དེ་ཡང་ སྐྱེས་ལོ་༢༦ ལང་མི་ ཉེས་ཅན་ཚེ་རིང་རྡོ་རྗེ་གིས་ དམངས་བསྡོམས་དབང་བཙོང་ལུས་འབྲེལ་འབད་བའི་ཁར་ གཉེན་རྐྱབ་མི་ ཨམ་སྲུ་ལུ་ དབང་བཙོང་ལུས་འབྲེལ་དང་ འཐབ་འཛིང་ དང་བླངས་རྟོགས་མེད་གདོང་ཐུག་ དེ་ལས་ འཕྲོག་བཅོམ་ཚུ་འབད་མི་ལུ་བརྟེན་ ཁོ་ལུ་ བཙོན་ཁྲིམས་ལོ་ངོ་༤༥ དང་ཟླཝ་༣ བཀལ་ཡོདཔ་ཨིན་པས།
དེ་ལས་ སྐྱེས་ལོ་༢༣ ལང་མི་ ཉེས་ཅན་མགོན་པོ་རྡོ་རྗེ་ལུ་ དམངས་བསྡོམས་དབང་བཙོང་ལུས་འབྲེལ་དང་ འཕྲོག་བཅོམ་ དེ་ལས་ འཐབ་འཛིང་འབད་མི་ལུ་བརྟེན་ ཁོ་ལུ་ བཙོན་ཁྲིམས་ལོ་ངོ་༡༧ དང་ ཟླཝ་༣ བཀལ་ཡོདཔ་ཨིན་པས།
ཁོང་༢ ཀྱིས་ ཉེས་ལས་ཚུ་ག་ར་ ཉིན་གྲངས་༡༩ གི་ ནང་འཁོད་ལུ་ འབད་ཡོདཔ་ད་ འགོ་དང་པ་ར་ ཐིམ་ཕུ་ཨོ་ལ་ཁ་ལུ་ སྐྱེས་ལོ་༢༤ དང་༢༥ ལང་མི་ ཨམ་སྲུ་༢ ལུ་ དབང་བཙོང་ཐོག་ལས་ ལུས་འབྲེལ་འབད་ཡོདཔ་ཨིན་པས།
དེ་ལས་ སྐྱེས་ལོ་༢༡ ལང་མི་ ཨམ་སྲུ་ཅིག་ལུ་ དབང་བཙོང་ལུས་འབྲེལ་འབད་ནིའི་ དཔའ་བཅམ་ད་ ཨམ་སྲུ་དེ་གིས་ གདོང་རྒོལ་འབད་མི་ལུ་བརྟེན་ མོ་ལུ་ བརྡུང་རྫོབ་འབད་ཡོདཔ་ཨིན་པས།
དེ་བཟུམ་སྦེ་ ཁོང་༢ ཀྱིས་ ཁྲིམས་འགལ་བྱ་ངན་ མང་རབས་ཅིག་ འབད་ཡོདཔ་ཨིན་རུང་ ལ་ལུ་ཅིག་ ཁྲིམས་སྲུང་འགག་པ་ལུ་ སྙན་ཞུ་མ་ལྷོདཔ་ལས་ དེ་སྦེ་ར་ ལུས་ཡོདཔ་ཨིན་པས།
ཉེས་ཅན་༢ པོ་དེ་གིས་ གནམ་ཕྱི་རུ་ ཨམ་སྲུ་ཚུ་ལུ་ དབང་བཙོང་ལུས་འབྲེལ་འབད་ཡོདཔ་མ་ཚད་ ཨམ་སྲུ་ལ་ལུ་ཅིག་ལས་ ཅ་ཆས་ཚུ་ཡང་ འཕྲོག་བཅོམ་འབད་བའི་ཁར་ ཉན་མ་བཏུབ་མི་ཚུ་ལུ་ བརྡུང་རྫོབ་ཡང་ འབད་ཡོདཔ་ཨིན་པས།
བཙོན་ཁྲིམས་ཕོག་མི་ དམག་མི་བགྲེསཔ་༢ ཀྱིས་ འཁྲུན་ཆོད་ལུ་ བསམ་པ་མ་རྫོགས་པ་ཅིན་ ཆེ་མཐོའི་ཁྲིམས་འདུན་ལུ་ མཐོ་གཏུགས་འབད་ནིའི་དོན་ལས་ ཉིན་གྲངས་༡༠ ཡོདཔ་ཨིན་པའི་གནས་ཚུལ།
ཡེ་ཤེས་སྒྲོལ་མ།
No comments:
Post a Comment