༉ དུས་རབས་༡༩ པའི་ དབང་འདུས་ཆོས་གླིང་ཕོ་བྲང་གི་ ཡིག་ཆ་བསྡུ་སྒྲིག་འབད་ནི་དེ་ ཨེ་ཨེཕ་སི་པི་ཟེར་མི་ ཡུ་ཨེསི་གཞུང་ཚབ་ཀྱི་ ལམ་སྲོལ་ཉམས་སྲུང་མ་དངུལ་གྱི་ གྲོགས་རམ་ཐོག་ལས་ འཕྲལ་མགྱོགས་ར་ འགོ་བཙུགས་ཚུགས་པའི་ རེ་བ་ཡོདཔ་ད་ ཡིག་ཐོག་བཀོད་ནི་དེ་ ཕོ་བྲང་ཉམས་པ་སོར་ཆུད་ཐོག་ བདག་འཛིན་འཐབ་ནི་གི་ ཐབས་ལམ་དང་པ་ཨིན་པས།
 |
| བུམ་ཐང་ལུ་ཡོད་མི་ དབང་འདུས་ཆོས་གླིང་ཕོ་བྲང་། |
དེ་ཡང་ སྤྱི་ཟླ་༡༠ པའི་ཚེས་༢༡ ལས་༢༦ ཚུན་ བདུན་ཕྲག་ཅིག་གི་རིང་ རྒྱལ་ཁབ་ནང་ ལྟ་སྐོར་ལུ་ ལྷོད་དེ་ཡོད་མི་ རྒྱ་གར་ལུ་ ཨེ་མི་རི་ཀའི་གཞུང་ཚབ་ ནཱན་སི་ཇེ་ པོ་ཝཱེལ་གྱིས་ ཡིག་ཆ་བསྡུ་སྒྲིག་ལས་འགུལ་ལག་ལེན་འཐབ་ནི་ཨིན་པའི་ གཞུང་མིན་ལས་ཚོགས་ འབྲུག་གཞི་ཚོགས་ལུ་ གྲོགས་རམ་མ་དངུལ་ ཡུ་ཨེསི་ཌོ་ལར་༩༧,༧༨༦ བྱིན་ཡོད་པའི་སྐོར་ ཁ་ཙ་ གསལ་བསྒྲགས་འབད་ཡི།
གཞུང་ཚབ་ཨམ་པོ་ཝཱེལ་གྱིས་ སླབ་མིའི་ནང་ ཨེ་ཨེཕ་སི་པི་ལས་འགུལ་དེ་ ཨེ་མི་རི་ཀ་གཞུང་དང་ མི་སེར་ཚུ་ལས་ འབྲུག་གི་ལམ་སྲོལ་བཟང་པོ་ལུ་ བརྩི་མཐོང་སྦོམ་ཡོད་པའི་ བརྡ་མཚོན་ལུ་ཨིནམ་ད་ ཡུ་ཨེསི་ཨེ་གིས་ འབྲུག་གི་ལམ་སྲོལ་མི་ཉམས་གོང་འཕེལ་གཏང་ནི་ལུ་ ཆ་རོགས་འབད་ནི་གི་ ཁས་བླངས་ཡོད་ཟེར་ སླབ་ཨིན་པས།
ད་རེས་ནངས་པ་ འཛམ་གླིང་ཉམས་ཉེན་ཆེ་བའི་ སྲོལ་ཁྱུན་ས་ཁོངས་མ་དངུལ་གྱི་ ལྟ་ལྟོག་ཐོ་བཀོད་ནང་ཚུད་ཡོད་མི་ དབང་འདུས་ཆོས་གླིང་ཕོ་བྲང་དེ་ རང་ལུགས་བཟོ་བཀོད་ཀྱི་ མིག་དཔེ་བཟུམ་ཅིག་སྦེ་ བརྩི་འཇོག་འབད་དོ་ཡོདཔ་ད་ ཕོ་བྲང་དེ་གིས་ འབྲུག་གི་བཟོ་བཀོད་གཟི་བརྗིད་ཅན་དང་ རྒྱལ་ཁབ་ཀྱི་ རྒྱལ་རབས་ལྡན་པའི་ ངོ་རྟགས་ཅིག་ཨིན་པའི་ གསལ་སྟོན་འབདཝ་ཨིན་ཟེར་ ལམ་སྲོལ་ལས་ཁུངས་ཀྱི་ ཡོངས་ཁྱབ་མདོ་ཆེན་ རྡོ་རྗེ་ཚེ་རིང་གིས་ བཤདཔ་ཨིན་པས།
ལོ་ངོ་༣ འབད་མི་ ལས་འགུལ་དེ་ གོ་རིམ་ཁག་གཉིས་སྦེ་ ལག་ལེན་འཐབ་ནི་ཨིནམ་ད་ ལས་འགུལ་དེ་གི་དོན་ལུ་ མ་དངུལ་ཡུ་ཨེསི་ཌོ་ལར་ས་ཡ་༥.༣ དེ་ཅིག་ གནས་ནི་ཨིན་པའི་ སྔོན་རྩིས་བཏོན་ཡོདཔ་ཨིན་པས།
གོ་རིམ་དང་པའི་ནང་ བརྟག་ཞིབ་དང་ ཡིག་ཐོ་བཀོད་ནི་ ཕོ་བྲང་གི་གནས་སྟངས་བརྟག་ཞིབ་འབད་ནི་ འབྲེལ་བ་ཅན་ཚུ་དང་ གྲོས་བསྟུན་འབད་ནི་ དེ་ལས་ ཉམས་གསོ་ཞུ་ནི་གི་ གྲོས་འཆར་ཚུ་ བཀོད་ནི་ཨིནམ་ད་ དེ་གི་ཤུལ་ལས་ དབང་འདུས་ཆོས་གླིང་ཕོ་བྲང་ཉམས་གསོ་ཞུ་སྟེ་ འགྲེམ་སྟོན་ཁང་ཅིག་སྦེ་ ལག་ལེན་འཐབ་ནི་ཨིན་པས།
དབང་འདུས་ཆོས་གླིང་ཕོ་བྲང་དེ་ སྤྱི་ལོ་༡༨༥༧ ལུ་ འབྲུག་རྒྱལ་ཁབ་དབང་དུ་འདུ་མི་ འཇིགས་མེད་རྣམ་རྒྱལ་གྱིས་ སྐུ་སྒེར་ཁང་བཟང་སྦེ་ བཞེངས་ཡོདཔ་བཞིན་དུ་ འབྲུག་བརྒྱུད་འཛིན་གྱི་ རྒྱལཔོ་དང་པ་ གོང་ས་ཨྱོན་དབང་ཕྱུག་མཆོག་ ཕོ་བྲང་དེ་ནང་ སྐུ་འཁྲུངས་ཡོདཔ་ལས་ ཕོ་བྲང་དེ་ རྒྱལ་རབས་ཅན་ཅིག་ཨིན་པའི་གནས་ཚུལ།
རིག་འཛིན་དབང་ཕྱུག།
No comments:
Post a Comment