ཤོང་ཚད་འགྲུལ་པ་༤༨ འབད་མི་ གནམ་གྲུ་དེ་གིས་ ཁ་ཙ་ དྲོ་པའི་ཆུ་ཚོད་༧ དེ་ཅིག་ལུ་ སྤ་རོ་རྒྱལ་སྤྱི་གནམ་ཐང་ནང་ལས་ དགེ་ལེགས་ཕུག་ ལུང་ཕྱོགས་ལཱ་གཡོག་འགྲེམ་སྟོན་ཐེངས་༤ པའི་ནང་ སྐུ་མགྲོན་གཙོ་བོ་སྦེ་བྱོན་མི་ ལས་གཡོག་བློན་པོ་རྡོ་རྗེ་དབང་འདུས་དང་ དམིགས་བསལ་གྱི་སྐུ་མགྲོན་ བརྒྱུད་འབྲེལ་བློན་པོ་ ནཱན་ད་ལཱལ་ རའི་གིས་གཙོས་པའི་ ལྷན་ཁག་༢ ནང་ལས་ འགོ་དཔོན་ཚུ་རྩིས་ཏེ་ འགྲུལཔ་༢༣ འགྲུལ་སྐྱོད་འབད་ཞིནམ་ལས་ དུས་ཡུན་སྐར་མ་༢༠ དེ་ཅིག་ སྒུག་ཞིནམ་ལས་ འགྲུལ་པ་ཚུ་བཏོན་བཞག་བཞག་སྟེ་ བུམ་ཐང་དང་ ཡོན་ཕུ་ལ་ལུ་ འཕུར་འགྲུལ་འབད་ཡོདཔ་ཨིན་པས།
དེ་ལས་ ཡོན་ཕུ་ལ་ལས་ ལོག་སྤ་རོ་ལུ་ འཕུར་འགྲུལ་འབད་བའི་ལམ་ཁར་ དྲོ་པའི་ཆུ་ཚོད་༡༠ དེ་ཅིག་ལུ་ གནམ་ཐང་ནང་ཆགས་ཞིནམ་ལས་ ད་རུང་ དུས་ཡུན་སྐར་མ་༢༠ དེ་ཅིག་གི་རིང་ སྒུག་སྡོད་ཞིནམ་ལས་ སྡེ་ཚན་དེ་ ལོག་འཐུ་འབག་ཡོདཔ་ད་ གནམ་གྲུ་ནང་ ཡོན་ཕུ་ལ་དང་ བུམ་ཐང་ལས་འོང་མི་ འགྲུལ་པ་ཚུ་རྩིས་ཏེ་ འགྲུལ་པ་བསྡོམས་༣༩ གིས་ འཕུར་འགྲུལ་འབད་ཡོདཔ་ཨིན་པས།
སྡེ་ཚན་དེ་ཡང་ དགེ་ལེགས་ཕུག་ལས་ འགོ་འབྱེད་གནང་ཚར་ཏེ་ དུམ་གྲ་ཅིག་གི་རྒྱབ་ལས་ ལོག་སོང་ཡོདཔ་ད་ གནམ་གྲུ་དེ་གིས་ དགེ་ལེགས་ཕུག་ལས་ སྤ་རོ་ལུ་ དུས་ཡུན་སྐར་མ་༢༥ འགོར་དོ་ཡོདཔ་ཨིན་པས།
འབྲུག་མཁའ་འགྲུལ་ལས་འཛིན་གྱི་ ཚོང་འབྲེལ་ལས་ཁུངས་ཀྱི་ སྤྱི་ཁྱབ་འཛིན་སྐྱོང་པ་ རྣམ་རྒྱལ་དབང་ཕྱུག་གིས་ སླབ་མིའི་ནང་ གནམ་གྲུ་དེ་ བུམ་ཐང་དང་ ཡོན་ཕུ་ལ་ལུ་ འཕུར་འགྲུལ་གྱི་ལས་རིམ་ནང་ཡོད་མི་ གནམ་གྲུ་ཅིག་ཨིན་ཟེར་ཨིནམ་ད་ ད་རེས་ དགེ་ལེགས་ཕུག་ལུ་ འཕུར་འགྲུལ་འབད་མི་དེ་ཡང་ ལྷན་ཁག་༢ ཀྱིས་ ཧེ་མ་ལས་ གླ་ཆ་སྤྲོད་དེ་ མཁོ་མངགས་འབད་ནི་དེ་གིས་ ཨིན་ཟེར་ཨིན་པས།
དགེ་ལེགས་ཕུག་གནམ་ཐང་ནང་ དུས་རྒྱུན་གྱི་ ལས་རིམ་དང་འབྲེལ་བའི་ གནམ་གྲུའི་འཕུར་འགྲུལ་ ནམ་ལས་འགོ་བཙུགས་ནི་ཨིན་ན་ཟེར་ དྲི་བཀོད་འབད་བའི་ལན་ལུ་ འབྲུག་མཁའ་འགྲུལ་གྱི་ བཀོད་ཁྱབ་འགོ་དཔོན་གཙོ་འཛིན་ རྒྱ་མཚོ་གིས་ སླབ་མིའི་ནང་ ད་རེས་ནངས་པ་ ཞི་བའི་མཁའ་འགྲུལ་ལས་ཁུངས་ཀྱིས་ ལས་རིམ་བཟོ་བའི་བསྒང་ཡོད་མི་ མཐུན་རྐྱེན་མཁོ་ཆས་ཚུ་ ནམ་བཟོ་སྐྲུན་འབད་ཚར་འོང་ག་ དེ་ལུ་ རག་ལས་ཟེར་ཨིན་པས།
རྒྱ་མཚོ་གིས་ སླབ་མིའི་ནང་ ད་ལྟོ་ གནམ་གྲུའི་རྒྱུག་ལམ་དེ་རྐྱངམ་གཅིག་ བསྒྲུབས་ཡོད་རུང་ ད་རུང་ ལྕགས་སྐུད་རྭཝ་རྐྱབ་ནི་དང་ འཐོན་འཛུལ་གྱི་ས་ཁོངས་བཟོ་སྐྲུན་ དེ་ལས་ དགོས་མཁོ་ཅན་གྱི་མཐུན་རྐྱེན་ཚུ་ བཟོ་སྐྲུན་འབད་བའི་བསྒང་ཡོདཔ་ལས་ དེ་ཚུ་མཇུག་མ་བསྡུ་ཚུན་ འཕུར་འགྲུལ་མི་འབད་ཟེར་ཨིན་པས།
ད་རེས་ནངས་པ་ འབྲུག་མཁའ་འགྲུལ་གྱི་ ཚོང་འབྲེལ་སྡེ་ཚན་གྱིས་ དགེ་ལེགས་ཕུག་གནམ་ཐང་སྤྱོད་མི་ ལྟ་བཤལཔ་དང་ ནང་འཁོད་ཀྱི་ འགྲུལ་པ་ཚུ་ ག་དེ་སྦེ་འོང་ག་ བརྟག་ཞིབ་འབད་བའི་བསྒང་ཡོད་ཟེར་ བཀོད་ཁྱབ་གཙོ་འཛིན་འགོ་དཔོན་གྱིས་ བཤདཔ་ཨིན་པའི་གནས་ཚུལ།
དགེ་ལེགས་ཕུག་ལས་ ཚེ་རིང་རྣམ་རྒྱལ།
No comments:
Post a Comment