རིག་འཛིན་དབང་ཕྱུག།
༉ ད་ལས་ཕར་ ཁྲིམས་ཀྱི་འདུན་སར་ ཁྲིམས་བཤེར་འབད་ཐོག་ལས་ གཉེན་ཡ་བྲལ་འགྱོ་བའི་ ཨ་ལུའི་གསོ་འཐུས་དེ་ ཁྲིམས་འདུན་ལུ་ རྩོད་གཞི་ཐོ་བཀོད་འབད་བའི་ ཚེས་གྲངས་ལས་ བཟའ་ཟླ་གིས་ སྤྲོད་དགོཔ་མ་ཚད་ ཨ་ལུ་འབྲང་གི་ ཐད་ཁར་ལྷོདཔ་ད་ ཨ་ལུ་སྐྱེས་བའི་ཉིནམ་ལས་ རྩིས་རྐྱབ་སྟེ་ ཨ་པ་གིས་ སྤྲོད་དགོ་མི་དེ་ཡང་ ཨ་ལུ་དེ་ སྐྱེས་མ་གིས་ གསོ་སྐྱོང་འབད་དགོ་ནི་དེ་གིས་ཨིན་པས།
དེ་ཡང་ ཁ་ཙ་ རྒྱལ་ཡོངས་ཁྲིམས་སྡེའི་ ཞལ་འཛོམས་ཐེངས་༢༠ པའི་ ཉིནམ་དང་པའི་ནང་ དྲང་དཔོན་ཚུ་གིས་ རྒྱལ་ཁབ་ནང་འཁོད་ཀྱི་ ཁྲིམས་འདུན་སོ་སོའི་ནང་ ཨ་ལུའི་གསོ་འཐུས་སྤྲོད་ནི་གི་ འགོ་བཙུགས་ཚེས་གྲངས་འདྲ་མིན་ཡོད་མི་དེ་ གཅིག་མཚུངས་བཟོ་མི་དང་བསྟུན་ཨིནམ་ད་ ཧེ་མ་འབད་བ་ཅིན་ ཕམ་ཡ་བྲལ་སོང་མིའི་ ཨ་ལུའི་གསོ་འཐུས་དེ་ ཁྲིམས་འདུན་ལ་ལུ་གིས་ སྐྱེས་བའི་ཚེས་གྲངས་དང་ ལ་ལུ་གིས་ རྩོད་གཞི་ཐོ་བཀོད་འབད་བའི་ཉིནམ་དང་ ཡང་ཅིན་ བཟའ་ཚང་ཡ་བྲལ་འགྱོ་བའི་ ཡིག་ཐིའུ་སྤྲོད་ལེན་དང་ འཁྲུན་ཆོད་བཏོན་པའི་ ཉིནམ་ལས་འགོ་བཟུང་ སྤྲོད་དགོ་པའི་ ཁྲིམས་ཀྱི་བཀའ་རྒྱ་གནང་ནི་ཡོདཔ་ཨིན་པས།
ད་རུང་ གཉེན་ཡ་བྲལ་སོང་མི་ ཨ་ལུའི་ཕམ་དེ་ ཁག་འབག་གི་ ལཱ་འབད་མི་དང་ ཡང་ཅིན་ ཚོང་རྐྱབ་མི་ཅིག་ཨིན་པ་ཅིན་ ཕོ་མོ་གང་རུང་གི་ ལོ་༣ གྱི་འོང་འབབ་ངེས་ཏིག་ དཔེར་ན་ ཚོང་ཁྲལ་གྱི་ འོང་འབབ་རྩིས་ཁྲ་བཙུགས་མི་དང་ ཁེ་སང་ དེ་ལས་ གྱོང་རྒུད་ཕོག་མི་ཚུ་ལུ་ རག་རྩིས་བཏོན་མི་དང་འཁྲིལ་ ཟླ་རིམ་བཞིན་དུ་ ཨ་ལུའི་གསོ་འཐུས་སྤྲོད་དགོཔ་ད་ གལ་སྲིད་ ཕམ་དེ་ ལས་གཡོགཔ་རྐྱབ་མི་ཨིན་པ་ཅིན་ ཨ་ལུའི་གསོ་འཐུས་དེ་ དངུལ་ཕོགས་ལག་པར་ངེས་ཏིག་ཐོབ་མི་ལས་ བརྒྱ་ཆ་༢༠ རེ་རྩིས་རྐྱབ་སྟེ་ སྤྲོད་དགོཔ་བཞིན་དུ་ ཕམ་ཞིང་པ་ཨིན་པ་ཅིན་ རྒྱལ་ཡོངས་ལས་མིའི་ གླ་ཆ་ལུ་ གཞི་བཞག་སྟེ་ སྤྲོད་དགོཔ་ཨིན་པས།
