 |
| རབས་ཆད་ནིའི་ ཉེན་ཁ་ཡོད་པའི་ ཆུ་བྱ་དཀརམོ། |
དཀོན་དྲགས་ཅན་གྱི་ བྱ་དང་ཉ་ཚུ་ གློག་མེ་ལས་འགུལ་གྱི་ལཱ་འབད་ས་ དགའ་སེང་ཚོ་འོགམ་རྒེད་འོག་ལས་མར་བཅད་དང་ རྐ་མེད་ཆུ་ཡར་བཅད་ ཀི་ལོ་མི་ཊར་༤༠ དེ་ཅིག་གི་ ས་ཁོངས་ནང་ འཁྱམས་སྡོད་དོ་ཡོདཔ་ཨིན་པས།
སྤུ་ན་གཙང་ཆུ་གློག་མེ་ལས་འགུལ་༢ པའི་ རང་བཞིན་གནས་སྟངས་འགོ་དཔོན་ སངས་རྒྱས་རྡོ་རྗེ་གིས་ སླབ་མིའི་ནང་ གཙང་ཆུ་དེ་ ཆུ་དུང་ནང་བཏང་རུང་ སེམས་ཅན་དེ་ཚུ་ལུ་ གནོད་སྐྱོན་མི་རྐྱབ་ཟེར་ཨིནམ་ད་ དེ་ཡང་ གཙང་ཆུ་ནང་ ཉ་རིགས་ཚུ་ ཨ་རྟག་ག་ཨིནམ་སྦེ་ བཞག་ཐབས་ལུ་ ལས་འགུལ་གྱིས་ དངུལ་ཀྲམ་ས་ཡ་༢ དེ་ཅིག་ ཟད་འགྲོ་བཏང་ཐོག་ལས་ དབང་འདུས་ ར་སྦུག་ནང་ལུ་ ཉ་གསོ་སྐྱོང་ཁང་བཟོ་མི་དེ་ ཤུལ་ལས་ སྤུ་ན་གཙང་ཆུ་ ཆུ་དུང་ནང་གཏང་པའི་སྐབས་ གཏང་ནི་ཨིན་ཟེར་ཨིན་པས།
ཁོ་གིས་འབད་བ་ཅིན་ ཆུ་བྱ་དཀརམོ་དེ་ ཉ་ལུ་བརྟེན་སྡོད་དོ་ཡོདཔ་ལས་ ཉ་ཡོད་པ་ཅིན་ རང་བཞིན་གྱིས་ བྱ་ཚུ་ འཁྱམས་སྡོད་ཚུགས་ཟེར་ཨིནམ་ད་ ཨིན་རུང་ རྒྱལ་འཛིན་རང་བཞིན་སྲུང་སྐྱོབ་ཚོགས་སྡེའི་ ཆུ་བྱ་དཀརམོ་མཁས་མཆོག་ རི་བི་ཀ་གིས་འབད་བ་ཅིན་ གཙང་ཆུ་དེ་ ཆུ་དུང་ནང་གཏང་པའི་སྐབས་ ཉ་འཁྱམས་སའི་ ས་གོ་མེདཔ་གཏང་ནི་ཨིནམ་ལས་ ཆུ་བྱ་དཀརམོ་ལུ་ གནོད་སྐྱོན་རྐྱབ་འོང་ཟེར་ཨིན་པས།
རང་བཞིན་གནས་སྟངས་མཁས་མཆོག་ སངས་རྒྱས་རྡོ་རྗེ་གིས་འབད་བ་ཅིན་ ད་ལྟོ་ ལས་འགུལ་གྱིས་ བྱ་གསོ་སྐྱོང་གི་དོན་ལུ་ དངུལ་ཀྲམ་ས་ཡ་༢ དེ་ཅིག་ བྱིན་མི་དེ་གིས་ ལས་འགུལ་བཟོ་སྐྲུན་འབད་བའི་སྐབས་ལུ་ བྱ་ཚུ་ ཉེན་སྐྱོབ་འབད་ནིའི་དོན་ལུ་ཨིན་ཟེར་ སླབ་ཨིན་པས།
ཨིན་རུང་ རི་བི་ཀ་གིས་ སླབ་མིའི་ནང་ གཙང་ཆུའི་མཐའམ་བདའ་སྟེ་ ལྕགས་སྐུད་རཝ་གུ་ཕོག་སྟེ་ བྱ་༢ ཤི་སོ་པའི་ཁར་ གཙང་ཆུ་ནང་ལས་ བྱེམ་བཏོན་པའི་སྐབས་ ཆུ་གཏིང་ཟབ་འགྱོ་མི་དེ་གིས་ བྱ་ཚུ་ ཉ་མ་ཐོབ་པའི་དཀའ་ངལ་འདུག་ཟེར་ཨིན་པས།
དེ་ལས་ གཱོལ་ཌན་མ་ཤིར་གྱི་ཐད་ལུ་ལྷོདཔ་ད་ སངས་རྒྱས་རྡོ་རྗེ་གིས་ སླབ་མིའི་ནང་ ཉ་རིགས་དེ་ སྤུ་ན་གཙང་ཆུ་ལས་འགུལ་༢ པའི་ འཕྲུལ་ཨམ་ལས་ ཀི་ལོ་མི་ཊར་༢ དེ་ཅིག་གི་ ས་ཁོངས་མར་བཅད་ རྐྱངམ་གཅིག་འོང་ནི་ཡོདཔ་ལས་ གཙང་ཆུ་བཅད་བཞག་རུང་ གནད་སྐྱོན་མེད་ཟེར་ཨིན་པས།
ཨིན་རུང་ ཧཱ་ལུ་ཡོད་པའི་ རྒྱལ་ཡོངས་ཉ་གསོ་སྐྱོང་ལྟེ་བའི་ ལས་འགུལ་མདོ་ཆེན་ སེངྒེ་ཚེ་རིང་གིས་ སླབ་མིའི་ནང་ གཙང་ཆུ་ནང་ ཆུ་རྫིང་རྐྱབ་པའི་སྐབས་ དཀོན་དྲགས་ཅན་གྱི་ ཉ་དེ་གིས་ སྒོང་རྡོག་འབུད་སའི་ ས་གོ་མེདཔ་གཏང་འོང་ཟེར་ཨིན་པས།
བྱ་དགྭོ་གི་ཐད་ཁར་ སངས་རྒྱས་རྡོ་རྗེ་གིས་འབད་བ་ཅིན་ བཟོ་སྐྲུན་གྱི་ལཱ་ཚུ་ རང་བཞིན་གནས་སྟངས་ལུ་ ཉམས་སྐྱོན་མེད་པའི་ཐོག་ལས་ འབད་དོ་ཡོདཔ་ལས་ བྱ་འཁྱམས་སྡོད་སའི་ ཤིང་སྦོམ་ཚུ་མ་བཏོག་པར་ བཞག་ནི་དེ་གིས་ གནོད་སྐྱོང་མེད་ཟེར་ སླབ་པའི་གནས་ཚུལ།
དབང་འདུས་ལས་ བསྟན་འཛིན་རྣམ་རྒྱལ།
No comments:
Post a Comment