དེ་ནང་ འབྲུག་ལས་ ཡོངས་གྲགས་ཅན་གྱི་ གློག་བརྙན་གྱི་འཁྲབ་རྩེདཔ་ ཀརྨ་བདེ་སྐྱིད་དང་ ལྷ་སྐྱིད་སྒྲོལ་མ་ གནམ་མཁའ་ལྷམོ་ཚུ་གིས་གཙོས་པའི་ ཨམ་སྲུ་སྡེ་ཚན་ཅིག་གིས་ འབྲུག་གི་ངོ་ཚབ་སྦེ་ ལས་རིམ་ནང་བཅའ་མར་གཏོགས་དོ་ཡོདཔ་ཨིན་པས།
ལྷོ་ཨེ་ཤི་ཡན་གྱི་ རྒྱལ་ཁབ་ཚུ་ནང་ཡོད་པའི་ གློག་བརྙན་བཟོ་སྐྲུན་ཁང་གི་ ངོ་ཚབ་དང་ འཐུས་མི་ཚུ་གིས་ཡང་ དུས་སྟོན་ནང་ བཅའ་མར་གཏོགསཔ་ཨིན་པས།
དུས་ཅི་གི་ དུས་སྟོན་སྐབས་ ཧེ་མ་བཟུམ་སྦེ་ འབྲུག་གི་གློག་བརྙན་ཚུ་ འགྲེམ་སྟོན་མི་འབད་ནི་ཨིན་རུང་ ཁོང་བཅའ་མར་གཏོགས་མི་ཚུ་གིས་སྦེ་ རང་ལུགས་ཀྱི་ཞབས་ཁྲ་དག་པ་ཅིག་ སྤྱན་འབུལ་འབད་ནི་ཨིན་ཟེར་ཨིན་པས།
ལས་རིམ་ནང་ བཅའ་མར་གཏོགས་མི་ཚུ་གིས་ ལྷོ་ཨེ་ཤི་ཡན་རྒྱལ་ཁབ་༨ ཀྱི་ ངོ་ཚབ་ཚུ་དང་གཅིག་ཁར་ གྲོས་འཛོམས་དང་ ཞལ་འཛོམས་ཚུ་ནང་ བཅའ་མར་གཏོགས་ནི་དང་ བསམ་འཆར་བརྗེ་སོར་འབད་ནི་ དེ་ལས་ ཕན་ཚུན་འབྲེལ་བ་འཐབ་ནིའི་ གོ་སྐབས་ཡང་ཐོབ་ཚུགས་ཟེར་ འབྲུག་གློག་བརྙན་ཚོགས་པའི་ ཡོངས་ཁྱབ་དྲུང་ཆེན་ ཤེས་རབ་རྒྱལ་མཚན་གྱིས་ བཤདཔ་ཨིན་པས།
འབྲུག་གིས་ རྒྱ་གར་གཱོ་བ་ལུ་ ལྷོ་ཨེ་ཤི་ཡན་ལུང་ཕྱོགས་ཀྱི་ གློག་བརྙན་དུས་སྟོན་ནང་ བཅའ་མར་གཏོགས་ཏེ་ རང་ལུགས་ཀྱི་ལམ་སྲོལ་དང་ ཞབས་ཁྲ་ཚུ་ གཞན་རྒྱལ་ཁབ་ཚུ་ལུ་ སྤྱན་འབུལ་འབད་ནི་དེ་ ད་རིས་འབདཝ་ད་ ལོ་༣ འགྱོཝ་ཨིན་པས།
ཡོངས་ཁྱབ་དྲུང་ཆེན་ ཤེས་རབ་རྒྱལ་མཚན་གྱིས་ འབད་བ་ཅིན་ ལུང་ཕྱོགས་ཀྱི་ དུས་སྟོན་ཚུ་ནང་ བཅའ་མར་གཏོགས་དགོ་པའི་ དམིགས་ཡུལ་གཙོ་བོ་ར་ ང་བཅས་རའི་ལམ་སྲོལ་ཚུ་ ཕྱི་རྒྱལ་ཁབ་ཚུ་ལུ་ ངོ་སྤྲོད་དང་ གསལ་སྟོན་འབད་དེ་ ཡར་དྲག་གཏང་ནི་དང་ གཞན་རྒྱལ་ཁབ་ཀྱི་ གློག་བརྙན་བཟོ་མི་ཚུ་དང་གཅིག་ཁར་ མཐུན་ལམ་ཡར་དྲག་གི་དོན་ལུ་ ཨིན་ཟེར་ཨིན་པས།
དུས་སྟོན་དེ་ ལྷོ་ཨེ་ཤི་ཡ་གཞི་ཚོགས་ཀྱིས་ རྒྱ་གར་གཱོ་བ་གི་ མི་སྡེའི་སྤྲོ་སྟོན་ལས་རིམ་དང་ མཉམ་རུབ་ཐོག་ལུ་ འགོ་འདྲེན་འཐབ་ཡོདཔ་ཨིན་པས།
ཉིནམ་༢ ཀྱི་རིང་ལུ་འགོ་འདྲེན་འཐབ་མི་ ལྷོ་ཨེ་ཤི་ཡན་གློག་བརྙན་དུས་སྟོན་དེ་ ད་རིས་མཇུག་བསྡུ་ནི་ཨིན་པའི་གནས་ཚུལ།
ནོར་འཛིན་ལྷ་མོ།
No comments:
Post a Comment