དེ་ཡང་ རྒྱལ་གཞུང་ཉེན་བཅོལ་ལས་འཛིན་དང་ འབྲུག་ཉེན་བཅོལ་ཚད་འཛིན་ དེ་ལས་ རྒྱལ་ཡོངས་དགོངས་ཞུ་དང་འཚོ་རྟེན་མ་དངུལ་ལས་སྡེའི་ འགོ་དཔོན་ཚུ་གིས་ མི་སེར་ཚུ་ལུ་ བསྐྱིན་འགྲུལ་བྱིན་ནི་ལས་ བཀག་ཆ་འབད་བ་ཅིན་ དེ་གིས་ ལས་སྡེ་ཚུ་ནང་ གནོད་སྐྱོན་ག་བཟུམ་ར་ འབྱུང་ནི་ཨིན་ན་ ལོག་དབྱེ་ཞིབ་འབད་དགོ་པའི་སྐོར་ལས་ ཞུ་བ་འབད་མི་དང་འཁྲིལ་ཏེ་ཨིན་པས།
རྒྱལ་གཞུང་ཉེན་བཅོལ་ལས་འཛིན་གྱི་ བཀོད་ཁྱབ་མདོ་ཆེན་ བསོད་ནམས་རྡོ་རྗེ་གིས་ བཤད་དོ་བཟུམ་འབད་བ་ཅིན་ བསྐྱིན་འགྲུལ་ཚུ་ ཚར་གཅིག་གུ་མིན་པར་ འགྲོས་ཀྱིས་འབད་ རིམ་པ་བཞིན་དུ་ བཀག་ཆ་འབད་ནི་ཨིན་ཟེར་ཨིན་པས།
འཕྲལ་ཁམས་ཅིག་ཁར་ ལས་སྡེ་༣ ནང་ལས་ ཐབས་རིག་ཚོགས་ཆུང་ཅིག་ཡང་ འཚོགས་ཡོདཔ་ད་ ཚོགས་ཆུང་དེ་གིས་ བསྐྱིན་འགྲུལ་ལས་རིམ་བཀག་ཆ་འབད་ནིའི་དོན་ལུ་ དུས་ཐུང་དང་ ཡུན་རིང་གི་ ཐབས་ལམ་རིམ་པ་ཚུ་ བཟོ་དགོཔ་སྦེ་ དངུལ་ཁང་ལྟེ་བ་གིས་ སླབ་ཡོདཔ་ཨིན་པས།
བསོད་ནམས་རྡོ་རྗེ་གིས་འབད་བ་ཅིན་ རྒྱལ་གཞུང་ཉེན་བཅོལ་ལས་འཛིན་གྱིས་ མི་སྡེ་ཉེན་སྲུང་ལམ་ལུགས་ཀྱི་འོག་ལུ་ཚུད་མི་ ཚེ་སྲོག་ཉེན་བཅོལ་དང་ གྲོང་གསེབ་ཁྱིམ་གྱི་ཉེན་བཅོལ་ སྒེར་སྡེའི་དགོངས་ཞུ་དང་འཚོ་རྟེན་མ་དངུལ་ཚུ་དང་ འབྲེལ་བ་འཐབ་དོ་ཟེར་ཨིན་པས།
དེ་འབདཝ་ལས་ ག་དེམ་ཅིག་སྦེ་ ལས་འཛིན་ལུ་ ཁེ་ཕན་ཡོད་པའི་ལས་རིམ་ཚུ་ བཀག་ཆ་འབད་དཔ་འདྲཝ་ཅིག་འབད་བ་ཅིན་ ཚེ་སྲོག་ཉེན་བཅོལ་ལས་རིམ་ཡོད་མི་ཚུ་གིས་ ཟླ་རིམ་གྱི་ ཉེན་དངུལ་རིམ་སྤྲོད་དེ་ ཡར་སེང་འགྱོ་འོང་ཟེར་ བཀོད་ཁྱབ་མདོ་ཆེན་ བསོད་ནམས་རྡོ་རྗེ་གིས་ བཤདཔ་ཨིན་པས།
ཁོ་གིས་འབད་བ་ཅིན་ ཚེ་སྲོག་ཉེན་བཅོལ་ལས་རིམ་ནང་ལས་ བསྡུ་ལེན་འབད་མི་ ཉེན་བཅོལ་རིམ་སྤྲོད་དེ་གིས་ ཁེ་སང་མེན་པར་ གྱོང་རྒུད་ཕོག་སྟེ་ ཡོད་ཟེར་ཨིན་པས།
