 |
| བཙག་འཐུའི་ལྷན་འཛིན་སྤྱི་ཁྱབ་ དྲགོས་ཀུན་བཟང་དབང་འདུས་ཀྱིས་ འབྲུག་མཉམ་རུབ་ཚོགས་པའི་ཁྲི་འཛིན་འཇིགས་མེད་བཟང་པོ་ལུ་ ཚོགས་པའི་ཐོ་བཀོད་ལག་ཁྱེར་ སྤྲོད་པའི་བསྒང་། |
འདས་པའི་བདུན་ཕྲག་༣ དེ་ཅིག་གི་ཧེ་མར་ སྲིད་ཚོགས་གསརཔ་ བྷུ་ཊཱན་ཀུན་མཉམ་པར་ཊི་དང་ འབྲུག་སྤྱིར་དབང་ཚོགས་པ་ལུ་ ཐོ་བཀོད་ཆ་འཇོག་གྲུབ་པའི་ ལག་ཁྱེར་ཚུ་ ལྷན་ཚོགས་ཀྱིས་ སྤྲོད་ཡོདཔ་ཨིན།
བཙག་འཐུ་ལྷན་ཚོགས་ཀྱིས་ ཐོ་བཀོད་ཆ་འཇོག་གྲུབ་པའི་ གསལ་བསྒྲགས་འབད་མི་དེ་གིས་ འབྲུག་མཉམ་རུབ་ཚོགས་པ་དེ་ ཐོ་བཀོད་ཅན་གྱི་ སྲིད་ཚོགས་༥ པ་སྦེ་ ཁྲིམས་མཐུན་ངོ་འབྱོར་འབདཝ་བཞིན་དུ་ དུས་ཅི་གི་ བཙག་འཐུ་ནང་ འབྲེལ་གཏོགས་ཀྱི་དོན་ལུ་ ཁྲིམས་མཐུན་ཐོག་ གྲ་སྒྲིག་འབད་དེ་ མི་སེར་ཚུ་ལུ་ འོས་ལྡན་གྱི་གདམ་ཁ་ ལྕོགས་གྲུབ་ཅན་ཅིག་སྦེ་ བཙག་འཐུ་ནང་ འབྲེལ་གཏོགས་ཀྱི་གོ་སྐབས་འཐོབ་ནི་མས་ཟེར་ ཚོགས་པའི་ཁྲི་འཛིན་ འཇིགས་མེད་བཟང་པོ་གིས་ བཤདཔ་ཨིན་པས།
སྲིད་ཚོགས་དེ་གི་ ཐོ་བཀོད་དོན་ལུ་ ཚོགས་པའི་རྩ་ཁྲིམས་ནང་ བསྒྱུར་བཅོས་འབད་དགོ་པའི་ མིང་ཚིག་ཚུ་དང་གཅིག་ཁར་ གཞན་ཡང་ བཙག་འཐུའི་ཁྲིམས་ལུགས་ལྟར་དུ་ བསྒྱུར་བཅོས་འབད་དགོ་པའི་ གནད་དོན་དག་པ་ཅིག་ཡང་ ཡོདཔ་ཨིན་པས།
དེ་དང་འབྲེལ་ ཚོགས་པ་དེ་གིས་ དུས་ཅི་གི་བཙག་འཐུ་ནང་ འབྲེལ་གཏོགས་འབད་ནི་ཨིན་པ་ཅིན་ ད་རུང་ འབད་དགོཔ་ཚུ་ཡོདཔ་ད་ དེ་ཡང་ ཚོགས་པ་དེ་གིས་ ལྷན་ཚོགས་ཀྱིས་དག་བཅོས་འབད་མི་ ཚོགས་པའི་རྩ་ཁྲིམས་དེ་ ཡོངས་ཁྱབ་ཞལ་འཛོམས་ཐོག་ལས་ ཆ་འཇོག་འབད་དགོ་པའི་ཁར་ ཚོགས་པའི་རྩིས་ཁྲ་དང་ ཐོ་བཀོད་ཀྱི་འཐུས་ བསྡུ་ལེན་འབད་ཡོད་པའི་ཁ་གསལ་ འཐུས་མིའི་འཐུས་དང་ ཞལ་འདེབས་མ་དངུལ་གྱི་རྩིས་ཁྲ་ཚུ་ ལྷན་ཚོགས་ལུ་ གསལ་བཀོད་འབད་དགོཔ་ཨིན་པས།
