ཉི་མ་དབང་འདུས།
༉
བསྟན་རྒྱས་ལྷན་ཁག་གིས་
ཁ་ཙ་ལས་ རྒྱལ་ཁབ་ཀྱི་
ནང་འདྲེན་ལས་ཁང་དང་
ཚོང་འབྲེལ་ལས་སྡེ་ དེ་ལས་
བཟོ་སྐྲུན་དང་ ཞབས་ཏོག་ལས་སྡེ་ཚུ་ཚུད་མི་
ཚོང་འབྲེལ་ལས་ཚོགས་ཚུ་ལུ་
མཁོ་གལ་ཅན་མེན་པའི་
ཅ་ཆས་ནང་འདྲེན་འབད་ནིའི་
ཆོག་ཐམ་སྤྲོད་ནི་ཚུ་
མཚམས་འཇོག་འབད་ཡོདཔ་ཨིན་པས།
ཨིན་རུང་
དགོས་མཁོ་ཆེ་བའི་ཅ་ཆས་
བཟའ་འཐུང་གི་རིགས་དང་
ཨོམ་གྱི་ཐོན་སྐྱེད་ སྨན་རིགས་དང་
སྨན་བཅོས་ཅ་ཆས་ དེ་ལས་
གོང་ཅན་དང་ བདེ་ཉམས་ཅན་གྱི་
གྱོན་ཆས་ཚུ་མེན་པའི་
གྱོན་ཆས་ཀྱི་རིགས་ཚུ་
ནང་འདྲེན་འབད་ཆོག་ནི་ཨིན་པས།
བསྟན་རྒྱས་ལྷན་ཁག་གི་
ཐོ་དང་འཁྲིལཝ་ད་ ཁྱིམ་ནང་མཁོ་གལ་ཆེ་བའི་
ཐབ་ཚང་ནང་ ལག་ལེན་འཐབ་མི་
གྱི་ཅུང་གི་རིགས་ དང་
གློག་ཆས་ཀུ་ཀར་
བཞེས་སྒོ་དྲོད་བཏགས་འཕྲུལ་ཆས་
ཨོ་བཱན་ཊཱོསི་ཊར་ དེ་ལས་
བརྒྱུད་འཕྲིན་ཚུ་
ནང་འདྲེན་འབད་ཆོག་ནི་ཨིན་རུང་
ཁྱིམ་གྱི་ནང་ཆས་གཞན་ཚུ་
ནང་འདྲེན་འབད་ནི་
བཀག་འཛིན་འབད་ཡོདཔ་ཨིན་པས།
དེ་བཟུམ་སྦེ་
བཟོ་གྲྭ་ཁང་ཚུ་གིས་ གནང་བ་ཡོད་པའི་
བཟོ་གྲྭའི་ཅ་ཆས་དང་
བཟོ་སྐྲུན་ལས་སྡེའི་ཅ་ཆས་
སློབ་གྲྭའི་ཅ་ཆས་ དེ་ལས་
མི་མང་སྐྱེལ་འདྲེན་གྱི་དོན་ལུ་
སྣུམ་འཁོར་དང་ གཞན་སྣུམ་འཁོར་རིགས་ཀྱི་
ཡན་ལག་ཅ་ཆས་ཚུ་རྐྱངམ་གཅིག་
ནང་འདྲེན་འབད་ཆོག་ནི་ཨིན་པས།
དེ་བཟུམ་མའི་
བཀག་ཆ་འབད་མི་དེ་ཡང་ གཙོ་བོ་ར་
རྒྱལ་ཁབ་ནང་ རྒྱ་གར་གྱི་ཏི་རུ་
རུ་པི་མ་ལང་པའི་
དཀའ་ངལ་ལུ་བརྟེན་ཏེ་ཨིནམ་ད་
ད་ལྟོ་ བཀག་ཆ་འབད་མི་ ཅ་ཆས་ཚུ་
ལོག་སྟེ་ནང་འདྲེན་འབད་ཆོག་པའི་
གསལ་བསྒྲགས་མ་འབད་ཚུན་ཚོད་
ནང་འདྲེན་དང་ འབྲེལ་ཡོད་ལས་སྡེ་གཞན་ཚུ་གིས་
མཉམ་འབྲེལ་འབད་དགོ་ཟེར་
བསྟན་རྒྱས་ལྷན་ཁག་གི་
ཚོང་འབྲེལ་འགོ་དཔོན་ཅིག་གིས་
སླབ་ཨིན་པས།
ནང་འདྲེན་འགོ་དཔོན་ཅིག་གིས་འབད་བ་ཅིན་
མཁོ་གལ་མ་ཆེ་བའི་ཅ་ཆས་
ནང་འདྲེན་འབད་ནི་དེ་
དུས་ཡུན་དེམ་ཅིག་གི་རིང་
བཀག་ཆ་འབདཝ་ཨིན་ཟེར་བའི་
དུས་ཚོད་ངེས་ཏིག་མེདཔ་ལས་
དུས་ནམ་ར་འབད་རུང་
ལོག་སྟེ་ནང་འདྲེན་འབད་ཆོགཔ་
བཟོ་ནི་གི་ འོས་འབབ་ཡོད་ཟེར་ཨིན་པས།
ཨིན་རུང་
ད་ལྟོའི་ གནས་སྟངས་དང་འཁྲིལ་བ་ཅིན་
བཀག་ཆ་དེ་ ལོ་༡ དེ་ཅིག་གི་རིང་
ལག་ལེན་འཐབ་ནི་བཟུམ་ཅིག་ཡོད་ཟེར་
འགོ་དཔོན་དེ་གིས་ སླབ་ཡོདཔ་ད་
འབྲུག་གིས་ ཅ་ཆས་རིགས་མ་འདྲཝ་༥,༣༠༠
དེ་ཅིག་ ནང་འདྲེན་འབད་དོ་ཡོདཔ་ཨིན་པས།
རྒྱ་ནག་ལས་
གྱོན་ཆས་ཚུ་ ནང་འདྲེན་འབད་མི་
བཙན་སྐྱོགས་ཀྱིས་འབད་བ་ཅིན་
ད་རེས་སྐབས་ཅིག་ ཧེ་མ་ལས་
ནང་འདྲེན་འབད་ཡོད་པའི་
ཚོང་ཟོག་ཚུ་གིས་ དུས་ཡུན་ཧ་ལམ་ཅིག་
གནས་ཚུགས་ནི་ཨིན་རུང་ གལ་སྲིད་
བཀག་ཆ་དེ་ ཡུན་རིངམོ་སྦེ་ར་ལུས་པ་ཅིན་
ནང་འདྲེན་འབད་མི་ཚུ་ལུ་
དཀའ་ངལ་འཐོན་འོང་ཟེར་ཨིན་པའི་གནས་ཚུལ།
No comments:
Post a Comment