བསམ་གཏན་ཡེ་ཤེས།
༉ རྒྱལ་ཁབ་ནང་ རུ་པིའི་ དཀའ་ངལ་ལུ་བརྟེན་ སྣུམ་འཁོར་གྱི་ ཚོང་འབྲེལ་འཐབ་མི་ཚུ་ ཚ་གྱང་ལང་དོ་ཡོདཔ་ཨིན་རུང་ ལག་ལེན་འཐབ་མི་ སྣུམ་འཁོར་རྙིངམ་ཚུ་ ཚོང་སྒྱུར་འཐབ་མི་ ལས་སྡེ་ཚུ་ལུ་ ཚོང་འབྲེལ་གྱི་ གོ་སྐབས་ལེགས་ཤོམ་བྱུང་དོ་ཡོདཔ་ཨིན་པས།
དེ་ཡང་ རྒྱལ་གཞུང་དངུལ་ལས་དབང་འཛིན་གྱིས་ རྒྱ་གར་ལས་ སྒེར་འཁོར་ཚུ་ ནང་འདྲེན་འཐབ་ནི་ཚུ་ བཀག་ཆ་འབད་བའི་ཤུལ་ལས་ སྣུམ་འཁོར་རྙིངམ་ཚུ་ ཉོ་བཙོང་འཐབ་མི་ ཀརྨ་གི་ ཚོང་འབྲེལ་དེ་ ལེགས་ཤོམ་འགྱོ་དོ་ཡོདཔ་ཨིན་པས།
ཁོ་གིས་ སླབ་མིའི་ནང་ ཧེ་མ་འབད་བ་ཅིན་ བདུན་ཕྲག་རེ་ནང་ སྣུམ་འཁོར་༢ དེ་ཅིག་ལས་ བཙོང་མ་ཚུགསཔ་ཨིན་རུང་ གཞུང་གིས་ རུ་པི་གི་ དཀའ་ངལ་སེལ་ཐབས་ལུ་ ཐབས་ལམ་ཚུ་ ལག་ལེན་འཐབ་པའི་ཤུལ་ལས་ ཉིནམ་རེ་ནང་ སྣུམ་འཁོར་༢ དེ་རེ་བཙོང་ཚུགས་པས་ཟེར་ཨིན་པས།
ཁོ་གིས་ སླབ་མིའི་ནང་ མི་གཞན་གྱིས་ ལག་ལེན་འཐབ་མི་ སྣུམ་འཁོར་རྙིངམ་ཚུ་ བཙོང་མི་ཐོནམ་ད་ ཉོ་ཞིནམ་ལས་ བཅོ་ཁ་རྐྱབ་སྟེ་ ད་རུང་ མཁོ་འདོད་བཀོད་མི་ཚུ་ལུ་ བཙོངམ་ཨིན་ཟེར་ཨིན་པས།
ཀརྨ་གིས་ སྤྱི་ཟླ་༨ པའི་ཧེ་མར་ སྣུམ་འཁོར་ནང་འདྲེན་གྱི་ བཀག་ཆ་མེད་པའི་རིང་ལུ་ ཟླཝ་རེ་ནང་ མཐོ་ཤོས་སྣུམ་འཁོར་༡༥ རེ་མ་གཏོགས་ བཙོང་མ་ཚུགསཔ་ཨིན་རུང་ ད་རེས་འབདཝ་ད་ བདུན་ཕྲག་རེ་ནང་ ཆ་སྙོམས་ལུ་ སྣུམ་འཁོར་༨ དེ་རེ་ བཙོང་ཚུགས་མི་ལུ་བརྟེན་ ཁེ་སང་བཟོ་ཚུགས་པས་ཟེར་ཨིན་པས།
ཁོ་གིས་སླབ་མིའི་ནང་ ད་རེས་ཀྱི་ གནས་སྟངས་ནང་ ཚོང་མགྲོན་པ་ཚུ་གིས་ ཧེ་མ་བཟུམ་སྦེ་ གོང་ཚད་ཕབ་ཆག་འབད་དགོ་པའི་ ཨུ་ཚུགས་མི་རྐྱབ་པས་ཟེར་ཨིན་པས།
ད་རེས་ཁམས་ཅིག་ཁར་ སྣུམ་འཁོར་རྙིངམ་ཚུ་ལུ་ མཁོ་འདོད་བཀོད་མི་ ཡར་སེང་སོང་མི་དེ་ཡང་ ཁྲོམ་ཁར་སྡོད་མི་ཚུ་ལུ་ སྣུམ་འཁོར་གྱི་ལག་ལེན་དེ་ མེད་ཐབས་མེདཔ་ཅིག་ཨིན་པའི་ཁར་ རྒྱལ་གཞུང་དངུལ་ལས་དབང་འཛིན་གྱིས་ སྣུམ་འཁོར་ནང་འདྲེན་ བཀག་ཆ་འབད་མི་ལུ་བརྟེན་ཏེ་ ཨིན་མས་ཟེར་བཤད་ཅི།
ཀརྨ་གིས་ སླབ་མིའི་ནང་ མཁོ་སྒྲུབ་འབད་བཞག་མི་ སྣུམ་འཁོར་རྙིངམ་ཚུ་ མང་ཤོས་ར་ བཙོང་ཚར་ཡི་ཟེར་ཨིན་པས།
དེ་བཟུམ་སྦེ་ འཇིགས་མེད་དབང་ཕྱུག་གིས་ཡང་ དེ་བཟུམ་མའི་ སྣུམ་འཁོར་ཚུ་ ཉོ་བཙོང་གི་ ཚོང་འབྲེལ་འཐབ་དོ་ཡོདཔ་ད་ ཁོ་གིས་འབད་བ་ཅིན་ ལག་ལེན་འཐབ་མི་ སྣུམ་འཁོར་རྙིངམ་ཚུ་ ཧེ་མ་དང་ཕྱདཔ་ད་ འཇམ་ཏོང་ཏོ་འབད་ བཙོང་ཚུགས་པས་ཟེར་ཨིན་པས།
ཁོ་གིས་ ད་རེས་ནངས་པ་ བདུན་ཕྲག་རེ་ནང་ ལག་ལེན་འཐབ་མི་ སྣུམ་འཁོར་རྙིངམ་༥ དེ་རེ་ བཙོང་དོ་ཡོདཔ་ཨིན་པའི་གནས་ཚུལ།
No comments:
Post a Comment