༉ རྒྱལ་ཁབ་ནང་འཁོད་ཀྱི་ ས་གནས་ཁག་ཚུ་ནང་སྡོད་མི་ འབྲུག་མི་ཚུ་གི་དོན་ལུ་ རྐང་འཁོར་སའི་ཀཱལ་གཏང་ནི་དེ་ རྩེདམོ་བཟུམ་ཅིག་ཨིན་རུང་ ལྷ་མོའི་རྫིང་ཁ་ཁྲོམ་ཁར་ སྡོད་མི་ཚུ་གི་དོན་ལུ་ ཉེ་བར་མཁོ་བའི་ སྐྱེལ་འདྲེན་གྱི་ ཐབས་ལམ་ཅིག་ཨིན་པས།
 |
| ལྷ་མོའི་རྫིང་ཁ་ལུ་ རྐང་འཁོར་སའི་ཀཱལ་གཏང་ནི་དེ་ སྐྱེལ་འདྲེན་གྱི་ ཐབས་ལམ་ངོ་མ་ཅིག་ཨིན་མས། |
ལྷ་མོའི་རྫིང་ཁ་དྲུང་ཁག་དེ་ ཕུན་ཚོགས་གླིང་དྲུང་ཁག་ལས་ ཀི་ལོ་མི་ཊར་༡༢༡ དེ་ཅིག་གི་ ས་ཁར་ཨིན་པས།
ས་གནས་ཀྱི་ ཁྱིམ་གུང་རེ་ལུ་ རྐང་འཁོར་སའི་ཀཱལ་རེ་ ཡོདཔ་བཞིན་དུ་ ཕོ་སྐྱེས་དང་ ཨམ་སྲུ་༢ ཆ་ར་གིས་ ལག་ལེན་འཐབ་དོ་ཡོདཔ་ད་ ས་གནས་ཁར་ སྡོད་མི་ཚུ་གིས་ སླབ་མིའི་ནང་ རྐང་འཁོར་སའི་ཀཱལ་བཏང་དགོ་པའི་ གནད་དོན་ངོ་མ་ར་ ས་གནས་ནང་ གླ་འཁོར་མེད་པའི་ཁར་ སྐྱེལ་འདྲེན་གྱི་ ཞབས་ཏོག་ཚུ་ ག་ནི་ཡང་ མེད་ནི་དེ་གིས་ ཨིན་ཟེར་ཨིན་པས།
ད་ལྟོ་ ལྷ་མོའི་རྫིང་ཁ་ལུ་བལྟ་བ་ཅིན་ སློབ་ཕྲུག་ཚུ་གིས་མ་ཚད་པར་ དེ་ནང་སྡོད་མི་ ཆ་མཉམ་ར་ རྐང་འཁོར་སའི་ཀཱལ་བཏང་འགྱོ་སར་ མཐོངམ་ཨིན་པས།
ཡིག་ཚང་ནང་ལཱ་འབད་མི་ འགོ་དཔོན་དག་པ་ཅིག་གིས་ཡང་ བཀབ་ནེ་དང་ ཡིག་སྣོད་ཚུ་ སའི་ཀཱལ་གྱི་རྒྱབ་ཁར་ བསྡམས་ཞིནམ་ལས་ དྲོ་པ་ཡིག་ཚང་ནང་འགྱོ་བའི་ མཐོང་གསལ་བྱུངམ་ཨིན་པས།
ས་གནས་ཀྱི་ མི་ཚུ་གིས་ སླབ་མིའི་ནང་ སྣུམ་འཁོར་ལམ་ཚུ་ ཡར་འཛེགས་ནི་དང་ མར་འབབ་མ་དགོ་པར་ ཕྲང་ཏང་ཏ་སྦེ་ཡོདཔ་མ་ཚད་ སྣུམ་འཁོར་ཉུང་སུ་ཅིག་ལས་བརྒལ་མེད་ནི་དེ་གིས་ རྐང་འཁོར་སའི་ཀཱལ་གཏང་ནི་དེ་ འཇམ་པའི་ཁར་ ཉེན་སྲུང་དང་ལྡནམ་སྦེ་ ཡོད་ཟེར་ཨིན་པས།
ལྷག་པར་དུ་ རྒྱ་གར་ལས་ཐོན་མི་ རྐང་འཁོར་སའི་ཀཱལ་ཚུ་ ཆ་མཉམ་གྱིས་ ཉོ་ཚུགསཔ་ལས་ སྟབས་བདེ་བས་ཟེར་ཨིན་པས།
