དེ་བཟུམ་མའི་ རྫོང་ཁག་བཙག་འཐུ་རྩོད་ཉོགས་ཞིབ་བསལ་ཚོགས་ཆུང་དེ་ ན་ཧིང་ ས་གནས་གཞུང་གི་བཙག་འཐུ་ འགོ་འདྲེན་འཐབ་པའི་སྐབས་ འགོ་དང་པ་གཞི་བཙུགས་འབད་དེ་ ལག་ལེན་འཐབ་ཡོདཔ་ཨིན་པས།
རྫོང་ཁག་གནས་རིམ་ནང་ གཞི་བཙུགས་འབད་དགོ་མི་དེ་ཡང་ བཙག་འཐུའི་སྐབས་ བཙག་འཐུ་དང་འབྲེལ་བའི་ རྩོད་ཉོགས་འདྲ་མིན་སྣ་ཚོགས་ འབྱུང་དོ་ཡོདཔ་བཞིན་དུ་ དེ་ཚུ་ཡིག་ཚང་ལྟེ་བའི་ བཙག་འཐུ་རྩོད་ཉོགས་ཞིབ་བསལ་ཚོགས་ཆུང་གིས་ ཞིབ་དཔྱད་འབད་དགོཔ་འཐོན་དོ་ཡོདཔ་ལས་ རྩོད་གཞི་ཆུང་ཀུ་རེ་འཐོན་མི་ཚུ་ རྫོང་ཁག་གནས་རིམ་ནང་ལས་ར་ ཉོགས་བསལ་འབད་ ཐབས་ལུ་ཨིན་པས།
བཙག་འཐུ་ལྷན་ཚོགས་ཀྱི་ སྦྱོང་བརྡར་འགོ་འདྲེན་པ་ ཀུན་ལེགས་ཀྱིས་སླབ་མིའི་ནང་ རྩོད་ཉོགས་འཐོན་མི་ཚུ་ག་ར་ ཡིག་ཚང་ལྟེ་བའི་ རྩོད་ཉོགས་ཞིབ་བསལ་ཚོགས་ཆུང་གིས་ ལག་ལེན་འཐབ་དགོ་པའི་སྐབས་ དཀའ་ངལ་དང་ དོ་འགྲན་སྦོམ་བྱུངམ་མས་ཟེར་ཨིན་པས།
ཁོ་གིས་སླབ་དོ་བཟུམ་འབད་བ་ཅིན་ བཙག་འཐུ་དང་འབྲེལ་བའི་རྩོད་གཞི་མང་ཤོས་ར་ ས་གནས་ནང་ལས་འབྱུང་དོ་ཡོདཔ་ལས་ དྲང་ཁྲིམས་ཀྱི་ལམ་ལུགས་དང་ ཆ་འདྲཝ་སྦེ་ རྩོད་ཉོགས་བསལ་ཐབས་དེ་ཡང་ ས་གནས་ཁ་ལས་ འགོ་བཙུགས་ནི་གི་དོན་ལུ་ ཨིན་ཟེར་ཨིན་པས།
རྫོང་ཁག་བཙག་འཐུའི་ རྩོད་ཉོགས་ཞིབ་བསལ་ཚོགས་ཆུང་ནང་ རྫོང་ཁག་བཙག་འཐུ་འགོ་དཔོན་དང་ ཁྲིམས་དོན་འགོ་དཔོན་ཚུ་དེ་ལས་ རྒེད་འོག་བདག་སྐྱོང་འགོ་དཔོན་ཚུ་ འཐུས་མིའི་གྲངས་སུ་ཚུདཔ་ཨིན་པས།
རྒེད་འོག་བདག་སྐྱོང་འགོ་དཔོན་ཚུ་གིས་ བཙག་འཐུ་དང་འབྲེལ་བའི་རྩོད་ཉོགས་ནང་ འབྲེལ་གཏོགས་ཡོད་མི་ མི་ངོམ་དེ་ རྒེད་འོག་ག་ཏེ་ལས་ཨིན་ན་ དེ་དང་འབྲེལ་ཡོད་ཀྱི་ རྒེད་འོག་བདག་སྐྱོང་འགོ་དཔོན་ཚུ་མ་གཏོགས་ རྩོད་ཉོགས་ཞིབ་དཔྱད་སྐབས་ རྒེད་འོག་ཆ་མཉམ་གྱི་ བདག་སྐྱོང་འགོ་དཔོན་ཚུ་ འཐུས་མིའི་གྲས་ཁར་ བཅའ་མར་གཏོགས་དགོཔ་མེདཔ་ཨིན་པས།
རྫོང་ཁག་བཙག་འཐུའི་ རྩོད་ཉོགས་ཞིབ་བསལ་ཚོགས་ཆུང་གི་འཐུས་མི་ཚུ་ འགོ་ཐོག་ས་གནས་གཞུང་གི་བཙག་འཐུའི་སྐབས་ རྩོད་ཉོགས་ཞིབ་བསལ་དང་འབྲེལ་བའི་ ཤེས་ཡོན་ཉམས་མྱོང་དང་ རིག་རྩལ་ཚུ་ག་ནི་ཡང་མེདཔ་ཨིན་རུང་ ད་རེས་ རྒྱལ་ཡོངས་སྤྱི་ཚོགས་ཀྱི་ བཙག་འཐུ་ཐེངས་༢ པ་དེ་ ཧ་ལམ་སྦོ་ལོགས་ཁར་ལྷོད་ཡོདཔ་བཞིན་དུ་ རྫོང་ཁག་ནང་ འོས་འབབ་ཅན་གྱི་ རྩོད་ཉོགས་ཞིབ་བསལ་ཚོགས་ཆུང་གི་ འཐུས་མི་ཚུ་ལུ་ རིག་རྩལ་སྦྱོང་བརྡར་ཅིག་འགོ་འདྲེན་འཐབ་ནི་འགོ་བཙུགས་ཏེ་ ཁ་ཙ་ དགེ་ལེགས་ཕུག་དང་ རྩི་རང་ གསར་སྤང་རྫོང་ཁག་ཚུ་ནང་ སྦྱོང་བརྡར་འགོ་འདྲེན་འཐབ་ཡོད་པའི་གནས་ཚུལ།
བསམ་གཏན་ཡེ་ཤེས།
No comments:
Post a Comment