཝ་ནང་ མཇུག་བསྡུ་ཚུགས་པའི་ རེ་བ་བསྐྱེད་དོ་ཡོདཔ་ཨིན་པས།
གཡུས་མི་ཚུ་གིས་ བཤད་དོ་བཟུམ་འབད་བ་ཅིན་ ཁོང་གིས་ འཕྲུལ་ཆས་ཚུ་གི་ མིང་ཚིག་ཚུ་ ཧ་མ་གོ་རུང་ ལམ་བདའ་སྟེ་ རྡོ་རུ་ ལེགས་ཤོམ་སྦེ་ མ་བླུགས་པའི་ཁར་ ལམ་ཁར་ འདམ་པ་ཐོན་མི་དེ་ ཤེས་ཚུགས་པས་ཟེར་ཨིན་པས།
གཡུས་ཁའི་ཚོགས་པ་ བྱག་ཆུ་གིས་ སླབ་དོ་བཟུམ་འབད་བ་ཅིན་ རྡོ་རུ་ཚུ་ ས་གོ་ལ་ལུ་ཅིག་ནང་རྐྱངམ་གཅིག་ བླུགས་ནུག་ཟེར་ཨིནམ་ད་ ཧག་ཀ་ཧོག་ཀ་ཐོན་མི་དང་ འདམ་པ་ཐོན་མི་ ས་གོ་ལ་ལུ་ཅིག་ བདག་མེད་སྦེ་ བཞག་ནུག་ཟེར་ཨིན་པས།
དེ་གིས་མ་ཚད་ ལཱ་འབད་མི་ཚུ་གིས་ འདམ་དང་རྡོ་སླ་བསྲེས་ཏེ་ འཁོར་ལམ་བདའ་སྟེ་ བླུགས་པའི་ཤུལ་ལུ་ ས་ཁོངས་ཚུ་ ལེགས་ཤོམ་སྦེ་ མ་བཟོ་བར་ བཞགཔ་མས་ཟེར་ཨིན་པས།
རྡོ་ཕུ་ཅན་རྒེད་འོག་ནང་ སྣུམ་འཁོར་ལམ་དེ་ ལོ་ངོ་བཅུ་ཕྲག་དེ་ཅིག་ བསྒུགས་སྡོད་པའི་ཤུལ་ལས་རྐྱངམ་གཅིག་ ད་རེས་ལྷོདཔ་ལས་བརྟེན་ རེ་དོན་གྲུབ་ཚུགས་ཅི་ཟེར་ཨིན་པས།
ལོ་ཏོ་ཀུ་ཅུ་གཡུས་ཚན་དེ་ ད་ཚུན་ ཞིང་ལམ་མེད་པར་ ལུས་མི་ལུ་བརྟེན་ ས་གནས་གཞན་དང་གཅིག་ཁར་ འབྲེལ་བ་འཐབ་ནི་དང་ ཚོང་འབྲེལ་ཡང་ འཐབ་མ་ཚུགས་པར་ ལུས་ཡོདཔ་ཨིན་རུང་ རྒེད་འོག་ནང་ རྒྱང་འཕྲིན་དང་ གློག་མེའི་ཞབས་ཏོག་ཚུ་ ལོ་དག་པ་ཅིག་གི་ཧེ་མ་ལས་ ལྷོད་ཡོདཔ་ཨིན་པས།
ད་ལྟོ་ བཟོ་སྐྲུན་འབད་མི་ཞིང་ལམ་དེ་ མཇུག་བསྡུ་ཞིནམ་ལས་ གཡུས་ཁའི་མི་ཚུ་ རྐང་སྟོང་སྦེ་ བསམ་རྩེ་དང་ རྡོ་རོ་ཁ་ལུ་ འགྱོ་མི་དགོ་ནི་ཨིནམ་ད་ སོ་ནམ་ཞིང་ལམ་དེ་ སེང་ལྡན་གཡུས་ཚན་ལས་ འགོ་བཙུགས་ཏེ་ ཌོ་ཡའི་གཡུས་ཚན་མཇུག་གི་ ལོ་ཏོ་ཀུ་ཅུ་དབང་ཕྱུག་ཚུན་ ཡོདཔ་ཨིན་པས།
མི་སེར་སོ་ནམ་པ་ཚུ་གིས་ བཤད་དོ་བཟུམ་འབད་བ་ཅིན་ ཞིང་ལམ་ལུ་བརྟེན་ ཚོང་ཁང་བཙུགས་ཚུགས་ནི་ཨིནམ་ལས་ གཡུས་མི་ཚུ་ ཧེ་མ་བཟུམ་སྦེ་ བཟའ་ཆས་ཚུ་ཉོ་བར་ ཐག་རིང་སར་ རྐང་སྟོང་སྦེ་ འགྱོ་མི་དགོ་ནི་ཨིན་པས།
ད་རེས་ བསམ་རྩེ་ལུ་འགྱོ་བལྟ་བ་ཅིན་ བཟའ་ཆས་ཚུ་ བདུན་རིམ་བཞིན་དུ་ ལེན་དོ་ཡོདཔ་ད་ ཧེ་མ་འབད་བ་ཅིན་ ལོ་༡ ལུ་ ཚར་༡ ལས་བརྒལ་ འགྱོ་ནི་མེད་ཟེར་ཨིན་པས།
