མི་སེར་དམངས་གཙོ་ཚོགས་པའི་གཙོ་འཛིན་ ཚེ་རིང་སྟོབས་རྒྱས། |
༡༤/༠༧/༢༠༡༣། ༉ ཁ་ཙ་ འབྲུག་གི་སྤྱི་ཚོགས་༢ པའི་ རྒྱལ་ཡོངས་ཚོགས་འདུའི་ སྤྱིར་བཏང་བཙག་འཐུ་ མཇུག་བསྡུཝ་དང་འབྲེལ་ འབྲུག་མི་ཚུ་གིས་ དང་འདོད་གསལ་སྟོན་ཀྱི་གྲུབ་འབྲས་ཐོག་ མི་སེར་དམངས་གཙོ་ཚོགས་པ་གིས་ འདེམས་ཁོངས་༣༢ ནང་ལས་ རྒྱལ་ཁ་ཐོབ་སྟེ་ གཞུང་སྐྱོང་དང་ འབྲུག་ཕུན་སུམ་ཚོགས་པ་གིས་ འདེམས་ཁོངས་༡༥ རྒྱལ་ཁ་ཐོབ་མི་ལུ་བརྟེན་ ལྡོག་ཕྱོགས་ཚོགས་པ་སྦེ་ ཕྱག་ཞུ་ནི་ཨིན་པས།
མ་གཞི་བཙག་འཐུ་དེ་ ཚོགས་རྒྱན་འཕྲུལ་ཆས་ཐོག་གི་ གྲུབ་འབྲས་ལུ་ལྟ་བ་ཅིན་ དོ་འགྲན་ཅན་ཅིག་སྦེ་བྱུང་ཡོད་པའི་ མངོན་གསལ་ཡོད་མི་དེ་ཡང་ འབྲུག་ཕུན་སུམ་ཚོགས་པ་གིས་ ཤར་ཕྱོགས་ཀྱི་འདེམས་ཁོངས་༥ དང་ མགར་ས་ལས་ འགྲེམ་ཐོག་ཚོགས་རྒྱན་མ་བརྩི་བར་ འཕྲུལ་ཆས་ཚོགས་རྒྱན་ཐོག་གི་ གྲུབ་འབྲས་ལུ་ལྟ་བ་ཅིན་ རྒྱལ་ཁ་ཐོབ་ཡོདཔ་ཨིན་རུང་ འགྲེམ་ཐོག་ཚོགས་རྒྱན་ལུ་ལྷོདཔ་ད་ དམངས་གཙོ་ཚོགས་པ་གིས་ ལེ་ཤ་གིས་ཁྱད་པར་ཐོན་མི་ལུ་བརྟེན་ ཕུན་སུམ་ཚོགས་པ་གིས་ རྒྱལ་ཁ་ཐོབ་མ་ཚུགས།
དཔེ་འབད་བ་ཅིན་ བཀྲིས་སྒང་བཀང་ལུང་ བསམ་མཁར་ལུ་འབད་བ་ཅིན་ འཕྲུལ་ཆས་ཚོགས་རྒྱན་ནང་ལས་ ཕུན་སུམ་ཚོགས་པ་གིས་ ཚོགས་རྒྱན་༢༢༣༢ དང་ དམངས་གཙོ་ཚོགས་པ་གིས་ ཚོགས་རྒྱན་༡༩༤༦ ཐོབ་ཡོདཔ་ཨིན་རུང་ འགྲེམ་ཐོག་ཚོགས་རྒྱན་ནང་ལྷོདཔ་ད་ ཕུན་སུམ་ཚོགས་པ་གིས་ ཚོགས་རྒྱན་༥༠༩ ལས་མ་ཐོབ་པའི་ཁར་ དམངས་གཙོ་ཚོགས་པ་གིས་ ཚོགས་རྒྱན་༧༧༩ ཐོབ་ཡོདཔ་ལས་ འགྲེམ་ཐོག་ཚོགས་རྒྱན་༢༩༡ གི་ ཁྱད་པར་ཐོན་ནུག།
