དེ་ཡང་ དྲོ་པའི་ཆུ་ཚོད་༦ ལས་ ཕྱི་རུའི་ཆུ་ཚོད་༦ ཚུན་ སྤྱན་རས་གཟིགས་ཀྱི་སྒྲུབ་ཆེན་དང་ མ་ཎི་དུང་སྒྲུབ་བསག་དོ་ཡོདཔ་ཨིན་པས།
བདེ་ཆེན་ཕོ་བྲང་དགེ་འདུན་སློབ་གྲྭའི་དབུ་འཛིན་ དཀོན་མཆོག་ཚེ་རིང་གིས་ སླབ་མི་དང་འཁྲིལཝ་ད་ ལོ་བསྟར་བཞིན་དུ་ སློབ་གྲྭ་ནང་ མ་ཎི་དུང་སྒྲུབ་བསག་ནིའི་སྲོལ་ཡོད་རུང་ སྤྱན་རས་གཟིགས་ཀྱི་ སྒྲུབ་ཆེན་དེ་ ད་ཚུན་ གནང་ནི་མེད་ཟེར་ཨིནམ་ད་ དུས་ཅི་ལས་འགོ་བཙུགས་ཏེ་ ཐིམ་ཕུ་རྫོང་ཁག་ནང་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ ཐུགས་ཀྱི་དགོངས་བཞེད་གནང་མི་དང་འཁྲིལ་ཏེ་ སྤྱན་རས་གཟིགས་ཀྱི་ སྒྲུབ་ཆེན་གནང་ནིའི་སྲོལ་ འགོ་བཙུགས་ཡི་ཟེར་ཨིན་པས།
མ་ཎི་དུང་སྒྲུབ་བསག་ནིའི་ལས་རིམ་དེ་ བདེ་ཆེན་ཕོ་བྲང་སློབ་གྲྭ་ནང་སྦེ་ འགོ་འདྲེན་འཐབ་སྟེ་ ལོ་༦ ལང་ཡོདཔ་ད་ ཧེ་མ་ གཞུང་གྲྭ་ཚང་གིས་ ལྕང་སྒང་ཁའི་ ལྷ་ཁང་ནང་སྦེ་ འགོ་འདྲེན་འཐབ་ནུག་ཟེར་ དབུ་འཛིན་གྱིས་ སླབ་ཨིན་པས།
ལོ་བསྟར་བཞིན་དུ་ མ་ཎི་དུང་སྒྲུབ་བསག་ནིའི་ལས་རིམ་དེ་ ཚོགས་དཔོན་བགྲེསཔ་ དྲག་ཤོས་ཨོ་རྒྱན་རྡོ་རྗེ་གིས་གཙོས་པའི་ ཚོགས་པའི་སྦྱིན་བདག་༥ གིས་ མ་དངུལ་གྱི་ གྲོགས་རམ་འབད་ཐོག་ལས་ གཞུང་གྲྭ་ཚང་གིས་ འགོ་འདྲེན་འཐབ་དོ་ཡོདཔ་ཨིན་པས།
སློབ་གྲྭའི་དབུ་འཛིན་འོགམ་ རྡོ་རྗེ་གིས་ སླབ་མའི་ནང་ མ་ཎི་དུང་སྒྲུབ་བསག་ནི་དང་ སྤྱན་རས་གཟིགས་ཀྱི་སྒྲུབ་ཆེན་གནང་དགོ་པའི་ དམིགས་ཡུལ་དེ་ རང་གསོན་པོ་སྦེ་ སྡོད་པའི་སྐབས་ལུ་ ནད་མུག་འཁྲུག་རྩོད་དང་ ཕྱི་ནང་གསང་༣ གྱི་ གདོན་བགེགས་བར་ཆད་ཚུ་ ག་ར་ཞི་སྟེ་ མཐུན་རྐྱེན་བསམ་དོན་ཡིད་བཞིན་དུ་ འགྲུབ་ཚུགས་ནིའི་དོན་ལུ་ རང་ཤི་བའི་སྐབས་དང་ གཞན་གཤིན་པོའི་དོན་ལུ་ ཚེ་རབས་ནས་ ཚེ་རབས་ཀྱི་བར་དུ་བསགས་པའི་ སྡིག་སྒྲིབ་ཚུ་དག་སྟེ་ ངན་སོང་གི་ སྡུག་བསྔལ་ལས་འགྲོལ་ཏེ་ མཐོ་རིས་དང་ཐར་པའི་ བདེ་བ་འཐོབ་པའི་དོན་ལུ་ ཨིན་ཟེར་ཨིན་པས།
དུས་ཅི་ལས་ དམིགས་བསལ་དུ་ འཕགས་པ་སྤྱན་རས་གཟིགས་ཀྱི་ སྒྲུབ་ཆེན་གནང་དགོ་མི་དེ་ དུས་ཀྱི་འགྱུར་བ་བསྟུན་ རྒྱལ་ཁབ་ནང་ འབྱུང་བ་བཞིའི་རྐྱེན་ངན་ཚུ་ བཟློག་ཐབས་ཀྱི་དོན་ལུ་ཨིན་ཟེར་ཨིན་པས།
སྤྱི་ལོ་༢༠༡༡ ལུ་ མ་ཎི་དུང་སྒྲུབ་ཀྱི་དོན་ལས་ ཟད་འགྲོ་དངུལ་ཀྲམ་འབུམ་༡༡ ལྷགཔ་ཅིག་ གནས་ཡོདཔ་ཨིན་པས།
མ་ཎི་དུང་སྒྲུབ་ནང་ གཞུང་གྲྭ་ཚང་གི་ སློབ་དཔོན་༤ གིས་ སྐོར་རྒྱབ་ཐོག་ལས་ གཙོ་བཞུགས་གནང་དོ་ཡོདཔ་ཨིན་པས།
བདུན་ཕྲག་༡ གི་རིང་ བསག་ནི་ཨིན་མི་ མ་ཎི་དུང་སྒྲུབ་དེ་ སྤྱི་ཟླ་༧ པའི་ཚེས་༣༡ ལུ་ འགྲོལ་ནི་ཨིན་པའི་གནས་ཚུལ།
བཀྲིས་ཕུན་ཚོགས།
No comments:
Post a Comment