 |
| ཚུལ་མིན་ཐོག་ལས་ དཀར་ཤིང་དྲ་མི་ཚུ་ བརྩེགས་བཞག་པའི་བསྒང་། |
དེ་ཡང་ དཀར་ཤིང་སི་ཨེཕི་ཊི་༢༣༥.༨༥ དྲ་མི་ཚུ་ དུས་ཅི་ སྤྱི་ཟླ་༤ པའི་ཚེས་༥ ལུ་ འཕྱོག་བཟུང་འབད་བའི་ཤུལ་ལས་ ནགས་ཚལ་ཡིག་ཚང་ལུ་ རྩིས་སྤྲོད་འབད་ཡོདཔ་ད་ ཁྲི་འཛིན་གྱིས་འབད་བ་ཅིན་ ཤིང་དེ་ གྲོང་སྡེ་ནགས་ཚལ་ནང་ཨིན་ཟེར་མནོ་སྟེ་ ནགས་ཚལ་འགོ་དཔོན་ལུ་ སྙན་ཞུ་མ་འབད་ཟེར་ཨིན་པས།
གྲོང་སྡེ་ནགས་ཚལ་ནང་འབད་བ་ཅིན་ ནགས་ཚལ་ལག་ལེན་དང་ བདག་འཛིན་འབད་ནིའི་ དབང་ཚད་དེ་ མི་སྡེ་ལུ་ སྤྲོད་མི་དང་འཁྲིལ་ཏེ་ ཤིང་བརྡབ་ནིའི་ དབང་ཚད་ཡོདཔ་ཨིན་པས།
ཁྲི་འཛིན་གྱིས་ དྲ་མི་ཤིང་དེ་ གཡུས་ཚན་ནང་ སློབ་གྲྭ་རྐྱབ་ནིའི་དོན་ལུ་ཨིནམ་ད་ གཡུས་ཚན་ནང་ ཤིང་མང་ཤོས་ར་ དཀར་ཤིང་ཡོད་ཟེར་ སླབ་ཨིན་པས།
ནགས་ཚལ་གླིང་འཛིན་འགོ་དཔོན་ བཙན་སྐྱོགས་དོན་གྲུབ་ཀྱིས་ སླབ་མིའི་ནང་ ཤིང་དེ་ གྲོང་སྡེ་ནགས་ཚལ་ནང་མེན་པར་ གཞུང་གི་སྲུང་སྐྱོབ་ས་ཁོངས་ནང་ ཨིནམ་ལས་བརྟེན་ ཉེས་ཆད་བཀལ་ཡི་ཟེར་ཨིནམ་ད་ ཨིན་རུང་ ལཱ་དེ་ དོན་ཅན་སྦེ་འབད་འབདཝ་མིན་པར་ ས་མཚམས་ལེགས་ཤོམ་སྦེ་ ངོས་འཛིན་འབད་མ་ཚུགསཔ་ལས་བརྟེན་ འབད་ནུག་ཟེར་ཨིན་པས།
བཙན་སྐྱོགས་དོན་གྲུབ་ཀྱིས་འབད་བ་ཅིན་ ས་མཚམས་དེ་ ལེགས་ཤོམ་སྦེ་ དབྱེ་ཞིབ་འབད་བའི་སྐབས་ གཞུང་གི་ སྲུང་སྐྱོབ་ས་ཁོངས་ནང་ ཚུདཔ་མས་ཟེར་ སླབ་ཨིན་པས།
དཀར་ཤིང་དེ་ སི་ཨེཕ་ཊི་རེ་ལུ་ གོང་ཚད་དངུལ་ཀྲམ་༢༩༡ རེ་ སླབ་དོ་ཡོདཔ་ཨིན་རུང་ གྲོང་གཡུས་ནང་ ཁྱིམ་རྐྱབ་ནི་ཨིན་པ་ཅིན་ གཞུང་གིས་ སྐྱིད་སྡུག་གི་ཐོག་ལས་ ཤིང་རྩ་བོ་རེ་ལུ་ ཁྲལ་མཐོ་ཤོས་ དངུལ་ཀྲམ་༤༠ རེ་སྦེ་ ཐོབ་དོ་ཡོདཔ་ཨིན་པས།
ནགས་ཚལ་ཡིག་ཚང་གིས་ དུས་ཅི་གི་ལོ་ནང་ ཚུལ་མིན་ཐོག་ལས་ དཀར་ཤིང་སི་ཨེཕ་ཊི་༣༠༠ དེ་ཅིག་ དྲ་ཡོད་མི་ལས་ ཉེས་ཆད་བསྡོམས་ དངུལ་ཀྲམ་འབུམ་༣ ལྷགཔ་ཅིག་ བསྡུ་ལེན་འབད་ཡོདཔ་ཨིན་པའི་གནས་ཚུལ།
དབང་འདུས་ལས་ བསྟན་འཛིན་རྣམ་རྒྱལ།
No comments:
Post a Comment