དེ་ཡང་ སྤྱི་ཟླ་༧ པའི་ཚེས་༡༩ ལུ་ འཕྱགས་འབག་མི་ སློབ་ཕྲུག་བུཚ་དེ་ སྐྱེས་ལོ་༡༥ ལང་མིའི་ཕུངམ་དེ་ ཁ་ཙ་ ཉིན་མའི་ཆུ་ཚོད་ ཕྱེད་དང་༡༢ དེ་ཅིག་ལུ་ རྒྱལ་པོའི་ཞིང་ཁྲིམས་སྲུང་འགག་པ་དང་ ཚེ་འདས་ཀྱི་ནང་མི་ དེ་ལས་ ས་གནས་ཀྱི་ ཞི་གཡོགཔ་ དེ་ལས་ མི་སེར་ཚུ་གིས་ ཆུ་ནང་ལས་ བཏོན་ཡོདཔ་ཨིན་པས།
རྐྱེན་ངན་དེ་ཡང་ སློབ་ཕྲུག་ཚུ་ ཉིན་མའི་ལྟོ་བཟའ་ཞིནམ་ལས་ སློབ་དཔོན་ཚུ་ ཞལ་འཛོམས་ཡོད་མི་ལུ་བརྟེན་ སློབ་སྟོན་མེད་པར་ རང་སོའི་ཁྱིམ་ནང་ བཏང་བའི་ཤུལ་ལུ་ ཉིན་མའི་ཆུ་ཚོད་༢.༣༠ དེ་ཅིག་ལུ་ ཀུར་རི་ཆུ་འབྲིང་རིམ་སློབ་གྲྭ་འོག་མའི་ སློབ་ཕྲུག་༦ དང་ ཕྱི་ཁ་ལས་བུཚ་༢ རྩིས་ཏེ་ བུཚ་༨ ཀུར་རི་ཆུ་ནང་ རྩལ་རྐྱབ་པར་འགྱོ་བའི་སྐབས་བྱུང་ནུག།
སློབ་གྲྭའི་དབུ་འཛིན་ པདྨ་འཕྲིན་ལས་ཀྱིས་ ཀུན་གསལ་ལུ་ འདས་པའི་བདུན་ཕྲག་ནང་ སླབ་དོ་བཟུམ་འབད་བ་ཅིན་ རྒྱལ་པོའི་ཞིང་ལུ་ དེ་བཟུམ་མའི་ རྐྱེན་ངན་དེ་ འདས་པའི་ལོ་ཚུ་ནང་ཡང་ བྱུང་ཡོདཔ་ལས་ ཆུའི་གནོད་ཉེན་ཡོད་ལུགས་ཀྱི་སྐོར་ སློབ་ཕྲུག་ཚུ་ལུ་ ཉེན་བརྡ་བྱིན་བཞིན་དུ་ཡོད་རུང་ འཕྲལ་གྱི་རྐྱེན་ངན་སྐབས་ སློབ་ཕྲུག་ཚུ་ ཉིན་མའི་ལྟོ་བཟའ་ཞིནམ་ལས་ ཁོང་རའི་ཁྱིམ་ནང་ བཏང་བའི་ཤུལ་ལུ་ བྱུང་ནུག་ཟེར་ཨིན་པས།
ཚེ་འདས་བུཚ་དེ་ མོང་སྒར་རྫོང་ཁག་བོ་རོག་གསར་རྒེད་འོག་ལས་ཨིནམ་ད་ ཚེ་འདས་ཀྱི་ ཨ་པ་དེ་ རྒྱལ་པོའི་ཞིང་འབྲིང་རིམ་སློབ་གྲྭ་གོང་མའི་ ཐབ་ཚངཔ་ཨིན་པས།
སྤྱི་ལོ་༡༩༩༨ ལས་ ད་རིས་ཚུན་ཚོད་ ཀུར་རི་ཆུ་ནང་ཐིམ་སྟེ་ མི་༨ ལུ་ ཤི་རྐྱེད་བྱུང་ཡོདཔ་ལས་ རྒྱལ་པོའི་ཞིང་ལུ་ སྡོད་མི་ཚུ་གིས་ དེ་བཟུམ་མའི་ རྐྱེན་ངན་མི་འབྱུང་ནིའི་དོན་ལུ་ རང་སོའི་ཨ་ལུ་ཚུ་ བདག་འཛིན་འབད་དགོཔ་ཨིན་ཟེར་ རྒན་ཤོས་ཅིག་གིས་ སླབ་ཨིན་པའི་གནས་ཚུལ།
མོང་སྒར་ལས་ བདེ་ཆེན་ཚེ་རིང་།
No comments:
Post a Comment