ཁོ་གིས་འབད་བ་ཅིན་ ད་ལྟོའི་ རིམ་སྤྲོད་དེ་ བསྐྱིན་འགྲུལ་སྦེ་ མ་བྱིན་པ་ཅིན་ ལམ་ལུགས་དེ་གི་ཐོག་ལས་ ཡུན་བརྟན་འབད་ཚུགས་ནི་ལུ་ ལཱ་ཁག་རྐྱབ་ནི་མས་ཟེར་ སླབ་མ་ཚད་ ཉེན་དངུལ་རིམ་སྤྲོད་ཚུ་ཡང་ ལོག་ལྟབ་ཀྱིས་ ཡར་སེང་འབད་དགོཔ་ འཐོན་འོང་ཟེར་ སླབ་ཨིན་པས།
བསོད་ནམས་རྡོ་རྗེ་གིས་འབད་བ་ཅིན་ དངུལ་ཁང་ལྟེ་བ་གིས་ རྒྱལ་ཁབ་ནང་ ཏི་རུ་མ་ལང་པའི་དཀའ་ངལ་ཚུ་ ལེགས་བསྒྱུར་མ་འགྱོ་ཚུན་ བསྐྱིན་འགྲུལ་ཚུ་ འཕྲོ་མཐུད་དེ་ར་ བྱིན་ཆོགཔ་སྦེ་སླབ་མི་དེ་ ངོས་ལེན་ལེགས་ཤོམ་ཅིག་ ཨིན་མས་ཟེར་ སླབ་ཨིན་པས།
འབྲུག་ཉེན་བཅོལ་ཚད་འཛིན་གྱི་ བཀོད་ཁྱབ་གཙོ་འཛིན་འགོ་དཔོན་ ཚེ་རིང་རྒྱལ་མཚན་གྱིས་འབད་བ་ཅིན་ དངུལ་ཁང་ལྟེ་བ་གིས་ གནད་དོན་དེ་ལུ་ བསྐྱར་ཞིབ་འབད་མི་དེ་ ལེགས་ཤོམ་ཅིག་ཨིན་མས་ཟེར་ སླབ་ཨིན་པས།
དངུལ་ཁང་ལྟེ་བ་གིས་ སྣུམ་འཁོར་ནང་འདྲེན་འབད་ནི་དང་ བཟོ་སྐྲུན་གྱི་ བསྐྱིན་འགྲུལ་བཀག་ཆ་འབད་མི་ལུ་བརྟེན་ ཉེན་བཅོལ་གྱི་ཚོང་འབྲེལ་ལུ་ གནོད་སྐྱོན་བྱུང་མིའི་གུ་ ད་རུང་ ལས་སྡེ་ཚུ་གིས་ བསྐྱིན་འགྲུལ་བྱིན་མ་ཆོགཔ་སྦེ་ སླབ་མི་དེ་གིས་ ཧེང་བཀལ་ར་ གནོད་སྐྱོན་འབྱུང་ནི་ཨིནམ་ལས་ ད་རེས་ གྲོས་ཐག་བཅད་མི་དེ་ལུ་ སེམས་དགའ་ཡི་ཟེར་ཨིན་པས།
རྒྱལ་གཞུང་དངུལ་ལས་དབང་འཛིན་གྱིས་འབད་བ་ཅིན་ དངུལ་ཁང་མིན་པའི་ དངུལ་འབྲེལ་ལས་སྡེ་ཚུ་གིས་ བསྐྱིན་འགྲུལ་བྱིན་ནི་གི་ ལམ་ལུགས་དེ་ འཛམ་གླིང་རྒྱལ་ཁབ་ག་ཏེ་ལུ་ཡང་མེདཔ་ལས་ བཀག་ཆ་འབད་ནི་སྦེ་ ཐག་བཅད་མི་དེ་ཡང་ གནད་དོན་འདི་ལུ་བརྟེན་ཏེ་ཨིན་ཟེར་ བཤདཔ་ཨིན་པའི་གནས་ཚུལ།
ཡེ་ཤེས་སྒྲོལ་མ།
No comments:
Post a Comment