བཙོན་ཁྲིམས་དེ་ གནད་དོན་ཁག་༢ ཀྱི་ཐོག་ལུ་ བཀལ་ཡོདཔ་ད་ དེ་ཡང་ ཁོ་གིས་ བུམོ་ཅུང་དེ་ལུ་ དབང་བཙོང་ལུས་འབྲེལ་ནིའི་ དཔའ་བཅམ་མི་དེ་ལུ་ བཙོན་ཁྲིམས་ཉུང་ཤོས་ ལོ་༥ དང་ ཉམས་རྒུདཔ་བུམོ་ཅུང་དེ་ ཉེས་ཅན་ཕོ་སྐྱེས་དེ་གི་ ཨ་ཞང་གི་བུམོ་ཨིནམ་ལས་ ཁྲིམས་མཐུན་གཉེན་སྦྱོར་ འབད་མ་ཆོག་པའི་སྤུན་ཆ་ཟེར་ ཉེ་ཚན་ཕོག་པའི་ མི་དང་གཅིག་ཁར་ འདོད་སྤྱོད་འབད་མ་ཆོགཔ་ལས་བརྟེན་ ཉེས་ཁྲིམས་དམའ་ཤོས་ ལོ་༡ ཨིནམ་ལས་ བཙོན་ཁྲིམས་ཡོངས་བསྡོམས་ ལོ་༦ ཕོག་ཡོདཔ་ཨིན་པས།
དེ་མ་ཚད་ དེ་བཟུམ་མའི་ བྱ་ངན་དེ་ ནམ་ཡང་བརྗེད་མ་བཏུབ་པའི་ འཇིགས་སྣང་ལང་ནི་ཅིག་ ཨིན་པའི་ཁར་ ཉམས་རྒུདཔ་བུམོ་ཅུང་དེ་ ངོ་ཚ་བའི་ གནད་དོན་ཐོག་ ཕོ་སྐྱེས་དེ་ལུ་ རྒུད་འཐུས་དངུལ་ཀྲམ་༥,༠༠༠ ཡང་ བཏབ་བཅུག་ཡོདཔ་ཨིན་པས།
བྱུང་རྐྱེན་དེ་ དུས་ཅི་ སྤྱི་ཟླ་༧ པའི་ཚེས་༡༣ ལུ་ དབང་འདུས་ཕོ་བྲང་ བ་འཇོ་ཁྲོམ་ཁར་ ཉམས་རྒུདཔ་བུམོ་ཅུང་དེ་ མོ་རང་རྐྱངམ་གཅིག་སྦེ་ ཁྱིམ་ནང་སྡོད་པའི་སྐབས་ལུ་ བྱུང་ཡོདཔ་ཨིན་པས།
བྱུང་རྐྱེན་དེ་གི་སྐོར་ལས་ དེ་ཚེ་ཕྱི་རུ་ བུམོ་ཅུང་དེ་གིས་ མོ་ར་ གཟུགས་ན་བའི་སྐོར་ལས་ ཨ་ནེ་ལུ་ སླབ་པའི་ཤུལ་ལས་ བ་འཇོ་སྨན་ཁང་ནང་ བརྟག་དཔྱད་འབདཝ་ ལུས་འབྲེལ་འབད་ཡོད་པའི་ གྲུབ་འབྲས་མ་བྱུང་རུང་ མོ་གི་ བརླད་དོ་གུ་ ཤུལ་དམརཔོ་དུམ་གྲ་རེ་ ངོས་འཛིན་བྱུང་མི་བརྟེན་ དོགས་པ་ཆགས་ཡོདཔ་ཨིན་པས།
དེ་ལས་ ཁྲིམས་སྲུང་འགག་པ་ལུ་ སྙན་ཞུ་འབད་བའི་ཤུལ་ལས་ ཉམས་རྒུདཔ་བུམོ་ཅུང་དེ་ལུ་ དྲི་དཔྱད་འབདཝ་ད་ ཕོ་སྐྱེས་དེ་གིས་ དབང་བཙོང་ལུས་འབྲེལ་འབད་ནི་གི་ དཔའ་བཅམ་པའི་སྐོར་ལས་ སླབ་མི་ལུ་བརྟེན་ ཁྲིམས་སྲུང་འགག་པ་གིས་ ཉེས་ཅན་ཕོ་སྐྱེས་དེ་ འཛིན་བཟུང་འབད་ཡོདཔ་ཨིན་པས།
མ་གཞི་ ལྷོ་མཚམས་པའི་ ལམ་སྲོལ་ལས་འབད་རུང་ ཨ་ཞང་གི་བུམོ་དང་གཅིག་ཁར་ ཚ་བོ་གིས་ གཉེན་སྦྱོར་འབད་བཏུབ་ཨིན་རུང་ ད་ལྟོའི་ གནད་དོན་ཐད་ཁར་ ཉམས་རྒུདཔ་བུམོ་ཅུང་དེ་ ལོ་ན་མ་སྨིན་པའི་ ཨ་ལུ་ཨིནམ་ཤེས་བཞིན་དུ་ ཁོ་གིས་ དབང་བཙོང་ལུས་འབྲེལ་འབད་ནིའི་ དཔའ་བཅམ་མི་དེ་ ཁྲིམས་ལས་འགལ་བའི་ ལཱ་ངན་ངོ་མ་ཅིག་ ཨིན་མས་ཟེར་ཨིན་པས།
ཉེས་ཅན་ཕོ་སྐྱེས་དེ་ ཁོ་རའི་གཡུས་ཁར་ ནོར་རྫིཔ་སྦེ་ སྡོད་པའི་བར་ན་ བ་འཇོ་ཁྲོམ་ཁར་ ལཱ་གཡོག་འཚོལ་བར་འོང་སྟེ་ ཟླཝ་དག་པ་ཅིག་ལས་ མ་ལངམ་ཨིན་པས།
ཉེས་ཅན་གྱི་ ཨ་པ་གིས་ སླབ་མིའི་ནང་ ཁྲོམ་ཁར་སྡོད་པ་ཅིན་ འོང་འབབ་དུམ་གྲ་རེ་ བཟོ་ཚུགསཔ་འོང་མནོ་སྟེ་ བཏང་ཡི་ཟེར་ཨིནམ་ད་ ཉེས་ཅན་གྱིས་འབད་རུང་ ཁོ་ར་ ཁྲོམ་ཁར་མ་འོང་པ་ཅིན་ དེ་བཟུམ་མའི་ བྱ་ངན་མ་འབདཝ་འོང་ཟེར་ བློ་འགྱོད་བསྐྱེད་པའི་་གཏམ་ཚུ་ ཁྲིམས་ཀྱི་འདུན་སའི་ འགོ་དཔོན་ཚུ་ལུ་ བཤད་ཡོདཔ་ཨིན་པས།
ཉམས་རྒུདཔ་ཕོ་སྐྱེས་དེ་ བ་འཇོ་ཁྲོམ་ཁར་ དེད་གཡོག་པའི་ ལས་རོགསཔ་སྦེ་ ལཱ་འབད་མི་ཅིག་ཨིན་པའི་གནས་ཚུལ།
དབང་འདུས་ལས་ བསྟན་འཛིན་རྣམ་རྒྱལ།
No comments:
Post a Comment