མེ་རྐྱེན་དེ་ ཁ་ཙ་ ཉིན་མའི་ཆུ་ཚོད་༡༠:༣༠ དེ་ཅིག་ལུ་ འགོ་བཙུགས་མི་དེ་གིས་ ད་ལྟོའི་བར་ན་ཡང་ བསད་མ་ཚུགས་པར་ཡོདཔ་ད་ ནགས་ཚལ་འགོ་དཔོན་ ཌམ་བར་ ཆེ་ཊི་རི་གིས་ སླབ་མིའི་ནང་ གནམ་མ་སྲོ་ཚུན་གྱི་རིང་ སྟོང་ཕུ་ཤིང་གི་ས་ཆ་ ཨེ་ཀར་༢༠,༠༠༠ ལྷགཔ་ཅིག་ འཚིགས་འཚིགསཔ་འོང་ཟེར་ཨིན་པས།
 |
| ཁ་ཙ་ ཕོབ་སྦྱིས་ཁ་ལུ་ ནགས་ཚལ་མེ་རྐྱེན་ཤོར་བའི་བསྒང་། |
སྐྱེས་ལོ་༧ དང་༩ དེ་ལས་༡༢ ལང་མི་ དོགས་པ་ཅན་བུཚ་༣ མེ་རྐྱེན་ཤོར་སའི་ས་ཁོངས་ནང་ལས་ འཛིན་བཟུང་འབད་ཡོདཔ་ད་ ཁོང་ལུ་དྲི་བཀོད་འབད་བའི་སྐབས་ རྐྱེན་ངན་ནང་ ཁོང་༣ འབྲེལ་བ་ཡོད་པའི་སྐོར་ལས་ ཁ་བཟེད་ཡི་ཟེར་ ཌམ་བར་ ཆེ་ཊི་རི་གིས་ སླབ་ཡོདཔ་ཨིན།
དོགས་ཅན་༣ ཆ་ར་ སློབ་ཕྲུག་ཨིནམ་ད་ ཁོང་གིས་ ཁ་ཙ་དྲོ་པ་ དཀྱིལ་འཁོར་ཐང་ས་གནས་ནང་ གཉེན་དར་སྦེ་ ཏི་རུ་ཕུལ་བཞག་མི་ཚུ་ འཐུ་བར་འགྱོཝ་ད་ མེ་ཊེ་སྒྲོམ་ཅིག་མཐོངམ་ལས་ མེ་བསྲོ་ནིའི་དོན་ལུ་ མེ་འཕུཝ་ད་ ཚར་གཅིག་གུ་ རླུང་མ་ཤུགས་སྦེ་ འཕུ་བའི་སྐབས་ མེ་རྐྱེན་ཤོར་སོ་ཡི་ཟེར་ སླབ་ཡོདཔ་ཨིན་པས།
ཌམ་བར་ ཆེ་ཊི་རི་གིས་ སླབ་མིའི་ནང་ ནགས་ཚལ་འགོ་དཔོན་ཚུ་ ཞིབ་དཔྱད་ནང་འགྱོ་བའི་སྐབས་ ནགས་མེ་ཤོར་སར་ མཐོང་ཡི་ཟེར་ཨིནམ་ད་ མེ་རྐྱེན་བྱུངམ་ཅིག་ར་ མེ་བསད་ནི་འགོ་བཙུགས་ཡོད་རུང་ གནམ་སྲོ་ནི་དེ་གིས་ ལུས་སོ་ཡི་ཟེར་ཨིན་པས།
ཨིན་རུང་ ད་རིས་ དྲོ་པའི་ཆུ་ཚོད་༦ ལས་ འཕྲོ་མཐུད་དེ་ མེ་བསད་ནི་ཨིནམ་ད་ ནགས་ཚལ་འགོ་དཔོན་ཚུ་གིས་ སླབ་མིའི་ནང་ ནུབ་མོའི་དུས་ཚོད་ལུ་ མེ་ཤུགས་སྦེ་འབར་བའི་ཁར་ མིག་ཏོ་གིས་ ལེགས་ཤོམ་མ་མཐོང་མི་ལུ་བརྟེན་ མེ་བསད་མི་ཚུ་གི་ ཚེ་སྲོག་ལུ་ ཉེན་ཁ་ཡོད་ཟེར་ཨིན་པས།
དེ་མ་ཚད་ མེ་རྐྱེན་བྱུང་སའི་ ས་གོ་ལ་ལུ་ཅིག་ བྱག་དང་གཤོང་འབདཝ་ལས་ མེ་བསད་ནི་ལུ་ ལཱ་ཁག་ཡོདཔ་ད་ ནགས་ཚལ་འགོ་དཔོན་ཚུ་གིས་ སླབ་མིའི་ནང་ ནུབམོ་ཅིག་ མེ་འབར་བ་ཅིན་ སྟོང་ཕུ་ཤིང་གི་ས་ཆ་ ཨེ་ཀར་༦༠,༠༠༠ དང་༧༠,༠༠༠ གི་བར་ན་ མེ་གིས་འཚིགས་ནིའི་ ཉེན་ཁ་ཡོད་ཟེར་ཨིན་པས།
སྟོང་ཕུ་ཤིང་ཚུ་ འཚིགས་ནི་ལས་ བཀག་ཐབས་འབད་ནིའི་དོན་ལུ་ མེ་བསད་མི་ཚུ་གིས་ འཕྲུལ་ཆས་པ་ཝར་ཅེན་ ལག་ལེན་འཐབ་ཐོག་ལས་ ཤིང་སྦོམ་ཚུ་ བརྡབ་ནིའི་དཔའ་བཅམ་རུང་ འབད་ཐབས་མ་འབྱུང་ཟེར་ཨིན་པས།
མེ་བསད་སྡེ་ཚན་ནང་ ནགས་ཚལ་འགོ་དཔོན་༤ དེ་ཅིག་དང་ རང་བཞིན་ཐོན་སྐྱེད་གོང་འཕེལ་ལས་འཛིན་དང་ རྒྱལ་གཞུང་རང་བཞིན་སྲུང་སྐྱོབ་ཚོགས་སྡེའི་ལས་བྱེདཔ་ དེ་ལས་ གཡུས་མི་བརྒྱ་ལྷགཔ་ཅིག་གིས་ བཅའ་མར་གཏོགས་ཡོད་པའི་གནས་ཚུལ།
དབང་འདུས་ལས་ བསྟན་འཛིན་རྣམ་རྒྱལ།
No comments:
Post a Comment