![]() |
ས་རུད་ཆད་སར་ ཐོགས་ལུས་མི་སྣུམ་འཁོར་ཚུ། |
ས་རུད་ཆད་སའི་ ས་གནས་ དེ་ དཔལ་ལི་ལ་ལས་ ཀྲོང་གསར་ཁ་ཐུག་ལུ་ ཀི་ལོ་མི་༢ དེ་ཅིག་གི་ས་ཁར་ཨིནམ་ད་ དེ་བསྒང་ འགྲུལ་སྐྱོད་འབད་མི་ཚུ་ ཞག་ཉལ་ས་དང་ བཞེས་སྒོ་བཟའ་ས་མེད་པར་ ལམ་སེལ་མ་ཚར་ཚུན་ ས་གནས་དེ་ནང་ར་ སྡོད་དགོཔ་བྱུང་ཡོདཔ་ཨིན་པས།
ལམ་འགྲུལཔ་མང་ཤོས་ཅིག་གིས་ སླབ་མིའི་ནང་ ས་རུད་ཆད་སའི་ ས་གནས་ཀྱི་ ཉེ་འདབས་ལུ་ བཟང་ཁང་ཕུད་རྡོག་གཅིག་ཡང་ མེད་པ་ལུ་བརྟེན་ ལྟོཝ་བཀྱེས་རུང་ བྱ་ཐབས་མེད་པར་དཀའ་སྤྱད་དེ་ སྡོད་དགོཔ་བྱུང་ཡི་ཟེར་ཨིན་པས།
ཀྲོང་གསར་ལས་འོང་མི་ ལ་ལུ་ཅིག་གིས་ ས་གནས་དེ་ཁར་ལས་ རྐང་སྟོང་འབད་ ཀི་ལོ་མི་ཊར་༩ དེ་ཅིག་ལུ་ ལྕགས་ཟམ་བཟའ་ཁང་ནང་ སོང་ཡོདཔ་ཨིན་རུང་ དབང་འདུས་ལས་ ཀྲོང་གསར་ཁ་ཐུག་ལུ་འགྱོ་མི་ཚུ་ ག་ཏེ་ཡང་ འགྱོ་ཐབས་མེད་པར་ ཞག་༡ ས་གནས་དེ་ནང་ར་ ལུས་ཡོདཔ་བཞིན་དུ་ ས་གནས་དེ་ ས་ཁ་མཐོ་སར་འབད་ནི་དེ་གིས་ ནུབ་གཅིག་ར་ ཞག་ཉལ་མ་ཚུགས་པའི་ དཀའ་སྡུག་བྱུང་ཡི་ཟེར་ཨིན་པས།
ས་རུད་ཆད་པའི་སྐབས་ རྡོ་དང་ ཤིང་ རག་རོ་ཚུ་གིས་ གཞུང་ལམ་ཁར་ སྤུངས་ཡོདཔ་ལས་ ལམ་སེལ་མི་ འཕྲུལ་གླང་ཌོ་ཟར་གྱིས་ ཁ་ཉིནམ་ ནུབ་མོའི་ཆུ་ཚོད་༡༡ དེ་ཅིག་ལས་ ལམ་བསལ་ནི་ འགོ་བཙུགས་ཡོད་རུང་ ཁ་ཙ་ཕྱི་རུ་ལས་བརྒལ་ སྣུམ་འཁོར་ཚུ་ འགྲོ་འགྲུལ་འབད་མ་ཚུགས།
ད་ལྟོ་ ཧ་ལམ་ཅིག་ལས་བརྒལ་ བསལ་མ་ཚུགས་རུང་ སྣུམ་འཁོར་བརྒྱུད་འབྲེལ་འབད་ནི་ འགོ་བཙུགས་ཡོདཔ་ད་ ལམ་སེལ་གྱི་ལཱ་འགོ་འདྲེན་འཐབ་མི་ ཁར་ཀ་གིས་ སླབ་མིའི་ནང་ ཆརཔ་མ་རྐྱབ་པ་ཅིན་ ལམ་བསལ་ནིའི་ལཱ་དེ་ ཉིནམ་༢ ཀྱི་ ནང་འཁོད་ལུ་མཇུག་བསྡུ་ཚུགས་པའི་ རེ་བ་ཡོད་ཟེར་ཨིནམ་ད་ གལ་སྲིད་ ཆརཔ་རྐྱབ་པ་ཅིན་ ད་རུང་ ཆད་ནིའི་ཉེན་ཁ་འདུག་ཟེར་ཨིན་པས།
ས་གནས་ནང་ ཐོགས་ལུས་མི་ སྣུམ་འཁོར་ཚུ་ མང་ཤོས་ར་ མང་སྡེ་ཆུ་གློག་མེ་ལས་འགུལ་གྱི་ དོས་སྐྱེལ་འདྲེན་འབད་མི་ སྣུམ་འཁོར་ཊཱག་ཚུ་ཨིནམ་ད་ དེའི་གྲས་ཁར་ ཕུན་ཚོགས་གླིང་ལས་ བུམ་ཐང་ལུ་འགྱོ་མི་ འགྲུལ་སྐྱེལ་བཱསི་ཅིག་ཡང་ ཡོདཔ་ཨིན་པས།
ལམ་འགྲུལ་པ་ མགོནམ་ཚེ་རིང་གིས་ སླབ་མིའི་ནང་ ས་རུད་ཆད་པའི་སྐབས་ དེ་འཕྲོ་ལས་ ལམ་བསལ་མི་ཚུ་ ལྷོད་པ་ཅིན་ ལམ་འགྲུལ་འབད་མི་ཚུ་ལུ་ དཀའ་ངལ་མི་བྱུང་ནི་མས་ཟེར་ཨིནམ་ད་ གནམ་བྱཱར་གྱི་དུས་ཚོད་ལུ་ ས་གནས་མང་ཤོས་ཅིག་ནང་ ས་རུད་ཆད་དེ་ འཁོར་ལམ་ཚུ་བསུབས་པའི་ དཀའ་ངལ་དེ་ ལམ་སེལ་མི་ དབང་འཛིན་ཚུ་གིས་ ཧ་གོ་མི་ལུ་བརྟེན་ ཧེ་མ་ལས་ གྲ་སྒྲིག་འབད་དགོཔ་དེ་ གལ་ཆེ་བས་ཟེར་ཨིན་པས།
གཞུང་ལམ་དེ་ དེ་ཚེ་ ཕྱི་རུའི་ཆུ་ཚོད་༢ དང་༣ དེ་ཅིག་གི་བར་ན་ ཆརཔ་ཤུགས་འབད་རྐྱབ་མི་ལུ་བརྟེན་ ཆད་ཡོདཔ་ད་ ལམ་སེལ་འགོ་དཔོན་ཚུ་གིས་འབད་བ་ཅིན་ ཆརཔ་དུམ་གྲ་རེ་རྐྱབ་ད་ ས་གནས་དེ་ཁར་ ས་རུད་ཆད་ནི་མེད་ཟེར་ སླབ་ཨིན་པའི་གནས་ཚུལ།
དབང་འདུས་ལས་ བསྟན་འཛིན་རྣམ་རྒྱལ།
No comments:
Post a Comment