དེ་བཟུམ་སྦེ་ ད་རུང་ ཚོགས་པའི་ཐོ་བཀོད་ཅན་གྱི་འཐུས་མི་ཚུ་གི་ ཐོ་དེབ་ཚུ་ གསལ་བཀོད་འབད་དགོ་པའི་ཁར་ ཐོ་དེབ་དེ་ནང་ འོས་འབབ་ཅན་གྱི་ འདེམས་ངོ་༤༧ ཡང་ གསལ་སྟོན་འབད་དགོཔ་ད་ ད་ལྟོ་ ཚོགས་པ་ལུ་ གཏན་འཁེལ་སོང་ཡོད་མི་ འདེམས་ངོ་༤༡ ཡོད་ཟེར་ བཤདཔ་ཨིན་པས།
ཚོགས་པའི་ཁྲི་འཛིན་ འཇིགས་མེད་བཟང་པོ་གིས་ སླབ་མིའི་ནང་ འོས་འབབ་ཅན་གྱི་འདེམས་ངོ་༤༧ ཚངམ་སྦེ་ ཡོདཔ་ཨིན་རུང་ དེ་ཚུའི་ནང་ལས་ཡང་ དང་འདོད་ཅན་གྱི་ འདེམས་ངོ་འོས་ལྡན་ཚུ་ ལོག་བཙག་འཐུ་འབད་བའི་བསྒང་ཡོད་ཟེར་ཨིནམ་ད་ ད་ཚུན་གཏན་འཁེལ་སོང་མི་ འདེམས་ངོ་ཚུ་གི་གྲས་ཁར་ སྐྱེས་ལོ་༣༥ ལས་༦༣ གྱི་བར་ན་འབད་མི་ཚུ་ ཡོད་ཟེར་ཨིན་པས།
ཚོགས་པ་དེ་གི་ ཐོ་བཀོད་སྐབས་ལུ་ རྫོང་ཁག་༢༠ ལས་ ཐོ་བཀོད་ཅན་གྱི་འཐུས་མི་༡༣༥ ཡོདཔ་ད་ ཚོགས་པ་དེ་གིས་ དུས་ཅི་བཙག་འཐུའི་དོན་ལུ་ དང་འདོད་ཅན་གྱི་ སྲིད་ཚོགས་སྦེ་ཐོན་མི་ དང་པ་ཨིན་རུང་ ཐོ་བཀོད་ཀྱི་དོན་ལུ་ སྲིད་ཚོགས་གཞན་གྱི་ཤུལ་ལས་ ན་ཧིང་ སྤྱི་ཟླ་༡༢ པའི་ཚེས་༡༠ ལུ་རྐྱངམ་གཅིག་ ཐོ་བཀོད་ཞུ་ཡིག་ བཙུགས་ཡོདཔ་ཨིན།
ཚོགས་པ་དེ་གིས་ དུས་སྐབས་གསརཔ་ལུ་ བསམ་ཤེས་གསརཔ་ཟེར་བའི་བརྗོད་དོན་ཐོག་ འབྲུག་གི་མི་སེར་ཚུ་དང་ དོན་ཚན་༧ གྱི་ཁག་འབག་ཟེར་བའི་ གོང་འཕེལ་དམིགས་གཏད་ཚུ་གི་ཐོག་ལས་ གཞུང་དང་མི་སེར་ལུ་ ཕྱག་ཞུ་ནི་གི་ ལས་རིམ་ཚུ་ཡོདཔ་ཨིན་པས།
ཚོགས་པའི་ཐོ་བཀོད་ལག་ཁྱེར་དེ་ བཙག་འཐུ་ལྷན་ཚོགས་ཀྱིས་ ནངས་པར་ སྤྲོད་ནི་ཨིན་པའི་གནས་ཚུལ།
བསམ་གཏན་ཡེ་ཤེས།
No comments:
Post a Comment