༣/༧/༢༠༡༣ བཙག་འཐུ་ལྷན་ཚོགས་ཀྱི་ཁྲིམས་ དྲང་བདེན་དང་ འདྲ་མཉམ་མེད་པའི་མངོན་གསལ།
༉ ཧེ་མར་ སྤྱི་ལོ་༢༠༡༡ ལུ་ ས་གནས་གཞུང་གི་ བཙག་འཐུའི་སྐབས་ ང་གིས་ མི་སེར་ལུ་མིན་པར་ ལཱ་འབད་མི་༦ ལུ་ ཆང་བི་ཡར་ཤེལ་དམ་༦ བྱིན་ཡོད་མིའི་ཐད་ལུ་ བཙག་འཐུ་ལྷན་ཚོགས་ཀྱི་ འཁྲུན་ཆོད་ཨང་༢༦/༧/༢༠༡༡ ཅན་མའི་དགོངས་དོན་དང་འཁྲིལ་ ང་ར་ རྒ་པོའི་འདེམས་ངོ་ལས་ ཆ་མེད་བཏང་ཡོདཔ་མ་ཚད་ ཉེས་བྱ་ཡང་ དངུལ་ཀྲམ་༦,༠༠༠ ཡངས་ཆག་མེད་པར་ བཀལ་གནང་ཡི་ཟེར་ཞུ་ནི།
འདི་འབདཝ་ད་ ད་རེས་ སྤྱི་ལོ་༢༠༡༣ གྱི་ སྤྱི་ཚོགས་༢ པའི་རྒྱལ་ཡོངས་ཚོགས་འདུའི་ བཙག་འཐུའི་ནང་འབད་བ་ཅིན་ འབྲུག་གི་རྩ་ཁྲིམས་ཆེན་མོའི་ རྩ་ཚན་༢༣ པའི་རྩ་དོན་༤ པ་དང་ འབྲུག་གི་བཙག་འཐུའི་བཅའ་ཁྲིམས་༢༠༠༨ ཅན་མའི་དོན་ཚན་༡༧༩ པ་ཚུ་གི་ དགོངས་དོན་ལས་འགལ་བའི་ངན་ལྷད་ དཔེ་འབད་བ་ཅིན་ ཧཱ་རྫོང་ཁག་གསང་སྦས་ལུ་ འགྲུལ་འཕྲིན་བའུ་ཅར་གྱི་དོན་ལུ་ དངུལ་ཀྲམ་༡༧,༠༠༠ སྤྲོད་མི་དང་ གཞན་ཡང་ རྫོང་ཁག་སོ་སོ་ནང་ལས་ཕར་ སྲིད་ཚོགས་ཀྱི་ འདེམས་ངོ་དང་ ཚོགས་པ་ཚུ་གིས་ ཇ་དང་ལྟོ་ལ་སོགས་པ་བྱིན་ཡོད་པའི་ ལོ་རྒྱུས་ཚུ་ ཐོན་ནུག་ཟེར་ཞུ་ནི།
དེ་མ་ཚད་ བཙག་འཐུ་འགོ་དཔོན་དང་ ཡིག་ཚང་ཚུ་ལས་ གནང་བ་མེད་པའི་ མི་མང་དང་ སྲིད་ཚོགས་འཛོམས་འདུ་ཚུ་ ཁྲིམས་འགལ་ཐོག་ལས་ འགོ་འདྲེན་འཐབ་ཡོདཔ་ མངོན་གསལ་བྱུང་ཡོད་མི་ཚུ་ གནས་སྟངས་དང་ དུས་ཚོད་དང་བསྟུནམ་ད་ གཞུང་གི་བཀག་དམ་ལས་འགལ་བའི་ ངན་ལྷད་ཀྱི་ ལཱ་ནང་ཚུད་དེ་ཡོདཔ་ལས་ ཉེས་བྱའི་ཐད་ རང་ལུ་ སྤྱི་ལོ་༢༠༡༡ ལུ་བཀལ་མི་ ཉེས་བྱ་དང་འདྲ་མཉམ་སྦེ་ ཕོག་དགོཔ་ཨིན་རུང་ ད་རེས་ རྫོང་ཁག་བཙག་འཐུའི་རྩོད་ཉོགས་སེལ་ཐབས་ཚོགས་ཆུང་གི་ ཁ་ཐུག་ལས་ ཉེན་བརྡ་ཅིག་བྱིན་ཏེ་ བཞགཔ་ཨིན་པས་ཟེར་ཞུ་ནི།
