 |
| མི་ཚུ་གིས་ ཕྱགས་སྙིགས་ཚུ་ ག་ལྷོད་སར་བཀོག་བའི་མཐོང་སྣང་། |
༉ ལྕང་ཟམ་ཏོག་ཚེ་ཆེན་གླིང་ལྷ་ཁང་གི་ ཉེ་འདབས་ལུ་ཡོད་པའི་ ཕྱགས་སྙིགས་བླུགས་ས་དང་ ཆུ་མེད་འཐུང་ཆུའི་ གསོག་མཛོད་ཁང་ཚུ་ནང་ ཕྱགས་སྙིགས་བླུགས་ཐོག་ལས་ ལག་ལེན་འཐབ་སྟེ་ ལོ་ལས་བཅད་ལུས་མི་དེ་ ས་གནས་ནང་ སྡོད་མི་ཚུ་གིས་ ཉོགས་བཤད་བཀོད་མི་ལུ་བརྟེན་ ཐིམ་ཕུ་ཁྲོམ་སྡེ་གིས་ སྤྱི་༣ པའི་ཚེས་ ༣༠ ལུ་ སྤོ་བཤུད་འབད་ཡོདཔ་ཨིན་པས།
ཁོང་གིས་ ཕྱགས་སྙིགས་བསྡུ་ལེན་འབད་མི་ སྣུམ་འཁོར་ཊཱག་ཚུ་ཡང་ ས་གནས་ནང་ ཕྱགས་སྙིགས་ལེན་པར་བཏང་ཡོདཔ་ཨིན་པས།
ཁྲོམ་སྡེའི་འགོ་དཔོན་ཚུ་གིས་ བཤད་མིའི་ནང་ ས་ཁོངས་དེ་ནང་ ཕྱགས་སྙིགས་ཚུ་ ད་ལྟོའི་བར་ན་ཡང་ ཚུལ་མཐུན་འབད་ མ་བླུགས་མི་ལུ་བརྟེན་ ས་གནས་ཁར་ སྡོད་མི་ཚུ་ལུ་ འཕྲོད་བསྟེན་གྱི་ ཉེན་ཁ་ཡོད་པའི་ཁར་ ཕྱགས་སྙིགས་ཚུ་ རླུང་མ་གིས་འབག་སྟེ་ ག་ལྷོད་བཀལ་བཞག་པའི་མཐོང་གསལ་བྱུངམ་ཨིན་མས།
ས་གནས་ནང་ སྡོད་མི་ཚུ་གིས་ ཧེ་མ་ ཉོགས་བཤད་མ་བཀོད་པར་ བཞག་མི་ལུ་བརྟེན་ ས་ཁོངས་དེ་ ཕྱགས་སྙིགས་ཀྱིས་གང་ཡོདཔ་ ཤེས་གསལ་མ་བྱུང་ཟེར་ ཁྲོམ་སྡེའི་འགོ་དཔོན་གྱིས་བཤདཔ་ཨིན་པས།
ལྷ་ཁང་གི་ དཀོན་གཉེར་གྱིས་འབད་བ་ཅིན་ ས་ཁོངས་དེ་ ད་ལས་ཕར་ ཧིང་སངས་ས་འོང་ནི་ཨིན་མི་དེ་ཡང་ ཕྱགས་སྙིགས་བསྡུ་ལེན་འབད་མི་ སྣུམ་འཁོར་ཊཱག་ཚུ་ བདུན་ཕྲག་རེའི་ནང་ ཕྱགས་སྙིགས་བསྡུ་ལེན་འབད་བར་ ལན་ཐེངས་གཉིས་རེ་ འོངམ་མས་ཟེར་ཨིན་པས།
ཁྲོམ་སྡེའི་མཐའ་འཁོར་གནས་སྟངས་ཀྱི་ གཙོ་འཛིན་འགོ་དཔོན་ པདྨ་རྡོ་རྗེ་གིས་འབད་བ་ཅིན་ ཁྲོམ་སྡེ་ཡིག་ཚང་གིས་ ཕྱགས་སྙིགས་བླུགས་ས་ཚུ་ བརྡལ་ཞིནམ་ལས་ དེ་གི་ཚབ་ལུ་ ཕྱགས་སྙིགས་ལེན་པར་ སྣུམ་འཁོར་གཏང་ནི་གི་ འཆར་གཞི་ཚུ་ བཟོ་ཡོདཔ་ལས་ ས་གནས་དེ་ཁར་ སྡོད་མི་ཚུ་གིས་ ས་ཁོངས་ཧིང་སངས་ས་བཟོ་ནིའི་དོན་ལུ་ གྲོགས་རམ་འབད་དགོ་ཟེར་ཨིན་པས།
ས་གནས་ཁར་སྡོད་མི་ སངས་རྒྱས་ཀྱིས་ སླབ་མིའི་ནང་ ས་གནས་གཞན་ཁར་ སྡོད་མི་ཚུ་གིས་ཡང་ ཕྱགས་སྙིགས་ཚུ་འབག་སྟེ་ ས་ཁོངས་དེ་ནང་ བླུགས་དོ་ཡོདཔ་ཨིན་རུང་ ད་རེས་འབདཝ་ད་ ཕྱགས་སྙིགས་བླུགས་ས་མེདཔ་བཟོ་ཡོདཔ་ལས་ མི་དེ་ཚུ་ ཕྱགས་སྙིགས་བླུགས་པར་ མི་འོངམ་འོང་ཟེར་ཨིན་པས།
ཕྱགས་སྙིགས་བླུགས་སའི་ དོང་ཡོད་པའི་སྐབས་ལུ་ མི་སེར་ཚུ་གིས་ ནམ་ར་འབད་རུང་ ཕྱགས་སྙིགས་ཚུ་ བླུགས་ཆོག་ཆོ་ཡོད་ནི་དེ་གིས་ བྱ་སྟབས་བདེ་དྲགས་ཡོདཔ་ཨིན་མས།
ད་ལྟོ་ ཕྱགས་སྙིགས་བླུགས་བཞག་སའི་ ས་ཁོངས་དེ་ ཧེ་མ་ སྨན་ཁང་བཟོ་སྐྲུན་འབད་བའི་སྐབས་ལུ་ ལས་མི་ཚུ་གི་ སྡོད་སྒར་སྦེ་ ལག་ལེན་འཐབ་པའི་ཤུལ་ལུ་ སྨན་ཁང་གི་ ལཱ་མཇུག་བསྡུ་ཞིནམ་ལས་ འདས་པའི་ལོ་གསུམ་གྱི་རིང་ལུ་ ཕྱགས་སྙིགས་བླུགས་ས་ཅིག་ལུ་ གྱུར་ཡོདཔ་ཨིན་པའི་གནས་ཚུལ།
No comments:
Post a Comment