 |
| སོ་ནམ་མཁས་མཆོག་གིས་ སྔོ་ཚལ་འཛུགས་སྐྱོང་གི་ཁྱིམ་ནང་ ཚོད་བསྲེའི་སོན་བཏབ་ཐངས་ཀྱི་ འགྲེམ་སྟོན་འབད་བའི་བསྒང་། |
སྔོ་ཚལ་འཛུགས་སྐྱོང་གི་ཁྱིམ་ནང་ གནམ་བྱཱ་ལུ་སྐྱེ་མི་ ཚོད་བསྲེ་བླམ་བན་ད་དང་ གོན་ཅུང་ མེ་ཏོག་ཀོ་པིའི་རིགས་ཚུ་ གནམ་དགུན་ལུ་ཡང་ སྐྱེ་བཏུབ་ནི་ཨིནམ་ད་ དེ་གི་དོན་ལུ་ ཚད་གཞི་མི་ཊར་གྲུ་བཞི་༡༠ དེ་ཅིག་འབད་མི་ སྔོ་ཚལ་འཛུགས་སྐྱོང་གི་ཁྱིམ་ནང་ ཚོད་བསྲེའི་རིགས་ ག་དེ་འབད་ འཛུགས་སྐྱོང་ འབད་ནི་ཨིན་ནིའི་སྐོར་ལས་ གོ་བ་བརྡ་སྤྲོད་ཀྱི་ལས་རིམ་དང་འབྲེལ་ འགྲེམ་སྟོན་འབད་མི་དེ་ནང་ དབང་འདུས་རྫོང་ཁག་གི་ མི་སེར་སོ་ནམ་ཚོགས་པ་༡༢ ཀྱི་ ཁྲི་འཛིན་དང་ འཐུས་མི་༢༧ དེ་ཅིག་གིས་ བཅའ་མར་གཏོགས་ཅི།
དེ་བསྒང་ སོ་ནམ་མཁས་མཆོག་ཚུ་གིས་ སོན་བཏབ་ཐངས་དང ལྕངམ་བཙུགས་ཐང་ གཡུར་མ་རྐྱབ་ཐངས་ཚུ་ སྟོན་ཡོདཔ་མ་ཚད་ འགྲེམ་སྟོན་འབད་མི་ སོ་ནམ་མཁས་མཆོག་ ཌི་ཌི་ ཆེ་ཏི་རི་གིས་ འབད་བ་ཅིན་ ཁ་ཙ་བཙུགས་མི་ སོན་དང་ལྕངམ་ཚུ་ སང་ཕོད་སྤྱི་ཟླ་༡ པ་ལས་ བསྡུ་ཚུགས་ནི་ཨིནམ་མ་ཚད་ སྔོ་ཚལ་འཛུགས་སྐྱོང་ ཁྱིམ་གྱི་ཕྱི་ཁར་ གནམ་དགུན་ལུ་སྐྱེ་མི་ ཚོད་བསྲེའི་རིགས་ཚུ་བཙུགས་ཅི།
དེ་བཟུམ་མའི་ ཐབས་ལམ་བཏོན་མི་དེ་ རྒྱལ་ཁབ་ཀྱི་ སྲིད་བྱུས་དང་འཁྲིལ་ ཕྱི་ཁ་ལས་ ཚོད་བསྲེའི་རིགས་ ནང་འདྲེན་འབད་ནི་དེ་ མཚམས་འཇོག་ཐོག་ ནང་འཁོད་ཚོད་བསྲེ་ཚུ་གིས་ གནམ་བྱཱར་དགུན་ གཉིས་ཆ་རའི་ནང་ ལང་ཚུགསཔ་བཟོ་ནིའི་དོན་ལུ་ཨིན་པས།
སོ་ནམ་ལྷན་ཁག་གི་ མཉམ་འབྲེལ་མདོ་ཆེན་ བསྟན་འཛིན་དོན་གྲུབ་ཀྱིས་འབད་བ་ཅིན་ ཚོད་བསྲེ་རྒྱ་སྦོམ་སྦེ་ འཛུགས་སྐྱོང་འབད་དགོ་པ་ཅིན་ ལཱ་འབད་ཐངས་ཀྱི་སྐོར་ལས་ གོ་བ་བརྡ་སྤྲོད་འབད་དགོཔ་ ཁག་ཆེ་ཟེར་ཨིན་པས།