དེ་བཟུམ་སྦེ་ རམ་འཇར་ཁམས་དྭངས་འདེམས་ཁོངས་དང་ མོང་སྒར་འདེམས་ཁོངས་ ཝམ་རོང་དང་ བདེ་བ་ཐང་སྒོམ་དར་འདེམས་ཁོངས་ དེ་ལས་ མགར་ས་གི་ ཁ་སྨད་ལུང་ནག་ནང་གི་ འདེམས་ཁོངས་ཚུ་ནང་ཡང་ འཕྲུལ་ཆས་ཚོགས་རྒྱན་ཐོག་གི་ གྲུབ་འབྲས་ནང་ ཕུན་སུམ་ཚོགས་པའི་ ཚོགས་རྒྱན་མངམ་ཡོད་རུང་ འགྲེམ་ཐོག་ཚོགས་རྒྱན་དེ་ དམངས་གཙོ་ཚོགས་པ་ལུ་ མཐོ་དྲགས་ཡོདཔ་ལས་ འདེམས་ཁོངས་དེ་ཚུའི་ནང་ལས་ དམངས་གཙོ་ཚོགས་པ་གིས་ འགྲེམ་ཐོག་ཚོགས་རྒྱན་ལུ་བརྟེན་ རྒྱལ་ཁ་ཐོབ་ནུག།
མ་གཞི་ འདེམས་ཁོངས་མང་ཤོས་ཅིག་ནང་ འགྲེམ་ཐོག་ཚོགས་རྒྱན་དེ་ རྒྱ་ཆེ་དྲགས་སྦེ་ དམངས་གཙོ་ཚོགས་པ་ལུ་བཏང་ཡོདཔ་མ་ཚད་ མ་འོངས་གཞུང་སྐྱོང་གི་བློན་ཆེན་གསརཔ་དང་ མི་སེར་དམངས་གཙོ་ཚོགས་པའི་ གཙོ་འཛིན་ཚེ་རིང་སྟོབས་རྒྱས་ཀྱིས་ ཚོགས་རྒྱན་གྱི་ཉིནམ་ མ་རནམ་ཅིག་ཁར་ མཇུག་གི་གསལ་བཤད་ནང་ འགྲེམ་ཐོག་ཚོགས་རྒྱན་དེ་མངམ་ར་ དམངས་གཙོ་ཚོགས་པ་ལུ་བཏང་ཡོད་པའི་ མངོན་གསལ་བྱུང་ཡོདཔ་སྦེ་ སླབ་ཡོདཔ་བཞིན་དུ་ དམངས་གཙོ་ཚོགས་པ་ལུ་བསྐྱལ་ནུག།
དེ་བཟུམ་སྦེ་ ཚོགས་པ་གིས་ ལྷོ་ཕྱོགས་ཀྱི་ འདེམས་ཁོངས་ཚུ་ནང་ལས་ ག་ར་དམངས་གཙོ་ཚོགས་པ་གིས་ རྒྱལ་ཁ་ཐོབ་ཚུགསཔ་འབད་ནི་གི་ རེ་བ་བསྐྱེད་ཡོད་མི་དང་བསྟུན་ གསར་སྤང་དང་ བསམ་རྩེ་ དེ་ལས་ རྩི་རང་རྫོང་ཁག་གི་ འདེམས་ཁོངས་ཆ་མཉམ་ལས་ གྲུབ་འབྲས་གསལ་སྟོན་སྐབས་ དམངས་གཙོ་ཚོགས་པ་གིས་ རྒྱལ་ཁ་ཐོབ་ནུག།
སྤྱིར་བཙག་འཐུ་ཐེངས་༢ པའི་ནང་ མི་རློབས་ཡོངས་བསྡོམས་ལས་ བརྒྱ་ཆ་༦༦ ལྷགཔ་ཅིག་གིས་ ཚོགས་རྒྱན་བཙུགས་ཡོདཔ་ཨིན་པའི་གནས་ཚུལ།
བསམ་གཏན་ཡེ་ཤེས།
No comments:
Post a Comment