༡༥/༥/༢༠༡༢
༉ འབྲུག་རྒྱལ་ཁབ་འདི་ སཱག་རྒྱལ་ཁབ་༩ གི་གྲས་ལས་ བརྡ་བརྒྱུད་ཀྱི་ དབང་རང་ཡོད་པའི་རྒྱལ་ཁབ་ ཨང་དང་པ་ཐོན་ཡོདཔ་ད་ འབྲུག་གི་འོག་ལས་ར་ མཱལ་དིབསི་དང་ བང་ལ་དེཤ་ རྒྱ་གར་ ཨཱཕ་ག་ནིས་ཏཱན་ པ་ཀིས་ཏཱན་ དེ་ལས་ ཤྲི་ལངྐ་རྒྱལ་ཁབ་ཚུ་ཨིན་པས།
དེའི་སྐོར་ལས་ འཕྲལ་ཁམས་ཅིག་ཁར་ འཛམ་གླིང་རྒྱལ་ཁབ་༡༧༩ ནང་ བརྡ་བརྒྱུད་རང་དབང་ཡོད་མེད་ཀྱི་སྐོར་ལས་ སྙན་ཞུ་ཅིག་འབད་ནི་ནང་ འཁོད་དེ་ཡོདཔ་ད་ སྤྱིར་བཏང་འཛམ་གླིང་རྒྱལ་ཁབ་ཚུ་ལས་འབད་བ་ཅིན་ འབྲུག་གིས་ ཨང་༧༠ པ་ཐོན་མི་དེ་ སྤྱི་ལོ་༢༠༡༠ དང་ཕྱདཔ་ད་ ཨང་རིམ་༦ གིས་ མར་བབས་སོང་ཡོདཔ་ད་ ལོ་དེ་ནང་ འབྲུག་གིས་ ཨང་༦༤ པ་ ཐོན་ཡོདཔ་ཨིན་པས།
སཱག་ལུང་ཕྱོགས་ཀྱི་ རྒྱལ་ཁབ་ཚུ་ལས་འབད་བ་ཅིན་ མཱལ་དིབསི་གིས་ཨང་༧༣ པ་ཐོན་ཡོདཔ་ད་ དེའི་འོག་ལས་ བང་ལ་ཌེཤ་གིས་ཨང་༡༢༩ པ་དང་ རྒྱ་གར་གྱིས་ཨང་༡༣༡ པ་ ཨཱཕ་ག་ནིས་ཏཱན་གྱིས་༡༥༠ པ་ཀིས་ཏཱན་གྱིས་༡༥༡ དེ་ལས་ ཤྲི་ལངྐ་གིས་ཨང་༡༦༣ པ་ ཐོན་ཡོདཔ་ཨིན་པས།
འཛམ་གླིང་ནང་ བརྡ་བརྒྱུད་རང་དབང་གི་ ཨང་དང་པ་དེ་ ཕིན་ལེན་རྒྱལ་ཁབ་ཐོན་ཡོདཔ་ད་ བརྡ་བརྒྱུད་རང་དབང་མེད་མི་དེ་ ཨི་རི་ཊི་རྒྱལ་ཁབ་ཨིན་རུང་ བརྡ་བརྒྱུད་ནང་ལཱ་འབད་མིའི་ ཚེ་སྲོག་ལུ་ གནོད་ཉེན་ཡོད་པའི་རྒྱལ་ཁབ་དེ་ པ་ཀིས་ཏཱན་ཨིན་པས།
ད་རུང་ ཨེ་མི་རི་ཀའི་གཞུང་མིན་ཚོགས་པ་ཅིག་གིས་ དམངས་གཙོའི་གཞུང་དང་ འགྲོ་བ་མིའི་དབང་ཆའི་སྐོར་ལས་ བརྟག་ཞིབ་སྙན་ཞུ་འབད་མི་དང་འཁྲིལཝ་ད་ འབྲུག་འདི་ ཨང་༡༢༧ པ་ཨིནམ་ད་ ཨེ་ཤི་ཡ་ལུང་ཕྱོགས་ཀྱི་ རྒྱལ་ཁབ་༤༠ གི་གྲས་ལས་འབད་བ་ཅིན་ འབྲུག་གིས་ཨང་༢༦ པ་ ཐོན་ཡོདཔ་ཨིན་པས།