ད་ལས་ཕར་ རྒྱ་སྦོམ་སྦེ་ འཛུགས་སྐྱོང་འབད་ནིའི་དོན་ལུ་ གཞུང་གིས་ ཐབས་ལམ་སྣ་ཚོགས་བཏོན་མིའི་གྲས་ལས་༡ སྔོ་ཚལ་འཛུགས་སྐྱོང་གི་ ཁྱིམ་ལག་ལེན་འཐབ་ནི་དེ་ཨིན་ཟེར་ཨིན་པས།
ཨིན་རུང་ ད་རེས་ནངས་པ་ དཀའ་ངལ་ངོ་མ་ར་ ཚོད་བསྲེ་ཚུ་ ཡུན་བརྟན་སྦེ་ བསགས་བཞག་སའི་ མཛོད་ཁང་དང་ བཙོང་སའི་ས་གནས་ དེ་ལས་ སྐྱེལ་འདྲེན་གྱི་ ཞབས་ཏོག་ཚུ་ ལེགས་ཤོམ་མེདཔ་ལས་ སང་ཕོད་ལས་ ས་ཁ་མཐོ་སའི་རྫོང་ཁག་ཚུ་ལུ་ གསོག་འཇོག་མཛོད་ཁང་ཚུ་ བཀྲམ་སྤེལ་འབད་ནི་དང་ སྐྱེལ་འདྲེན་གྱི་འཐུས་ཚུ་ཡང་ གཞུང་ལས་ མར་བཅག་ཐོག་ལས་ བྱིན་འོང་ཟེར་ མཉམ་འབྲེལ་མདོ་ཆེན་གྱིས་ བཤད་ཅི།
དེ་མ་ཚད་ འཆར་གཞི་༡༡ པའི་ནང་ སོ་ནམ་ཞིང་ལམ་ཚུ་ གནམ་བྱཱར་དགུན་མེད་པར་ ལག་ལེན་འཐབ་བཏུབ་ བཟོ་ཐོག་ལས་ ཚོད་བསྲེའི་རིགས་ ག་ཅི་བཟུམ་ཨིན་རུང་ རུལ་ནི་གི་ ཚ་གྱང་མེད་པར་ བཙོང་ཚུགས་པའི་ གོ་སྐབས་ཡོད་པའི་ཁར་ ད་རེས་ནངས་པ་ རྫོང་ཁག་ལ་ལུ་ཅིག་ནང་ སའི་དབྱིབས་ ལེགས་ཤོམ་མེད་མི་ལུ་བརྟེན་ འཕྲུལ་ཆས་ཀྱི་ཐོག་ལས་ ལཱ་འབད་མ་ཚུགས་མི་ཚུ་ཡང་ འབད་ཚུགསཔ་བཟོ་ནི་ཟེར་ཨིནམ་ད་ དེ་བཟུམ་མའི་ དཀའ་ངལ་དེ་ མང་ཤོས་ར་ ཤར་ཕྱོགས་རྫོང་ཁག་ཚུ་ནང་ ཡོདཔ་ཨིན་པས།
སྤྱི་ལོ་༡༠༡༢ དང་༢༠༡༣ གྱི་ ནང་འཁོད་ལུ་ ཚོད་བསྲེའི་ཐོན་སྐྱེད་རྒྱ་བསྐྱེད་གཏང་ནིའི་དོན་ལུ་ གཞུང་གིས་ དངུལ་ཀྲམ་ས་ཡ་༢༤ དེ་ཅིག་ བགོ་བཀྲམ་འབད་ཡོད་པའི་གནས་ཚུལ།
དབང་འདུས་ལས་ བསྟན་འཛིན་རྣམ་རྒྱལ།
No comments:
Post a Comment