སྒྲིགས་ལམ་རྣམ་གཞག་ ཡར་དྲག་གཏང་ནི་ལུ་ བརྩོན་ཤུགས་བསྐྱེད་ནི།

བཀྲིས་ཕུན་ཚོགས།

༉ ནང་སྲིད་དང་སྲོལ་འཛིན་ལྷན་ཁག་འོག་གི་ ལམ་སྲོལ་ལས་ཁུངས་ཀྱི་ སྒྲིགས་ལམ་སྡེ་ཚན་གྱིས་ རྒྱལ་ཁབ་ཀྱི་ སྲིད་བྱུས་དང་ ཡར་རྒྱས་ཀྱི་གནས་ཚད་དང་བསྟུན་ མ་འོངས་རྒྱལ་ཁབ་ཀྱི་དོན་ལུ་ བྱིན་རླབས་ཅན་གྱི་ལམ་སྲོལ་ཚུ་ འཛིན་སྐྱོང་སྤེལ་ནི་ལུ་དམིགས་ཏེ་ འཆར་གཞི་༡༡ པའི་ནང་ རྫོང་ཁག་རེ་རེའི་ནང་ སྒྲིགས་ལམ་རྣམ་གཞག་ཚུ་ ཡར་དྲག་གཏང་ནིའི་དོན་ལུ་ གཞུང་གིས་ འཆར་དངུལ་ཡང་ བཞག་ནི་ཨིན་པས།

དེ་ཚུ་གི་གྲས་ལས་ དཔལ་ལྡན་འབྲུག་པའི་ལུགས་ལས་ བཟང་པོའི་བྱ་བ་ཆེ་ཆུང་ ག་ཅི་བཟུམ་ཅིག་བརྩམ་རུང་ དང་པ་ ལེགས་བྱས་ཀྱི་ མཛད་སྒོ་འབྱེད་རྟེན་འབྲེལ་ཕུན་སུམ་ཚོགས་པའི་ བཞུགས་གྲལ་ཕུན་སུམ་ཚོགས་པ་ འབད་དགོཔ་ཨིན་པས།

བཞུགས་གྲལ་ཕུན་སུམ་ཚོགས་པའི་རྟེན་འབྲེལ་དེ་ རྒྱལ་ཡོངས་དུས་ཆེན་དང་ དུས་སྟོན་གཞན་ ཁྲི་མངའ་གསོལ་ གོ་གནས་གསར་བསྐོས་ གྲྭ་ཚང་གི་གསོལ་ཐབ་ རྒྱལ་ཡོངས་ཚོགས་འདུའི་ འགོ་བཙུགས་རྟེན་འབྲེལ་ ལོ་གསར་ གཉེན་སྟོན་ དེ་ལས་ སྐྱེས་སྟོན་ཚུ་གི་སྐབས་ལུ་ འབད་དགོཔ་ཨིན་པས།

ལམ་སྲོལ་ལས་ཁུངས་ལས་ སྒྲིགས་སློབ་ཚེ་རིང་དཔལ་འབྱོར་གྱིས་ སླབ་མི་དང་འཁྲིལཝ་ད་ བཞུགས་གྲལ་ཕུན་སུམ་ཚོགས་པའི་ རྟེན་འབྲེལ་དེ་ གོ་རིམ་འབད་ བརྩི་སྲུང་འབད་བའི་སྐབས་ ཆེ་མཐོའི་འགོ་དཔོན་དང་ གཞན་དབུ་ཁྲིདཔ་ལ་ལུ་ཅིག་གིས་ རྟེན་འབྲེལ་གྱི་རྫས་ཚུ་ ལེན་མ་བཏུབ་པའི་སྐབས་ རྟེན་འབྲེལ་དེ་ ཆུངམ་མས་ཟེར་ཨིན་པས།

རྒྱལ་ཁབ་ནང་ ཆེ་མཐོའི་འགོ་དཔོན་དང་ དབུ་ཁྲིདཔ་གཞན་ཚུ་གིས་ བཞུགས་གྲལ་རྟེན་འབྲེལ་དེ་ བརྩི་སྲུང་འབདཝ་ཤེས་ཏེ་འབད་རུང་ དེ་གི་ཁུངས་དང་ དགོས་པ་ འབྱུང་ཁུངས་ དེ་ལས་ རྟེན་འབྲེལ་བརྩི་དགོ་པའི་དམིགས་ཡུལ་དེ་ བརྒྱ་ཆ་ལས་༨༠ གིས་ མི་ཤེས་པས་ཟེར་ཨིན་པས།