སྐྱེས་ལོ་༧༨ ལང་མི་ དཱ་མེ་གིས་ སླབ་དོ་བཟུམ་འབད་བ་ཅིན་ ཁོང་གི་སོ་ནམ་ཐོན་སྐྱེད་ཚུ་ བཙོང་ནིའི་དོན་ལུ་ ཉིན་གྲངས་༢ དེ་ཅིག་ སྒལ་ཏོ་ཁར་ འབག་འགྱོ་དགོཔ་ལས་ བཤོལ་བཞག་ཅི་ཟེར་ཨིནམ་ད་ ད་ལས་ཕར་ ཞིང་ལམ་ལུ་བརྟེན་ སྣུམ་འཁོར་ཐོག་ལས་ སྐྱེལ་འདྲེན་འབད་དེ་ འོང་འབབ་བཟོ་ཚུགས་པའི་ རེ་བ་ཡོད་ཟེར་ཨིན་པས།
མ་དངུལ་ས་ཡ་༦.༧ གནས་མི་ སོ་ནམ་ཞིང་ལམ་དེ་གིས་ ཁྱིམ་གུང་༢༦༥ འི་ མི་སེར་བསྡོམས་༩༥༠ ལུ་ ཕན་ཐོགས་འབྱུང་ཚུགས་ནི་ཨིན་པས།
རྡོ་ཕུག་ཅན་གྱི་རྒཔོ་ ཅཱན་ད་ར་ པར་སཱཌ་ ཕུ་ཡེལ་གྱིས་ སླབ་དོ་བཟུམ་འབད་བ་ཅིན་ མི་སེར་ཚུ་གིས་ ཞིང་ལམ་གྱི་སྐོར་ལས་ ཉོགས་བཤད་བཀོད་མི་ཚུ་ ཞིབ་དཔྱད་འབད་ནི་ཨིན་ཟེར་ཨིན་པས།
ད་ལྟོ་ བསམ་རྩེ་ལུ་ སྨོན་ལམ་ཆེན་མོ་ ཚོགས་པའི་བསྒང་ཡོདཔ་ལས་ དལ་ཁོམ་མེད་ནི་དེ་གིས་ སྨོན་ལམ་ཆེན་མོ་མཇུག་བསྡུ་ཞིནམ་ལས་ བལྟ་བར་འགྱོ་ནི་ཟེར་ཨིན་པས།
ཁག་འབགཔ་གིས་ སླབ་དོ་བཟུམ་འབད་བ་ཅིན་ ཞིང་ལམ་གྱི་བཟོ་སྐྲུན་ མཇུག་མ་བསྡུ་བའི་ཧེ་མ་ལས་ སྣུམ་འཁོར་ཚུ་ འགྲོ་འགྲུལ་འབད་ནི་ འགོ་བཙུགས་མི་ལུ་བརྟེན་ བྱ་སྟབས་མ་བདེཝ་བྱུངམ་མས་ཟེར་ཨིནམ་ད་ སྣུམ་འཁོར་བོ་ལེ་རོ་གི་ ཇོ་བདག་ལ་ལུ་ཅིག་གིས་ ཚར་རེ་འགྲུལ་སྐྱོད་འབདཝ་ད་ མི་རེ་ལས་ གླ་ཆ་དངུལ་ཀྲམ་༣༠༠ རེ་ ལེནམ་མས་ཟེར་ཨིན་པས།
ཁག་འབགཔ་གིས་ སླབ་མིའི་ནང་ ལམ་ཁར་ རྡོ་ཞིབ་ནིའི་ལཱ་ཚུ་ བཟོ་སྐྲུན་འབད་ཚར་ཞིནམ་ལས་ འགོ་བཙུགས་ནི་ཟེར་ཨིནམ་ད་བཟོ་སྐྲུན་འབད་མ་ཚར་ཚུན་ བར་ཆད་མི་རྐྱབ་ཟེར་ རྒཔོ་གིས་ སླབ་ཨིན་པས།
དེ་འབདཝ་ད་ ཁོང་གིས་བཟོ་སྐྲུན་འབད་མི་ཚུ་ སྤུས་ཚད་ག་དེ་སྦེ་ཡོདཔ་ཨིན་ན་ ཁག་འབགཔ་ལས་ རྩིས་མ་ལེན་པའི་ཧེ་མར་ བརྟག་ཞིབ་འབད་ནི་ཟེར་ཨིན་པས།
གལ་སྲིད་ ག་དེམ་ཅིག་སྦེ་ ཞིང་ལམ་དེ་ ལེགས་ཤོམ་མེད་པ་ཅིན་ རྒེད་འོག་ཡིག་ཚང་གིས་ ངོས་ལེན་མི་འབད་ཟེར་ ཅཱན་ད་ར་ པར་སཱཌ་གིས་ སླབ་ཨིན་པའི་གནས་ཚུལ།
No comments:
Post a Comment