འདི་འབདཝ་ལས་ བཙག་འཐུ་ལྷན་ཚོགས་ལུ་ བཅའ་ཁྲིམས་ཁག་༢ ཡོདཔ་བཟུམ་སྦེ་ ཚོར་སྣང་བྱུང་ཡོདཔ་བཞིན་དུ་ དེ་སྦེ་ཨིན་པ་ཅིན་ མི་སེར་ཉམ་ཆུང་རང་ལུ་ ཁེ་རྒུད་རྩ་ལས་མ་བཏུབ་ཟེར་ཞུ་ནི། ད་རིས་ཀྱི་ དུས་ཚོད་དང་ གནས་སྟངས་ནང་བྱུང་ཡོད་མི་ ངན་ལྷད་ཚུ་ ཚབས་ཆེན་ཨིནམ་ལས་ ཉེས་བྱ་ཚུ་ཡང་ ང་ལུ་བཀལ་དོ་བཟུམ་ བཀལ་གནང་དགོ་ཟེར་ཞུ་ནི།གནད་དོན་དེ་ལུ་བརྟེན་ བཙག་འཐུ་ལྷན་ཚོགས་ཀྱི་ཧོངས་ལས་ ཡང་བསྐྱར་དབྱེ་ཞིབ་མཛད་དེ་ ཉེས་པ་དང་བསྟུན་པའི་ ཉེན་བརྡ་མིན་པར་ ཉེས་ཁྲིམས་འདི་ར་ ཡངས་ཆག་མེད་པར་ བཀལ་གནང་དགོ་ཟེར་ ཞུ་ནི་ཨིན།
ཨྱོན་རྡོ་རྗེ།
དྭགས་ས། དགོངས་འདུ་རྒེད་འོག། མོང་སྒར་རྫོང་ཁག།
ཏི་རུ་སྤྲོད་མི་ལུ་ དབྱེ་ཞིབ་མཐིལ་ཕྱིན་གནང་དགོཔ།
༉ ཧཱ་ལུ་ རྫོང་ཁག་བཙག་འཐུའི་རྩོད་རྙོགས་སེལ་ཐབས་ཚོགས་ཆུང་གིས་ རང་རྩེ་གཡུས་ཚན་ལས་ཨིན་མི་ ཚོགས་པའི་ལས་བྱེདཔ་ཅིག་ཨིན་མི་ ཉི་མ་ཚེ་རིང་ལུ་ མི་གྲངས་༡༡ ལུ་ ཏི་རུ་སྤྲོད་ཡོད་པའི་ ཉེས་བྱ་དངུལ་ཀྲམ་༣,༠༠༠ བཀལ་ཡི་ཟེར་མི་ལུ་ ང་བཅས་མི་སེར་ཚུ་ ཚ་གྱང་སྦོམ་ལང་བཅུག་ཅི་ཟེར་ཞུ་ནི། དཔེར་ན་ གེ་ཟ་སྤྱ་གིས་བཟའ་ མདའ་རྐྱབ་ད་ དོམ་གུ་རྐྱབ་དོ་བཟུམ་ཡ་སོ་ཡི་ཟེར་ཞུ་ནི།
དེ་སྦེ་ ཞུ་དགོ་མི་དེ་ཡང་ ཉི་མ་ཚེ་རིང་ཁོ་རའི་དོན་ལུ་ ཚོགས་རྒྱན་དགོ་ནི་སྦེ་ རྒྱབ་སྐྱོར་འཚོལ་ཞིནམ་ལས་ ཏི་རུ་སྤྲོད་སྤྲོདཔ་ཨིན་ན་ ཡང་ཅིན་ ཁོ་རའི་འདེམས་ཁོངས་ཀྱི་ འདེམས་ངོའི་དོན་ལུ་ བྱིན་བྱིནམ་ཨིན་ན་ ཏི་རུ་དེ་ ག་ཏེ་ལས་བྱུང་བྱུངམ་ཨིན་ན་ རྩོད་རྙོགས་སེལ་ཐབས་ཚོགས་ཆུང་གིས་ ལེགས་ཤོམ་སྦེ་ ཞིབ་དཔྱད་མ་རྐྱབ་པར་ ཉི་མ་ཚེ་རིང་བཟུམ་སྦེ་ ལཱ་འབད་མི་ལུ་ ཉེས་བྱ་ཕོག་པ་ཅིན་ ད་ལས་ཕར་ རྒྱལ་ཁབ་ནང་ ལཱ་འདི་བཟུམ་འབད་མི་ ལེ་ཤ་འཐོན་འོང་ཟེར་ཞུ་ནི།
འདི་འབདཝ་ལས་ འབྲེལ་ཡོད་ལས་ཁུངས་ཚུ་གིས་ དབྱེ་ཞིབ་གནང་འོང་མནོ་བའི་ རེ་བ་ཡོད་ཟེར་ ཞུ་ནི་ཨིན།ཟོར་པོ། རང་རྩེ་རྟ་ང་།