དེ་བཟུམ་སྦེ་ རྫོང་ཁག་༢༠ ནང་འབད་བ་ཅིན་ བཞུགས་གྲལ་ཕུན་སུམ་ཚོགས་པའི་རྟེན་འབྲེལ་དེ་ བརྩི་བའི་སྐབས་ གོ་རིམ་དཀྲུགས་ཏེ་འབད་མི་ཡང་ཡོདཔ་ལས་ སྒྲིགས་ལམ་སྡེ་ཚན་ལས་ ཧེ་མའི་ ལམ་ལུགས་སྲོལ་ཚུ་ དེང་སང་གི་ གནས་སྟངས་དང་འཁྲིལ་ཏེ་ ལེགས་བཅོས་འབད་དེ་ཡོདཔ་མ་ཚད་ སྲོལ་འཛིན་འགོ་དཔོན་ཚུ་ལུ་ ཤེས་ཡོན་དང་ སྦྱོང་བརྡར་ཚུ་ཡང་ བྱིན་ཡི་ཟེར་ཨིན་པས།

བཞུགས་གྲལ་ཟེར་མི་དེ་ གཙོ་བོ་ར་ མཛད་སྒོ་ག་ཅིའི་དོན་ལུ་ བརྩིཝ་ཨིན་རུང་ རྟེན་འབྲེལ་ངོ་མ་དེ་གིས་ འགོ་བཙུགསཔ་ཨིནམ་ལས་ བཞུགས་གྲལ་གྱི་རྫས་ཚུ་ དྲང་བཞག་རྐྱབ་ད་ བདེ་གཤེགས་སྤྱི་མཆོད་པ་ལས་ འགོ་བཟུང་སྟེ་ དཔལ་ལྡན་འབྲུག་པ་ ཞབས་དྲུང་གི་ འཁྲུངས་རབས་ཕུན་སུམ་ཚོགས་པའི་གསོལ་འདེབས་ལས་ མཇུག་བཀྲིས་སྨོན་ཚིག་ཚུན་ཡོདཔ་ཨིན་པས།

དེ་སྦེ་ འབད་དགོ་པའི་དམིགས་ཡུལ་དེ་ཡང་ ལཱ་དང་བྱ་བ་ག་ཅི་རང་ཨིན་རུང་ ཕུན་སུམ་ཚོགས་ནིའི་དོན་ལུ་ སྐྱབས་མགོན་དམ་པ་ ཞབས་དྲུང་ངག་དབང་རྣམ་རྒྱལ་གྱི་ བྱིན་རླབས་འཇུག་ནིའི་དོན་ལུ་ཨིན་པས།

བཞུགས་གྲལ་གྱི་ གོ་རིམ་དེ་ཡང་ གྲོ་མ་ དྲི་བཟང་ གསོལ་ཇ་ བཞེས་རྩམ་ མར་ཆང་ ཐུགས་སྨོན་དར་ཤིང་ ཕྱག་འགྱེདཔ་ དོག་མ་པ་ནེ་ དེ་ལས་ ཤིང་འབྲས་ཀྱི་རིགས་ཚུ་ དྲང་དགོཔ་མ་ཚད་ ཁྲི་མངའ་གསོལ་དང་ གོ་གནས་གསར་བསྐོས་ ཚོགས་འཛོམས་འགོ་བཙུག་ནི་ རབ་གནས་ལ་སོགས་པའི་རྟེན་འབྲེལ་ལུ་ ཤིང་འབྲས་དང་པ་ ངང་ལ་ལས་ འགོ་བཙུག་དགོ་ཟེར་ཨིན་པས།

དེ་བཟུམ་སྦེ་ ལོ་གསར་ལུ་ ཤིང་འབྲས་ཧུམ་པ་ གཉེན་གྱི་སྐབས་ ཚལ་ལུ་ལས་འགོ་བཙུགས་ཏེ་ དྲང་དགོཔ་ཨིན་ཟེར་ འགོ་དཔོན་ཚུ་གིས་ བཤདཔ་ཨིན་པས།

