༉ རྒྱ་གར་གྱི་ ས་མཚམས་ཁྲོམ་སྡེ་ ཇའི་སྒང་ལས་ འབྲུག་གི་དངུལ་ལོར་ རྫུས་མ་འབག་འོང་མི་ ཕོ་སྐྱེས་༢ སྤྱི་ཟླ་༣ པའི་ཚེས་༡༣ གྱི་ཕྱི་རུ་ རྩི་རང་གི་ ཁྲིམས་སྲུང་འགག་པ་གིས་ འཛིན་བཟུང་འབད་ཡོདཔ་ཨིན་པས།
སྐྱེས་ལོ་༢༢ དང་༢༨ འབད་མི་ ཕོ་སྤུན་༢ དར་དཀར་ནང་བཀྲིས་ལྡིང་རྒེད་འོག་ ཤོམ་རྡོ་ལེགས་ལས་ཨིནམ་ད་ དེ་བསྒང་ རྩི་རང་ལྕང་ལྕེ་ནང་ ཚོང་པ་ཅིག་གིས་ ཁོང་༢ ཀྱི་ལག་པར་ དངུལ་ལོར་རྫུས་མ་ཡོད་པའི་སྐོར་ལས་ སྙན་ཞུ་འབད་བའི་ཤུལ་ལུ་ འཛིན་བཟུང་འབད་ཡོདཔ་ད་ དེ་བསྒང་ ཕོ་སྤུན་༢ ཀྱིས་ སྟོང་ལོར་༡༣ བཙུགས་མི་ དངུལ་ཁུག་དེ་ བཀོག་བཏང་ཡོདཔ་སྦེ་ སླབ་པའི་ཁར་ ལྕང་ལྕེ་ནང་གི་ ཚོང་པ་ཚུ་ལས་ དངུལ་ཀྲམ་༣,༠༠༠ གྱི་ ཉོ་ཚོང་རྐྱབ་ཡོདཔ་ཨིན་པས།
ཁྲིམས་སྲུང་འགག་པ་གིས་ སླབ་མིའི་ནང་ ཁོང་༢ ཀྱིས་ དངུལ་ལོར་རྫུས་མ་ཚུ་ ལག་ལེན་འཐབ་ཐོག་ལས་ དར་དཀར་ནང་དང་ སུན་ཀོཤ་ཁྲོམ་ནང་ལས་ཡང་ ཚོང་ཟོག་ཚུ་ཉོ་སྟེ་ རྩི་རང་ལུ་ འོང་ནུག་ཟེར་ཨིན་པས།
ཁྲིམས་སྲུང་འགག་པ་གིས་ དྲི་དཔྱད་འབད་བའི་སྐབས་ དངུལ་ལོར་རྫུས་མ་ ནང་འདྲེན་འབད་མི་གཙོ་ཅན་ སྐྱེས་ལོ་༢༢ ལང་མི་ཕོ་སྐྱེས་དེ་གིས་ ཇའི་སྒང་ལས་ དངུལ་ཀྲམ་ངོ་མ་༡༩,༠༠༠ སྤྲོད་དེ་ དངུལ་ལོར་རྫུས་མ་༣༨,༠༠༠ ལེན་ཡོདཔ་སྦེ་ ཁ་བཟེད་ཡོད་པའི་གནས་ཚུལ།
No comments:
Post a Comment