བརྡ་བརྒྱུད་ཀྱི་རང་དབང་དེ་ ཁག་གསུམ་ལུ་དབྱེ་སྟེ་ བརྟག་ཞིབ་འབད་བའི་སྐབས་ རང་དབང་ཅན་ནང་ རྒྱལ་ཁབ་༦༦ ཚུད་ཡོདཔ་ད་ རང་དབང་ཆ་ཤས་ཅན་ནང་ རྒྱལ་ཁབ་༧༢ དེ་ལས་ རང་དབང་མེད་པིའི་ སྡེ་ཚན་ནང་ རྒྱལ་ཁབ་༥༩ ཚུད་ཡོད་མི་ལས་ འབྲུག་འདི་རང་དབང་ཤ་ཆས་ཀྱི་ གྲས་ཁར་ཨིན་པས།
འཛམ་གླིང་ནང་ བརྡ་བརྒྱུད་ཀྱི་ རང་དབང་རྩ་ལས་མེད་མི་ རྒྱལ་ཁབ་དེ་ བི་ལ་རུས་དང་ ཀིའུ་བ་ ཇུ་ནིའི་ ཨི་ཊི་རི་ ཨི་རཱན་ བྱང་ཀོ་རི་ཡ་ ཏྲག་མིན་ཊན་ དེ་ལས་ ཡུ་བིས་ཀིས་ཊཱན་ཚུ་ཨིན་པས།
རྒྱལ་ཁབ་ཀྱི་ བརྡ་བརྒྱུད་ལས་ཁང་ཚུ་དང་ ལཱ་འབད་མི་ཚུ་གིས་འབད་བ་ཅིན་ རྒྱལ་ཁབ་གཞན་ཚུ་གི་ གནས་ཚད་ལུ་བལྟ་བ་ཅིན་ འབྲུག་གི་ བརྡ་བརྒྱུདཔ་ཚུ་ལུ་ ཚེ་སྲོག་དང་འབྲེལ་བའི་ཉེན་ཁ་མེདཔ་ལས་ ལཱ་འབད་རུང་ བྱ་སྟབས་བདེ་ཏོག་ཏོ་འདུག་ཟེར་ཨིན་པས།
ཁོང་གིས་འབད་བ་ཅིན་ ད་རེས་ དཀའ་ངལ་ངོ་མ་ར་ གཞུང་གི་འགོ་དཔོན་ཚུ་གིས་ གནས་ཚུལ་དང་ ཡིག་ཆ་ཚུ་ བྱིན་མ་བཏུབ་མི་དེ་ཨིན་རུང་ དེ་ཚུ་ཡང་ འགྲོས་ཀྱིས་སྦེ་ བསལ་ཚུགས་པའི་རེ་བ་བསྐྱེད་དོ་ཟེར་ སྤྱི་ཟླ་༥ པའི་ཚེས་༣ ལུ་ རྒྱལ་ཁབ་ནང་ འཛམ་གླིང་བརྡ་བརྒྱུད་རང་དབང་གི་ཉིནམ་ བརྩི་སྲུང་འབད་བའི་སྐབས་ སླབ་ཡོདཔ་ཨིན་པས།
འཛམ་གླིང་སྤྱི་ཚོགས་ཀྱི་ ཡོངས་ཁྱབ་དྲུང་ཆེན་ བང་ཀི་མཱུན་གྱིས་འབད་རུང་ བརྡ་བརྒྱུད་དེ་ འཛམ་གླིང་གི་མི་ཚུ་ལུ་ བརྡ་དོན་དང་འབྲེལ་བའི་ གནད་དོན་སྤྲོད་མི་ཨིནམ་ལས་ ཁག་ཆེ་ཤོས་ཅིག་ཨིནམ་མ་ཚད་ རྒྱལ་ཁབ་ཀྱི་ངན་ལྷད་དང་ གཞུང་གི་སྲིད་བྱུས་ངན་པ་ དེ་ལས་ སྤྱིར་བཏང་བྱ་ངན་ཚུའི་སྐོར་ལས་ སྙན་ཞུ་འབད་མི་དེ་ བརྡ་བརྒྱུད་ཨིནམ་ལས་ ཁོང་ལུ་ མི་ཚུ་གིས་ ག་དེ་དྲག་དྲག་ རྒྱབ་སྐྱོར་འབད་དགོ་ཟེར་ ཨིན་པའི་གནས་ཚུལ།
བསྟན་འཛིན་རྣམ་རྒྱལ།
No comments:
Post a Comment