ཡེ་ཤེས་སྒྲོལ་མ།
༉ གསར་སྤང་རྫོང་ཁག་ དགེ་ལེགས་ཕུག་རྒེད་འོག་ དཔལ་རི་ཐང་ལུ་ ཟ་ཁང་ཅིག་ནང་ ལཱ་འབད་སྡོད་མི་ སྐྱེས་ལོ་༢༥ ལང་མི་ ཕོ་སྐྱེས་ཅིག་གིས་ སྤྱི་ཟླ་༤ པའི་ཚེས་༡ ལུ་ ཁོ་རའི་ གནས་ཚང་དང་གཅིག་ཁར་ ཁ་ཤགས་རྐྱབ་པའི་ཤུལ་ལུ་ སྤྱི་ཟླ་༤ པའི་ཚེས་༤ ལུ་ རང་སྲོག་བཅད་ཡོདཔ་ཨིན་པས།
ཚེ་འདས་ཀྱིས་ ཁོ་ར་སྡོད་སའི་ ཁང་མིག་གི་ གནམ་པང་གུ་ གྱིབ་ཀྱི་ཐགཔ་བཏགས་ཞིནམ་ལས་ ཨོལ་ལྐོག་དཔྱངས་ཡོདཔ་ཨིན་པས།
གནད་དོན་དེ་གི་སྐོར་ལས་ ཚེ་འདས་ཀྱི་ ཆ་རོགས་ཀྱིས་ སྤྱི་ཟླ་༤ པའི་ཚེས་༥ ལུ་ དྲོ་པའི་ཆུ་ཚོད་༨:༤༥ དེ་ཅིག་ཁར་ ཁྲིམས་སྲུང་འགག་པ་ལུ་ སྙན་ཞུ་འབད་ཡོདཔ་ཨིན་པས།
དེ་ཚེ་དྲོ་པ་ ཚེ་འདས་ཀྱི་ ཆ་རོགས་ཀྱིས་ ག་དེམ་ཅིག་འབོ་རུང་ ཁ་ལན་འཇལ་ནི་མེདཔ་ལས་ ཁྱིམ་གྱི་ སྒོ་ནང་ལས་ བལྟ་བར་སོང་ཡི་ཟེར་ཨིནམ་ད་ ཆ་རོགས་དེ་གིས་ སྒོ་གི་དོང་ནང་ལས་ ལྟ་བའི་སྐབས་ ཚེ་འདས་དེ་ ཁྱིམ་གྱི་ གནམ་པང་གུ་ དཔྱངས་ཡོདཔ་མཐོང་ཡི་ཟེར་ཨིན་པས།
ཚེ་འདས་ཀྱིས་ རང་སྲོག་མ་བཅད་པའི་ཧེ་མར་ ཤོག་ཀུ་ཅིག་ནང་ ཡི་གུ་བྲིས་བཞག་ཡོདཔ་ད་ ཡིག་ཤོག་དེ་ནང་ ཁོ་རའི་ གནས་ཚང་དང་ ཕམ་སྤུན་ཆ་ཚུ་ལུ་ ལཱ་མ་བཏུབ་ཚུ་འབདཝ་ལས་ བློ་འགྱོད་ཡོད་ལུགས་ཀྱི་་སྐོར་ལས་ བྲིས་ཡོདཔ་ཨིན་པས།
ཚེ་འདས་ཀྱི་ གནས་ཚང་དེ་ ཚོང་ཁང་ཅིག་ནང་ ལཱ་འབད་དོ་ཡོདཔ་ད་ སྤྱི་ཟླ་༤ པའི་ཚེ་༡ ལུ་ ཁོང་ར་༢ ཁ་ཤགས་རྐྱབ་པའི་ཤུལ་ལུ་ རྨགཔ་གིས་ དྲང་འོང་ཟེར་ འདྲོག་བྱེལ་འཐབ་སྟེ་ ཁྱིམ་ནང་མ་འགྱོཝ་ཨིན་པས།
ཁོང་༢ གཉེན་རྐྱབ་སྟེ་ ཟླཝ་༨ དེ་ཅིག་ལང་ཡོདཔ་ད་ དེ་གི་བར་ན་ ལན་ཐེངས་༥ དེ་ཅིག་ བརྡུང་རྫོབ་འབད་ཡི་ཟེར་ མོ་གིས་ སླབ་ཨིན་པས།
འཐབ་འཛིང་འབད་དགོ་པའི་ གནད་དོན་དེ་ཡང་ གཙོ་བོ་ ཚེ་འདས་ཀྱིས་ མིག་སེར་ལྟ་མི་ལུ་བརྟེན་ཏེ་ ཨིན་ཟེར་ཨིན་པས།
ཁྲིམས་སྲུང་འགག་པ་ཚུ་གིས་ བཤད་དོ་བཟུམ་འབད་བ་ཅིན་ ཚེ་འདས་ཀྱིས་ བྲིས་བཞག་མི་ ཡི་གུ་ལུ་བལྟ་བ་ཅིན་ གཞན་གྱིས་ གནོད་སྐྱོན་རྐྱབ་པའི་ དོགས་པ་མིན་འདུག་ཟེར་ཨིནམ་ད་ རྐྱེན་ངན་དེ་ བྱུང་བའི་སྐབས་ལུ་ ས་གནས་ནང་ གནས་ཚང་མེད་ནི་དེ་གིས་ དྲི་དཔྱད་འབད་དགོཔ་ཡང་ མིན་འདུག་ཟེར་ ཨིན་པའི་གནས་ཚུལ།
No comments:
Post a Comment