དེ་བཟུམ་མའི་ གྲོས་ཐག་བཅད་མི་དེ་ཡང་ བསམ་རྩེ་རྫོང་ཁག་ཁྲིམས་འདུན་གྱིས་ ཕམ་གཉིས་ཡ་བྲལ་འགྱོཝ་ད་ ཨ་ལུའི་གསོ་འཐུས་དེ་ དངུལ་ཕོགས་ངེས་ཏིག་ལག་པར་ ཐོབ་མི་ལས་དང་ ཡང་ཅིན་ དངུལ་ཕོགས་ཡོངས་བསྡོམས་ལས་ བཏོག་ནི་ཨིན་ན་ དེ་ལས་ ཕམ་ཁག་འབགཔ་དང་ ཡང་ཅིན་ ཚོང་པ་ཨིན་པ་ཅིན་ ཁོང་ལུ་ འོང་འབབ་ཀྱི་ གནས་ཐོ་ཏན་ཏན་མེདཔ་ལས་ ཨ་ལུའི་གསོ་འཐུས་དེ་ རྒྱལ་ཡོངས་ལས་མིའི་ གླ་ཆ་གུ་ གཞི་བཞག་སྟེ་ སྤྲོད་ནི་ཨིན་ན་ཟེར་ གྲོས་འཆར་ཕུལ་མི་དང་འཁྲིལ་ཨིན་པས།
དེ་འབདཝ་ད་ སྐྱིན་འགྲུལ་སྤྲོད་ནི་ཡོད་པ་ཅིན་ དངུལ་ཕོགས་ངེས་ཏིག་ལག་པར་ ཐོབ་མི་གུ་ རྩིས་མི་རྐྱབ་ནི་ཨིནམ་ད་ ཆེ་མཐོ་ཁྲིམས་འདུན་གྱི་ དྲང་དཔོན་ཅིག་གིས་ སླབ་མིའི་ནང་ བཟའ་ཟླ་གང་རུང་གི་ མིང་ཐོག་ཁར་ཡོད་མི་ སྐྱིན་འགྲུལ་དེ་ རྩིས་རྐྱབ་ནི་མེདཔ་སྦེ་ བཟོ་ཡི་ཟེར་ཨིན་པས།
ཨ་ལུའི་གསོ་འཐུས་དེ་ཡང་ ཨ་ལུ་སྐྱེས་ལོ་༡༨ མ་ལང་ཚུན་ཚོད་ དངུལ་ཕོགས་ངེས་ཏིག་ཐོབ་མི་ལས་ ཟླ་རིམ་བཞིན་དུ་ བརྒྱ་ཆ་༢༠ རེ་དང་ ཨ་ལུ་༢ ལས་ལྷག་སྟེ་ཡོད་པ་ཅིན་ བརྒྱ་ཆ་༤༠ རེ་ སྤྲོད་དགོཔ་ད་ གལ་སྲིད་ འཛོལ་བ་དེ་ སྐྱེས་མ་ལུ་ཡོད་པ་ཅིན་ ཨ་པའི་ཁ་ཐུག་ལས་ ཨ་ལུའི་གསོ་འཐུས་ བརྒྱ་ཆ་༥༠ སྤྲོད་དགོཔ་ཨིན་པས།
དེ་ལས་ གཉེན་ཐམ་མེད་པའི་རིགས་ ཁྲིམས་ཀྱི་འདུན་ས་ལས་ རྩོད་བཤེར་དང་འབྲེལ་བའི་ ནང་འགྲིགས་འབད་ཆོག་པའི་ བཀའ་རྒྱ་གནང་སྲོལ་ཡོད་མི་དེ་ ཁྲིམས་མཐུན་ཡོད་མེད་ཀྱི་ གྲོས་འཆར་ཕུལ་མིའི་ཐད་ལུ་ རྩ་ཕན་གཉིས་ཀྱི་བར་ན་ གྲོས་འཆམ་བྱུང་མིའི་ གན་ཡིག་གུ་ གཞི་བཞག་སྟེ་ ཁྲིམས་འདུན་གྱིས་ ཁྲིམས་མཐུན་གྱི་ གྲོས་ཆོད་བཏོན་ནི་སྦེ་ ཐག་བཅད་ཡོད་པའི་གནས་ཚུལ།
No comments:
Post a Comment