ཚོགས་དཔོན་གྱིས་འབད་བ་ཅིན་ སྤྱི་ཚོགས་དང་པའི་ ཚོགས་ཐེངས་༡༠ པ་དེ་ སྤྱི་ཟླ་༢ པའི་ཚེས་༨ ལས་འགོ་བཙུགས་ཏེ་ སྤྱི་ཟླ་༢ པའི་ཚེས་༢༨ ཚུན་ འཚོགས་ནི་ཨིན་ཟེར་ཨིན་པས།
དེ་སྦེ་ བཟོ་དགོ་མི་དེ་ཡང་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་ཉིནམ་སྦེ་ གྲོས་འཆར་བཀོད་མི་དང་འཁྲིལ་ མི་དབང་འབྲུག་རྒྱལ་༤ པ་མཆོག་ལུ་ གུས་བཏུད་ཞུ་ནིའི་དོན་ལུ་ ཨིན་ཟེར་ཨིནམ་ད་ སྤྱི་ཟླ་༣ པའི་ནང་འབད་རུང་ སྟབས་མ་བདེཝ་མེདཔ་སྦེ་ བཞག་ཅི་ཟེར་སླབ་ཨིན་པས།
ཁྲིམས་ལུགས་དང་འཁྲིལཝ་ད་ སྤྱི་ཚོགས་འཚོགས་ནིའི་ཚེས་གྲངས་ གཏན་འཁེལ་བཟོ་ནི་དེ་ ཚོགས་དཔོན་ལུ་ དབང་ཚད་ཡོད་ཟེར་ཨིན་པས།
ཚོགས་ཐེངས་མཇུག་ནང་ དཔྱད་ཡིག་གལ་ཅན་ཚུ་ ཡོད་པ་ཅིན་མ་གཏོགས་ དཔྱད་ཡིག་གསརཔ་ཚུ་ ངོ་སྤྲོད་མི་འབད་ཟེར་ཨིན་པས།
གལ་ཅན་ཨིན་པ་ཅིན་ སྤྱི་ཚོགས་དེ་ནང་ར་ ཆ་འཇོག་འབད་ནི་མ་གཏོགས་ ཧེ་མ་བཟུམ་སྦེ་ ཚོགས་ཐེངས་ཤུལ་མའི་ནང་ ཆ་འཇོག་འབད་ནིའི་དོན་ལུ་ མི་བཞག་ཟེར་ཨིན་པས།
སྤྱི་ཟླ་༧ པའི་ཚེས་༡༡ ལུ་ ཚོགས་ཐེངས་༩ པ་ མཇུག་བསྡུ་བའི་ཤུལ་ལུ་ རྒྱལ་ཡོངས་ཚོགས་སྡེ་གིས་ ཁག་འབག་དཔྱད་ཡིག་དང་ རྩོད་རྙོགས་ཀྱི་ གྲོས་ཆོད་དཔྱད་ཡིག་སྐོར་ གྲོས་བསྡུར་འབད་དེ་ ཆ་འཇོག་གྲུབ་མི་འདི་ རྒྱལ་ཡོངས་ཚོགས་འདུ་གིས་ འོས་འབབ་གཟིགས་ནི་ཨིན་པས།
ན་ཧིང་ རྒྱལ་ཡོངས་ཚོགས་འདུ་གིས་ ནང་འཁོད་རྩུབ་སྤྱོད་བཀག་སྡོམ་དཔྱད་ཡིག་དང་ འཁོར་ལམ་དཔྱད་ཡིག་ གྲོས་བསྡུར་འབད་དེ་ ཆ་འཇོག་འབད་མི་དེ་ཡང་ རྒྱལ་ཡོངས་ཚོགས་སྡེ་གིས་ འོས་འབབ་གཟིགས་ནི་ཨིན་པས།
རྐྱེན་ངན་འཛིན་སྐྱོང་དཔྱད་ཡིག་དེ་ མཉམ་འབྲེལ་ཚོགས་ཆུང་འཚོགས་ཞིནམ་ལས་ ཆ་འཇོག་གནང་ནི་ཨིན་པས།
འབྲུག་གི་རྒྱལ་དར་དཔྱད་ཡིག་གི་ གྲོས་འཆར་བཀོད་མི་དེ་ རྒྱལ་ཡོངས་ཚོགས་འདུ་གིས་ ཕྱིར་བཏོན་འབད་ནི་གི་ གྲོས་འཆར་བཀོད་ཡོདཔ་ཨིན་རུང་ རྒྱལ་ཡོངས་ཚོགས་སྡེའི་ འཐུས་མི་ཚུ་གིས་ ཁས་ལེན་འབད་མ་བཏུབ་ལས་ དེ་ཡང་ མཉམ་འབྲེལ་ཚོགས་ཆུང་ནང་ གྲོས་ཐག་གཅད་ནི་ཨིན་པས།
རྒྱལ་ཡོངས་ཚོགས་འདུའི་ ཚོགས་ཐེངས་དང་པ་དེ་ སྤྱི་ལོ་༢༠༠༨ ཟླ་༤ པའི་ཚེས་༢༡ ལུ་ འཚོགས་ཡོདཔ་ད་ རྒྱལ་ཡོངས་ཚོགས་སྡེ་གིས་ སྤྱི་ལོ་༢༠༠༨ ཟླ་༤ པའི་ཚེས་༢༨ ལུ་ འཚོགས་ཡོདཔ་ཨིན་པས།
དེ་ལས་ སྤྱི་ཚོགས་ལྷན་བཞུགས་ འགོ་དང་པ་དེ་ སྤྱི་ལོ་༢༠༠༨ ཟླ་༥ པའི་ཚེས་༨ ལུ་ འཚོགས་ཡོདཔ་ཨིན་པའི་གནས་ཚུལ།
ཡེ་ཤེས་སྒྲོལ་མ།
No comments:
Post a Comment