ཟིན་བྲིས་དཔྱད་ཡིག་གི་ དགོངས་དོན་དང་འཁྲིལཝ་ད་ བཅའ་ཁྲིམས་དེ་གི་ ཁྱབ་ཚད་དེ་ འབྲུག་རྒྱལ་བརྒྱུད་རྒྱལ་ཁབ་ནང་འཁོད་དང་ ཕྱི་རྒྱལ་སྤྱིའི་ཚོངས་འབྲེལ་གྱི་སྐབས་ལུ་ཡང་ ཕན་ཚུན་ རྩ་ཕན་ཚུ་གི་བར་ན་ ནང་འགྲིགས་འཆམ་ཁ་དང་ འཁོན་པ་འདུམ་འགྲིགས་ཚུ་ ཁྲིམས་འདུན་ལུ་ བསྐྱར་མ་དགོ་པར་ དུས་ཡུན་ཐུག་ཀུ་ཅིག་ནང་ གཙུག་སྡེ་གཞི་བཙུག་འབད་མི་ལུ་བརྟེན་ བཟོ་ཚུགས་ནི་ཨིན་པས།
བསྟན་རྒྱས་བློན་པོ་མཆོག་གིས་ གསུངས་མི་དང་འཁྲིལཝ་ད་ དཔྱད་ཡིག་གི་དམིགས་ཡུལ་དང་པ་དེ་ རྩ་ཁྲིམས་ཆེན་མོའི་དགོངས་དོན་ལྟར་ སྤྱི་ཚོགས་ཀྱིས་ ཕྱོགས་རིས་མེད་པའི་ རང་དབང་ཅན་གྱི་ བདག་སྐྱོང་གི་ཁྲིམས་ཞིབ་ཚོགས་སྡེ་དང་ གདམ་ཁ་ཅན་གྱི་ འཁོན་འདུམ་ལྟེ་བ་ཚུ་ ཁྲིམས་ཀྱི་ཐོག་ལུ་ གཞི་བཙུགས་འབད་ཆོག་ཟེར་བའི་ཚིག་ ཚུད་ཡོད་ལུགས་ཚུ་ཞུ་ཡི།
གཉིས་པ་དེ་ རྒྱལ་སྤྱི་རྒྱལ་ཁབ་ཚུ་ནང་འབད་བ་ཅིན་ ཚོང་བསྒྱུར་གྱི་དོན་ལུ་ མ་རྩ་བཙུགས་ཆོག་པའི་ཁྲིམས་ཡོདཔ་ལས་ དེ་བཟུམ་ རྒྱལ་ཁབ་ནང་ཡང་ ཕྱི་རྒྱལ་གྱི་ལས་སྡེ་ཚུ་གིས་ འབྲུག་ནང་འཁོད་ལུ་ ཚོང་ལཱ་ཆེ་ཆུང་གི་སྐོར་ མ་རྩ་བཙུག་ནིའི་དོན་ལུ་ དང་འདོད་དང་སྤྲོ་བ་ཡོད་པ་ཅིན་ ཁྲིམས་ཀྱི་འདུན་སར་འཐུག་མ་དགོ་པར་ འཁོན་པ་འདུམ་འགྲིག་གི་ ཐབས་ལམ་ལུ་བརྟེན་འགྱོཝ་མས་ཟེར་ཨིན་པས།
དཔལ་འབྱོར་གོང་འཕེལ་གྱི་སྲིད་བྱུས་དང་ ཕྱི་རྒྱལ་གྱི་ མ་རྩ་གཞི་བཙུགས་ཀྱི་སྲིད་བྱུས་ཚུ་དང་འཁྲིལ་ འཁོན་འདུམ་དེ་བྱ་སྟབས་བདེ་ཏོག་ཏོ་སྦེ་ དུམ་འགྲིག་འབད་མི་གཙུག་སྡེ་ཅིག་ གཞི་བཙུགས་འབད་ནིའི་དོན་ལུ་ ཁྲིམས་ཅིག་བརྩམ་དགོཔ་དེ་ གལ་ཆེ་ཟེར་ཞུ་ཡི།
གནད་དོན་གསུམ་པ་དེ་ འབྲུག་རྒྱལ་ཁབ་ནང་ ནང་འགྲིགས་ཀྱི་ཐོག་ལས་ འཁོན་པ་འདུམ་འགྲིགས་ཀྱི་ སྲོལ་ཚུ་ སྔོན་དང་ཕུ་ལས་ར་ ལག་ལེན་འཐབ་སྲོལ་ཡོདཔ་བཞིན་དུ་ དེ་ཚུ་ ཁྲིམས་མཐུན་བཟོ་ནི་དང་ ནང་འགྲིགས་ཀྱི་དོན་ལུ་ ལམ་ལུགས་དེ་ རྩ་བརྟན་བཟོ་ནིའི་དོན་ལུ་ཨིན་ཟེར་ ཞུ་ཡི།