རྐང་འཁོར་ཚུ་ ས་མཚམས་ཁྲོམ་སྡེ་དང་ ཡང་ཅིན་ ཕུན་ཚོགས་གླིང་ལས་ གོང་ཚད་དངུལ་ཀྲམ་༢,༠༠༠ ལས་༥,༠༠༠ གི་བར་ན་ ལེགས་ཧིང་དང་བསྟུན་ འཐོབ་ཚུགས་དོ་ཡོདཔ་ཨིན་པས།
ས་གནས་ཀྱི་ མི་ཚུ་གིས་སླབ་མིའི་ནང་ གནམ་བྱཱར་གྱི་དུས་ཚོད་ལུ་ རྐང་འཁོར་གཏང་ནི་དེ་ བྱ་སྟབས་བདེ་ཏོག་ཏོ་འདུག་ཟེར་ཨིནམ་ད་ དེ་ཡང་ གཙང་ཆུ་བྲེས་པའི་སྐབས་ལུ་ འཇམ་ཏོང་ཏོ་སྦེ་ འཐུ་འབག་ཚུགས་པས་ཟེར་ཨིན་པས།
སྐྱེས་ལོ་༥༣ ལང་མི་ པི་རི་ཐི་གིས་ སླབ་མིའི་ནང་ ཐ་ན་ ས་མཚམས་ཁྲོམ་སྡེ་ནང་ལས་ ཉེ་བར་མཁོ་བའི་ ཅ་ཆས་ཚུ་ ཉོ་དགོཔ་ཐོནམ་ད་ སྣུམ་འཁོར་འཚོལ་མ་དགོ་པར་ དེ་འཕྲོ་ལས་ རྐང་འཁོར་གཏང་སྟེ་ འགྱོ་ཚུགས་པའི་ ཕན་ཁྱད་འདུག་ཟེར་ཨིན་པས།
ད་རུང་ ཨམ་སྲུ་རྒས་ཤོས་ཅིག་གིས་ སླབ་དོ་བཟུམ་འབད་བ་ཅིན་ རྐང་འཁོར་ལུ་བརྟེན་ རང་སོའི་ སློབ་གྲྭ་ནང་འགྱོ་མི་ ཨ་ལུ་ཚུ་ བསྐྱལ་ནི་དང་ ལེན་ནི་ལུ་ཡང་ ལཱ་ཁག་མི་རྐྱབ་པས་ཟེར་ཨིནམ་ད་ ས་གནས་ཀྱི་མི་ཚུ་གིས་ སློབ་ཕྲུག་ཨ་ལུ་ཚུ་ རྐང་འཁོར་གཏང་མ་ཆོགཔ་ཨིན་རུང་ ཆུང་ཀུའི་བསྒང་ལས་ར་ རྐང་འཁོར་གཏང་ནི་གི་ སྦྱང་བ་བྱིན་བཞགཔ་ཨིན་ཟེར་ སླབ་ཨིན་པས།
དྲུང་ཁག་གི་ འགོ་དཔོན་ཚུ་གིས་ སླབ་མིའི་ནང་ ས་གནས་ཀྱི་ མི་འབོར་མང་ཤོས་ཅིག་ལུ་ རྐང་འཁོར་གྱིས་ ཕན་ཐོགས་བྱུང་མི་ལུ་བརྟེན་ རྒྱལ་ཁབ་ཀྱི་ ས་མཚམས་ཁྲོམ་སྡེ་ གཞན་ཁར་བཟུམ་སྦེ་ རྐང་འཁོར་བཏང་མ་ཆོག་པའི་ བཀག་དམ་མ་འབད་ཟེར་ཨིན་པས།
འགོ་དཔོན་ཚུ་གིས་ སླབ་མིའི་ནང་ ཉིན་མའི་དུས་ཚོད་ལུ་ རྐང་འཁོར་བཏང་སྟེ་ ལཱ་འབད་བར་འོང་མི་ འབྲུག་མི་མེན་མི་ཚུ་ ཕྱི་རུ་ ལོག་འགྱོཝ་ད་ཡང་ རྐང་འཁོར་བཏང་སྟེ་ར་ འགྱོ་མ་འགྱོ་གི་ ཞིབ་དཔྱད་ཚུ་ སྒྲིང་སྒྲིང་སྦེ་ར་ འབད་བཞིན་དུ་ཡོད་ཟེར་ ཨིན་པའི་གནས་ཚུལ།
No comments:
Post a Comment