 |
མི་དབང་རྒྱལ་བཙུན་རྣམ་གཉིས་
ཌ་ཀ་ལུ་ ནང་པའི་ལྷ་ཁང་ནང་
ཆིབས་བསྐྱོད་གནང་པའི་བསྒང་།
|
མི་དབང་རྒྱལ་བཙུན་རྣམ་གཉིས་ཀྱིས་ ལྷ་ཁང་དེ་ནང་ ཐུགས་སྨོན་གནང་པའི་ཤུལ་ལུ་ ཆོས་སྡེ་གིས་ དུས་རབས་༡༠ པའི་ ནང་པའི་སློབ་དཔོན་ ཇོ་བོ་རྗེ་དཔལ་ལྡན་ཨ་ཏི་ཤ་གི་རིང་བསྲེལ་ སྤུར་ཐལ་ཕུལ་ཡོདཔ་ཨིན་པས།
དེ་མ་ཚད་ མི་དབང་མཆོག་གིས་ ལྷ་ཁང་དེ་ནང་ ཇོ་བོ་རྗེ་དཔལ་ལྡན་ཨ་ཏི་ཤའི་ སྐུ་རྟེན་དང་ མཆོད་རྟེན་བཞེངས་ནིའི་དོན་ལུ་ འགྱམ་རྡོ་བཙུགས་གནང་ཡོདཔ་ད་ ནང་པའི་མི་སྡེ་གིས་ མི་དབང་རྒྱལ་བཙུན་རྣམ་གཉིས་ལུ་ རང་ལུགས་ཀྱི་ སྤྲོ་སྟོན་ལས་རིམ་ཅིག་ སྤྱན་འབུལ་ཞུ་ནུག།
ཕྱི་རུ་ མི་དབང་མཆོག་གིས་ བང་ལ་དེཤ་གི་སྲིད་བློན་ ཨམ་ཤེག་ཧ་སི་ན་དང་ མཇལ་ཕྲད་གནང་པའི་ཤུལ་ལུ་ སྲིད་བློན་གྱིས་ མི་དབང་རྒྱལ་བཙུན་རྣམ་གཉིས་ཀྱི་དོན་ལུ་ ཚོགས་སྟོན་ལས་རིམ་ཅིག་ འགོ་འདྲེན་འཐབ་ནུག།
བང་ལ་དེཤ་གི་སྲིད་བློན་ ཤེག་ཧ་སི་ན་དེ་ སྤྱི་ལོ་༢༠༠༩ ལོའི་སྔ་ཆ་ལུ་ སྲིད་བློན་སྦེ་ བཙག་འཐུ་གྲུབ་པའི་ཤུལ་ལུ་ སྤྱི་ཟླ་༡ པའི་ནང་ འབྲུག་ལུ་ གཟིགས་སྐོམར་གནང་ཡོདཔ་མ་ཚད་ སྤྱི་ལོ་༢༠༡༠ ཟླཝ་༤ པའི་ནང་ ཐིམ་ཕུ་ལུ་ ལྷོ་ཨེ་ཤི་ཡ་ ལུང་ཕྱོགས་མཐུན་འབྲེལ་ཚོགས་པའི་ དབུ་ཁྲིད་ཞལ་འཛོམས་ཐེངས་༡༦ པ་འཚོགས་གནང་པའི་སྐབས་ལུ་ཡང་ བྱོན་ཡོདཔ་ཨིན་པས།
རྒྱལ་པོའི་བརྡ་དཔོན་ཡིག་ཚང་ལས་ གནས་ཚུལ་གསར་བཏོན་འབད་མིའི་ནང་ ཆེ་མཐོའི་དབུ་ཁྲིད་གནས་རིམ་ནང་ ཕན་ཚུན་གཟིགས་སྐོར་གནང་མི་དེ་གིས་ མི་དབང་མངའ་བདག་རིན་པོ་ཆེ་མཆོག་དང་ བང་ལ་དེཤ་གི་ དབུ་ཁྲིད་ཀྱི་བར་ན་ མཛའ་བརྩེ་དང་ མཐུན་འབྲེལ་ལེགས་ཤོམ་ཡོད་པའི་ བརྡ་མཚོན་སྟོནམ་ཨིན་ཟེར་ བཀོད་ཡོད་པའི་གནས་ཚུལ།
 |
| མི་དབང་རྒྱལ་བཙུན་རྣམ་གཉིས་ སྲིད་བློན་ཤེག་ཧ་སི་ན་གིས་ཕུལ་མི་ བང་ལ་དེཤ་གི་ རང་ལུགས་གྱོན་ཆས་བཞེས་ཐོག་ལས་ སྲིད་བློན་གྱི་ ཚོགས་སྟོན་ནང་ ལྷན་བཞུགས་གནང་པའི་བསྒང་། |
No comments:
Post a Comment