གཙུག་སྡེ་གཞི་བཙུགས་དེ་ རང་དབང་དང་ གཞུང་མིན་འདུས་ཚོགས་ཅིག་ཨིནམ་ལས་ བདག་སྐྱོང་གཙོ་འཛིན་ཅིག་ བསྐོ་བཞག་འབད་ནི་དང་ མི་ངོ་ཅིག་དེ་ འབྲུག་པའི་མི་སེར་ཨིནམ་པའི་གུ་ མཐོ་རིམ་ཤེས་ཚད་ཡོད་མི་ དེ་ལས་ ཉུང་ཤོས་ལོ་༡༠ གྱི་ ཉམས་མྱོང་ཡོད་མི་དགོཔ་ཨིན་པས།
ཨིན་རུང་ མོང་སྒར་གྱི་ རྒྱལ་ཡོངས་ཚོགས་སྡེའི་འཐུས་མི་གནས་བཅུ་གིས་ བདག་སྐྱོང་གཙོ་འཛིན་གྱི་ ལཱ་གི་ཉམས་མྱོང་དེ་ ཉུང་ཤོས་ལོ་༡༠ བཞག་མི་དེ་ མ་འོངས་འགན་འཁྲི་འབག་སྟེ་ ལཱ་འབད་བའི་སྐབས་ དཀའ་ངལ་མི་འབྱུང་ནིའི་དོན་ལུ་ ཕྱིར་དབྱུང་འབད་དེ་ ལོ་༡༥ བཟོ་བ་ཅིན་ལེགས་ཤོམ་འོང་ཟེར་ ཞུ་ཡོདཔ་བཞིན་དུ་ བུམ་ཐང་འཐུས་མི་ ཚེ་དབང་འགྱུར་མེད་ཀྱིས་འབད་རུང་ ལོ་༡༥ ལས་ ཡར་བཅད་བཟོ་བ་ཅིན་ འོས་འབབ་འདུག་ཟེར་ རྒྱབ་སྐྱོར་ཞུ་ཡི།
དོན་ཚན་དེ་གུ་ ཀྲོང་གསར་འཐུས་མི་ རྒྱ་གར་རྡོ་རྗེ་གིས་འབད་བ་ཅིན་ འཐུས་མི་དེ་ གཙུག་སྡེའི་ བདག་སྐྱོང་གཙོ་འཛིན་ཅིག་ཨིནམ་ལས་ ཉུང་ཤོས་ལོ་༡༠ གྱི་ ཉམས་མྱོང་དགོ་ཟེར་འཁོད་ཡོད་མི་དང་འབྲེལ་ ག་ཅི་བཟུམ་གྱི་ཉམས་མྱོང་དགོཔ་ཨིན་ན་ ཁ་གསལ་སྦེ་བཀོད་དགོཔ་འདུག་ཟེར་ཞུ་བའི་ཁར་ ཆུ་ཁའི་འཐུས་མི་ ཚེ་དབང་ལྷ་མོ་གིས་ གོང་གསལ་ཞུ་མི་ལུ་ རྒྱབ་སྐྱོར་ཚུ་ཞུ་ཡི།
ཁྲིམས་བཟོ་ཚུགས་ཆུང་ལས་ འཐུས་མི་ བཀྲིས་དབང་མོ་གིས་འབད་བ་ཅིན་ ཉམས་མྱོང་དེ་ ག་དེ་ཅིག་ར་ཡོད་རུང་ བཙག་འཐུ་གྲུབ་མི་དེ་ལུ་ ལྕོགས་གྲུབ་མེད་པ་ཅིན་ དཀའ་ངལ་སྦོམ་ཡོད་ཟེར་ ཞུ་ཡི།
ཟིན་བྲིས་དཔྱད་ཡིག་གུ་ ཚོགས་ཁང་ནང་ གྲོས་བསྡུར་ཞིབ་ཞིབ་གནང་ཞིནམ་ལས་ དོན་ཚན་ལ་ལུ་ཅིག་ ཕྱིར་བཏོན་འབད་དགོཔ་ད་ དོན་ཚན་ལ་ལུ་ཅིག་ གསར་བཀོད་འབད་དགོཔ་འཐོན་མི་ཚུ་ ད་རིས་ མཐའ་བཅད་ཀྱི་ གསུང་གྲོས་ནང་ གྲོས་ཐག་བཅད་ནི་ཨིན་པའི་གནས་ཚུལ།
བཀྲིས་ཕུན་ཚོགས།
No comments:
Post a Comment