དེ་བཟུམ་སྦེ་ འོག་གི་འབའ་སྐྱོར་ནང་ རྒྱལ་ཡོངས་དགའ་སྐྱིད་དང་ ཕོསི་ཊར་ དེ་ལས་ བཟོ་རིག་གྲོས་བསྟུན་སྡེ་ཚན་༣ གྱི་བར་ན་ རྩེད་འགྲན་འབདཝ་ད་ རྒྱལ་ཡོངས་དགའ་སྐྱིད་སྡེ་ཚན་གྱིས་ སྐོར་ཐེངས་༡༥ འི་ནང་ སྐུགས་༥ ཆོདཔ་ད་ གཞན་མི་སྡེ་ཚན་༢ ཀྱིས་ སྐུགས་༡ ཡང་ཆོད་མ་ཚུགསཔ་ལས་ རྒྱལ་ཁ་ཐོབ་ཅི།
རྒྱལ་ཡོངས་དགའ་སྐྱིད་སྡེ་ཚན་གྱིས་ སྐོར་ཐེངས་༧ པའི་ནང་སྐུགས་ཅིག་ཆོད་པའི་ཤུལ་ལུ་ འཕྲོ་མཐུད་དེ་ར་ སྐོར་ཐེངས་༨ པ་དང་༩ པ་ དེ་ལས་ སྐོར་ཐེངས་༡༠ པ་འབདཝ་ད་ སྐོར་ཐེངས་རེ་རེའི་ནང་ སྐུགས་རེ་རེ་ཆོད་ཡོདཔ་མ་ཚད་ སྐོར་ཐེངས་༡༤ ནང་ ད་རུང་སྐུགས་ཅིག་ཆོད་ཡོད་རུང་ གཞན་མི་སྡེ་ཚན་༢ ཀྱིས་ སྐུགས་གཅིག་ཡང་ཆོད་མ་ཚུགསཔ་ཨིན་པས།
ད་ཚུན་ གཡང་འཕེལ་མདའ་རྩེད་འགྲན་བསྡུར་གྱི་ སྐོར་ཐེངས་༡༥ འི་ནང་ སྐུགས་༥ ཆོད་ཚུགས་མི་མེདཔ་མ་ཚད་ ཀོ་ཊར་ཕའི་ནཱལ་གྱི་ རྩེད་འགྲན་ནང་ བཀག་རེག་༥༤ ཕོག་མི་དེ་ ད་ཚུན་ མཐོ་ཤོས་ཅིག་ཨིན་པས།
ད་རིས་ ལྟག་གི་འབའ་སྐྱོར་ནང་ བུ་ཊཱན་ཨེསི་པེར་ཤཱན་ལྟ་བཤལ་དང་ ཡུལ་རྒྱལ་ དེ་ལས་ སྲིད་ཅེ་སྡེ་ཚན་༣ གྱི་བར་ན་ དོ་འགྲན་འབད་ནི་དང་ འོག་གི་འབའ་སྐྱོར་ནང་ སྤྱི་མཐུན་བཟོ་སྐྲུན་དང་ སྡེ་ཚན་པ་ལ་ནེཌ་ཇེམ་ དེ་ལས་ ཨ་ཏ་བོ་ནིང་སྡེ་ཚན་༣ གྱི་བར་ན་ རྩེད་འགྲན་འབད་ནི་ཨིན་པས།
ཀོ་ཊར་ཕའི་ནཱལ་གྱི་ རྩེད་འགྲན་མཇུག་དེ་ ནངས་པ་ ཨིད་ནོ་ལ་ཞོན་ ཨིཌསི་ཊལ་དང་ དཀོན་མཆོག་ཚེ་རིང་བཟོ་སྐྲུན་ དེ་ལས་ མཚམས་སྦྱར་བཟོ་སྐྲུན་སྡེ་ཚན་༣ གྱི་བར་ན་ འབད་ནི་ཨིན་པའི་གནས་ཚུལ།
བཀྲིས་ཕུན་ཚོགས།
No comments:
Post a Comment