བསྟན་འཛིན་རྣམ་རྒྱལ།
༉ རང་ཟླ་༢ པའི་ཚེས་༡༡ ལས་འགོ་བཙུགས་མི་ ལོ་བསྟར་སྤ་རོ་ཚེས་བཅུ་ ཉིནམ་དང་པའི་ནང་ དགེ་འཆམ་གཤིན་རྗེ་ཡབ་ཡུམ་དང་ དུར་བདག་ བོད་འཆམ་དགྲ་མེད་རྩེའི་རྔ་འཆམ་ ཨ་ཙ་རའི་མཛར་ཅུམ་གྱི་ལས་རིམ་ སྡེ་བརྒྱད་དམངས་འཆམ་ དེ་ལས་ སྒྲ་སྙན་ཆོས་གཞས་ཚུ་ དད་ཅན་མི་མང་གིས་ མཇལ་ཁ་ཞུ་བར་འཛོམས་ཡོདཔ་ཨིན་པས།
ལས་རིམ་ཚུ་གི་གྲས་ལས་ ཨ་ཙ་རའི་མཛར་ཅུམ་དེ་ གལ་གནད་ཅན་ཅིག་ཨིནམ་སྦེ་ བརྩི་དོ་ཡོད་མི་ དེ་ཡང་ ཨ་ཙ་རའི་མཛར་ཅུམ་ཟེར་མི་དེ་ སྤ་རོ་རིན་སྤུངས་རྫོང་གི་འོག་ལུ་ཡོད་པའི་ ཧུྃ་རལ་བྱག་གི་གནས་བདག་ ཧུྃ་རལ་མགོནམ་ལུ་ གསོལ་མཆོད་ཕུལ་བའི་ བརྡ་མཚོན་ལུ་ཨིན་ཟེར་ ཨ་ཙ་ར་གོངམ་ཀུན་ལེགས་ཀྱིས་བཤད་ཅི།
ཁ་ཙ་ གཤིན་རྗེ་ཡབ་ཡུམ་སྐུ་འཆམ་གྱིས་གཙོས་པའི་ ཞྭ་ནག་རྔ་འཆམ་དང་ བོད་འཆམ་ཚུ་གོ་རིམ་བཞིན་དུ་སྦེ་ ཤཝ་ཤ་ཁྱིའི་འཆམ་དང་ ཨ་ཙ་ར་མོ་བཏབ་ལས་རིམ་གྱིས་ མཇུག་བསྡུ་བའི་ཁར་ ཤཝ་གངས་ལས་ཕབ་མིའི་འཆམ་དེ་ བྱིན་རླབས་ཅན་ཅིག་སྦེ་བརྩིསཝ་ཨིན་པས།
འཆམ་དཔོན་ཕུར་པ་གིས་འབད་བ་ཅིན་ འཆམ་དེ་ ཧུྃ་རལ་ཆོས་རྗེ་ཀྱི་བརྒྱུད་པ་ལས་བྱུང་བའི་གར་ འཆམ་རྐྱབ་ཐངས་ཡང་ སྤ་རོ་དང་ ཐིམ་ཕུ་ལྕང་སྒང་ཁ་ལྷ་ཁང་ནང་རྐྱབ་སྲོལ་ཡོདཔ་བཟུམ་སྦེ་ གཞན་ག་ཏེ་ཡང་མིན་འདུག་ཟེར་ཨིན་པས།
ཉིནམ་དང་པ་དང་༢ པའི་སྐབས་ ཚེས་བཅུ་མཇལ་ཁ་ཞུ་མི་ མི་སེར་ཕོ་མོ་ ༣༠༠ དེ་ཅིག་ལས་བརྒལ་མེདཔ་ད་ དེ་ཁར་ ལྟ་བཤལཔ་༡༠༠ ལྷགཔ་ཅིག་འཛོམས་ཡོདཔ་ཨིན་པས།
ཚེས་བཅུ་དེ་ རང་ཟླ་༢ པའི་ཚེས་༡༥ ལུ་ བྱིན་རླབས་ཅན་གྱི་ གུ་རུ་མཚན་བརྒྱད་ཀྱི་སྐུ་འཆམ་མཇལ་ཁ་ གནང་ཐོག་ལས་འགྲོལ་ནི་ཨིན་པའི་གནས་ཚུལ།
No comments:
Post a Comment