མི་སེར་ལ་ལུ་ཅིག་གིས་ སླབ་མི་དང་འཁྲིལཝ་ད་ བཞུགས་གྲལ་གྱི་རྟེན་འབྲེལ་ བརྩི་དགོ་པའི་ཁུངས་དང་དགོས་པ་ དེ་ལས་ རྫས་ཚུ་གི་གྲས་ལས་ འགོ་ཐོག་ར་ གྲོ་མ་ལས་ འགོ་བཟུང་སྟེ་ དྲང་དགོ་པའི་རྒྱུ་མཚན་ཡང་ མི་ཤེས་ཟེར་ཨིན་པས།

མི་ལ་ལུ་ཅིག་གིས་འབད་བ་ཅིན་ བཞུགས་གྲལ་ཕུན་སུམ་ཚོགས་པའི་རྟེན་འབྲེལ་དེ་ རྒྱལ་ས་ལྟེ་བ་ ཐིམ་ཕུ་རྐྱངམ་གཅིག་ནང་ འབད་དོ་བཟུམ་ཅིག་ མཐོང་ཡི་ཟེར་ཨིནམ་མ་ཚད་ ལ་ལུ་ཅིག་གིས་ འབྲུག་མི་ རེ་རེ་བཞིན་གྱིས་ ཤེས་དགོཔ་དེ་ གལ་ཆེ་ཤོས་ཅིག་ཨིན་མས་ཟེར་ བཤདཔ་ཨིན་པས།

སྒྲིགས་སློབ་ཚེ་རིང་དཔལ་འབྱོར་གྱིས་ སྒྲིག་ལམ་རྣམ་གཞག་གི་སྐོར་ལས་ ཆེ་མཐོའི་འགོ་དཔོན་དང་ ལྷན་ཁག་ ལས་ཁུངས་ ལས་སྡེ་ ལས་འཛིན་ དེ་ལས་ སྒེར་སྡེའི་འགོ་དཔོན་དང་ མི་མང་ལུ་ སྒྲིགས་ལམ་གྱི་ སློབ་སྦྱོང་དང་ ལས་རིམ་གཞན་ཚུ་ འགོ་འདྲེན་འཐབ་ཐོག་ལས་ གོ་བ་བརྡ་སྤྲོད་འབད་ཡི་ཟེར་ཨིནམ་ད་ འཆར་གཞི་བཅུ་པའི་ནང་ སྲོལ་འཛིན་འགོ་དཔོན་ཚུ་གིས་ རང་སོའི་རྫོང་ཁག་ནང་ ལས་རིམ་འགོ་འདྲེན་འཐབ་ནི་ལུ་ མ་དངུལ་མེདཔ་ལས་ འབད་མ་ཚུགས་ཟེར་ཨིན་པས།

ཨིན་རུང་ འཆར་གཞི་༡༡ པའི་ནང་ རྫོང་ཁག་སོ་སོའི་ནང་ ལམ་སྲོལ་དེ་ འཛིན་སྐྱོང་སྤེལ་ནིའི་དོན་ལུ་ མ་དངུལ་འཐོབ་པ་ཅིན་ རང་སོའི་རྒེད་འོག་གི་ མི་མང་ཡོངས་ལུ་ གོ་བ་བརྡ་སྤྲོད་དང་ ལས་རིམ་ཚུ་ འགོ་འདྲེན་འཐབ་ཚུ་ནི་ཨིནམ་ལས་ ལྷན་ཐབས་ཡོད་ཟེར་ཨིན་པས།

ལྷག་པར་དུ་ རྒྱལ་ཡོངས་གྱོན་ཆས་ བཀབ་ནེ་དང་ རག་ཅུང་ དཔའ་རྟགས་ ལྷམ་ བཟའ་བཅའ་འགྲོ་གསུམ་ ཕྱག་དབང་བཅར་ཐངས་ བསུ་བ་གསེར་སྦྲེང་དང་ཆིབས་གྲལ་ དེ་ལས་ བསྔོ་བ་ཞུ་ཐངས་ སྒྲིག་ལམ་ཚུ་གི་ ཁུངས་དང་དགོས་པ་ འབྱུང་རབས་ ལག་ལེན་དངོས་བསྟར་ འབད་ཚུགསཔ་བཟོ་ནིའི་ འགན་ཁུར་སྦོམ་འབད་ར་ འབྲུག་མི་ཡོངས་ལུ་ ཕོག་སྟེ་ཡོད་ཟེར་ བཤདཔ་ཨིན་པའི་གནས་ཚུལ།